ޒޯޔާ ފަހަތުން އާފިޔާއަށް ގޮވަމުން ދިޔައެވެ. އޭރުވެސް އަޔާންގެ ގެލެރީއިން އެ ރާގު ކުޅޭ އަޑު އިވެމުން ދިޔައެވެ. އާފިޔާ މަޑުވެސްކޮށްނުލާ ދިޔައިރު އަޔާން ހުރީ ދޮރަށް ފުރަގަސްދީގެން ދޮރާއި ދިމާލުގައެވެ. އާފިޔާ ދިޔަ ބާރުމިނުގައި އަތުގައި ހުރި ބާރެއްލާފައި ދޮރު ހުޅުވާލިއެވެ. ދޮރުން އަޔާންގެ ގައިގައި ޖެހުނުލެއް ބާރުކަމުން އޭނާގެ އަތުން ގިޓާ ދޫވެގެން ވެއްޓުނެވެ. ވެއްޓި ޖެހުނު ގޮތަކުން ގިޓާގެ ނަރު ކަނޑައިގެން ދިޔައެވެ.
“އަހަރެންގެ ގިޓާ.” އަޔާންއަށް ބޮލުގައި ހިފަހައްޓާލަމުން ބުނެލިއެވެ.
“ރަނގަޅޭ އެ ހަލާކުވިކަން. ނޫންނަމަ އަހަރެން އެ ހަލާކުކޮށްލީމުސް.” އާފިޔާ ރުޅިވެރިކަމާއެކު އެހެން ބުނެލި ވަގުތަކީ ޒޯޔާއަށް އެހިސާބަށް މަޑުކޮށްލެވުނު ވަގުތެވެ.
“ހިނގާ ދާން ޒޯޔާ.” އާފިޔާ ދާން ހިނގައިގަންނަމުން ބުނެލިއެވެ. އަޔާން ޒޯޔާއަށް ބަލައިލިއިރު އެ ލޮލުގައިވަނީ ހިތާމައާއި ރުޅި އެކުވެފައެވެ. ޒޯޔާ އެއްފަހަރު ގިޓައަށް އަނެއްފަހަރު އަޔާންއަށް ބަލާލުމަށްފަހު، އާފިޔާ ދިޔަ ދިމާއަށް ބަލައިލީ ނުރުހުމާއެކުއެވެ. އަދި ބާރު ހިނގުމެއްގައި އާފިޔާގެ ފަހަތުން ދިޔައެވެ.
އާފިޔާ ބާރު ހިނގުމުގައި ގޮސް ކާރަށް އަރަން ދިމާކޮށްލި ވަގުތު ޒޯޔާ ދުވެލާފައި ކަހަލަ ގޮތަކަށް ގޮސް އޭނާ ހުއްޓުވިއެވެ. އަދި ދޮރުފަތުން އޭނާގެ އަތް ނައްޓުވާލުމަށްފަހު ބާރަށް ދޮރު ޖެހިއެވެ.
“މަންމާ. މަންމަ ތިކުރީ ކީއް؟ މަންމަ ތި ހަލާކުކޮށްލީ އޭނަގެ ގިޓައޭ.” ޒޯޔާ ނުރުހުމާއެކު ބުންޏެވެ.
“އެ ގިޓާ ހަލާކުވާނެކަމެއް އަހަންނަކަށް ނޭނގެ. އަހަރެން ބޭނުންވީ އޭނާ އެ ރާގު ޖެހުން ހުއްޓުވަން. ސަބަބަކީ އެ ރާގު އަޑުއިވުނީމަ ކަލޭގެ ހާލަތު ގޯސްވާތީ. އަދި ކުރިން ވީފަދަ ކަންތައްތަކެއް ތަކުރާރުވާން އަހަރެން ބޭނުން ނުވާތީ.” އާފިޔާ ހުރީ ޒޯޔާ އަޔާންއާ އެއްކޮޅަށް ވާހަކަ ދެއްކީތީ ހިތްހަމަނުޖެހިފައެވެ.
“އެއީ އޭނަގެ ގެލެރީ، އޭނަގެ ގިޓާ. އޭނަ ގިޓާ ކުޅުން ހުއްޓުވަން އަހަރެމެން މީ ކޮންބައެއް؟ މަންމަގެ ސަބަބުން މިއަދު އޭނަގެ ގިޓާ އެ ހަލާކުވީ. ކުޑަމިނުން މަންމަ އޭނަގެ ކިބައިން މާފަށް އެދެން ޖެހޭނެ.” ޒޯޔާ ހިތްހަމަނުޖެހިފައި ބުންޏެވެ.
