ބޮލީވުޑްގެ މަޝްހޫރު ދެ ތަރިން ކަމަށްވާ އަޔުޝްމާން ކުރާނާ އަދި ސާރާ އަލީ ޚާން ލީޑް ރޯލުން ފެނިގެންދާ ފިލްމު “އުޅްތާ ތީރް” ސިނަމާތަކަށް ގެންނަ ތާރީޚު އޮކްޓޫބަރު މަހުގެ 23 ވަނަ ދުވަހަށް ފަސްކޮށްފިއެވެ.
މި ފިލްމު ރިލީޒްކުރާ ތާރީޚަށް މި ބަދަލު ގެނައީ ފިލްމު އަޅުވާ ދުވަސްވަރު ގިނަ ފިލްމުތަކެއް އެއްފަހަރާ ނުކުތުމުގެ ސަބަބުން ކުރިމަތިވެދާނެ ވާދަވެރިކަމުން ސަލާމަތްވެ، ފިލްމަށް ރަނގަޅު މާކެޓެއް ހޯދައިދިނުމުގެ ގޮތުން ކަމަށް ފިލްމު އުފެއްދި ފަރާތްތަކުން ވަނީ ބުނެފައެވެ. މި ޚަބަރު ކަށަވަރުކޮށްދީފައިވަނީ ބޮލީވުޑްގެ ތަޖުރިބާކާރު ޓްރޭޑް އެނަލިސްޓް ތަރަން އަދާޝް އެކްސް (ކުރީގެ ޓްވިޓާ) ގައެވެ.
ތަރަން އަދާޝް އޭނާގެ ޕޯސްޓުގައި ބުނެފައިވަނީ، ގިނަ ފިލްމުތަކެއް އެއްފަހަރާ ރިލީޒްވާ ވަގުތެއްގައި ސްކްރީންތައް މަދުވުމުގެ ބަދަލުގައި، ފިލްމު އުފެއްދި ޓީމުން ބޭނުންވަނީ މި ފިލްމު ސިނަމާތަކުގައި ދެއްކުމަށް އެންމެ ފުރިހަމަ އަދި ތަނަވަސް ފުރުސަތެއް ފަހިކޮށްދިނުމަށް ކަމަށެވެ. އަދި އާ ތާރީޚަކަށް ފިލްމު ބަދަލުކުރަން ޖެހުނު މައިގަނޑު ސަބަބަކީ އެއީ ކަމަށްވެސް އޭނާ ހާމަކުރިއެވެ.
އަޔުޝްމާން އަދި ސާރާގެ އިތުރުން މި ފިލްމުގައި ހިމެނޭ މުހިންމު ކާސްޓުންގެ ތެރޭގައި ގުލްޝަން ގްރޯވަރ، މުކުލް ދޭވް އަދި ރާމް ކަޕޫރު ފަދަ ހުނަރުވެރި ތަރިން ހިމެނެއެވެ.
މިއީ އަޔުޝްމާން އަދި ސާރާ އެކުގައި ފެނިގެންދާ ފުރަތަމަ ފަހަރެއް ނޫނެވެ. މި ދެ ތަރިން ވަނީ މި އަހަރު ނުކުތް ޑައިރެކްޓަރު މުދައްސިރު އަޒީޒްގެ “ޕަތީ ޕަތުނީ އައުރު ވޯ ދޯ” ގައިވެސް އެކުގައި މަސައްކަތްކޮށްފައެވެ. އެ ފިލްމުގައި ވާމިގާ ގައްބީ، ރަކުލް ޕްރީތު ސިންގް، އަދި ވިޝާލް ވަޝިޝްތާވެސް މުހިންމު ރޯލުތަކުން ފެނިގެންދިޔައެވެ. “ސެކްނިލްކް” ގެ ތަފާސްހިސާބުތައް ދައްކާގޮތުން އެ ފިލްމަށް އިންޑިއާއިން 60.11 ކްރޯޑް ރުޕީސް ލިބިފައިވާއިރު، މުޅި ދުނިޔޭގެ ބޮކްސް އޮފީހުން ވަނީ 67.96 ކްރޯޑް ރުޕީސްގެ އާމްދަނީއެއް ހޯދާފައެވެ.
