ޤާނޫނީ ހަމަތަކުގެ މަތިން

ހަމްދާނުގެ ދަރިމައިނުވުމުގެ މައްސަލަ އޭނާ އާޝިޔާއަށް ސިއްރުކުރިއެވެ. އަދި ނަޖުމީގެ ބައިވެރިވުމާއެކު ދަރިއަކު ހޯދުމަށް އޭނާ ސިއްރުން ރޭވިއެވެ. ޑރ. ޝަހުދާ ބޭސްފަރުވާގެ ރެކޯޑުތަކަށް ބަދަލު ގެނައީ އެކަމަކީ ޤާނޫނީ ހަމަތަކުގެ މަތިން ހިނގި ކަމެއްގެ ގޮތުގައި ދެއްކުމަށާއި އެކަން ސިއްރުކުރުމަށެވެ. އެރޭ އާޝިޔާގެ ނިކަމެތިކަމުގެ ފައިދާ ނަގައި، އޭނާއަށް ނޭނގި އޭނާގެ ރުހުމެއް ނެތި ކަންތައްތަކެއް ހިނގަން ފުރުސަތު ދެވުނެވެ. ނަޖުމީ އެކަމުގައި ބައިވެރިވެ، އެތައް އަހަރެއް ވަންދެން އެ ކުށްވެރިކަމުގެ އިޙުސާސް އުފުލިއެވެ.

ސިދުރާގެ ޑީ.އެން.އޭ އިން ދައްކާ ގޮތުގައި އޭނާގެ ބަޔޮލޮޖިކަލް ބައްޕައަކީ ނަޖުމީއެވެ. އެހެންނަމަވެސް، ހަމްދާން އޭނާ ބޮޑުކުރީ އަމިއްލަ ދަރިއެއްގެ ގޮތުގައެވެ. ހަމައެއާއެކު، ހަމްދާން ގެންދިޔައީ އާޝިޔާގެ އެންމެ ގާތް އެކުވެރިޔާ ޒޯޔާއާއެކު ސިއްރު ލޯބީގެ ގުޅުމެއް ބާއްވަމުންނެވެ. ހަމްދާނުގެ ދަރިމައިވުމުގެ މައްސަލައާއި، ނަޖުމީއާ ގުޅޭގޮތުން ރޭވި ރޭވުން ޒޯޔާއަށް އެނގެއެވެ. ހަމްދާނާއި ޒޯޔާގެ ގުޅުން ނަޖުމީއަށް އެނގެއެވެ. އަދި މި ހުރިހާ ކަމެއްގެ ބޮޑުބައި ޑރ. ޝަހުދާއަށް އެނގެއެވެ.

މި ހުރިހާ ބޮޑެތި ސިއްރުތަކެއް ހިފަހައްޓައިގެން ތިބެ، އެންމެންވެސް އާދައިގެ ދިރިއުޅުމެއް އުޅެމުން ދިޔުމަކީ ހައިރާންވާންޖެހޭ ކަމެކެވެ. އިސްމާޢީލް ފައިލް ލައްޕާލިއެވެ. ބޭރުން ފެންނަނީ ވިލިނގިއްޔަށް އިރުއޮއްސެމުންދާ މަންޒަރެވެ. އޮފީސްތަކާއި ސްކޫލްތަކުން ނިމިގެން މީހުން ގެއަށް ދިޔުމަށް ދަތުރުކުރާ އުޅަނދުފަހަރު ދުއްވަމުންދެއެވެ. ފުލުހުންގެ އިދާރާގެ ތެރޭގައި އަންހެނެއްގެ މުޅި ހަޔާތުގެ ތާރީޚު އަލުން ލިޔެވިއްޖެކަން އެއިން އެއްވެސް މީހަކަށް ނޭނގެއެވެ.

