ދިވެހި ފިލްމީ ދާއިރާގައި ބޮޑު މަގުބޫލުކަމެއް ހޯދާފައިވާ ހުނަރުވެރި ބަތަލާ ނުޒުހަތު ޝުއައިބު (ނުޒޫ)، އަލަށް ރިލީޒްކުރި ފިލްމު “ދެވި” ދެވަނަ ފަހަރަށް ބެލުމަށްފަހު ފިލްމުގެ މުޅި ޓީމަށް ވަރަށް ބޮޑަށް ތައުރީފުކޮށްފިއެވެ.
ނުޒޫ ބުނި ގޮތުގައި، ފިލްމުގެ ޕްރިމިއާ ނައިޓްގައި ފުރަތަމަ ފަހަރަށް ފިލްމު ބަލަން ދިޔައިރު ބައެއް ޓެކްނިކަލް މައްސަލަތައް ދިމާވި ނަމަވެސް، އެވަރުގެ ބޮޑެތި މަސައްކަތްތަކުގައި އެފަދަ ކަންކަން ދިމާވުމަކީ ވެދާނެ ކަމެކެވެ. އަދި އެފަދަ ކަންކަމުގެ ތަފްސީލު ނޭނގުނު ކަމުގައި ވިޔަސް، ކެރެކްޓަރުންގެ ދެމެދުގައި ހުރި ގުޅުމާއި (ކެމިސްޓްރީ)، ކުރޫއިން ކޮށްފައިވާ ބުރަ މަސައްކަތް ވަރަށް ފުރިހަމައަށް ފެނިގެންދިޔަ ކަމަށް އޭނާ ފާހަގަކުރިއެވެ.
ދެވަނަ ފަހަރަށް ފިލްމު ބަލަން ދިއުމުން ކުރެވުނު އިހުސާސްތައް ހިއްސާކުރަމުން ނުޒޫ ބުނީ، މިރޭ ފިލްމު ބެލުމުން ހީވީ މުޅިން އައު ފިލްމެއް ބެލުނުހެން ކަމަށާއި ހުރިހާ ކަމެއްވެސް ދިޔައީ ވަރަށް ފުރިހަމައަށް ކަމަށެވެ. ޚާއްސަކޮށް ފިލްމުގެ ހުރިހާ ލަވަތަކުގެ ޅެމާއި، އަޑު އަދި މުޅި މިއުޒިކަށް ވެސް އޭނާ ވަނީ ލޯބި ޖެހިފައިވާ ކަމަށް ބުނެފައެވެ.
މީގެ އިތުރުން ފިލްމުގެ ކާސްޓުންނާއި ޑައިރެކްޝަނަށް ތައުރީފު ކުރަމުން، ޑައިރެކްޓަރު ހުސައިން ޝާދިޔާންގެ ހުނަރުވެރިކަމާއި ޑައިރެކްޝަން ވަރަށް ފުރިހަމަ ކަމަށް ނުޒޫ ބުންޏެވެ. އަދި ފިލްމުން ކުޑަ ތަންކޮޅަކުން ފެނިގެންދިޔަ ނަމަވެސް، ރިޝްމީ ރަމީޒަކީ އަބަދުވެސް އޭނާގެ ފޭވަރިޓް ކަމަށާއި، މަރިޔަމް އައްޒަ އާއި ސަރަފް އަބްދުﷲ ގެ މޮޅު އެކްޓިންއަށްވެސް ވަރަށް ބޮޑަށް ސާބަސް ރައްދުކުރިއެވެ.
ހަމައެއާއެކު، މުހައްމަދު މަނިކަކީ ޝައްކެއްވެސް ނެތް ގޮތުގައި މޮޅު އެކްޓަރެއް ކަމަށާއި، މިއީ އޭނާ މިފަދަ ކެރެކްޓަރަކުން ފެނުނު ފުރަތަމަ ފަހަރު ކަމަށް ވިޔަސް، މިފަދަ ރޯލުތަކަށް މަނިކު މާ މޮޅު ކަމަށް ނުޒޫ ފާހަގަކުރިއެވެ.
ނިންމާލަމުން ނުޒޫ ވަނީ، ފިލްމުގެ ޓެކްނިކަލް މަސައްކަތްތަކުގައި އިސްވެ ހަރަކާތްތެރިވި ހުނަރުވެރި މުއާ އަބްދުﷲ އަދި “ދެވި” ގެ މުޅި ޓީމަށް ޝުކުރު އަދާކޮށް، ބެލުންތެރިންނަށް ތަފާތު މެސެޖެއް އެކުލެވޭ ތަފާތު މޮޅު މަސައްކަތެއް ގެނެސްދިނީތީ މަރުހަބާ ކިޔާފައެވެ.