އާފިޔާ ޒޯޔާއަށް ބަލައިލީ ޤަބޫލު ނުކުރެވިފައެވެ. އެއަށްވުރެ ބޮޑަށް އޭނަގެ “އީގޯ” އަށް އަނިޔާ ލިބުނެވެ.
“ކީކޭ ތިބުނީ!؟ އޭނަ ކިބައިން މާފަށް އެދޭށޭ!؟ ޒޯޔާ، ތިޔަށްވުރެ ބޮޑު އިންސަލްޓެއް އަހަންނަކަށް ނޯންނާނެ.” އާފިޔާ ބުނެލިއެވެ.
“އަމިއްލަ ކުށް ޤަބޫލުކުރުމަކީ އިންސަލްޓެއް ނޫން މަންމާ.” ޒޯޔާ ހައިރާންވެފައި ބުންޏެވެ. އާފިޔާގެ މި ސިފައަކީ އޭނައަށް ޤަބޫލުކުރަން ދަތި ސިފައެކެވެ.
“ޒޯޔާ! އަހަންނަކީ ކަލޭގެ މަންމަ. ކަލެއެއް ނޫން އަހަރެންގެ މަންމައަކީ. ރަނގަޅާއި ނުބައި ގޮތް އަހަންނަށް ކިޔައިދޭން ނޫޅޭ. ދެން އޭނަ ކިބައިން މާފަށް އެދުމުގެ ވާހަކަ. ހަނދާން ނައްތާލާ!” އާފިޔާގެ އަޑުގައި ހަރުކަށިކަންވިއެވެ.
“މަންމަގެ ފަރާތުން އަހަރެން މިކަހަލަ ކަމަކަށް އުއްމީދެއް ނުކުރަން. އަހަރެން ވަރަށް ބޮޑަށް ޑިސެޕޮއިންޓް ވެއްޖެ.” ޒޯޔާ މާޔޫސްވެފައި ބުންޏެވެ.
“ޒޯޔާ ކޮންއިރަކު އޭނައާ އެއްކޮޅަށް ވަކާލާތުކުރަން ފެށީ؟” އާފިޔާ ނުރުހުމާއެކު އެހިއެވެ. ދުލުން ހާމަނުކުރިޔަސް އޭނާގެ ހިތުގައި ބިރުވެރިކަމެއް ހިނގާލިއެވެ.
“އަހަރެން އޭނައާ އެއްކޮޅަކަށް ވާހަކައެއް ނުދައްކަން. އަހަރެން މި ވާހަކަ ދައްކަން ކަން އޮތްގޮތަށް. މަޑުމަޑުން އޭނަ އަހަންނަށް އުނދަގޫކުރުން ހުއްޓާލާފައި ވަނިކޮށް، މަންމަ އަނެއްކާވެސް އިތުރު މައްސަލައެއް ތި އުފެއްދީ. ދެން އޭނަ ހަދާނެ ގޮތެއްވެސް ނޭނގެ. އަހަންނަށް ހީވަނީ ދެން އޭނަ މުޅި އުމުރަށްވެސް އަހަންނަށް އުނދަގޫ ކުރާނެހެން. އަދި އަހަރެމެން ދެމީހުންގެ ދެމެދުގައި އޮތް ދެކޮޅުވެރިކަން މަޑުމަޑުން ނިމުމަކަށް އަންނަނިކޮށް، މަންމަ އެކަންވެސް ތި ހަލާކުކޮށްލީ.” ޒޯޔާ ބުނީ އޭނާގެ ހިތުގައި އޮތް ގޮތަށެވެ.
“އަހަރެން ބޭނުންވަނީވެސް އެގޮތް. ކަލޭ ދެވަނަ ފަހަރަށް އޭނަގެ މަޅީގައި ޖެހޭކަށް އަހަރެން ބޭނުމެއް ނޫން. ކުރިންވެސް އޭނަގެ މަޅީގައި ޖެހިގެން…” ހިތްހަމަނުޖެހިފައި ހުރިވަރުން ނުބުނަންވީ ވާހަކައެއް ބުނެވޭކަން އާފިޔާއަށް އިޙުސާސްވީ ބޮޑު ބައެއް ބުނެވުނު ފަހުންނެވެ. ވުމާއެކު އޭނަ އަވަހަށް ހުއްޓާލިއެވެ.
