ނަޖުމީ ދުވަހަކުވެސް ފާޅުނުކުރި ވާހަކަތައް
ހަމްދާން މަރުވި ފަހުން ފުރަތަމަ ފަހަރަށް، އާޝިޔާގެ އަތުގައި ޝައްކުތަކަށްވުރެ ބިރުވެރި އެއްޗެއް އޮތެވެ. އެއީ ނަމެކެވެ. މަރީހާ އިބްރާހީމެވެ.
އާޝިޔާ އޭނާގެ ނޯޓްފޮތުގައި ރައޫފްގެ ނަމުގެ ތިރީގައި އެ ނަން ލިޔެ، އެ ދެމެދުގައި ރޮނގެއް ދަމާލިއެވެ. ނަމަވެސް އެ ގުޅުން އަދިވެސް ފުރިހަމަވާކަމެއް އިޙުސާސެއް ނުކުރެވެއެވެ. ފުލުހުންގެ އަސްލު ފައިލުން އެނގޭ ގޮތުގައި މަރީހާއަކީ ރައޫފްގެ ކޮއްކޮއެވެ. އަދި އޭނާ ގެއްލިގެން ރިޕޯޓްކުރީވެސް މަރީހާއެވެ. އެކަމަކު މި ހާދިސާގެ ތެރެއިން މަރީހާގެ ނަން އުނިކުރެވުނީ ކީއްވެގެން ކަމެއް، ނުވަތަ ފާއިތުވި އެއް އަހަރު ދުވަހު ހަމްދާން ރައޫފް ހޯދުމަށް މަސައްކަތްކުރީ ކީއްވެގެން ކަމެއް، ނުވަތަ ކުރީގެ ފޮޓޯގަނޑުގައި ތިބި ފަސް މީހުން ހަތަރު މީހުންނަށް ބަދަލުކޮށްލީ ކީއްވެގެން ކަމެއް އަދިވެސް ސާފެއް ނުވެއެވެ.
އިންސްޕެކްޓަރ އިސްމާޢީލް މުހިއްމު ލިޔުންތަކެއް ގެނެސްދޭނެ ކަމަށް ވަޢުދުވީ ނަމަވެސް، ފުލުހުންގެ ފަރާތުން ޖަވާބެއް ލިބެންދެން މަޑުން ހުންނާކަށް އާޝިޔާ ބޭނުމެއް ނުވިއެވެ. ހަޤީޤަތަކީ އެކަން ފޮރުވަން ބޭނުންވި ބަޔަކު ވަރަށް ރޭވުންތެރިކަމާއެކު ފޮރުވާފައިވާ އެއްޗެއްކަން މިހާރު އޭނާއަށް ވަނީ އެނގިފައެވެ. އަދި ވަޅުލާފައިވާ ކޮންމެ އެއްޗަކީ އަބަދު ވަޅުލެވިފައި އޮންނާނެ އެއްޗެއް ނޫނެވެ.
އެ ދުވަހުގެ މެންދުރުފަހު، ސިދުރާ ނިދާފައި އޮއްވައި އާޝިޔާ އަނެއްކާވެސް ނޯޓްފޮތް ހުޅުވާލިއެވެ. އޭނާގެ ލޮލުގައި އަޅައިގަތީ އެތައް ފަހަރަކު ލިޔެފައިވާ އެހެން ނަމެކެވެ. ނަޖުމީއެވެ. ނަޖުމީއަކީ އާޝިޔާގެ މުޅި އުމުރުދުވަހު ދަންނަ މީހެކެވެ. ޒޯޔާގެ ފިރިމީހާއަށް ވުމުގެ ކުރިން، ހަމްދާންގެ އެންމެ ގާތް އެކުވެރިޔާއަށް ވުމުގެ ކުރިން، އަދި އާއިލާއަށް ދިމާވި ހިތާމަވެރި މަރުތަކުގައި އެހީތެރިވެދޭން އާޝިޔާގެ ކައިރީގައި ހުރި މީހަކަށް ވުމުގެ ކުރިން، ނަޖުމީއަކީ ހަމައެކަނި އަބަދުވެސް އާޝިޔާގެ ކައިރީގައި އުޅުނު ކުއްޖެކެވެ.
