އިޖުތިމާޢީ މުޢާމަލާތްތަކުގައި ފެންނަ އެންމެ އާދަޔާ ޚިލާފު އެއް ކަމަކީ، މީހެއްގެ އަމިއްލަ ނުވަތަ ސިއްރު މަޢުލޫމާތެއް އެހެން މީހަކަށް ކިޔައިދިނުމަށްފަހު، “މި ވާހަކަ އެއްވެސް މީހެއް ގާތު ނުބުނާތި” އޭ ބުނުމެވެ. މިކަމުގެ ސަބަބުން ވަރަށް އާދައިގެ ނަމަވެސް މުހިންމު ސުވާލެއް އުފެދެއެވެ. އެއީ އެ ވާހަކައަކީ އެހެން ބަޔަކަށް އެނގެން ބޭނުންނުވާ ވާހަކައެއް ނަމަ، އަސްލު އެ ވާހަކަ ދެއްކުމުގެ ބޭނުމަކީ ކޮބައި ހެއްޔެވެ؟
އެހެން މީހެއްގެ އަމިއްލަ ދިރިއުޅުމާއި، ޞިއްޙަތާއި، އާއިލީ ކަންކަމާއި، މާލީ ހާލަތާއި، އަޤީދާ ނުވަތަ އަބުރާ ގުޅޭ ސިއްރު މަޢުލޫމާތު ހާމަކުރުމަކީ، އެ ވާހަކަ އަޑުއަހާ މީހާގެ ބޮލުގައި އެޅުވޭ ބޮޑު މަސްއޫލިއްޔަތެކެވެ. މީގެ ސަބަބުން ދޭތެރެޖެއްސުމާއި، މީހުންގެ މެދުގައި އޮންނަ އިތުބާރު ގެއްލި، ގުޅުންތައް ހީނަރުވެގެން ދެއެވެ. އަދި އެ ވާހަކައެއް ރައްދުވާ މީހާއަށް އޭނާގެ ދިފާޢުގައި އެއްޗެއް ބުނުމުގެ ފުރުޞަތު ލިބުމުގެ ކުރިން އޭނާގެ އަބުރަށް އިއާދަނުކުރެވޭ ފަދަ ގެއްލުންތައް ލިބިގެންދެއެވެ.
މީހުން މިފަދަ ސިއްރުތައް ހިއްސާކުރަނީ ސަމާލުކަން ހޯދުމަށް ނުވަތަ ހަމްދަރުދީ ހޯދުމަށް، ނޫންނަމަ ހިތުގެ އުދާސްތައް ބޭރުކޮށްލުމުގެ ނިޔަތުގައެވެ. ނަމަވެސް، އެއްފަހަރު ދުލުން ބޭރުވާ ސިއްރަކީ ދެން އެ މީހެއްގެ ކޮންޓްރޯލްގެ ދަށުގައި އޮންނަ އެއްޗެއް ނޫނެވެ. އަދި އެހެން މީހެއްގެ އަމިއްލަ ކަންކަން ފެތުރުމަށްފަހު، އެ ވާހަކަ އަޑުއެހި މީހާގެ ކިބައިން އެ ސިއްރު ހިފެހެއްޓުމަށް އެދުމަކީ ހަޤީޤަތާ އެކަށީގެންވާ ކަމެއް ނޫނެވެ.
އިސްލާމްދީނުގައި މީހުންގެ އަބުރާއި އިއްޒަތް ރައްކާތެރިކުރުމަށް ވަރަށް ބޮޑަށް ބާރުއަޅުއްވާފައިވެއެވެ. ކީރިތި ޤުރުއާނުގައި ދޭތެރެޖެއްސުމާއި، ފުރަގަސްދީ ނެތިނުބައި ބުނުމުގެ ނުރައްކާތެރިކަމާމެދު އިންޒާރު ދެއްވާފައިވެއެވެ. (އަލް-ޙުޖުރާތު: 12). އަދި މާތް ނަބިއްޔާ ﷺ ވަނީ މުސްލިމުންގެ އަބުރާއި އަމިއްލަ ކަންކަން ރައްކާތެރިކުރުމަށް އިރުޝާދު ދެއްވާފައެވެ. ގެއްލުންދެނިވި ވާހަކަތައް ދެއްކުމުގެ ބަދަލުގައި ހަނުހުރުން އިޚްތިޔާރު ކުރުމަކީ ބުއްދިވެރިކަމާއި، ތެދުވެރިކަމާއި، އޯގާތެރިކަމުގެ ރަމްޒެކެވެ.
ވާހަކަތައް ސިކުންތުކޮޅެއްގެ ތެރޭގައި މުޅި ދުނިޔެއަށް ފެތުރިގެންދާ މި ޒަމާނުގައި، ބަހެއް ބުނުމުގެ ކުރިން ވިސްނާލުމަކީ ނުހަނު މުހިންމު ކަމެކެވެ. އެހެން މީހުންގެ އަމިއްލަ ކަންކަމަށް އިޙްތިރާމް ކުރުމަކީ ހަމައެކަނި ސިއްރެއް ހިފެހެއްޓުމެއް ނޫނެވެ. އެއީ އިތުބާރާއި އިންސާނީ ކަރާމާތް ރައްކާތެރިކުރުމެވެ.
ވީމާ، ދެން ފަހަރަކުވެސް މީހަކު އެހެން މީހެއްގެ ސިއްރުތައް ކިޔައިދިނުމަށްފަހު “އެއްވެސް މީހެއް ގާތު ނުބުނާތި” އޭ ބުނެފިނަމަ، މަޑުޖެހިލާ އެކަމާމެދު ވިސްނާލާށެވެ. މިއަދު އެހެން މީހެއްގެ އިތުބާރު އެމީހާ އެ އުފުލާލީ ފަސޭހަކަމާއެކުގައެވެ. ހަމަ އެފަދައިން މާދަމާ ތިބާގެ އިތުބާރުވެސް އޭނާ އުފުލާލަފާނެއެވެ.
މިފަދަ ޙާލަތްތަކުގައި ދެވޭނެ އެންމެ ރަނގަޅު ޖަވާބަކީ ވަރަށް ސާދާ ޖަވާބެކެވެ. މީހަކު “އެއްވެސް މީހެއް ގާތު ނުބުނާތި” އޭ ބުނާ ހިސާބުން، އެ މީހާގެ ކިބައިން ދުރުވާށެވެ. އެއީ އެ ސިއްރުގެ ސަބަބަކުން ނޫނެވެ. އެކަމަކު، އެމީހާ މިހާރުވެސް އެވަނީ އިތުބާރު މުގުރާލާފައި ކަމަށްވާތީއެވެ.