އާފިޔާ ވާހަކަ މެދުކަނޑާލި ނަމަވެސް އޭނާ ބުނި ވާހަކަ ޒޯޔާގެ ސަމާލުކަމަށް ނައިހެއް ނުދިޔައެވެ. “ކީކޭ؟”
“އެއްޗެއް ނޫން. އަހަރެން މި ދަނީ.” ޒޯޔާއަށް އިތުރު އެއްޗެއް ބުނާނެ ފުރުސަތެއްވެސް ނުދީ އާފިޔާ އަވަސްއަވަހަށް ކާރަށް އަރައި ނައްޓާލައިފިއެވެ.
ޒޯޔާ އާފިޔާގެ ކާރު ދިޔަ ދިމާލަށް ބަލަން ހުރީ ވަރަށް ހިތްހަމަނުޖެހިފައެވެ.
**********
އާޓް ގެލެރީގެ ތެރޭގައި އަޔާންގެ ގިޓާ ކައުންޓަރު މަތީގައި ބާއްވާފައި އޮތެވެ. އަޔާން ހުރީ ކައުންޓަރު ކައިރީގައި ދޮރަށް ފުރަގަސްވާ ގޮތަށެވެ. އޭނާއަށް އެ ގިޓާ ޚާއްސަވީ ވަކި ސަބަބެއް ހަނދާން ނެތް ނަމަވެސް އެ ގިޓައަކީ ކިހާ ޚާއްސަ އެއްޗެއްކަން އޭނައަށް އިޙުސާސް ކުރެވެއެވެ. އޭނާގެ ލޮލުގައި ކަރުނައިގެ އަސަރު ވިއެވެ.
“އަޔާން. އަހަރެމެން ތި ގިޓާ އަލުން މަރާމާތު ކުރާނީ.” އަޔާން ދެރަވެފައި ހުރިވަރު ފެނިފައި ނަތާޝާ ބުނެލިއެވެ.
“މީތި ދެން ރަނގަޅެއް ނުކުރެވޭނެ. އެއްވެސް އެއްޗެއް ހަލާކުވުމަށްފަހު މަރާމާތުކޮށްގެން ކުރިން ހުރި ގޮތެއް ނުހުންނާނެ ނަތާ.” އަޔާން ނަތާޝާއާ ދިމާއަށް އެނބުރިވެސްނުލައި ހުރެ ބުނެލިއެވެ.
“ނަތާ. އަހަންނަކަށް ނޭނގެ…” އަޔާން ބުނަން ފެށި ޖުމްލަ މެދުކަނޑާލީ އިސްޖަހައިގެން ހުރެ ގެލެރީ ތެރެއަށް ވަދެގެން އައި ޒޯޔާ ފެނުމުންނެވެ. ޒޯޔާ ފެނުމާއެކު އަޔާންއަށް ރުޅިގަނޑު ކޮންޓްރޯލެއް ނުކުރެވުނެވެ.
“ކީއްކުރަން މިތަނަށް ތިއައީ؟ ނުކުމޭ މިތަނުން. މިބުނީނު ނުކުންނާށޭ!” އަޔާން ހަޅޭއްލަވައިގަތެވެ.
“އަހަރެން.. އަހަރެން މިއައީ..”
“އަހަރެން.. މިއައީ.. ކީއްކުރަން؟ އިތުރު އެއްޗެއް ހަލާކުކޮށްލަންތަ؟ ކަލޭގެ މަންމަ ނުނިންމާ ދިޔަ ކަންތައް ނިންމަންތަ ތި އައީ؟ މަޑުކުރޭ.” އަޔާން ޒޯޔާގެ ވާހަކަ މެދުކަނޑާލުމަށްފަހު ފައްޗަކަށް އެތިވަރު ގޮވައިގަނެފައި ގޮސް އޭނާ ވަރަށް މަސައްކަތުން ތައްޔާރުކޮށްފައި ހުރި އެއްޗެއް ހިފައިގެން އައިސް ޒޯޔާއަށް ދިއްކޮށްލިއެވެ.
“އަން، މީގަ ހިފާ.” ޒޯޔާއަށް ކުރެވުނުހާވެސް ކަމަކީ އިސްޖަހާލައިގެން ހުރުމެވެ. ދެރައާއި އެއްވަރަށް ޒޯޔާ ހުރީ އާފިޔާގެ ސަބަބުން ލަދުވެސް ގެންފައެވެ.