ސްކޫލް ދައުރުގައި އޭނާއަކީ ގްރޫޕްގެ ތެރޭގައި ހުންނަ މަޑުމައިތިރި ކުއްޖާއެވެ. މީހުންގެ ސަމާލުކަން ހޯދަން މަސައްކަތް ނުކުރާ، މައްސަލަތަކުގެ ތެރެއަށް ނުވަންނަ ކުއްޖެކެވެ. ނަމަވެސް އާޝިޔާ އުޅޭނޫޅޭ ގޮތް އޭނާއަށް އަބަދުވެސް އެނގެއެވެ. އާޝިޔާ ގަލަން ހަނދާން ނެތިއްޖެނަމަ، ނަޖުމީ އަތުގައި އިތުރު ގަލަމެއް އޮވެއެވެ. ފިލާވަޅެއް ނުލިބިއްޖެނަމަ، ނަޖުމީގެ ނޯޓްފޮތް އާޝިޔާގެ މޭޒުމަތިން ފެނެއެވެ. ފިރިހެން ކުދިންތަކެއް އާޝިޔާއާ ދިމާކުރާނަމަ، އެކަން ހުއްޓުވާ ފުރަތަމަ މީހަކީ ނަޖުމީއެވެ. އޭރު އާޝިޔާ އެކަންކަމާމެދު މާބޮޑަކަށް ނުވިސްނައެވެ. އޭނާ ހީކުރީ އެއީ ނަޖުމީގެ އާދަ ކަމަށެވެ. ނަމަވެސް ފަހުން ކޮލެޖް ދުވަސްވަރު އޭނާއަށް ތަފާތުތަކެއް ފާހަގަވާން ފެށިއެވެ.
އާޝިޔާގެ އަމިއްލަ ނަފްސާ ބެހޭގޮތުން އޭނާ ހަނދާން ނެތިފައިވާ ކަންކަންވެސް ނަޖުމީ ހަނދާން ހުރެއެވެ. ކެންޓީނުން އޯޑަރުކުރާ ބުއިމެވެ. ކިޔަން ބޭނުންވާ ފޮތްތަކެވެ. ގަޑިއަށް ފަރުވާތެރިވާ މިންވަރެވެ. ރުޅިއައިސްފައި ހުރެ، އެކަން ސިއްރުކުރަން އުޅޭއިރު އާޝިޔާގެ މޫނުމަތިން ފެންނަ ޚާއްސަ އަސަރެވެ. ހަމްދާނަށް އެނގުމުގެ ކުރިން، އާޝިޔާ ދެރަވެފައި ހުންނަކަން ނަޖުމީއަށް އެނގެއެވެ. އަދި އެންމެ ފާހަގަކޮށްލެވޭ ކަމަކީ، އާޝިޔާ ކޮޓަރިއަކަށް ވަންނަ ކޮންމެ ފަހަރަކު، ނަޖުމީގެ ސަމާލުކަން އެއްވެސް މަސައްކަތަކާ ނުލައި އާޝިޔާއަށް ހުއްޓޭ ކަމެވެ. އާޝިޔާ ދުވަހަކުވެސް އެކަމަށް ހިތްވަރެއް ނުދެއެވެ. އަދި އެކަން ކުރާކަށް ބޭނުމެއްވެސް ނުވިއެވެ. އޭނާ ލޯބިވީ ހަމްދާން ދެކެއެވެ. އެއީ އެންމެންނަށްވެސް އެނގޭ ހަޤީޤަތެކެވެ. ފަހުން ނަޖުމީ ޒޯޔާއާ ކައިވެނިކުރިއެވެ. އަދި އާޝިޔާއާމެދު އޭނާގެ ހިތުގައި އޮތް ކޮންމެ އިޙުސާސެއް، އަމިއްލަ ދިރިއުޅުމުގެ އެންމެ ހަމަހިމޭން ކަނަކަށް ކޮއްޕާލިއެވެ. އެއީ ދެން އެފަދަ އިޙުސާސެއް ނެތްކަމަށް ދެއްކުމަށެވެ. ނަމަވެސް، އެކަމާ ބެހޭގޮތުން ވާހަކަ ނުދެއްކުމަކުން އިޙުސާސްތަކެއް ފިލައިގެން ނުދެއެވެ. ފަހަރެއްގައި އެ އިހުސާސްތައް ދަސްކުރަނީ މީހުންގެ ކުރިމަތީގައި ރީތިކޮށް އުޅޭށެވެ.
