ބޮލީވުޑްގެ ކާމިޔާބު ޑައިރެކްޓަރު ސަންޖޭ ލީލާ ބަންސާލީގެ އިންތިޒާރުކުރެވެމުންދާ ފިލްމު “ލަވް އެންޑް ވޯރ” ގެ ޝޫޓިން އެއްކޮށް ނިންމާލައިފިއެވެ.
މަޝްހޫރު ތަރިން ކަމަށްވާ ރަންބީރު ކަޕޫރު، އާލިއާ ބަޓް އަދި ވިކީ ކޯޝަލް މުހިންމު ރޯލުތަކުން ފެނިގެންދާ މި ރޮމޭންޓިކް ވޯ ޑްރާމާގެ ޝޫޓިން ނިމުމުން، ޑައިރެކްޓަރު ބަންސާލީ ވަނީ ފިލްމުގެ ކާސްޓާއި ކްރޫއަށް ވަރަށް އަސަރާއެކު ވަދާއީ ސަލާމް ކޮށްފައި ކަމަށް ރިޕޯޓުތައް ބުނެއެވެ.
މި ފިލްމުގެ ޝޫޓިން ރަސްމީކޮށް ފަށާފައިވަނީ 2024 ވަނަ އަހަރުގެ ނޮވެމްބަރު މަހުގައެވެ. އެކި މަރުހަލާތަކަކަށް ބަހާލައިގެން ކުރިއަށް ގެންދިޔަ މި މަސައްކަތުގެ ފަހު މަރުހަލާ ފަށާފައިވަނީ 2026 ވަނަ އަހަރުގެ އޮގަސްޓު މަހުގައެވެ. ޝޫޓިން ނިމުމާއެކު، ބަންސާލީ ދެން އަވަސްވެގަންނާނީ ފިލްމުގެ ޕޯސްޓް-ޕްރޮޑަކްޝަން މަރުހަލާގެ މަސައްކަތްތަކަށެވެ.
ފިލްމު ރިލީޒްކުރާ ތާރީޚަށް އެކި ފަހަރު މަތިން ވަނީ ބަދަލުތަކެއް އައިސްފައެވެ. އެންމެ ފުރަތަމަ 2025 ވަނަ އަހަރުގެ ފަހުކޮޅު ނެރުމަށް ނިންމި ނަމަވެސް، ފަހުން 2026 ގެ ނޮވެމްބަރަށް ފަސްކުރިއެވެ. ނަމަވެސް، ޕްރޮޑަކްޝަންގެ ތާވަލަށް އައި ލަސްތަކާއެކު، ފިލްމު ސިނަމާތަކަށް ގެންނަން މިހާރު ހަމަޖެހިފައިވަނީ 21 ޖެނުއަރީ 2027 ގައެވެ. ރަންބީރު ކަޕޫރު މީގެ ކުރިން އިންސްޓަގްރާމް ލައިވެއްގައި ހާމަކޮށްފައިވާ ގޮތުގައި މި ފިލްމު ރިލީޒްކުރާނީ އޭނާގެ ފިލްމު “ރާމާޔަނާ ޕާޓް 1” ނިކުތުމަށް ފަހުގައެވެ. މި ފިލްމު ހިންދީ، ތަމަޅަ އަދި ތެލުގޫ ބަހުން ނެރުމަށް ވަނީ ހަމަޖެހިފައެވެ.
ފިލްމާ ބެހޭގޮތުން ވާހަކަދައްކަމުން ބަތަލާ އާލިއާ ބަޓް ބުނެފައިވަނީ، ގިނަ އަހަރުތަކަކަށްފަހު ރަންބީރު އަދި ބަންސާލީ އެކުގައި މަސައްކަތްކުރާތަން ބަލައިލަން ބެލުންތެރިއެއްގެ ގޮތުން ވެސް އޭނާ ވަރަށް ބޮޑަށް ކެތްމަދުވެފައިވާ ކަމަށެވެ. މީގެ އިތުރުން، އޭނާއާއި ވިކީ އަލުން އެކުގައި ފެނިގެންދިއުމާއި، “ސަންޖޫ” ފިލްމަށްފަހު ރަންބީރު އަދި ވިކީގެ ޖާދޫ އަނެއްކާވެސް ފެނިގެންދާނެތީ މިއީ ވަރަށް ތަފާތު އަދި ފުރިހަމަ ކޮމްބިނޭޝަނަކަށް ވާނެ ކަމަށް އާލިއާ ފާހަގަކުރިއެވެ.
