ކާބޯތަކެތި ބޭނުންކުރާ ވަގުތުތައް ވަކި އުސޫލެއްގެ މަތިން ހިފެހެއްޓުމަކީ ސިކުނޑީގެ މަސައްކަތްތައް ހަރުދަނާކޮށްދޭ ކަމެއް ކަމަށް އައު ދިރާސާއަކުން ދައްކައިފިއެވެ.
މި ދިރާސާގައި ބަޔާންކޮށްފައިވާ ގޮތުގައި، ދުވަހުގެ ކެއުންތައް ބަހާލެވިފައިވާ ވަގުތުތަކަކީ އުމުރުން ދުވަސްވީ މީހުންގެ ސިކުނޑީގެ މަސައްކަތްތަކަށް ނުފޫޒު ފޯރުވާ ކަމެކެވެ. މީގެ ކުރިން ބޮޑަށް ސަމާލުކަން ދެވިފައިވަނީ އަޅުގަނޑުމެން ކަނީ ކޮން އެއްޗެއްތޯ ބެލުމަށް ނަމަވެސް، މިހާރު ދިރާސާވެރިން ބޮޑަށް ބަލަމުންދަނީ ކެއުން ބަހައްޓާ ވަގުތުތަކުގެ މުހިންމުކަމުގެ މައްޗަށެވެ.
“ދަ ގާޑިއަން” ނޫހުގައި ރިޕޯޓުކޮށްފައިވާ ގޮތުގައި، ރޭގަނޑުގެ ވަގުތުގައި ގިނަ އިރުތަކެއް ވަންދެން ނުކައި ހުރުމަކީ (ފާސްޓިންގ) ހަށިގަނޑުގެ ބަރުދަނާއި، ލޭގެ ޕްރެޝަރާއި، މެޓަބޮލިޒަމް ނުވަތަ ހަށިގަނޑުގެ ބާރު ހަކަތައަށް ބަދަލުކުރުމުގެ ނިޒާމަށް ހެޔޮ ބަދަލުތަކެއް ގެނުވާ ކަމެކެވެ. މީގެ ސަބަބުން ވަކި ވަގުތުތަކެއްގައި ނުކައި ހުރުން ނުވަތަ “އިންޓަމިޓަންޓް ފާސްޓިންގ” އަށް އޮތް ޝައުގުވެރިކަން ވަނީ އިތުރުވެފައެވެ.
މީގެ އިތުރުން، ދިރިއުޅުމުގެ އާދަކާދަތައް ދުޅަހެޔޮކޮށް ބެހެއްޓުމަކީ ފަހުން ކުރިމަތިވެދާނެ ހަނދާން ނެތޭ ބަލި (ޑިމެންޝިއާ) އިން ރައްކާތެރިވުމަށް އެހީތެރިވެދޭނެ ކަމެއް ކަމަށް ތަޖުރިބާކާރުން ގަބޫލުކުރެއެވެ. ވަކިން ހާއްސަކޮށް، އުމުރުގެ މެދުތެރޭގައި ހަށިގަނޑުގެ ބަރުދަން އާދަޔާ ހިލާފަށް އިތުރުވުމަކީ ފަހުގެ އުމުރުގައި މިފަދަ ބަލިތަކަށް މަގުފަހިވާ ކަމެކެވެ.
ދިރާސާގެ ހޯދުންތައް
އެމެރިކާގެ މޭރީލޭންޑްގައި ބޭއްވުނު “ނިއުޓްރިޝަން 2026” ކޮންފަރެންސްގައި ހުށަހެޅި މި ދިރާސާގައި، އުމުރުން 50 އާއި 79 އަހަރާ ދެމެދުގެ، ބަރުދަން އިތުރު 47 އަންހެނުން ހަ މަސް ދުވަހުގެ މުއްދަތަށް މޮނިޓަރ ކުރެވުނެވެ.
މި ދިރާސާގައި ބައިވެރިވި ހުރިހާ އެންމެންވެސް ކެލޮރީ މަދު ކާބޯތަކެތި ބޭނުންކުރިއިރު، މީގެ ތެރެއިން އެއް ގްރޫޕެއްގެ މީހުން ކެއުމަށް ހޭދަކުރާ ވަގުތު ދުވާލަކު 9 ގަޑިއިރަށް ހަނިކުރިއެވެ. ދިރާސާ ނިމުނުއިރު ދެ ގްރޫޕުންވެސް އެވްރެޖްކޮށް 7 ކިލޯގެ ބަރުދަން ލުއިކުރިއެވެ. ނަމަވެސް، ދިރާސާވެރިން ފާހަގަކުރާ ގޮތުގައި މިއީ ކުޑަ ސާމްޕަލްއެއްގެ މައްޗަށް ބިނާކޮށް ކުރި ދިރާސާއަކަށް ވާތީ، މި ހޯދުންތައް އިތުރަށް ކަށަވަރު ކުރުމަށް ފުޅާ ދިރާސާތަކެއް ބޭނުންވެއެވެ.
މައްސަލަ ހައްލުކުރުމާއި ރޭވުންތެރިކަން
ކެއުން ބަހައްޓާ ވަގުތުގެ ސަބަބުން ސިކުނޑިއަށް ކުރާ އަސަރުތައް ދިރާސާވެރިން މިހާރު ދަނީ އިތުރަށް ބަލަމުންނެވެ. މީގެ ތެރޭގައި ހަށިގަނޑުގެ ގުދުރަތީ ގަޑި (ސާކޭޑިއަން ރިދަމް) އާއި، މެޓަބޮލިޒަމް އަދި ދުޅަވުން (އިންފްލެމޭޝަން) އާ ހުރި ގުޅުންތައް ހިމެނެއެވެ.
ދިރާސާގެ ނަތީޖާތަކުން ދައްކާ ގޮތުގައި، ދުވާލަކު 9 ގަޑިއިރުގެ ތެރޭގައި ކައި ނިންމާ، އަދި ނިދުމުގެ 4 ގަޑިއިރު ކުރިން ކެއުން ހުއްޓާލި އަންހެނުން، ކަންކަން ރޭވުމާއި މައްސަލަތައް ހައްލުކުރުމުގެ އިމްތިހާންތަކުން އެހެން ބައިވެރިންނަށްވުރެ މާ ރަނގަޅު ނަތީޖާ ދެއްކިއެވެ.
