އަންނާރާއި ކެއުމުގައި ބޭނުންކުރާ ބައެއް ބާވަތްތަކުގެ ނަޓްސް (މަދު) ކެއުމުން ގޮހޮރުގައި އުފެދޭ މާއްދާއެއް ކަމަށްވާ ‘ޔޫރޯލިތިން އޭ’ ބޭނުންކޮށްގެން، މިހާތަނަށް ފަރުވާ ދިނުމަށް އެންމެ ދަތިވެފައިވާ ހިތުގެ ބަލީގެ ވައްތަރަކަށް އުއްމީދީ ކުރިއެރުމެއް ލިބިދާނެ ކަމަށް އިނގިރޭސިވިލާތުގެ ކިންގްސް ކޮލެޖް ލަންޑަންގެ ސައިންސްވެރިން ހޯދައިފިއެވެ.
ބްރިޓިޝް ހާޓް ފައުންޑޭޝަނުން ޚަރަދުކޮށްގެން ހެދި، އަދި ސައިންސް އެޑްވާންސަސް މަޖައްލާގައި ޝާއިއުކޮށްފައިވާ މި ދިރާސާއިން ދައްކާ ގޮތުގައި، މި މާއްދާގެ ސަބަބުން ލެބޯޓްރީ ޓެސްޓްތަކުގައި ހިތުގެ މަސައްކަތް 80 އިންސައްތައާ ހަމައަށް ރަނގަޅުކޮށްދެއެވެ.
ހިތް ފޭލްވާ (ހާޓް ފެއިލިއާ) މީހުންގެ ގާތްގަނޑަކަށް ދެބައިކުޅަ އެއްބައި މީހުން ތަހައްމަލު ކުރަމުންދަނީ “ހާޓް ފެއިލިއާ ވިތު ޕްރިޒާވްޑް އިޖެކްޝަން ފްރެކްޝަން” (HFpEF) ނަމަކަށް ކިޔާ ބާވަތެކެވެ. މި ބާވަތުގެ ބަލީގައި ހިތުން ލޭ ޕަމްޕުކުރުމުގެ ބާރު ހުރި ނަމަވެސް، ވިންދު ޖެހުމުގެ ދެމެދުގައި ހިތުގެ މަސްތައް ހަރުއެރުމުގެ ސަބަބުން ހިތް ހަމައިން ދޫވެ، އެކަށީގެންވާ ވަރަށް ލޭ އެތެރެއެއް ނުވެއެވެ. މިއީ މިހާތަނަށް ބޭސްތަކުން ވެސް ފަރުވާ ދިނުމަށް ވަރަށް ބޮޑަށް ނުކުޅެދިފައިވާ ހާލަތެކެވެ.
ސައިންސްވެރިން މި ދިރާސާ ކުރިއަށް ގެންގޮސްފައިވަނީ މީދަލާއި، ލެބޯޓްރީގައި އުފައްދާފައިވާ އިންސާނާގެ ހިތުގެ ޓިޝޫތަކެއްގައެވެ. ‘ޔޫރޯލިތިން އޭ’ ދިނުމުން، ހިތުގެ މަސްތައް ދޫކޮށްލަދޭ ޕްރޮޓީނެއް ކަމަށްވާ ‘ޕީކޭޖީ-ވަން އަލްފާ’ (PKGIα) މަސައްކަތްކުރަން ފަށައި، ހިތުގެ ހަރުކަން ކެނޑި، މަސްތައް ދުޅަވުމާއި ލަކުނުލުން ކުޑަކޮށްދިން ކަމަށް ދިރާސާއިން ދެއްކިއެވެ. އެންމެ ހަފުތާއެއްގެ ފަރުވާއިން ވެސް މީދާތަކުގެ ހިތުގެ މަސައްކަތަށް ބޮޑު ކުރިއެރުމެއް ލިބުނެވެ.
ކިންގްސް ކޮލެޖް ލަންޑަންގެ އިސް ސައިންސްވެރިޔާ ޑރ. ޖޯސެފް ބާގޮއިން ވިދާޅުވީ، މިއީ ހިތުގެ ބަލިތަކުގެ ތެރެއިން ފަރުވާ ދޭން އެންމެ އުނދަގޫ ބާވަތް ކަމަށާއި، މި ހޯދުމުގެ ސަބަބުން މި ބައްޔަށް އައު ފަރުވާއެއް ހޯދުމުގެ އުއްމީދު ބޮޑުވެފައިވާ ކަމަށެވެ.
‘ޔޫރޯލިތިން އޭ’ އަކީ ކާނާއިން ސީދާ ލިބޭ އެއްޗެއް ނޫނެވެ. އެއީ އަންނާރާއި، ވޯލްނަޓް އަދި ސްޓްރޯބެރީ، ރާސްޕްބެރީ ފަދަ ބެރީގެ ބާވަތްތައް ކެއުމުން ގޮހޮރުގައި ހުންނަ ބެކްޓީރިއާތަކުން އުފައްދާ މާއްދާއެކެވެ. ނަމަވެސް ކޮންމެ މީހެއްގެ ގޮހޮރުގައި މި މާއްދާ އުފައްދާ މިންވަރު ތަފާތުވެއެވެ.
ބްރިޓިޝް ހާޓް ފައުންޑޭޝަންގެ އެސޯސިއޭޓް މެޑިކަލް ޑިރެކްޓަރު ޕްރޮފެސަރ ޖޭމްސް ލެއިޕަރ ވިދާޅުވީ، މިއީ ވަރަށް އުއްމީދީ ހޯދުމެއް ނަމަވެސް، އަދި މި ޓެސްޓުތައް ހަދާފައިވަނީ ޖަނަވާރާއި ލެބޯޓްރީ ޓިޝޫގައި ކަމަށެވެ. އެހެންކަމުން އިންސާނުންގެ ހަށިގަނޑުގައި މިކަން މަސައްކަތްކުރާ ގޮތް ބެލުމަށް ކްލިނިކަލް ޓްރަޔަލްތައް ހަދަންޖެހޭނެ ކަމަށް އޭނާ ފާހަގަކުރެއްވިއެވެ.
މި ދިރާސާއާ ގުޅިގެން މާހިރުން އިރުޝާދު ދެއްވަނީ، ހިތުގެ ބަލީގެ އަލާމާތްތައް ކަމަށްވާ ނޭވާކުރުވުމާއި، ވަރުބަލިވުން އަދި ފައި ދުޅަވުން ފަދަ ކަންކަން ފެންނަނަމަ، އަމިއްލައަށް ކާނާ ނުވަތަ ސަޕްލިމެންޓް ބޭނުންކުރުމުގެ ބަދަލުގައި ލަސްނުކޮށް ޑޮކްޓަރެއްގެ ލަފާ ހޯދުމަށެވެ.
