އަޅުގަނޑުމެންގެ ތެރެއިން ބައެއް މީހުން ރަނގަޅު ފޮތެއް ހިފައިގެން ހަމަޖެހިލައިގެން އިނުމަށް ލޯބިކުރާއިރު، އަނެއް ބަޔަކު އިސްކަންދެނީ ސީރީޒް ބެލުމަށް ނުވަތަ ވީޑިއޯ ގޭމް ކުޅުމަށެވެ. ނަމަވެސް ނިއުރޯސައިންސްގެ ނަޒަރުން ބަލާއިރު، ފޮތް ކިޔުމަކީ ހަމައެކަނި މުނިފޫހިފިލުވުމަށްވުރެ މާ ބޮޑު ކަމެކެވެ.
މިއީ ޚާއްސަކޮށް ކުޑަކުދިންނާއި ފުރާވަރުގެ ކުދިންނަށް ވަރަށް ފައިދާހުރި ކަމެކެވެ. ޅަ ސިކުނޑިއެއްގައި، ފޮތް ކިޔުމުގެ ސަބަބުން ސިކުނޑީގެ ވިސްނުމުގެ ވަކި ޚާއްސަ މަސައްކަތްތަކަކަށް ހިތްވަރު ލިބި، އެކަމުގެ ސަބަބުން ބޮޑެތިވާ ދުވަހު ދިރިއުޅުމަށް ބޮޑު ބަދަލެއް ގެނެސްދެއެވެ.
ފުރާވަރު އުމުރުގައި ފޮތް ކިޔުން މުހިންމު ވަނީ އެއީ ސިކުނޑި އަދިވެސް ތަރައްޤީވަމުން އަންނަ މަރުޙަލާއަކަށް ވާތީއެވެ. މި މަރުޙަލާގެ ތެރޭގައި، ވިސްނުންތެރިކަމާއި، ރޭވުންތެރިކަމާއި، އަދި އަޚްލާޤީ ކޮންޓްރޯލް ވަރުގަދަކޮށްދޭ ސިކުނޑީގެ ނިއުރަލް ނެޓްވޯކްތައް ވަރަށް ބޮޑަށް އަލުން ތަރުތީބުވެގެން ދެއެވެ.
މި މަރުޙަލާގައި ސިކުނޑީގެ މުހިންމު އެއް ބަޔަކީ “ޕްރީފްރޮންޓަލް ކޯޓެކްސް” އެވެ. މިއީ ސަމާލުކަން ދެމެހެއްޓުމާއި، ސަމާލުކަން ގެއްލޭ ކަންކަން ހުއްޓުވުމާއި، އަދި މަޢުލޫމާތު ޕްރޮސެސްކުރުން ކޮންޓްރޯލް ކުރުމަށް ޒިންމާވާ “އެގްޒެކެޓިވް ފަންކްޝަންސް” އާ ގުޅިފައިވާ ބައެކެވެ. މި މަރުޙަލާގައި ލިބޭ ބައެއް ތަޖުރިބާތަކުގެ ސަބަބުން ވިސްނުމުގެ ތަރައްޤީ އަވަސްވެ، މި ޤާބިލިއްޔަތުތައް ވަރުގަދަ ކުރުމަށް އެހީތެރިވެދެއެވެ.
ދިގު ލިޔުމެއް ދެނެގަތުމަކީ ފުރާވަރުގެ ކުދިންގެ ސިކުނޑިން އަދިވެސް ބިނާކުރަމުންދާ ގިނަ ވިސްނުމުގެ މަސައްކަތްތައް ހަރަކާތްތެރިކުރުވާ ކަމެކެވެ. އޭގެ ތެރޭގައި ގިނަ ވަގުތު ސަމާލުކަން ދެމެހެއްޓުމާއި، ކުރީގެ މަޢުލޫމާތު ހަނދާނަށް ގެނައުމާއި، ޚިޔާލުތަކުގެ މެދުގައި ގުޅުން އުފެއްދުމާއި، ކުރިއަށް ވާނެ ގޮތް ލަފާކުރުމާއި، ފުށުއަރާ ކަންކަން ދެނެގަތުމާއި، އަދި ވާހަކައިގެ މާނަ ވިސްނައިގަތުން ހިމެނެއެވެ. މިއީ ހަމައެކަނި ބަލަން އިނދެގެން ކުރާ އާދައިގެ ކަމެއް ނޫނެވެ. ފޮތް ކިޔުމުގައި ސިކުނޑީގެ ވަރަށް ބޮޑު މަސައްކަތެއް ހިމެނެއެވެ.
