ލަވަކިޔުންތެރިޔާ އަދި އެކްޓްރެސް ޑަވް ކެމަރަން އާއި މާނެސްކިން ބޭންޑުގެ ލީޑް ސިންގަރ ޑާމިއާނޯ ޑޭވިޑްގެ ކައިވެނީގެ ހަފުލާތައް ތިން ދުވަހުގެ މުއްދަތަށް އިޓަލީގެ ޓަސްކަނީގައި ކުރިއަށްދިޔަ ގޮތުގެ ތަފުސީލު ވޯގް މެގަޒިންއިން ހާމަކޮށްފިއެވެ. މި ހަފުލާތަކުގެ ތެރޭގައި މެދުޒަމާނީ ސިޓީ ހޯލެއްގައި ބޭއްވި ރަސްމީ ކައިވެނި ކުރުމުގެ ރަސްމިއްޔާތާއި، މޭބިސްކަދުރު ދަނޑެއްގައި ބޭއްވި ރޭގަނޑުގެ ފަރިއްކޮޅެއްގެ އިތުރުން، ގަދީމީ ކަސްލްއެއްގެ ތެރޭގައި ބޭއްވި މައިގަނޑު ކައިވެނީގެ ރަސްމިއްޔާތު ހިމެނެއެވެ.
ވޯގްއިން ރިޕޯޓްކުރި ގޮތުގައި، މި ދެމަފިރިން ކައިވެނިކުރީ ސެޕްޓެމްބަރު 24 ވީ ބުރާސްފަތި ދުވަހު ޓަސްކަނީގެ މޮންޓަލްޗީނޯގައެވެ. އަދި ކައިވެނީގެ އުފާފާޅުކުރުންތައް ހޮނިހިރު ދުވަހުގެ ނިޔަލަށް “ކަސްޓިގްލިއޯން ޑެލް ބޮސްކޯ” ރިސޯޓުގައި ކުރިއަށްދިޔައެވެ.
މި ދެ ފަންނާނުން ފުރަތަމަ ބައްދަލުވީ 2022 ވަނަ އަހަރުގެ އެމް.ޓީ.ވީ ވީޑިއޯ މިއުޒިކް އެވޯޑްސްގައެވެ. އެއަށްފަހު އޭގެ އަހަރެއް ފަހުން ބޭއްވި ހަމަ އެ އެވޯޑްސް ހަފުލާގައި އަލުން ބައްދަލުވެ، ދެމީހުންގެ މެދުގައި ގުޅުން އުފެދުނެވެ. މިހާރު ލޮސް އެންޖެލިސް އާއި ރޯމްގައި ދިރިއުޅެމުންދާ މި ދެމަފިރިންގެ ކައިވެނީގެ އިންތިޒާމުތައް ބެލެހެއްޓީ ޕްލޭނަރ އެލެސަންޑްރާ ގްރިލޯއެވެ.
މޮންޓަލްޗީނޯގައި ބޭއްވި ރަސްމީ ކައިވެނި
ކައިވެނީގެ ފުރަތަމަ ރަސްމިއްޔާތު ބޭއްވީ މޮންޓަލްޗީނޯގެ މެދުޒަމާނީ ސިޓީ ހޯލެއް ކަމަށްވާ “ޕަލާޒޯ ޑެއި ޕްރިއޯރީ” ގައެވެ. މި ރަސްމިއްޔާތުގައި ބައިވެރިވީ ހަމައެކަނި ގާތް އާއިލާގެ މީހުންނާއި ރައްޓެހިންނެވެ. އިޓަލީގެ މީޑިއާތަކުން ރިޕޯޓްކުރި ގޮތުގައި މި ކައިވެނި ކޮށްދެއްވީ މޭޔަރު ސިލްވިއޯ ފްރެންޗެސްކެލީއެވެ. ވޯގްއިން ބުނި ގޮތުގައި، ކައިވެނި ކުރާ ތަނަށް މި ދެމަފިރިން އައީ ހުދުކުލައިގެ “ލާންޗިއާ ކޮންވަރޓިބަލް” ކާރެއްގައެވެ. އަދި ކައިވެނީގެ ރަސްމިއްޔާތު ހިނގަމުންދިޔައިރު ލިއޮނާޑް ކޯލްގެ “ހަލެލޫޔާ” ގެ މިއުޒިކް ކުޅެމުންދިޔައެވެ. ކައިވެނީގެ ލިޔެކިޔުންތަކުގައި ހެކިވެރިއެއްގެ ގޮތުން ސޮއިކުރީ ކެމަރަންގެ އެންމެ ގާތް އެކުވެރިޔާ ވެރޯނިކާ ސެއިންޓް ކްލެއަރއެވެ.
މި ކައިވެނި ކުރި ތާރީޚަކީ އެ ދެމީހުން ފުރަތަމަ ފަހަރަށް ޑޭޓަކަށް ދިޔަ ދުވަހަށް ތިން އަހަރު ފުރުނު ދުވަހެވެ. ކައިވެންޏަށްފަހު ރިސޯޓުގެ ސެލަރގައި ރޭގަނޑުގެ ކެއުމާއި ނެށުމުގެ ހަރަކާތްތައް ކުރިއަށްދިޔައެވެ.
މަރުހަބާ ކިއުމުގެ ފަރިއްކޮޅާއި މައިގަނޑު ރަސްމިއްޔާތު
ކައިވެނީގެ މެހެމާނުންނަށް މަރުހަބާ ކިއުމުގެ ގޮތުން ހުކުރު ދުވަހު މޭބިސްކަދުރު ދަނޑުތަކުގެ ތެރޭގައި ޚާއްސަ ފަރިއްކޮޅެއް ބޭއްވުނެވެ. މި ފަރިއްކޮޅުގައި އިޓަލީގެ ޚާއްސަ ކެއުންތައް ކަމަށްވާ ބަފަލޯ މޮޒަރެއްލާ އާއި ޕަކޭރީ އަލް ޕޮމޮޑޯރޯ ފަދަ ބާވަތްތައް ސާވްކުރިއެވެ.
ކައިވެނީގެ މައިގަނޑު ރަސްމިއްޔާތު އޮތީ ހޮނިހިރު ދުވަހު އެ ރިސޯޓުގައި ހުރި 12 ވަނަ ގަރުނުގެ ގަދީމީ ކަސްލްއެއްގެ ތެރޭގައެވެ. މި ރަސްމިއްޔާތުގައި ކެމަރަން ހިނގާފައި އައީ އޭނާގެ މަންމަ ބޮނީއާ އެކުގައެވެ. ކައިވެނީގެ މި ރަސްމިއްޔާތު ކުރިއަށް ގެންގޮސްދިނީ “ޑިސެންޑެންޓްސް” ފިލްމުތަކުގެ ޑައިރެކްޓަރު ކެނީ އޮރެގާއެވެ. މި ހަފުލާގައި މާނެސްކިން ބޭންޑުގެ އެހެން މެންބަރުން ވެސް ބައިވެރިވިއެވެ.
