މަޝްހޫރު ފިލްމު “ދަންގަލް” އާއި “ފްލޭމްސް”، “އިންދޯރީ އިޝްޤް” އަދި “ކެމްޕަސް ޑައިރީސް” ފަދަ ކާމިޔާބު ސީރީޒްތަކުން ފެނިގެންދިޔަ ހުނަރުވެރި އެކްޓަރު ރިތުވިކް ސަހޯރޭ، ކުރިއަށް އޮތް ފިލްމު “ޕްރަހާރު” ގައި ޕަބްލިކް ޕްރޮސެކިއުޓަރ އުއްޖްވަލް ނިކަމްގެ ދަރިފުޅުގެ ރޯލުން ފެންނާނެކަން ހާމަކޮށްފިއެވެ.
ޑައިރެކްޓަރު އަވިނާޝް އަރުން ޑައިރެކްޓްކުރާ މި ފިލްމުގައި އުއްޖްވަލް ނިކަމްގެ ރޯލު އަދާކުރަނީ ބޮލީވުޑްގެ ކުޅަދާނަ އެކްޓަރު ރާޖްކުމާރު ރާއޯއެވެ. މި ފިލްމާ ގުޅޭގޮތުން “ވެރައިޓީ އިންޑިއާ” އަށް ދިން އިންޓަވިއުއެއްގައި ރިތުވިކް ވަނީ އޭނާ ކުޅޭ “އަނިކެތު ނިކަމް” ގެ ކެރެކްޓަރާ ބެހޭގޮތުން ވާހަކަދައްކާފައެވެ.
ރިތުވިކް ބުނި ގޮތުގައި “ޕްރަހާރު” ފަދަ ފިލްމަކުން ފުރުސަތު ލިބި، އަނިކެތު ނިކަމްގެ ރޯލު ކުޅެން ލިބުމަކީ އޭނާއަށް ލިބުނު ވަރަށް ބޮޑު ޝަރަފެކެވެ. މިއީ ފިލްމުގައި ވަރަށް މުހިންމު ރޯލެއް ކަމަށާއި، އަނިކެތު އާއި އޭނާގެ ބައްޕަ އުއްޖްވަލް ނިކަމްގެ ގުޅުން އަދި އެ ދަތި އުނދަގޫ ދަނޑިވަޅުގައި މުޅި އާއިލާ އެކަތިގަނޑެއްގެ ގޮތުގައި ސާބިތުވެ ތިބި ގޮތް ދައްކުވައިދިނުމަކީ ލިބުނު ވަރަށް ބޮޑު އުފަލެއް ކަމަށް އޭނާ ފާހަގަކުރިއެވެ. އަދި އިންސާފު ހޯދުމަށް ނިކަމް ކުރި ބުރަ މަސައްކަތުގައި އޭނާގެ ފަހަތުގައި އެންމެ ބޮޑު އެހީތެރިކަމެއް ފޯރުކޮށްދިނީ އޭނާގެ އާއިލާ ކަމަށްވާއިރު، މި ފިލްމުން އުއްޖްވަލް ނިކަމްގެ އަމިއްލަ ދިރިއުޅުންވެސް ފެނިގެންދާނެ ކަމަށް ރިތުވިކް ބުންޏެވެ.
މި ފިލްމު އޭނާއަށް މުހިންމުވާ ސަބަބު ހާމަކުރަމުން ރިތުވިކް ބުނީ، މުމްބާއީއަށް ދިން 26/11 ގެ ޓެރަރިސްޓް ހަމަލާއާ ގުޅިގެން ގިނަ ފިލްމުތަކެއް އުފައްދާފައިވީ ނަމަވެސް، ހަމަލާ ދިން އަޖްމަލް ކަސާބުގެ މައްޗަށް ކުށް ސާބިތުކުރުމަށް ކޯޓު ރޫމް ތެރޭގައި ހިނގައިދިޔަ ކަންކަން އެނގެނީ ވަރަށް މަދު ބަޔަކަށް ކަމަށެވެ. އެހެންކަމުން މިއީ އާންމުންނަށް ކިޔައިދޭންޖެހޭ ވަރަށް މުހިންމު ބާބެއް ކަމަށް އޭނާ ދެކޭ ކަމަށް ބުންޏެވެ.
މީގެ އިތުރުން، ރާޖްކުމާރު ރާއޯ އާއި އަވިނާޝް އަރުން ފަދަ ކުޅަދާނަ ފަންނާނުންނާއެކު މަސައްކަތް ކޮށްލަން ލިބުމަކީ އެކްޓަރެއްގެ ގޮތުން ލިބުނު ވަރަށް ބޮޑު ތަޖުރިބާއެއް ކަމަށްވެސް އޭނާ ވަނީ ސިފަކޮށްފައެވެ.
ރިތުވިކް އާއި ރާޖްކުމާރުގެ އިތުރުން ވާމިގާ ގައްބީ، ޖައިދީޕް އަހްލާވަތު، ލަލިތު ޕްރަބާކަރު އަދި ސިކަންދަރު ކޭރް މުހިންމު ރޯލުތަކުން ފެނިގެންދާ މި ފިލްމު ރިލީޒްކުރުމަށް ހަމަޖެހިފައިވަނީ މި ފެށުނު އޮކްޓޫބަރު މަހުގެ 16 ވަނަ ދުވަހުއެވެ.