މިގޮތަށް ސިކުނޑިން ކުރަންޖެހޭ މަސައްކަތް ބޮޑުވުމުގެ ސަބަބުން، މާ ބޮޑު މަސައްކަތެއް ނުކޮށް ބަލާލެވޭ އެހެން ކަންކަމުން ވަގުތުން ލިބޭ ޝައުޤުވެރިކަން ފޮތް ކިޔުމުން އަބަދަކު ވަގުތުން ނުލިބިދާނެއެވެ. ޑިޖިޓަލް ވަސީލަތްތަކުން ވަގުތުން އުފާވެރިކަން ލިބި، މެދުކެނޑުމެއްނެތި އައު ކަންކަން ފެންނަމުން ދިޔަ ނަމަވެސް، ފޮތް ކިޔުމުގައި ވާހަކައިގެ އަސްލު އުފާވެރިކަން އިޙުސާސްވުމުގެ ކުރިން ފުރަތަމަ ސަމާލުކަމާއި ވަގުތު ދޭންޖެހެއެވެ.
ފޮތް ކިޔުމުގެ ހުނަރު ވަރުގަދަވަމުންދާ ވަރަކަށް، ވަރަށް ޝައުޤުވެރި ކަމެއް މެދުވެރިވެއެވެ. އެއީ ކިޔުން ފަސޭހަކަމާއެކު އޮމާންކޮށް ކުރިއަށްދާން ފެށުމެވެ. ލަފުޒުތައް ދެނެގަތުމާއި، އޭގެ މާނަ ދެނެގަތުމާއި، އަދި ލިޔުން ވިސްނައިގަތުމަށް ބޭނުންވާ މަޢުލޫމާތު އެއްކުރުމުގެ މަސައްކަތް އަމިއްލައަށް ހިނގާ ކަމަކަށް ވުމުން، ސިކުނޑިން ކުރަންޖެހޭ މަސައްކަތް ލުއިވެ، ކިޔުންތެރިޔާއަށް ވާހަކައިގެ ތެރެއަށް ގެނބިގެން ދެވޭގޮތް ވެއެވެ. އޭރުން ސަމާލުކަން ހުންނާނީ ޖުމްލަތައް ދެނެގަތުމަކަށް ނޫނެވެ. އޭގެ ބަދަލުގައި ސަމާލުކަން ހުއްޓޭނީ ވާހަކައިގެ ދުނިޔެއަށާއި އޭގައި އުޅޭ ޝަޚްސިއްޔަތުތައް ދެނެގަތުމަށެވެ. މިއީ ގިނަ މީހުންނަށް ފޮތް ކިޔުމަކީ އުފާވެރި ކަމަކަށް ވެގެންދާ ހިސާބެވެ. ޤަވާއިދުން ފޮތް ކިޔުމަކީ ހަމައެކަނި އުފާވެރިކަން ގެނެސްދޭ ކަމެއް ނޫނެވެ. އެއީ ވިސްނުމުގެ ތަރައްޤީއަށް ވެސް ބާރުދޭ ކަމެކެވެ. ހަޤީޤަތުގައި، ފުރާވަރުގެ ކުރިއެރުމާ ފޮތް ކިޔުމާ ދެމެދު އޮންނަ ގުޅުން ވަރަށް ބޮޑެވެ.