ނަމަވެސް، އިސްމާޢީލަށް އަދިވެސް ޖަވާބު ނުލިބޭ އެއް ސުވާލު އޮތެވެ. އެތައް އަހަރެއް ފަހުން ހަމްދާން ރައޫފް ހޯދަން އުޅުނީ ކީއްވެ ހެއްޔެވެ؟ އޭނާ ރެކޯޑުތައް ބަލަހައްޓަން ޖެހޭވަރަށް ބިރުގަތީ ކީއްވެ ހެއްޔެވެ؟ އަދި އާޝިޔާއަށް ކޮންމެވެސް ދުވަހަކުން ދޮގުހެދީ ކާކުކަން އެނގޭނެ ކަމަށް ޒޯޔާ ލިޔެފައިވަނީ ކީއްވެ ހެއްޔެވެ؟ އެންމެ މުހިންމު ކަމަކީ، އަސްލު ރިޕޯޓުން ހަޤީޤަތް ހާމަވާން އޮތްއިރު، އާޝިޔާގެ ފަހުގެ ޑީ.އެން.އޭ ސާމްޕަލަށް ބަދަލު ގެނައީ ކީއްވެ ހެއްޔެވެ؟

އިސްމާޢީލް ޝައްކުކުރާ ގޮތުގައި، މިކަމުގެ ޖަވާބު މިހާރު ހަމައެކަނި ސިދުރާއާ ގުޅިފައެއް ނެތެވެ. އެއީ 2018 ވަނަ އަހަރު ހިނގި ކަންތައްތަކެވެ. އެއީ ރައޫފާ ގުޅުންހުރި ކަމެކެވެ. އަދި ފަހަރުގައި، ހަމްދާނާއި ޒޯޔާ މަރުވި ރޭ އެ ގެސްޓްހައުސްގައި ތިބި ސަބަބާވެސް ގުޅިފައިވާ ކަމެކެވެ.

އެކަމަކު މިހާރު އެއް ކަމެއް ސިއްރެއްގެ ގޮތުގައި ނެތެވެ. ސިދުރާއަކީ ނަޖުމީގެ ދަރިއެކެވެ. އެ ފުރުސަތު އޮތްކަން ނަޖުމީއަށް އެނގެއެވެ. ހަމްދާނަށް އެނގެއެވެ. ޑރ. ޝަހުދާއަށް އެނގެއެވެ. ޒޯޔާއަށް އެނގެއެވެ. ހަމައެކަނި ހަޤީޤަތުގެ މި ބޮޅުން ބޭރުގައި ހުރީ އާޝިޔާއެވެ. އަދި މިހާރު އެ ސިއްރުތަކުގެ ފަރުދާ ކެހި، ހަޤީޤަތް ހާމަވަނީއެވެ.

ބައެއް ސިއްރުތައް އަށް އަހަރު ވަންދެން ދެމިއޮތެވެ. ބައެއް ސިއްރުތައް ދެމިއޮތީ މަދު މަސްތަކަކަށެވެ. ނަމަވެސް، ކަންތައްތައް ހަނދާންކުރުމަށް އާޝިޔާ ކުރި ހިތްވަރުގެ ކުރިމަތީގައި އެއްވެސް ސިއްރަކަށް ކެތެއް ނުކުރެވުނެވެ. ޑީ.އެން.އޭ ރިޕޯޓު ސިޓީއުރައަކަށްލައި ބަންދުކުރިއިރު، އިސްމާޢީލަށް އެނގުނު ކަމަކީ، މި ހަޤީޤަތް ދެން އެންމެ ފުރަތަމަ އިއްވަން ޖެހެނީ އެހެން ތުހުމަތުކުރެވޭ މީހަކަށް ނޫން ކަމެވެ. އެއީ އާޝިޔާއަށެވެ.