އާޝިޔާ ނޯޓްފޮތް ލައްޕާލިއެވެ. ނަޖުމީއާމެދު އެގޮތަށް ވިސްނާކަށް އޭނާ ބޭނުމެއް ނޫނެވެ. ޚާއްސަކޮށް މިވަގުތަކު ނޫނެވެ. ޒޯޔާ މަރުވިތާ މާ ގިނަ ދުވަހެއް ނުވެއެވެ. ނަމަވެސް އޭނާގެ ނަން އުނދަގޫކުރާ އެހެން ސަބަބެއްވެސް އޮތެވެ. 2018 ވަނަ އަހަރު ނަޖުމީވެސް ހުއްޓެވެ. ރައޫފްގެ ވާހަކަ އޭނާއަށް އެނގެއެވެ. ލޯންޗުގެ ހާދިސާ އެނގެއެވެ. އެރޭގެ ވާހަކަ ދުވަހަކުވެސް ނުދެއްކުމަށް ހަމްދާނާއި ޒޯޔާ ވަޢުދުވީ ކީއްވެގެންކަންވެސް އޭނާއަށް އެނގެއެވެ. އަދި މިހާރު އާޝިޔާއަށް އެހެން ކަމެއްވެސް އެނގިއްޖެއެވެ. އެތައް އަހަރެއް ވަންދެން ނަޖުމީ ހުރީ އާޝިޔާގެ ލޯބީގައި ފިދާވެފައެވެ. އޭގެ މާނައަކީ އާޝިޔާގެ ދިރިއުޅުމާ ބެހޭގޮތުން ދެ ބާވަތެއްގެ މައުލޫމާތު އޭނާއަށް އެނގެއެވެ. އެއީ ހަމްދާން އޭނާގެ އެންމެ ގާތް އެކުވެރިޔާއަށް ކިޔައިދީފައިވާ ވާހަކަތަކާއި، ނަޖުމީ އަމިއްލައަށް ފާހަގަކޮށްފައިވާ ކަންކަމެވެ.
އާޝިޔާ ނިންމީ ނަޖުމީއާ ބައްދަލުކުރުމަށެވެ. އޭނާއަށް ތުހުމަތުކުރާކަށް ނޫނެވެ. އޭނާ އާޝިޔާދެކެ ލޯބިވީތޯ އަހާކަށްވެސް ނޫނެވެ. އޭނާ އެ ސިއްރުކުރަނީ ކޮން ކަމެއްތޯ ބަލާށެވެ.
ނަޖުމީ އައީ މަޣްރިބް ނަމާދަށް ގޮވަން ކުޑަ ވަގުތުކޮޅަކަށް ވެފައި ވަނިކޮށެވެ. މިހާރު އޭނާ އަންނަނީ ކުރިން ގުޅާފައެވެ. ކުރިން އެ ހަތަރު މީހުންގެ މެދުގައި އޮތް ގާތްކަން މިހާރު ވަނީ ގެއްލިފައެވެ. އޭގެ ސަބަބު ދެމީހުންނަށްވެސް އެނގެއެވެ. އޭނާ ސިދުރާއަށް ކާނާއާއި ކުޑަކުދިންގެ ހެދުންތަކެއް ގެނައެވެ.
