ޖައްވުގެ ތެތްކަމުން ސާފު ބޯފެން އުފައްދައިދޭ އިންގިލާބީ ޖެކެޓެއް، ޔުނިވަރސިޓީ އޮފް ޓެކްސަސް އެޓް އޮސްޓިން (ޔޫ.ޓީ. އޮސްޓިން) ގެ ދިރާސާވެރިން އުފައްދައިފިއެވެ. ޕްރޮފެސަރ ގުއިހުއާ ޔޫ އަދި ޕްރޮފެސަރ ކީތު ޖޯންސްޓަންގެ އިރުޝާދުގެ ދަށުން ތައްޔާރުކުރި މި ޖެކެޓުގައި ބޭނުންކޮށްފައިވަނީ، ވައިގެ ތެރޭގައި ހުންނަ ތެތްކަން ދަމައިގަނެ، ކުޑަ ހޫނުކަމެއް ބޭނުންކޮށްގެން އެއިން ބޯފެން އުފައްދައިދޭ “ބަޔޯމާސް-ޑެރައިވްޑް ހައިޑްރޯޖެލް” ފޮއްޗެކެވެ. މި ހޯދުމާ ގުޅޭ ދިރާސާ “ސައިންސް އެޑްވާންސަސް” މަޖައްލާގައި ޝާއިޢުކޮށްފައިވަނީ 10 ޖޫން 2026 ގައެވެ.

އާދައިގެ ފެން ދަމާ މާއްދާތަކާ ޚިލާފަށް، މި ފޮތީގެ ފައިބަރުތަކުން ފެން ދަމައިގަތުމަށްފަހު، ޖެކެޓުގައި ހަރުކޮށްފައިވާ ވަކިކުރެވޭ ކުދި ފުޅިތަކަކަށް ފެން ފޮނުވައިދެއެވެ. ދިރާސާގެ އަމަލީ ތަޖުރިބާތަކުން ދެއްކި ގޮތުގައި، ވައިގެ ތެތްކަން ހުންނަ މިންވަރަށް ބަލައި، ދުވާލަކު 400 އާއި 900 މިލިލީޓަރާ ދެމެދުގެ މިންވަރަކަށް މި ޖެކެޓުން ފެން އުފައްދައިދެއެވެ.

މި ޓެކްނޮލޮޖީ ޓެސްޓުކޮށްފައިވަނީ އެމެރިކާގެ ޓެކްސަސްގެ އިތުރުން ޗައިނާގެ ދެ ސަރަހައްދެއްގައެވެ. މީގެ ތެރޭގައި ފެން މަދު ހަނަފަސް ސަރަހައްދެއްވެސް ހިމެނެއެވެ. ލެބޯޓްރީ ތަހުލީލުތަކުން ކަށަވަރުވެފައިވާ ގޮތުގައި، މި ޖެކެޓުން އުފެއްދި ފެނަކީ ދުނިޔޭގެ ސިއްޙަތު ޖަމްޢިއްޔާ (ޑަބްލިޔު.އެޗް.އޯ) ގެ މިންގަނޑުތަކަށް ފެތޭ، ބޯން ކަމުދާ ސާފު ފެނެވެ.

މީގެ އިތުރުން، މި ފޮތި ބޭނުންކޮށްގެން އަވިން ހަކަތަ ހޯދައިގެން ވައިން ފެން އުފައްދާ ކުޑަ މެޝިނެއްވެސް ދިރާސާވެރިން ވަނީ ތައްޔާރުކޮށްފައެވެ. ނިއު މެކްސިކޯގެ ހަނަފަސް ސަރަހައްދަކާއި ޓެކްސަސްގެ ތެތްކަން ބޮޑު ސަރަޙައްދެއްގައި މި މެޝިން ޓެސްޓުކުރުމުން، ދުވާލަކު 1.3 ލީޓަރުގެ ސާފު ފެން އުފައްދާފައިވެއެވެ. މިއީ މިހާތަނަށް މިފަދަ ކުޑަ މެޝިނަކުން ފެން އުފެއްދި އެންމެ މަތީ މިންވަރެވެ.

ދިރާސާވެރިން ހާމަކުރި ގޮތުގައި، މި އީޖާދުގެ ސަބަބުން ފަރުބަދައަށް އަރާ މީހުންނާއި، ސިފައިންނާއި، ކުއްލި ނުރައްކަލުގެ ހާލަތްތަކުގައި މަސައްކަތްކުރާ ޓީމުތަކާއި، ދަނޑުވެރިންގެ އިތުރުން ފެންލިބުން ދަތި ސަރަހައްދުތަކުގައި ދިރިއުޅޭ މީހުންނަށް ބޮޑެތި ފައިދާތަކެއް ކުރާނެއެވެ. އަދި މި ފޮތި ބޭނުންކޮށްގެން ދަބަހާއި، ފޭލިގެ ފަދަ ތަކެތި ތައްޔާރުކޮށްގެންވެސް ވައިގެ ތެރެއިން ފެން ހޯދިދާނެއެވެ.

ޔުނިވަރސިޓީ އޮފް ޓެކްސަސް އެޓް އޮސްޓިން އިން މިހާރު ވަނީ މި އީޖާދު ރަޖިސްޓްރީކޮށް (ޕޭޓަންޓް)، މިއީ ވިޔަފާރީގެ އުސޫލުން ބޭނުންކުރެވޭނެ އުފެއްދުމަކަށް ހެދުމަށްޓަކައި ބައިވެރިން ހޯދަން ފަށާފައެވެ. މި މަސައްކަތް ކާމިޔާބުވެއްޖެނަމަ، ދުނިޔެއަށް ކުރިމަތިވެފައިވާ ފެނުގެ ދަތިކަމަށް އަމަލީ ހައްލެއް ލިބި، ރައްކާތެރި ބޯފެން ލިބުމުގެ ފުރުޞަތު ފަހިވެގެންދާނެއެވެ.