ސަބަބަކީ، މި ހުރިހާ ސިއްރުތަކެއްގެ މެދުގައި ހުރި އަންހެނާ، އެތައް އަހަރެއް ވަންދެން ޤަބޫލުކުރަމުން ދިޔައީ އޭނާ އުޅެމުންދަނީ އަމިއްލަ އިޚްތިޔާރުގައިވާ ދިރިއުޅުމެއް ކަމަށެވެ. ނަމަވެސް، އޭނާގެ ދިރިއުޅުމުގެ ކިހާ ބޮޑު ބައެއް އިޚްތިޔާރުކޮށްފައިވަނީ އެހެން ބަޔަކުކަން މިހާރު އޭނާއަށް އެނގެން ޖެހެއެވެ.

ދިގުލައިގެން ދިޔަ ބުރަ ތަހުޤީޤަށްފަހު، އަދި ނަޖުމީ އާއި ޑޮކްޓަރ ޝަހުދާއާ ޑިޓެކްޓިވް އިސްމާޢީލް ވަކިވަކިން ސުވާލުކޮށް ނިންމުމަށްފަހު، އެންމެ ފަހުން އާޝިޔާ ޕޮލިސް ސްޓޭޝަނަށް ގެނެވުނެވެ.

އާޝިޔާ ހީކޮށްގެން ހުރީ އޭނާއާ އަނެއްކާވެސް ކުރެވޭނީ ސުވާލެއް ނުވަތަ ދެއްކޭނީ ކޮންމެވެސް ލިޔުމެއް ކަމަށެވެ. ފަހަރެއްގައި އެއީ ފާއިތުވި ދުވަސްތަކުގައި އޭނާ އަލުން އަތުރާލަން މަސައްކަތްކުރަމުންދިޔަ އޭނާގެ ދިރިއުޅުމުގެ ބައެއް ކަމުގައި ވެދާނެއެވެ. ނަމަވެސް، އެ ކުޑަ އިންޓަވިއު ރޫމަށް ވަދެ، މޭޒުމަތީގައި ފަތުރާލެވިފައިވާ ފައިލްތައް ފެނުމާއެކު، އިސްމާޢީލްގެ މޫނުމަތިން ފެންނަން ހުރި އަސަރުތަކުން، ދެން އިތުރަށް އޮޅުވާލުމެއް ނޯންނާނެކަން އޭނާއަށް ވިސްނުނެވެ.

އިސްމާޢީލް ވަގުތުން އޭނާ ގާތު އިށީނުމަކަށް ނުބުނެއެވެ. އިރުކޮޅަކު އާޝިޔާއަށް ބަލަން ހުރުމަށްފަހު، ގޮނޑިއެއް ދަމާލިއެވެ.

“އާޝިޔާ، އަހަރެމެންނަށް ފެނުނު ކަންތައްތައް ކިޔައިދިނުމުގެ ކުރިން ކަމެއް ވިސްނައިދޭން ބޭނުން. މި އިވޭ ބައެއް ވާހަކަތަކަކީ ހިތަށް ތަދުވާނެ ކަންތައްތަކެއް. ބައެއް ކަންކަމާ ކޮޅެއްނެތް ވަރަށް ރުޅިވެސް އަތުވެދާނެ. އަދި އޭގެ ތެރޭގައި ތިބާ ލޯބިވާ މީހުންނާމެދު ސުވާލު އުފެދޭނެ ކަންކަންވެސް ހުންނާނެ. އޭގެ ތެރޭގައި މިއަދު ދުނިޔޭގައި ނެތް، ތިބާގެ ސުވާލުތަކަށް ޖަވާބުދެވެން ނެތް މީހުންވެސް ހިމެނޭ. އެކަމަކު އަހަރެމެން މިތިބީ ޔަޤީންވާ ކަންތައްތަކާއި ޝައްކުކުރެވޭ ކަންތައްތައް ވަކިކޮށްގެން.” އިސްމާޢީލް ބުންޏެވެ.

އާޝިޔާ ގޮނޑީގައި އިށީނދެލިއެވެ. ފާއިތުވި ދުވަސްތަކުގައި އޭނާ ހުރީ ހަޤީޤަތް އެނގިދާނެތީ ބިރުންނެވެ. ނަމަވެސް، އެ ހަޤީޤަތް އެނގުމުން ކުރެވޭ އިޙުސާސަކީ މުޅިން ތަފާތު ވޭނެއްކަން އޭނާއަށް މިއަދު އިޙުސާސް ކުރެވުނެވެ.