މީގެ އިތުރުން، އެހެން މީހުންގެ ވިސްނުމާއި ޖަޒުބާތީ ހާލަތްތައް ދެނެގަތުމަށާއި، އަޅުގަނޑުމެންގެ އަމިއްލަ ވިސްނުމުގެ މަރުޙަލާތައް ދެނެގަނެ ތަޙުލީލުކުރުމަށާއި، މަޢުލޫމާތު ވަޒަންކުރުމަށާއި، އަދި ވަރުގަދަ ޙުއްޖަތްތަކާއި ބަލިކަށި ޙުއްޖަތްތައް ވަކިކޮށް ދެނެގަތުމަށް ފޮތް ކިޔުން އެހީތެރިވެދެއެވެ. ފާޑުކިޔުމުގެ ވިސްނުން (ކްރިޓިކަލް ތިންކިންގ) ވަރުގަދަކޮށްދިނުމުގެ ސަބަބުން، ދޮގު ޚަބަރާއި ނުރަނގަޅު މަޢުލޫމާތުތަކުން މީހާ ރައްކާތެރިކޮށްދެއެވެ.
ކިޔަނީ ކޮން އެއްޗެއްކަން މުހިންމު ހެއްޔެވެ؟
އަދަބީ ވާހަކަތައް، މިސާލަކަށް ނޮވެލް ފަދަ ވާހަކަތަކުގައި އުޅޭ މީހުންގެ ޢަމަލުތައް ލަފާކުރަން ނޭނގޭ އަދި އޮޅުންބޮޅުން ބޮޑު ޙާލަތްތައް ހިމެނޭތީ، އެހެން މީހުންގެ ނަފްސާނީ އަދި ޖަޒުބާތީ ޙާލަތްތައް ދެނެގަތުމަށް އެފަދަ ފޮތްތައް ވަރަށް ބޮޑަށް އެހީތެރިވެދެއެވެ. މިއީ ކިޔުންތެރިޔާ އިޖުތިމާޢީ ކޮމްޕްލެކްސް މާޙައުލުތަކަކަށް ގެންގޮސްދޭތީއެވެ. އަނެއްކޮޅުން، މަޢުލޫމާތުދޭ ނުވަތަ ތަޢުލީމީ ފޮތްތަކުން ވިސްނުމާއި ދަލީލު ދެއްކުމުގެ ހުނަރު ތަރައްޤީކުރުމަށް ބޮޑަށް އެހީތެރިވެދެއެވެ. އެންމެ ރަނގަޅު ގޮތަކީ ތިމާއަށް އެންމެ ކަމުދާ އެއްޗެއް ކިޔުމެވެ. އެހެންނަމަވެސް، ތަފާތު ވައްތަރުގެ އަދި ފެންވަރު ރަނގަޅު ލިޔުންތައް ކިޔުމުން ތަފާތު ގިނަ ހުނަރުތަކެއް ތަރައްޤީވެގެންދާނެއެވެ.
ފޮތް ކިޔަން ބޭނުން ނުވާނަމަ ހަދާނީ ކިހިނެއް؟
ކޮންމެ މީހަކަށް ފޮތް ކިޔުމަކީ އުފަންވި އިރުންސުރެ ޝައުޤުވެރިވާ ކަމަކަށް ނުވެދާނެއެވެ. ނަފްސާނީ ދިރާސާތަކުން ދައްކާ ގޮތުގައި، ސިކުނޑިން މަސައްކަތް ކުރަންޖެހޭ ކަންކަމުގައި، ކުޑައިރުއްސުރެ ފެށުމާއި އަދި ގިނަގިނައިން ފަރިތަކުރުމަކީ އެކަމުން ފަހުން ފައިދާ ލިބުމަށް އޮތް އެންމެ މުހިންމު ތަޅުދަނޑިއެވެ. ފޮތް ކިޔުމަކީ ވެސް މީގެ ތެރެއިން ކަމެކެވެ. ކުޑައިރު ފޮތް ކިޔުމުގެ ތެރެއަށް ވަދެވިއްޖެނަމަ، ފޮތްތަކާމެދު ރަނގަޅު ޝުޢޫރުތަކެއް އުފެދުމުގެ ފުރުޞަތު ބޮޑެވެ. އަދި ކުޑައިރު ލިބުނު ތަޖުރިބާތަކަކީ ނޭދެވޭ ތަޖުރިބާތަކަކަށް ވެއްޖެނަމަ, މިސާލަކަށް ހިތްހަމަނުޖެހޭ އެއްޗެހި ކިޔަން މަޖުބޫރުވުން، ނުވަތަ އުނދަގޫވެގެން ފޫހިވުން ފަދަ ކަންކަން ދިމާވިނަމަ, ކިޔުމުގެ ޝައުޤުވެރިކަން ވަރަށް ބޮޑަށް ދަށްވާނެއެވެ. އެހެންވެ، ކްލާސްރޫމްތަކުގައްޔާއި ގޭގޭގައި ހުރިހާ ވައްތަރެއްގެ ފޮތްތައް ލިބެން ހުރުމާއި، ކިޔާނެ އެއްޗެއް އަމިއްލައަށް އިޚްތިޔާރުކުރުމުގެ ފުރުޞަތު އޮތުމާއި، އެކުގައި ކިޔުމާއި، އަދި ތިމާގެ ޝައުޤުވެރިކަމާ ގުޅޭ ވާހަކަތައް ހޯދުމަކީ ވަރަށް މުހިންމު ކަމެކެވެ.
