ގިނަ ތަރިންތަކަކާއެކު އަސަރުގަދަ ވީޑިއޯއެއް
ދިވެހިރާއްޖޭގެ މަޤުބޫލު ފަންނާނުން ކަމަށްވާ ޓޯއީ އަދި ލައީގެ އައު ލަވަ “ވާނަމަ އިރާދައިގާ” ސިމްބޮލިކް ރެކޯޑްސް އިން ރަސްމީކޮށް ރިލީޒްކޮށްފިއެވެ. މި ލަވަ ސިމްބޮލިކް ރެކޯޑްސްގެ ރަސްމީ ޔޫޓިއުބް ޗެނަލް މެދުވެރިކޮށް އާންމުންނަށް ދޫކޮށްލާފައިވާއިރު، މި ޓްރެކުގައި ޕީ.ވީ.އެން.ޑީ.ވީ ވެސް ފީޗާކޮށްފައިވެއެވެ.
މިއުޒިކް ޕްރޮޑިއުސަރުން ކަމަށްވާ ޕެންޑާ އަދި ޑީމަން ގުޅިގެން ޕްރޮޑިއުސްކޮށްފައިވާ މި ލަވައިގެ މައިގަނޑު ކޮންސެޕްޓް ބިނާވެފައިވަނީ ލޯބީގެ ގުޅުމެއްގައި ދިމާވާ އުފާވެރި އަދި ހިތާމަވެރި އެކި ދަނޑިވަޅުތަކާއި، އެފަދަ ގުޅުންތަކުގައި އުފެދޭ އެކި ކަހަލަ އޮޅުންބޮޅުން ބޮޑު ނަފްސާނީ އަދި އިހުސާސީ ހަނގުރާމަތަކުގެ މައްޗަށެވެ. އެގޮތުން މިއީ ލޯބީގެ އުނދަގޫ އިމްތިހާނުތަކާއި އެތެރެހަށީގެ އިހުސާސްތައް ވަރަށް އަސަރުގަދަކޮށް ބަޔާންކޮށްދޭ ލަވައެކެވެ.
މި ލަވައިގެ ވީޑިއޯއަށް ބަލާއިރު، ޑިރެކްޓަރ އޮފް ފޮޓޯގްރަފީ (ޑީ.އޯ.ޕީ) އަދި ސިނަމަޓޯގްރަފީގެ ހުރިހާ މަސައްކަތެއް ކޮށްފައިވަނީ އަލާއު އެވެ. މި ވީޑިއޯ ލަވައިން ފަންނާނުން ކަމަށްވާ ޓޯއީ، ލައީ އަދި ޕެންޑާގެ އިތުރުން މުނިފޫހިފިލުވުމުގެ ދާއިރާގެ މަޝްހޫރު އެތައް މޫނުތަކެއް ވަނީ ފެނިގެން ގޮސްފައެވެ. އޭގެ ތެރޭގައި އިޔައްކޮ، އައިޝް، ލުއްލު، އައްޒާމް އަދި ލަޔާން ހިމެނެއެވެ.
ދިވެހިރާއްޖޭގެ މިއުޒިކް އިންޑަސްޓްރީގައި 2013 ވަނަ އަހަރުން ފެށިގެން ހަރަކާތްތެރިވަމުން އަންނަ ސިމްބޮލިކް ރެކޯޑްސްގެ ޔޫޓިއުބް ޗެނަލުން މިހާރު މި ލަވަ ބަލައިލެވޭނެއެވެ. ލަވަ ރިލީޒްކުރުމާއެކު ގިނަ ބައެއްގެ ސަމާލުކަން މި ލަވައަށް ލިބިފައިވާއިރު، މީސްމީޑިއާގައި ވެސް ލަވައަށް ބޮޑު ތަރުހީބެއް ދަނީ ލިބެމުންނެވެ.