އިސްމާޢީލް ވާހަކަ ދައްކަން ފެށީ ނަޖުމީއާ ބެހޭގޮތުންނެވެ. އޭނާ ހުރިހާ ވާހަކައެއް ކިޔައިދިނެވެ. އާޝިޔާގެ ހިތަށް ތަދުވެދާނެތީ އެއްވެސް ކަމެއް ފޮރުވުމެއް ނެތިއެވެ.

ނަޖުމީ އާޝިޔާދެކެ ލޯބިވާން ފެށީ އޭނާ ހަމްދާނާ ކައިވެނި ކުރުމުގެ މާ ކުރިންނެވެ. އެކަން ހަމްދާނަށް އެނގެއެވެ. ޒޯޔާއަށްވެސް އެނގެއެވެ. އަދި އާޝިޔާގެ ހިތުގެ ކޮންމެވެސް ކަނެއްގައި އެކަން އިޙުސާސް ކުރެވުނު ނަމަވެސް، އެއީ ލޯބިކަމަށް ޤަބޫލުކުރަން އޭނާ ބޭނުންނުވީއެވެ.
ނަމަވެސް، ހަމައެކަނި ސިއްރަކީ ނަޖުމީގެ ލޯތްބެއް ނޫނެވެ. ހަމްދާނާއި ޒޯޔާއާ ދެމެދުގައިވެސް ސިއްރު ގުޅުމެއް އޮތެވެ. އެއީ ގިނަ އަހަރުތަކެއް ވަންދެން ދެމިގެން އައި ގުޅުމެކެވެ.

އާޝިޔާ އެންމެ ބޮޑަށް އިތުބާރުކުރި ޒޯޔާ، އޭނާގެ އެންމެ ގާތް އެކުވެރިޔާގެ ފިރިމީހާއާ ސިއްރު ގުޅުމެއް ބާއްވަމުން ދިޔައިރުވެސް، އާޝިޔާގެ ގާތުގައި ހުރެ އޭނާގެ ކަންބޮޑުވުންތައް އަޑުއަހައި، އޭނާގެ ގެއަށް ޒިޔާރަތްކޮށް، އެކުގައި ހީނ ސަމާސާކޮށް، އެކުވެރިއެއްގެ ގޮތުގައި ދައްކަމުން ދިޔައީ ހަޤީޤަތް ފޮރުވައިގެންނެވެ.

އާޝިޔާ އެއްވެސް ބަހެއް ބުނުމެއް ނެތި ކަނުލައި އަޑުއަހަމުން ދިޔައެވެ. މި ހަޤީޤަތް އެނގުމުން ކުރެވުނު އިޙުސާސް އެހެން ކަންކަމާ ތަފާތެވެ. އެއީ އޭނާއަށް އެއްވެސް ޝައްކެއް ކުރެވިފައި ނުވާތީއެއް ނޫނެވެ. ނަމަވެސް، އާޝިޔާއަށް އެ ސުވާލު ކުރެވުމުގެ ކުރިން ޒޯޔާ މި ދުނިޔެއާ ވަކިވެފައިވާތީއެވެ.

ދެން ދެކެވުނީ ހަމްދާންގެ ދަރިމައިވުމުގެ ނުކުޅެދުންތެރިކަމާ ބެހޭ ވާހަކައެވެ. އިސްމާއިލް އެ މެޑިކަލް ރިޕޯޓުތަކާއި، ހަމްދާންގެ ހާލަތުގެ ސީރިއަސްކަމާއި، ފަރުވާގެ މަޝްވަރާތަކާއި، އަދި ޑރ. ޝަހުދާއާއެކު އޭނާ ހަދާފައިވާ ސިއްރު އެއްބަސްވުންތަކުގެ ތަފުސީލު ކިޔައިދިނެވެ.
އާޝިޔާގެ ނަޒަރު ހުރީ އެ ލިޔުންތަކަށް ހުއްޓިފައެވެ.

