ފިލްމީ ސިނާއަތަށް އަލަށް ނުކުތް ސްޓޫޑިއޯއެއް ކަމަށްވާ ހައުސް އޮފް ސްޓޯރީޓެލަރސްގެ ފުރަތަމަ ވެބް ސީރީޒް “ބޭނުން” ގެ ޓައިޓްލް ލަވަ ރިލީޒްކޮށްފިއެވެ.
މިއަދު ވީޑިއޯކްލަބްގެ މީސްމީޑިއާ މަންސަތަކުގައި މިލަވަ އާންމުކުރުމާއެކު ގިނަ ބައެއްގެ ތަރުހީބު ވަނީ މި ލަވައަށް ލިބިފައެވެ. އެގޮތުން އިންސްޓަގްރާމްގައި އެތައް ބަޔަކު މި ލަވަ ބަލައި، ޝެއާކޮށްފައިވެއެވެ.
“ބޭނުން” މި ލަވައިން ފެނިގެންދަނީ މި ސީރީޒްގެ މައިގަނޑު ތަރިން ކަމަށްވާ ޝަރަފުއްދީން ޢަބްދުﷲ (ޝަރަފް)، ވާޝިޔާ މުޙައްމަދު (ޝިޔާ)، ހާޒިފް މުޙައްމަދު އަދި އާމިނަތު ޝުހާއެވެ.
ދިވެހި އަމިއްލަ ރާގަކަށް ހަދާފައިވާ މަޑުމައިތިރި، ރޮމޭންޓިކް މި ލަވައިގެ އަޑުގެ ވެރިންނަކީ މިއުޒިކީ ދާއިރާގައި ކުރިއަރަމުން އަންނަ ވަރަށް ހިތްގައިމު ދެ އަޑުގެ ވެރިން ކަމަށްވާ އަޙްމަދު ނާޝިއު އާއި އާމިނަތު ރާޔާ އަޝްރަފެވެ. ލަވައިގެ ޅެން ހަދާފައިވަނީ މަމްދޫހު ޖަމާލްއެވެ.
ހުޅުމާލޭގައި މަންޒަރުތައް ނަގާފައިވާ މި ހިތްގައިމު ލަވައިގެ ކެމެރާގެ މަސައްކަތް ކޮށްފައިވަނީ ސިނެޓޯން ސްޓޫޑިއޯއިން އަޙްމަދު ޒިފާފް (ޒިއްޕެ) އެވެ. ހޭވައްލާ ސްޓޫޑިއޯގައި އޯޑިއޯގެ މަސައްކަތްތައް ކޮށްފައިވަނީ ހިމްޔާން އިބްރާހީމެވެ.
ޖުމްލަ 10 އެޕިސޯޑްގެ މައްޗަށް ތައްޔާރުކޮށްފައިވާ “ބޭނުން” ލިޔެ ޑައިރެކްޓްކޮށްފައިވަނީ ގިނަ އުފެއްދުންތަކެއް ލިޔެ ޑައިރެކްޓްކުރަމުން އަންނަ ޝަހުދާ މަހުމޫދު (ޝަހޫ) އެވެ. މިހާރު ވީޑިއޯކްލަބުން މި ސީރީޒް އެއްކޮށް ބަލައިލެވޭނެއެވެ.
