ދުނިޔޭގެ ކޮންމެ ކަމަކަށް ކަހަލަ ގޮތަކަށް ޖަވާބު ލިބެން އޮތް މި ޒަމާނުގައިވެސް، އަހަރެމެންނަށް އަމިއްލައަށް ހޯދައިނުގަނެވޭނެ، ވަގުތު ކަނޑަނޭޅޭނެ އަދި ކޮންޓްރޯލް ނުކުރެވޭނެ ދެ ކަމެއްވެއެވެ. އެއީ ލޯތްބާއި މަރެވެ. އެ ދެ ކަންތައް އަހަރެމެންނާ ބައްދަލުކުރަނީ އެކަމަށް ކަނޑައެޅިފައިވާ ވަގުތުގައެވެ.
ދިރިއުޅުމުގައި ކުރިމަތިވާނެ އެންމެ ހިތްދަތި އެއް ތަޖުރިބާއަކީ، ތިމާ އިންތިހާއަށް ލޯބިވާ މީހަކު ނުރައްކާތެރި ބައްޔެއްގެ ވޭނުގައި މަޑުމަޑުން ހަލާކުވަމުންދާ މަންޒަރު ބެލުމެވެ. ފުރާނައަށް ނުރައްކާވާ ފަދަ ބައްޔެއް ތަހައްމަލު ކުރަމުންދާ ގާތް އެކުވެރިއެއްގެ ގާތުގައި އިށީނދެގެން އިންނަ މަންޒަރު ހިތަށް ގެންނަވާށެވެ. އެކުގައި ހީނސަމާސާކޮށް، މުސްތަޤުބަލުގެ ރޭވުންތައް ރާވައި، އާދައިގެ ވަގުތުތައް ހޭދަކުރި އެ އެކުވެރިޔާ ދުވަހުން ދުވަހަށް ބަލިކަށިވަމުންދާ މަންޒަރު ފެނުމުން ކުރާނެ އަސަރު ހިތަށް އަރުވާލައްވާށެވެ.
މުޢުޖިޒާތަކަށް އެދި، އުއްމީދާއެކު ދުޢާކުރުން މަތީގައި ތިބާ ހުންނަ އިރު، ހިތުގެ ކޮންމެވެސް ކަނެއްގައި ބިރުވެރި ޚިޔާލެއް އުފެދެން ފަށައެވެ. “އެ މީހަކާ ނުލައި އަހަރެން މި ދުނިޔޭގައި އުޅޭނީ ކިހިނެއް ހެއްޔެވެ؟”
މިއީ “އެންޓިސިޕޭޓަރީ ގްރީފް” ނުވަތަ ލޯބިވާ މީހަކު ވަކިވުމުގެ ކުރިން އިޙުސާސްވާން ފަށާ ހިތާމައެވެ. މީގެ ސަބަބުން ބިރުވެރިކަމާއި، މާޔޫސްކަމާއި، ރުޅިވެރިކަމާއި، އެހީތެރިކަމެއް ނެތްކަމުގެ އިޙުސާސާއި، ކުށްވެރިވުމުގެ އިޙުސާސްވެސް ކުރެވިދާނެއެވެ. މިފަދަ އިޙުސާސްތައް ކުރެވުމަކީ އީމާންތެރިކަން ކުޑަވުމެއް ނޫނެވެ. ބައެއް ފަހަރު، މިފަދަ ހިތްދަތި ވަގުތުތަކުގައި ސާބިތުވެ ހުރުމަށް އެހީތެރިވެދޭ އެންމެ ބޮޑު ބާރަކީވެސް އީމާންތެރިކަމެވެ.
ﷲ އަށް އީމާންވާ މީހުންނަށް، އުއްމީދާއި ކަންކަމަށް އިސްތިސްލާމްވުން
އެބައިމީހުން ދިރިއުޅެމުންދަނީ ޝަކުވާއެއް ކުރުމެއްނެތި، އުންމީދުތަކާ އެކުގައެވެ. ބަލިން ފަސޭހަވުމަށާއި އިތުރު ވަގުތަށް އެދި ދުޢާކުރާ ހާލު، ދިރިހުރުމާއި މަރުވުން އެއީ އެކަލާނގެ މިންވަރުފުޅުގައިވާ ކަމެއްކަން ޤަބޫލުކޮށް ވަކީލުކުރެވިދާނެއެވެ.