“އޭނާއަށް ޤުދުރަތީ ގޮތުން ދަރިއަކު ނުލިބޭނެ.” އިސްމާއިލް މަޑުމައިތިރިކަމާއެކު ބުންޏެވެ. “އެކަމާ އޭނާ ވަރަށް ބޮޑަށް ލަދުގަތް. ކަލެއަށް އެކަން ކިޔައިދިނުމުގެ ބަދަލުގައި އޭނާ އިޚުތިޔާރުކުރީ އެހެން މަގެއް.”

“ދެން ނަޖުމީ؟”

“އޭނާގެ ކިބައިން އެދިފައިވަނީ ދަރިމައިވުމަށް އެހީތެރިވެދިނުމަށް.”

އާޝިޔާ ލޯ މަރާލިއެވެ. މުޅި ކޮޓަރިތެރެއަށް ހަމަހިމޭންކަން ވެރިވެފައިވާ ކަހަލައެވެ.

“ނަޖުމީ އެކަމަށް އެއްބަސްވިތަ؟”

“އާނ.”

“އެއީ އޭނާ އަހަރެން ދެކެ ލޯބިވާތީތަ؟”

“އާނ.”

އާޝިޔާ އިސްދަށަށް ޖަހާލިއެވެ. “އަދި ހަމްދާނަށްވެސް އޭނާ އަހަރެންދެކެ ލޯބިވާކަން އެނގޭތީ.”

“އާނ.”

އޭނާގެ އަނގައިން ނިކުތީ މަލާމާތުގެ ހިނިތުންވުމެކެވެ. “އެހެންވީމާ، އަހަރެންގެ އަމިއްލަ ދިރިއުޅުމާ ބެހޭގޮތުން އަހަރެންނަށް ނޭނގޭ ކިތަންމެ ކަމެއް އެ ތިން މީހުންނަށް އެނގޭ.”

އިސްމާއިލް ވަގުތުން ޖަވާބެއް ނުދެއެވެ. “އާނ.” އިރުކޮޅެއް ފަހުން އޭނާ ބުންޏެވެ.

އާޝިޔާ އެ ފައިލުތަކަށް ބަލާލިއެވެ. “ދެން ޑރ. ޝަހުދާ؟”

“އޭނާ މެޑިކަލް ރިޕޯޓުތަކަށް ބަދަލު ގެނައީ.”

“އަދި އަހަރެން ހަނދާން ނެތް އެ ރޭ؟”

އިސްމާއިލް ކުޑަކޮށް ފަސްޖެހުނެވެ. ނަމަވެސް ފަހުން ކިޔައިދިނެވެ. އޭނާ އެކަން ތަފުސީލުކޮށް ސިފަކޮށްދޭކަށް ނުޖެހުނެވެ. އާޝިޔާއަށް ވިސްނުނެވެ. އޭނާއަށް ވަނީ ބޭސްދީ މަސްތުކޮށްފައެވެ. އަމިއްލަ އިޚުތިޔާރުގައި ކަމެއް ނިންމުމުގެ ބާރު އޭނާގެ ކިބައިން ވަނީ ނިގުޅައިގަނެވިފައެވެ. ނަޖުމީ ހުރީ އެތަނުގައެވެ. އޭނާ ޤަބޫލުކޮށްގެން ހުރީ އެއީ ހަމްދާން އެދިގެން ކުރާ ކަމެއް ކަމަށެވެ. ހިނގަމުންދިޔަ ކަންތައްތައް ހުއްޓުވުމުގައި އޭނާ ނުކުޅެދުންތެރިވިއެވެ. އަދި އެ ހިތާމަ އޭނާގެ ފަހަތުން އެތައް އަހަރެއް ވަންދެން އައެވެ.

(ނުނިމޭ)