“ފޮތް ކިޔުމަކީ ތިމާއާ ގުޅޭ ކަމެއް ނޫން” ކަމަށް އިޙުސާސްވާ މީހުންނަށް، ފުރަތަމަކޮޅު ދިމާވާ އުނދަގޫތަކަކީ ޤާބިލުކަން ނެތުން ނޫންކަން ހަނދާން ބެހެއްޓުން މުހިންމެވެ. ހަޤީޤަތުގައި އެއީ ދަސްވުމުގެ މަރުޙަލާގެ ބައެކެވެ. ތަޖުރިބާ ލިބެމުންދާ ވަރަކަށް، ކިޔައިގެން ދެނެގަތުމަކީ ފަސޭހަ އަދި މާ ބޮޑު މަސައްކަތެއް ނުކޮށް ކުރެވޭ ކަމަކަށް ވާތީ، އޭގެ އުފާވެރިކަން ލިބެން ފެށުމުގެ ކުރިން އުންމީދު ކަނޑާނުލުން އެންމެ ރަނގަޅެވެ. ފޮތް ކިޔުމުގައި އެންމެ ބޮޑަށް އުނދަގޫވާ މީހުންނަށްވެސް މީގެ ފައިދާ ލިބިދާނެއެވެ.
އެންމެ ފަހުން ބަލާއިރު، ދިރިއުޅުމުގެ ދަތުރުތައް ފަދައިން، ފޮތް ކިޔުމުގެ ދަތުރުތަކަކީ ވެސް އެކި މީހުންނަށް އެކި ގޮތަށް އޮންނަ ކަމެކެވެ. އަދި ވަގުތާއެކު މި ހުނަރުތައް ތަފާތު އެތައް ގޮތަކަށް ތަރައްޤީވެދާނެއެވެ. ނަމަވެސް މިއީ ޚާއްސަކޮށް ކުޑަކުދިންނަށާއި ފުރާވަރުގެ ކުދިންނަށް ވަރަށް މުހިންމު ކަމެކެވެ. ފުރާވަރުގެ އުމުރުގައި، ފޮތް ކިޔުމަކީ ހަމައެކަނި އާދައަކަށްވުރެ ބޮޑު ކަމެކެވެ. އެއީ ސިކުނޑީގެ ތަރައްޤީ އެންމެ ބާރަށް ހިނގަމުންދާ ދުވަސްވަރު، ސަމާލުކަމާއި، ތަޞައްވުރުކުރުމާއި، ވިސްނުންތެރިކަމާއި، އަދި ފުން ވިސްނުން ތަމްރީނުކޮށްދޭ ކަމެކެވެ.
ފޮތް ނުކިޔަން ނިންމުމަކީ ހަމައެކަނި ވަގުތު ފާއިތުކޮށްލުމަށް ކުރާ ކަމެއް ދޫކޮށްލުމެއް ނޫނެވެ. އެއީ ސިކުނޑީގެ ވިސްނުމުގެ ތަރައްޤީއަށާއި، ފުރިހަމަ ސަގާފީ، ފާޑުކިޔުމުގެ ވިސްނުން، އަދި މަދަނީ ތަޢުލީމަކަށް ބޭނުންވާ ބާރުގަދަ ވަސީލަތެއް ދޫކޮށްލުންވެސް މެއެވެ.
