ބޮލީވުޑްގެ މަޝްހޫރު ތަރިން ކަމަށްވާ ޖެކީ ޝްރޮފް އަދި ޝަރަދު ކެލްކަރް މުހިންމު ރޯލުތަކުން ފެނިގެންދާ އާ ބިރުވެރި ފިލްމު “ކާލީ ކޭތީ” މި އަހަރުގެ އޮކްޓޫބަރު މަހުގެ 23 ވަނަ ދުވަހު ސިނަމާތަކުގައި އެޅުވުމަށް ނިންމައިފިއެވެ. ފިލްމު ރިލީޒްކުރާ ތާރީޚު އިޢުލާނުކޮށްފައިވަނީ ފިލްމުގެ ފުރަތަމަ ޕޯސްޓަރާއެކުގައެވެ.
ހާރިސް އިމްތިޔާޒް ޚާން ލިޔެ ޑައިރެކްޓްކޮށްފައިވާ މި ފިލްމުގެ ފުރަތަމަ ޕޯސްޓަރުން ބިރުވެރި މާހައުލެއް ދައްކުވައިދިން ނަމަވެސް، ފިލްމުގެ އަސްލު ވާހަކައިގެ ސިއްރުތައް އަދި ވަނީ ހާމަނުކޮށް ހިފަހައްޓާފައެވެ.
“ކާލީ ކޭތީ” ގެ ޕޯސްޓަރެއް / ފޮޓޯ: ގޫގަލް
މި ފިލްމަކީ ދަނޑުވެރިކަމުގެ ދާއިރާއާ ގުޅުވައިގެން ތަފާތު ގޮތަކަށް ގެނެސްދޭ ބިރުވެރި ފިލްމެކެވެ. ފިލްމާ ގުޅޭގޮތުން ޑައިރެކްޓަރު ހާރިސް އިމްތިޔާޒް ބުނެފައިވަނީ، “ކާލީ ކޭތީ” އަކީ ދަނޑުވެރިކަމުގެ ދުނިޔެ ބިރުވެރި ނަޒަރަކުން ދައްކުވައިދޭ ފިލްމެއް ކަމަށެވެ. އަދި މިއީ މީގެ ކުރިން ފެނިފައިނުވާ ފަދަ އާ، ޝައުޤުވެރި އަދި އެހާމެ ބިރުވެރި ތަޖުރިބާއަކަށް ވާނެ ކަމަށްވެސް އޭނާ ފާހަގަކުރިއެވެ.
ރަށްފުށުގެ މާހައުލަކަށް ބިނާކޮށް އުފައްދާފައިވާ މި ފިލްމުގެ މައިގަނޑު ވާހަކަ އެކުލެވިގެންވަނީ ޢާއިލާއާއި، ވާރުތަވަމުން އަންނަ ކަންކަމުގެ އިތުރުން ފަސްއަޅައި ފޮރުވާފައިވާ ބޮޑެތި ހަޤީޤަތްތަކެއްގެ މައްޗަށެވެ.
ޖެކީ ޝްރޮފް އަދި ޝަރަދު ކެލްކަރްގެ އިތުރުން ނޭހާ ސަރްގަމް، ވިރެންދުރަ ސަކްސޭނާ އަދި ޝާޖީ ޗައުދަރީވެސް މި ފިލްމުގެ މުހިންމު ރޯލުތަކުން ފެނިގެންދާނެއެވެ.
ބްލެކްކެންވަސް ސްޓޫޑިއޯގެ ދަށުން ސަނާ ޚާން ޕްރޮޑިއުސްކުރާ “ކާލީ ކޭތީ” އަކީ ބިރުވެރި ފިލްމުތަކަށް ލޯބިކުރާ ފަރާތްތަކަށް ތަފާތު ރަހައެއް ގެނެސްދޭނެ ފިލްމަކަށް ވާނެ ކަމަށް ބެލެވެއެވެ.