“އަން، މީގަ ހިފާބަލަ. މިވެސް ހަލާކުކޮށްލާ. މުޅި މި ތަންވެސް ހަލާކުކޮށްލާ. އެޔެއްނު ނުވެގެން ތި އުޅޭ ކަމަކީ.” ޒޯޔާ އިސްއުފުލާ ބަލައިލިއެވެ. އޭނާގެ ދެލޯ ވަނީ ފެންކަޅިވެފައެވެ.
“ނަތާ، އަހަންނަކަށް ނޭނގެ މީހުން މިހާ ނުލަފާވަނީ ކީއްވެގެން ކަމެއް. ފައިސާގެ ބާރުގައި މުޅި ދުނިޔެ ގަންނަން ބޭނުންވަނީ ކީއްވެ ކަމެއް. އަހަރެމެންނަކީ ވެސް އިންސާނުން. އެކަމަކު އަހަރެމެންގެ އިޙުސާސްތަކާއި ގުޅިފައިވާ ކަންކަމަށްވެސް އެއްވެސް އިޙުތިރާމެއް ނެތް.” އަޔާން އެހެން ބުނެފައި ގޮސް އޭނާގެ ހަލާކުވެފައިވާ ގިޓާ ބާއްވާފައި އޮތް ކައުންޓަރު ކައިރީ މަޑުކޮށްލިއެވެ.
“ބައެއް މީހުންނަށް މިއީ ހަމައެކަނި ގިޓައަކަށް ވިޔަސް އަހަންނަށް މިއީ ހަމައެކަނި ގިޓައެއް ނޫން. މިއީ އަހަރެންގެ ދިރިއުޅުމުގެ ބައެއް.” އަޔާން އެ ގިޓާގައި އަތް ހާކާލީ ހިތުގައި ފިރުމާލި ފަދައިންނެވެ.
“މިއަދު މި މިވަނީ ހަލާކުވެފައި، ހަމައެކަނި ކަލޭގެ މަންމަގެ ސަބަބުން. އަހަންނަށް އުޅެއުޅެ ނުވިސްނުނު ކަލޭގެ މަންމަގެ އަހަންނާ އޮތީ ކޮން ދެކޮޅުވެރިކަމެއް ކަމެއް. އަހަރެންގެ އަމިއްލަ ގެލެރީގައި ހަމަޖެހިލައިގެން ގިޓާ ކުޅެން ހުއްޓާ، ކަލޭގެ މަންމަ އައިސް އަހަރެންގެ ގިޓާ ހަލާކުކޮށްލުމުގެ ކޮން ޙައްޤެއް އޮތީ ކަލޭގެ މަންމައަށް؟ އޭނ. އަހަންނަށް އެނގޭ މީ ނޭނގުމެއްގެ ތެރޭގައި ވީ ކަމެއް ނޫންކަން. ހަމަ ގަސްތުގައި ކުރި ކަމެއްކަން. ނޫންނަމަ ގެލެރީ ބަންދު ގަޑިއެއްގައި އަހަރެން އެތާ ދޮރު ކައިރީ ހުއްޓާ އައިސް ގައިގައި ހުރި ބާރެއް ލާފައި ދޮރެއް ނުހުޅުވާނެ. ގިޓާ ހަލާކުވުމުގެ އިތުރަށް އަހަރެންގެ އަތަށްވެސް ވަރަށް ތަދުވި. ކަލޭ ކީއްވެތަ މިތަނަށް އައިސް އަނގަ ހިމޭނުން ލައިގެން ތި ހުންނަނީ؟ ދޭބަލަ ކަލޭގެ ކެފޭއަށް. ގޮސް ޕާޓީއެއް ބާއްވާ. މިކަން ފާހަގަކުރަން ޖެހޭނެއެއްނު. ދޭ މިތަނުން.” އަޔާން ހަޅޭއްލަވައިގަތެވެ.
އަޔާންގެ އަޑަށް ޒޯޔާ ސިހުނެވެ. ނަތާޝާ އަވަސްއަވަހަށް އައިސް އަޔާންގެ އަތުގައި ހިފެހެއްޓީ އޭނާގެ އަތުން ގޯހެއް ހަދާފާނެތީއެވެ.