ތިމާ ބިރުގަންނަކަމަށް ނުވަތަ ވަރުބަލިވެ ހާސްވެފައިވާ ކަމަށް އިޢުތިރާފުވުމަކީ ލަދުގަންނަންޖެހޭ ކަމެއް ނޫނެވެ. ބޮޑު ބައްޔެއް ތަހައްމަލު ކުރަމުންދާ މީހަކަށް އެހީތެރިވާ މީހަކަށް ކޮންމެހެން ބޭނުންވަނީ ނަސޭހަތާއި “ވަރުގަދައަށް ހުރުމަށް” ހަނދާންކޮށްދިނުމެއް ނޫނެވެ. ބައެއް ފަހަރު އެމީހުން ބޭނުންވަނީ ހަމައެކަނި ގާތުގައި އިށީނދެލައިގެން “އަހަރެން މިހުރީ ކަލޭގެ ގާތުގައޭ” ބުނެލާނެ މީހެކެވެ.
ބައެއް ހާލަތްތަކުގައި ބަސްތަކަށްވުރެ ގާތުގައި ހުރުމުގެ ބާރު މާ ބޮޑެވެ. އެމީހުންގެ އަތުގައި ހިފަހައްޓާށެވެ. އެމީހުން ދައްކާ ވާހަކަތައް އަޑުއަހާށެވެ. ފުރުސަތު ލިބޭ ހިނދު އެކުގައި ހީނލާށެވެ. ހަނދާންތައް ބިނާކުރާށެވެ. ފޮޓޯ ނަގައި، އަބަދުވެސް ފަސްކުރަމުންދާ މުހިންމު ވާހަކަތައް ދައްކާށެވެ.
ލޯބިވާ މީހުން ގާތުގައި އެމީހުން ދެކެ ލޯބިވާ ވާހަކަ ބުނާށެވެ. އެއީ އުއްމީދު ކަނޑާލުމަކުން ނޫނެވެ. ނަމަވެސް ލޯބީގެ ބަސްތަކަކީ މީހަކު މަރުވެ ކަށުނަމާދާ ހަމައަށް މަޑުކުރަންޖެހޭ އެއްޗަކަށް ނުވާތީއެވެ.
މަރަކީ ދިރިއުޅުމުގައި ކަށަވަރުވެގެންވާ ކަމެކެވެ. ނަމަވެސް އެކަން ހިނގާނެ ވަގުތަކީ އަހަރެމެންގެ އިޚްތިޔާރުގައިވާ ކަމެއް ނޫނެވެ. އެކަކު އަނެކަކާއެކު ހޭދަކުރަން ލިބޭ ވަގުތަކީ އަބަދަށް ލިބޭނެ އެއްޗެއްގެ ގޮތުގައި ނުދެކެންވީ އެހެންވެގެން ކަމަށް ވެދާނެއެވެ.
ތިބާ ލޯބިވާ މީހަކު ބައްޔަކާ ހަނގުރާމަކުރަމުންދާނަމަ، މުޢުޖިޒާތަކަށް އެދި އުއްމީދުކުރާތީ އެއީ ކުށެއް ކަމުގައި ނުދެކޭށެވެ. އަދި ހިތަށް ބިރުވެރިކަން ވަންނަ ހިނދުވެސް އަމިއްލަ ނަފްސު ކުށްވެރި ނުކުރާށެވެ. ދުޢާކުރާށެވެ. އުއްމީދުކުރާށެވެ. ގާތުގައި ހުންނާށެވެ. ލޯބިދޭށެވެ.
އަދި އެ މީހަކާ ނުލައި ދިރިއުޅުން ކުރިއަށް ގެންދަންޖެހޭ ދުވަސް އައިސްފިނަމަ، ދިރިއުޅުމާއިގެން ކުރިއަށް ދިއުމަކީ އެމީހުން މަތިން ހަނދާން ނައްތާލުން ނޫންކަން ހަނދާންކުރާށެވެ. އެއީ އެމީހުންގެ ހަނދާންތަކާއި، ލޯތްބާއި، އެމީހުންގެ ކިބައިން ލިބުނު ފިލާވަޅުތަކާއެކު ކުރިއަށް ދިއުމެވެ.
ލޯބި ލިބޭނެ ވަގުތާއި މަރު އަންނާނެ ވަގުތު އިޚްތިޔާރު ކުރުމުގެ ބާރު އަހަރެމެންނަށް ލިބިގެން ނުވެއެވެ. ނަމަވެސް، އެ ދެމެދުގައި ލިބޭ އަގުހުރި ވަގުތުތަކުގެ ބޭނުން ހިފާނެ ގޮތް އިޚްތިޔާރު ކުރުމުގެ ފުރުސަތު އަހަރެމެންނަށް އެބައޮތެވެ.
