ބޮލީވުޑްގެ ކާމިޔާބު ބަތަލާ ޝްރައްދާ ކަޕޫރު ލީޑް ރޯލުން ފެނިގެންދާ ފިލްމު “އީތާ” ރިލީޒްކުރާ ތާރީޚު ފަސްކޮށް އާ ތާރީޚު އިޢުލާންކޮށްފިއެވެ. ކުރިން 2026 ވަނަ އަހަރުގެ އޮގަސްޓް 28 ގައި ރިލީޒްކުރަން ނިންމާފައި އޮތް ނަމަވެސް، ފިލްމު އުފައްދާ ފަރާތުން މިހާރު ވަނީ މި ފިލްމު 2026 ޑިސެމްބަރު 4 ގައި ސިނަމާތަކަށް ގެނައުމަށް ނިންމާފައެވެ.
މެޑޮކް ފިލްމްސްގެ ފަރާތުން މި ފިލްމު އުފައްދާއިރު، މިއީ “އީތާ” ގެ ޑައިރެކްޓަރު ލަކްޝްމަން އުޓޭކަރް އަދި ޝްރައްދާ ކަޕޫރުގެ ވަރަށް ޚާއްސަ ފިލްމެކެވެ. އެއީ ދެ ފަންނާނުންވެސް އެންމެ ފަހުން ނެރުނު ފިލްމުތަކަށް (ސްޓްރީ 2 އަދި ޗާވާ) ބޮޑު ތަރުހީބެއް ލިބިފައިވާ ދަނޑިވަޅެއްގައި މި ފިލްމު އަންނާތީއެވެ. ފިލްމުގެ އާ ތާރީޚު އިޢުލާން ކުރަމުން މެޑޮކް ފިލްމްސް އިން ސޯޝަލް މީޑިއާގައި ބުނެފައިވަނީ “ތޫފާނަށް ތައްޔާރުވާށެވެ. އީތާ އަންނަނީ ޑިސެމްބަރު 4 ގައެވެ.”
ޑިސެމްބަރު މަހުގެ ފުރަތަމަ ހަފުތާއަކީ ފަހަކަށް އައިސް ބޮޑެތި ފިލްމުތަކެއް ރިލީޒްކޮށް ބޮޑު ކާމިޔާބީއެއް ހޯދަމުން އަންނަ ދުވަސްވަރެކެވެ. އެގޮތުން “އެނިމަލް”، “ޕުޝްޕާ 2” އަދި “ދުރަންދަރު” ފަދަ ފިލްމުތަކުން މި ދުވަސްވަރު ވަނީ ބޮޑު އާމްދަނީއެއް ހޯދާފައެވެ. ނަމަވެސް “އީތާ” އަށް ބޮކްސް އޮފީހުގައި ބޮޑު ވާދަވެރިކަމަކާ ކުރިމަތިލާން ޖެހޭނެއެވެ. އެއީ ޕްރަބާސްގެ “ފައުޖީ” އާއި، އަކްޝޭ ކުމާރުގެ ފިލްމެއްގެ އިތުރުން އަޖޭ ދޭވްގަންގެ “ރޭންޖާ” ވެސް އެ ދުވަސްވަރު ރިލީޒްކުރަން ތާވަލުކޮށްފައިވާތީއެވެ.
“އީތާ” އަކީ މަޝްހޫރު “ތަމާޝާ ކުއީން” ވިތާބާއީ ބާއޫ މަންގް ނަރަޔަންގާއޮންކަރްގެ ހަޤީޤީ ދިރިއުޅުމުގެ މައްޗަށް ބިނާކޮށް އުފައްދާ ފިލްމެކެވެ. މި ފިލްމުގައި ޝްރައްދާގެ އިތުރުން ރަންދީޕް ހޫޑާ، މުޙައްމަދު ޒީޝާން އައްޔޫބް، އަދި ސިދާތު ޖާދަވް ފަދަ ތަރިން ފެނިގެންދާނެއެވެ.