“އަހަރެން މިއައީ ހަމައެކަނި މަންމަގެ ފަރާތުންނާއި އަހަރެންގެ ފަރާތުން މާފަށް އެދެން.” ޒޯޔާ އެހެން ބުނުމަށްފަހު، އަޔާން އޭނާގެ އަތަށް ދިން އެތި ރެކެއްގެ މަތީ ބެހެއްޓުމަށްފަހު އަވަސް ފިޔަވަޅުތަކެއްގައި ގެލެރީއިން ނުކުންނަން ހިނގައިގަތެވެ. އޭރު އޭނާގެ ދެލޮލުން ކަރުނަ އޮހެން ފަށައިފިއެވެ.
“އަޔާން. ތި ރުޅި މަޑުކޮށްބަލަ. ޒޯޔާގެ މަންމަ ކުރި ކަމެއްގެ ރުޅި އޭނައަށް ތި ބާލަނީ ކީއްކުރަން؟ ހަމަޖެހިބަލަ. އަހަރެމެން އާ ގިޓައެއް ހޯދާނީ.” ނަތާޝާ އަޔާންގެ ކޮނޑުގައި ހިފާލަމުން ކައުންޓަރު ކައިރީ ހުރި ގޮނޑީގައި ބޭންދިއެވެ.
**********
އާފިޔާ ގެއަށް އައީ މެންދުރުވީ ފަހުންނެވެ. އޭނާ ހީވަނީ ރުޅިއައިސްގެން ފަޅަފަޅައިގެން ހިނގައިދާނެހެންނެވެ. އޭނާ ބާރު ހިނގުމެއްގައި ގޮސް ސިޑިއަށް އަރަނިކޮށް ރަފިއްޔާއާ ދިމާވިއެވެ.
“މެޑަމް ތި އައީތޯ؟”
“ނޫން. ފުރޭތައެއް މިއައީ.” އާފިޔާ ރުޅިއައިސްގެން ބުންޏެވެ.
“އެހެނެއް ނޫން މެޑަމް. މެންދުރުގެ ކެއުން ތައްޔާރުކުރަންތޯ؟”
“ކާން ބޭނުންވާ މީހުން ގާތު އަހާ! އަހަރެން ނޫޅެން ނުކެވިގެންނެއް.”
“މެޑަމް، އޭގެ މާނައަކީ މިއަދު ގޭގައި ކެއުން ތައްޔާރު ނުކުރަންވީއޭތޯ؟ ބޭރުން ކައިގެންތޯ ތި އައީ؟” ރަފިއްޔާ އަނެއްކާވެސް އެހިއެވެ.
“ރަފިއްޔާ! މިއަދު އަހަރެން ނުކާނަމޭ!” އާފިޔާ އަޑަށް ބާރުލާފައި ބުންޏެވެ.
“ކިހިނެއްތޯ ވީ މެޑަމް؟ ހާލުކޮޅު ރަނގަޅުތޯ؟” ރަފިއްޔާ ކަންބޮޑުވެފައި އެހިއެވެ.
“ރަފިއްޔާ މާ ސުވާލު ގިނަވެގެން ތިއުޅެނީ ކީއްވެތަ؟ ގޮސް ކުރަން ހުރި މަސައްކަތްތައް ކޮށްބަލަ! ދާންއުޅޭ!” ރަފިއްޔާގެ ސުވާލުތަކުން އުނދަގޫވެގެން އާފިޔާ ހަޅޭއްލަވައިގަތެވެ.
އެހެންޏާ މެންދުރު ގަޑީގައި ގެއަށް ނާންނަ ޒޯޔާ އެދުވަހު ގެއަށް އަތުވެއްޖެއެވެ. ރަފިއްޔާ ގާތު ނުކާނެ ކަމަށް ބުނެފައި އޭނާ ގޮސް ކޮޓަރިއަށް ވަނެވެ.
*********
މެންދުރު ކެއުމަށް އެކަކުވެސް ކާމޭޒުދޮށަކަށް ނާދެއެވެ. އެހެންކަމުން ނަސީރު ރަފިއްޔާ ގާތު އެހިއެވެ.
“އަޅުގަނޑު ކީކޭތޯ ދަންނަވާނީ. ދެފަހަރު އެހިން. މެޑަމްވެސް ޒޯޔާވެސް ބުނީ މިއަދު ނުކާނެ ކަމަށް.” ރަފިއްޔާ ބުންޏެވެ.
“އެ ދެމީހުން ޒުވާބުކުރީތަ؟”
“ހީވަނީ އެހެންހެން. ވާހަކަ ދައްކާތަނެއް ނުފެނޭ.” ރަފިއްޔާ ބުންޏެވެ.
