ދިވެހި ސިނަމާގެ އެންމެ މަޤުބޫލް އެއް ޕްރޮޑިއުސަރ އަދި ޑައިރެކްޓަރ ފާތިމަތު ނަހުލާގެ އައު ފިލްމު “މަޖުނޫން” ބަލަން ބޭނުންވާ ހުރިހާ ފަރާތްތަކަށް މިފަހަރު އެ ފުރުސަތު ނުލިބިދާނެ ކަމުގެ އިޝާރާތެއް އޭނާ ދީފިއެވެ.
މިކަމާ ގުޅޭ އިތުރު ތަފުސީލު ހާމަކުރުމަށް ހަމަޖެހިފައިވަނީ ނަހުލާ މީގެ ކުރިން ކުރިއަށް ގެންދިޔަ ސިލްސިލާ ޓިކްޓޮކް ލައިވް ޝޯތަކުގެ ތެރެއިން މިރޭ އަލުން ފަށާ ޚާއްޞަ ލައިވްގައެވެ. މިރޭ ބާއްވާ މި ޝޯގައި، ފިލްމު އެޅުވުމާއި ޓިކެޓް ވިއްކުމާ ގުޅޭގޮތުން ބެލުންތެރިންނަށް މުހިންމު މައުލޫމާތުތަކެއް ހިއްސާކުރުމަށް ވަނީ ނިންމާފައެވެ.
މިރޭގެ މި ޚާއްޞަ ޓިކްޓޮކް ލައިވްގައި ޚާއްޞަ މެހެމާނެއްގެ ގޮތުގައި ބައިވެރިވާނީ “މަޖުނޫން” ފިލްމުގެ ލީޑް ރޯލުން ފެނިގެންދާ ހުނަރުވެރި ބަތަލާ ޝިފާއެވެ. މި ލައިވްގައި ޝިފާއާއެކު ފިލްމާ ގުޅޭގޮތުންނާއި، ފިލްމުގެ މަސައްކަތްތައް ކުރިއަށްދިޔަ ގޮތުގެ ވާހަކަތަކުގެ އިތުރުން ފިލްމާ ގުޅޭ ގިނަ ކަންތައްތަކެއް ބެލުންތެރިންނާ ހިއްސާކުރާނެ ކަމަށް ނަހުލާ ވަނީ ބުނެފައެވެ.
ބެލުންތެރިންގެ މެދުގައި ބޮޑު އިންތިޒާރެއް އުފެދިފައިވާ ކްރިސްޓަލް އެންޓަޓެއިންމެންޓްގެ “މަޖުނޫން” އަކީ އަސަރުގަދަ ލޯބީގެ ވާހަކައެއްގެ މައްޗަށް ބިނާކޮށް އުފައްދާފައިވާ ފިލްމެކެވެ. ފިލްމު ބަލަން ބޭނުންވާ ހުރިހާ ފަރާތްތަކަށް ޓިކެޓް ނުލިބިދާނެ ކަމުގެ ކަންބޮޑުވުން އުފެދިފައިވާއިރު، މިރޭގެ ލައިވް ވެގެންދާނީ ފިލްމަށް އިންތިޒާރުކުރާ ގިނަ ބަޔަކު ބަލާނެ މުހިންމު ލައިވެކަށެވެ.
ޝޯ ފެށޭނީ މިރޭ 09:30 ގައެވެ.