“މި އެއްޗެހި ނުގެނަޔަސް އޯކޭވާނެ.” އާޝިޔާ ބުންޏެވެ.
“އެނގޭ.”
އާޝިޔާ ކުޑަކޮށް ހިނިތުންވެލިއެވެ. “އެކަމެއް އަދިވެސް ބަދަލެއް ނުވޭ.”
“ކޯއްޗެއް؟”
“މީހަކު ނޭދޭ ކަންކަންވެސް ކޮށްދިނުމުގެ އާދަ.”
އެ ވަގުތުކޮޅު، އެމީހުންގެ ކުރީގެ އެކުވެރިކަމުގެ ހަނދާންތައް އާވެގެން ދިޔައެވެ. ނަޖުމީ ހިނިތުންވެލިއެވެ.
“ހީވަނީ ބައެއް އާދަތަކަކީ ދޫކޮށްލަން އުނދަގޫ ކަންކަންހެން.”
އާޝިޔާ އޭނާއަށް އެތެރެއަށް ވަނުމަށް ދަޢުވަތު ދިނެވެ. ސިދުރާ ކައިރީގައި ކުޅެން އޮއްވައި، އެމީހުން ސިޓިންގ ރޫމުގައި އިށީނެވެ. އާޝިޔާ ވަގުތުން މަރީހާގެ ވާހަކައެއް ނުފަށައެވެ. އޭގެ ބަދަލުގައި އޭނާ އެހިއެވެ. “ސްކޫލް ދުވަސްވަރު މަތިން ހަނދާންވޭތަ؟”
ނަޖުމީ ކުޑަކޮށް ހައިރާންވެފައި ބަލާލިއެވެ. “އާނ، އޮފްކޯސް.”
“އޭރު އަބަދުވެސް އުޅެނީ އަހަރެމެންގެ ފަހަތުން.”
“އާޝިޔާގެ ފަހަތުން.” ނަޖުމީ ބުންޏެވެ.
“އަހަރެމެންގެ.” އާޝިޔާ އެ ބަސް އިސްލާހުކުރިއެވެ.
ނަޖުމީ ހިނިތުންވެލިއެވެ. “ނޫން. އާޝިޔާގެ.”
އާޝިޔާ އޭނާގެ މޫނަށް ބަލާލިއެވެ. ނަޖުމީއަށް ބުނެވުނު އެއްޗަކާމެދު ވިސްނާލުމަށްފަހު، އެހެން ފަރާތަކަށް އެނބުރުނެވެ.
“އަބަދުވެސް ކޮންމެވެސް މައްސަލައެއްގެ ތެރޭގައި އުޅޭނީ.” އޭނާ ބުންޏެވެ.
“އަހަރެން ނޫޅެން.”
“ސްކޫލް ފަހަތުގައި ހުރި ބާ ރުކަށް އެރީމެއްނު.”
“އެއީ ޒޯޔާގެ ޚިޔާލެއް.”
“އެކަމަކު އެރީ އާޝިޔާ.”
“ކަލޭ ހުރީ ބަލަން.”
“އަހަރެން ހުރީ އާޝިޔާ ވެއްޓިދާނެތީ ބަލަހައްޓައިގެން.”
“ކަލޭ ޖެހޭނީ އަހަރެން ހުއްޓުވަން.”
“އޭރު އަހަރެންގެ އުމުރަކީ ފަނަރަ އަހަރު.”
“ދެން؟”
“އޭރު އަހަރެން ހުރީ އާޝިޔާދެކެ ލޯބިން.”
އެ ބަސްތައް ބުނީ ވަރަށް މަޑުމައިތިރިކޮށެވެ. އެއްވެސް ކަހަލަ ތަމްސީލީ ގޮތެއް ނުވަތަ ރޮމޭންޓިކް ކަމެއް އެ ވަގުތަކު ނެތެވެ. ފަހަރެއްގައި އެކަމުގެ ސަބަބުން އެ ވާހަކަ މާބޮޑަށް ހިތަށް އަސަރުކުރުވިއެވެ. އާޝިޔާ އެއްވެސް ޖަވާބެއް ނުދެއެވެ. ނަޖުމީ ބިންމައްޗަށް ބަލަހައްޓައިގެން އިނެވެ.
