ހޮލީވުޑްގެ މަޝްހޫރު ދެ ތަރިން ކަމަށްވާ މެޑެލިން އާތަރ އަދި ޑިއާން ޑޯން، އަލަށް އުފައްދާ ސައިކޮލޮޖިކަލް ހޮރޯ ފިލްމު “ޑޫލާ” ގެ ލީޑު ރޯލުން ފެނިގެންދާނެ ކަމަށް ރިޕޯޓުތައް ބުނެފިއެވެ.
މަޝްހޫރު މީޑިއާ “ޑެޑްލައިން” އިން ރިޕޯޓުކޮށްފައިވާ ގޮތުގައި، ހަޤީޤީ ހާދިސާތަކެއްގެ މައްޗަށް ބިނާކޮށް އުފައްދާ މި ފިލްމުގެ ވާހަކަ ލިޔެ، ޑައިރެކްޓް ކުރަނީ ގޯލްޑީ ޖޯންސެވެ.
މި ފިލްމުގެ ވާހަކަ ބިނާވެފައިވަނީ، އެކަހެރި ފަރުބަދަމަތީގެ ކެބިންއެއްގައި އުނދަގޫ ވިހެއުމެއްގެ ތެރޭގައި، ބަނޑުބޮޑު އަންހެނަކާއި އޭނާގެ ޑޫލާ ނުވަތަ ވިހެއުމުގައި އެހީތެރިވާ މީހާއާ ދެމެދު ހިނގާ ނުރައްކާތެރި އަދި ބިރުވެރި ކަންތައްތަކެއްގެ މައްޗަށެވެ.
މި ފިލްމުގެ ޕްރިންސިޕަލް ފޮޓޯގްރަފީގެ މަސައްކަތް ބުރާސްފަތި ދުވަހު ކެނެޑާގެ މެނިޓޯބާގެ ވިންނިޕެގްގައި ފެށުމަށް ވަނީ ހަމަޖެހިފައެވެ. މި މަޝްރޫއަކީ މެނިޓޯބާ ފިލްމް އެންޑް މިއުޒިކް ޓެކްސް އިންސެންޓިވްގެ އެހީތެރިކަމާއެކު ކުރިއަށްގެންދާ މަސައްކަތެކެވެ.
މި ފިލްމު ޕްރޮޑިއުސް ކުރުމުގައި ޖޭމްސް ޖޭ ޔީ، ޖަޑް ޓިލްޔާޑް، އެލިސް ޓިއުފެކް އަދި ވެރިޓީ ފިކްޝަން ހަރަކާތްތެރިވާނެއެވެ. އަދި އެގްޒެކެޓިވް ޕްރޮޑިއުސަރުންގެ ގޮތުގައި އެންޑްރިއާ ޗުންގްއާއެކު ކާވެލް ރޮކް ޕިކްޗާސް އަދި ކްރިސްޓިން އެސްޓޯނިނޯސް ބައިވެރިވެއެވެ.
އުމުރުން 29 އަހަރުގެ މެޑެލިން އާތަރއަކީ “ޑެވިލް އިން އޮހާޔޯ”، “ޓު އޯލް ދަ ބޯއިސް” ފްރެންޗައިޒް އަދި “ކަލަރ އައުޓް އޮފް ސްޕޭސް” ފަދަ ކާމިޔާބު އުފެއްދުންތަކުން ފެނިގެން ގޮސްފައިވާ ފަންނާނެކެވެ. މީގެ އިތުރުން، އުމުރުން 36 އަހަރުގެ ޑިއާން ޑޯންއަކީ ޑިޒްނީގެ “ޑިސެންޑެންޓްސް” އިން މަޝްހޫރުކަން ހޯދައި، “ވޮރިއަރ”، “ރީޔޫނިއަން” އަދި “ބެޓަރ ހާފް” ފަދަ ޕްރޮޖެކްޓްތަކުން ވިދާލާފައިވާ ތަރިއެކެވެ.
