ސޮނީ ޓީވީގެ މަޝްހޫރު ޑާންސް ރިއަލިޓީ ޝޯވ “އިންޑިއާސް ބެސްޓް ޑާންސާ” ގެ 5 ވަނަ ސީޒަންގެ ތަށި ރައިޕޫރަށް ނިސްބަތްވާ ރިތޭޝް ޕާލް އަދި އޭނާގެ ކޮރިއޮގްރާފަރު ޕްރަތީކް އުޓޭކަރ ކާމިޔާބުކޮށްފިއެވެ.

މަސްތަކަކަށް ދެމިގެންދިޔަ މި ފޯރިގަދަ މުބާރާތުގައި “އިންޑިއާ ވާލާ ޑާންސް” ތީމްގެ ދަށުން ހުށަހަޅައިދިން ފުރިހަމަ ހުނަރުތަކާއެކު، ރިތޭޝް ވަނީ މުޅި ސީޒަންގައިވެސް އޭނާގެ ހުނަރުވެރިކަމާއި ބުރަ މަސައްކަތް ސާބިތުކޮށްދީފައެވެ. ވަރުގަދަ ކުރިމަތިލުންތަކަކަށްފަހު ބޭއްވި މި ސީޒަންގެ ގްރޭންޑް ފިނާލޭގައި، މި ޖޯޑުން ވަނީ އެމީހުންގެ ހުނަރުން ފަނޑިޔާރުންނާއި ބެލުންތެރިންގެ ހިތްތައް ފަތަހަކޮށް އެންމެ ޝަރަފުވެރި ތަށި އުފުލައިލާފައެވެ.

ޖުމްލަ 12 ބައިވެރިންނާއެކު ފެށި މި ޝޯވގެ ފައިނަލަށް ދަތުރުކޮށްފައިވާ ފަސް ބައިވެރިންނަކީ ރިތޭޝް ޕާލް، ޑިޕާލީ ބޯރްކަރް، ޕްރަތަމޭޝް މާނޭ، އަންޝިކާ ދާރާ އަދި ގީތާންޖަލީ މަރްވާހާއެވެ. ރިތޭޝް މި ޝޯވ ކާމިޔާބުކުރީ މި ފަސް ބައިވެރިންގެ ހުށަހެޅުންތަކަށްފަހު އެންމެ މަތިން ޕޮއިންޓް ލިބުނު ތިން ބައިވެރިންގެ މެދުގައި އޮތް “ބެޓްލް” ކާމިޔާބުކޮށްގެންނެވެ. މި ބެޓްލްގައި ދެން ވާދަކުރީ ދެވަނަ ހޯދި އަންޝިކާ އާއި ތިންވަނަ ހޯދި ޕްރަތަމޭޝްއެވެ.

މި ޝޯވގެ ގްރޭންޑް ފިނާލޭ ފާހަގަކުރެވިގެން ދިޔައީ ބޮލީވުޑްގެ ގިނަ ތަރިންތަކެއް ބައިވެރިވި ވަރަށް ކުލަގަދަ އިވެންޓެއްގެ ގޮތުގައެވެ. މި ހަފުލާގައި ޝޯވގެ ޖަޖުން ކަމަށްވާ ކަރިސްމާ ކަޕޫރު، ޖާވިދު ޖާފަރީ، ގީތާ ކަޕޫރު އަދި ޓެރެންސް ލުއިސްގެ އިތުރުން ޚާއްސަ މެހެމާނުންގެ ގޮތުގައި މަޝްހޫރު އެކްޓަރު ޖެކީ ޝްރޮފް، ތަމަންނާ ބާޓިއާ އަދި ސިދާތު މަލޯތުރާވެސް ބައިވެރިވިއެވެ.

މުބާރާތުގެ ކާމިޔާބީއަށްފަހު ވާހަކަދައްކަމުން ރިތޭޝް ޕާލް ބުނީ، ނެށުމަކީ އަބަދުވެސް އޭނާ އެންމެ ކުރާހިތްވާ ކަންތައް ކަމަށާއި، މި ޝޯވ ކާމިޔާބުވުމަކީ ދެކެމުން އައި ހުވަފެނެއް ހަޤީޤަތަކަށް ވުން ކަމަށެވެ. އަދި އޭނާގެ މި ދަތުރުގައި އެހީތެރިވެދިން ހުރިހާ ޖަޖުންނަށާއި، ޚާއްސަކޮށް އޭނާއަށް އިތުބާރުކޮށް މަގުދައްކައިދިން ކޮރިއޮގްރާފަރު ޕްރަތީކް އުޓޭކަރަށް ވަރަށް ބޮޑަށް ޝުކުރު އަދާކުރާ ކަމަށްވެސް ރިތޭޝް ބުންޏެވެ.

ކޮރިއޮގްރާފަރު ޕްރަތީކް އުޓޭކަރު ބުނީ، އޭނާގެ ދަރިވަރު ރިތޭޝްއާއެކު މި ތަށި އުފުލައިލަން ލިބުމަކީ ވަރަށް ފަޚުރުވެރި އަދި އަސަރުގަދަ ވަގުތުކޮޅެއް ކަމަށެވެ. އަދި މުބާރާތުގައި ދިމާވި ހުރިހާ ގޮންޖެހުންތަކަކުން އަރައިގަނެ، އެކުގައި ކުރި ބުރަ މަސައްކަތުގެ ނަތީޖާ ފެނުމުން އިންތިހާއަށް އުފާވާ ކަމަށްވެސް އޭނާ ފާހަގަކުރިއެވެ.

ރިތޭޝްއަށް މުބާރާތުގެ ތަށްޓާއެކު 15 ލައްކަ ރުޕީސްގެ ފައިސާގެ އިނާމު ލިބުނުއިރު، ދެވަނަ ލިބުނު އަންޝިކާއަށް 3 ލައްކަ ރުޕީސް އަދި ޕްރަތަމޭސްއަށް 2 ލައްކަ ރުޕީސްގެ ފައިސާގެ އިނާމެއް ވަނީ ހަވާލުކޮށްފައެވެ.