“ހަމަ އެއްކަހަލަ ދެމީހުން އެއީ. ނުލާހިކު ގޮތްދޫނުކުރާނެ. ދެން ހުރިހާ ކަމެއް ހުއްޓާލާފަ މި ޖެހުނީ އެ ދެމީހުން ރުއްސަން ދާކަށްނު.” ނަސީރު ބޯ ހޫރާލަމުން ބުނެލިއެވެ. ރަފިއްޔާ ހިނިތުންވެލިއެވެ.
ނަސީރު ގޮސް ޒޯޔާގެ ކޮޓަރި ކައިރީގައި މަޑުކޮށްލިއެވެ. ކޮޓަރީގެ ދޮރު ހުރީ ރީއްޗަށް ނުލައްޕައެވެ. އޭރު ޒޯޔާ އޮތީ އެނދުގައި ބަންޑުން އޮށޯވެލައިގެންނެވެ. އޭނާ ދޮރުގައި ޓަކިޖަހާލިއެވެ.
ޒޯޔާ ތެދުވެ އެނދުގައި އިށީނދެލަމުން ހެދުން ރީތިކޮށްލިއެވެ. ނަސީރު އެތެރެއަށް ވަނެވެ. ޒޯޔާގެ ގާތުގައި އެނދުގައި އިށީންނަމުން ނަސީރު ވީގޮތް އަހާލިއެވެ. ޒޯޔާ މިއަދު ވީ ކަންތައް ކިޔައިދިނެވެ. ނަސީރު ވާހަކަދެއްކީ އާފިޔާ އާއި ޒޯޔާގެ ދެމެދުގައި ސުއްޙަވާނެ ގޮތަށެވެ.
“ބައްޕާ. ބައްޕަ ތި ދެއްކި ވާހަކަ ރަނގަޅޭ. އޭގެ މާނައަކީ އަހަރެންގެ ވާހަކަ ގޯހެކޭ ނޫން. ކޮންމެ ގޮތެއް ވިޔަސް، ހަޤީޤަތަކީ އޭނަ އޭނަގެ އަމިއްލަ ގެލެރީގައި ގިޓާ ކުޅެން އިނީ. އެ ރާގުގެ ސަބަބުން އަހަންނަށް އަސަރުކުރީ. އެކަމަކު އޭގަ އޭނަގެ ކުށެއް ނެތް. އޭނައަށް އެކަމެއް ނުވެސް އެނގޭނެ ބައްޕާ. ދެން ވީކަމެއް ވީ. ކަންތައް ގޯސްވެ ގިޓާވެސް ހަލާކުވީ. އެކަމަކު ކުޑަމިނުން މަންމަ އޭނަ ކިބައިން މާފަށް އެދެން ޖެހޭނެއެއްނު ބައްޕާ.” ޒޯޔާ އޭނާގެ ހިތް ޤަބޫލުކުރާ ގޮތް ބުންޏެވެ.
“ދަރިފުޅާ. މަންމަ ބޭނުންވަނީ ދަރިފުޅު އުފަލުގައި ހުންނަން. އެ ރާގު އިވިގެން ދަރިފުޅަށް ޕެނިކް އެޓޭކް އައި ދުވަހު މަންމައަށް ވީގޮތް ބައްޕައަށް ފެނުނު. އަދި ދަރިފުޅަށް އެނގެއެއްނު މަންމައަށް ކޮންމެ ކަމެއްވެސް ވާނީ އާދައިގައި ވާވަރަށްވުރެ ބޮޑަށްކަން. މާބޮޑަށް އުފާވުން، މާބޮޑަށް ރުޅިއައުން، ނޫނީ މާބޮޑަށް ރޮވުން. މަންމަ ދަރިފުޅުދެކެ އެހާ ލޯބިވާތީ އެ ގެލެރީގައި އުޅޭ ކުއްޖާދެކެ ރުޅިއަންނަނީ.” ނަސީރު ވަރަށް ލޯބިން ޒޯޔާއަށް ވިސްނައިދޭން މަސައްކަތްކުރިއެވެ.
“ނޫން ބައްޕާ. މަންމަ އެހެންވެއެއް ނޫން އޭނަދެކެ ރުޅިއަންނަނީ. އޭގެ އެހެން ސަބަބެއް އެބައޮތް. މަންމައަށް މިއަދު ބުނެވުނު އެހެން.” ޒޯޔާ އެހެން ބުނެލުމާއެކު ނަސީރަށް ކުއްލިއަކަށް ޒޯޔާއަށް ބަލައިލެވުނެވެ.
(ނުނިމޭ)
