އިންޑިއާގެ މަޤުބޫލު ރިއަލިޓީ ޝޯވ “ބިގް ބޮސް 20” އަށް ވައިލްޑް ކާޑް އެންޓްރީއެއްގެ ގޮތުގައި ވަންނަން އުޅޭކަމަށް ދެކެވެމުންދާ ވާހަކަތައް މަޝްހޫރު ޓީވީ އެކްޓަރު ކަރަން ވާހީ ދޮގުކޮށްފިއެވެ.
މި އަޑުތައް ގަދަވެގެން ދިޔައީ ކަރަން އޭނާގެ އިންސްޓަގްރާމް ސްޓޯރީގައި “އުނޯ” ކާޑު ކުޅުމުގެ ތެރޭގައި ހިމެނޭ “ވައިލްޑް ކާޑު” ފެންނަ ފޮޓޯއެއް ހިއްސާކުރުމާ ގުޅިގެންނެވެ. ގިނަ ބަޔަކު ވަނީ އެއީ އޭނާ ބިގް ބޮސް ޝޯވއަށް ވަންނަން އުޅޭކަމުގެ އިޝާރާތެއްގެ ގޮތުގައި މާނަކޮށްފައެވެ. އަދި މި ޝޯވގައި މިހާރު ވާދަކުރަމުންދާ ބައިވެރިންގެ ތެރޭގައި ކަރަންގެ ކުރީގެ ލޯބިވެރިޔާ އުދިތީ ސިންގް ހިމެނޭތީ މި ވާހަކަތަކަށް އިތުރު ސަމާލުކަމެއް ލިބުނެވެ.
ނަމަވެސް އިންސްޓަގްރާމް މެދުވެރިކޮށް ސަޕޯޓަރުންނާ ވާހަކަދައްކަމުން ކަރަން ވަނީ މި އަހަރުގެ ބިގް ބޮސް ޝޯވގައި އޭނާ ބައިވެރިނުވާނެ ކަމަށް ސާފުކޮށް ބުނެފައެވެ. ސަޕޯޓަރަކު ކުރި ސުވާލަކަށް ޖަވާބު ދެމުން ކަރަން ބުނީ އޭނާގެ ޕޯސްޓަކީ އެއްވެސް އިޝާރާތެއް ނޫން ކަމަށާއި، އެއީ ހަމައެކަނި “އުނޯ” ކުޅުމުގައި އޭނާއަށް އެންމެ ކަމުދާ ކާޑުގެ ވާހަކަ ކަމަށެވެ. އަދި ކޮންމެ އެއްޗެއްގެ މާނަ އެހެން ގޮތަކަށް ނެގުމުގެ އާދަ ދޫކޮށްލުމަށްވެސް އޭނާ ވަނީ މަޖާޒީ ގޮތަކަށް އެދިފައެވެ.
“އަހަރެން ބިގް ބޮސްއަކަށް ނުދަން. ތި ވިސްނުން ދޫކޮށްލާ. ހަމަގައިމުވެސް މި އަހަރަކު އަހަރެން އެ ޝޯވއަކުން ނުފެންނާނެ.” ކަރަން ބުންޏެވެ.
މި އަޑުތަކާ ގުޅިގެން، ބިގް ބޮސް ގޭގެ ތެރޭގައި އެހެން ބައިވެރިންނާ ވާހަކަދައްކަމުން އުދިތީ ސިންގްވެސް ވަނީ އޭނާގެ ވިސްނުން ހާމަކޮށްފައެވެ. އުދިތީ ބުނީ އޭނާ މިހާރު ދިރިއުޅުމައިގެން ކުރިއަށް ގޮސްފައިވާ ކަމަށާއި، ކަރަން އެ ޝޯވއަށް އަޔަސް އޭނާއަށް ވާނީ އެހެން އާދައިގެ ބައިވެރިއަކަށް ކަމަށެވެ.
ކަރަން ވާހީއަކީ އިންޑިއާގެ ޓީވީ ޑްރާމާތަކުން ބެލުންތެރިންގެ ބޮޑު މަޤުބޫލުކަމެއް ހޯދާފައިވާ ތަރިއެކެވެ. އޭނާ އެންމެ ފުރަތަމަ ފެނިގެންދިޔައީ “ރީމިކްސް” އިންނެވެ. އޭގެ ފަހުން “ދިލް މިލް ގަޔޭ” ގައި ޑރ. ސިދާންތު މޯދީގެ ރޯލުން ގިނަ ބައެއްގެ ލޯބި ހޯދިއެވެ. މީގެ އިތުރުން “ބާތު ހަމާރީ ޕައްކީ ހޭ”، “ކުޗް ތޯ ލޯގް ކަހޭންގޭ”، “މޭރޭ ގަރް އާއީ އޭކް ނަންހީ ޕަރީ” ފަދަ ޑްރާމާތަކާއި “ހޭޓް ސްޓޯރީ 4” އަދި “އާޕް ޖެއިސާ ކޯއީ” ފަދަ ފިލްމުތަކުގައިވެސް އޭނާ ވަނީ މަސައްކަތްކޮށްފައެވެ. އަދި “ނަޗް ބަލިޔޭ” އަދި “އިންޑިއަން އައިޑޯލް” ފަދަ ޝޯވތަކުން ހޯސްޓެއްގެ ގޮތުގައިވެސް އޭނާ ވަނީ ބޮޑު މަޤުބޫލުކަމެއް ހޯދާފައެވެ.