“މީގެ ކުރިން ދުވަހަކުވެސް މި ވާހަކައެއް ނުބުނަން.”
“ނުބުނޭ.”
“އަހަރެން އާޝިޔާގެ ފަރާތުން އެއްވެސް ކަމަކަށް އުއްމީދެއް ނުކުރަން. ދުވަހަކުވެސް ނުކުރަން.”
އާޝިޔާ ސިދުރާއާ ދިމާއަށް ބަލާލިއެވެ.
“ޒޯޔާއަށް އެނގޭތަ؟”
ނަޖުމީ ކުޑަކޮށް މަޑުޖެހިލިއެވެ.
“ޒުވާން ދުވަސްވަރު އަހަރެންގެ ހިތުގައި އާޝިޔާއާމެދު އިޙުސާސްތަކެއް ހުރިކަން އޭނާއަށް އެނގޭ.”
“ހަމްދާނަށް އެނގޭތަ؟”
“އާނ.”
އެއީ އާޝިޔާ ހައިރާންވި ކަމެކެވެ. “ކިހިނެއް؟”
“ސަބަބަކީ ހަމްދާނަށް ހުރިހާ ކަމެއް ފާހަގަވާތީ.”
އާޝިޔާއަށް ކުޑަކޮށް ހިނި އައެވެ. “އެއީ ހަމަ އޭނާގެ ގޮތް.”
“ކޮލެޖުގައި އުޅުނުއިރު އެއްދުވަހަކު އޭނާ ބުނި، އޭނާގެ އެކުވެރިއެއްގެ ގޮތުގައި ހުންނަން ބޭނުންނަމަ، ދުނިޔޭގައި ހުރި ހަމައެކަނި އަންހެނަކީ އާޝިޔާ ކަމަށް ދެކިގެން ބެލުން ހުއްޓާލަން ޖެހޭނެއޭ.”
އާޝިޔާގެ މޫނުމަތީގެ ކުލަވަރު ބަދަލުވިއެވެ. “ކަލޭ ބުނީ ކީކޭ؟”
“އަހަރެން ބުނިން އެއީ ކުރެވޭނެ ކަމެއް ނޫނޭ.” އެއީ ވަރަށް ސާދާ އިއުތިރާފެކެވެ. “އަހަރެން މަސައްކަތް ކުރިން.” އޭނާ މަޑުމަޑުން ދެއަތް ދެއަތާ އުނގުޅާލިއެވެ. “ދެން ޒޯޔާ އަހަރެންގެ ދިރިއުޅުމަށް އައީ. އަހަރެން އޭނާދެކެ ލޯބިވިން. ހަމަ ހަޤީޤަތަށްވެސް ލޯބިވިން. އެކަމަކު ޒޯޔާދެކެ ލޯބިވުމަކުން، އެންމެ ފުރަތަމަ އާޝިޔާދެކެ ލޯބިވި އަހަރެންގެ އެ ބައެއް ފިލައިގެނެއް ނުދިޔަ.”
އާޝިޔާ އެއްވެސް ފާޑުކިޔުމެއް ނެތި އަޑުއަހަން އިނެވެ. އެ ވާހަކަ އަޑުއިވުމުން އެއްވެސް ހިތްހަމަޖެހުމެއް ނުލިބުނެވެ. އޭގެ ބަދަލުގައި މާޒީގެ ބުރަދަން އިތުރުވީއެވެ.
“މިހާރު ތި ވާހަކަ އަހަންނަށް ތި ކިޔައިދެނީ ކީއްވެ؟”
“ސަބަބަކީ މީގެ އެތައް އަހަރެއް ކުރިން އަހަރެން ޖަވާބުދޭންޖެހޭ ސުވާލުތަކެއް އާޝިޔާ ކުރާތީ.”
(ނުނިމޭ)
