އިންޑިއާގެ މަޝްހޫރު ޑައިރެކްޓަރު ރޯހިތު ޝެޓީ ހުށަހަޅައިދޭ ސްޓަންޓް ރިއަލިޓީ ޝޯވ “ޚަތުރޯން ކޭ ކިލާޅީ” ގެ 15 ވަނަ ސީޒަން ކާމިޔާބުކޮށް، އެ ޝޯވގެ ތަށި ޓީވީ އެކްޓަރު އަވިނާޝް މިޝްރާ އުފުލާލައިފިއެވެ.
އެއް އަހަރުގެ މެދުކެނޑުމަކަށްފަހު މިއަހަރުގެ އޯގަސްޓް މަހު “ޑަރް ކާ ނަޔާ ދައުރު” ގެ ތީމަށް ފެށި މި ސީޒަނަކީ ކުރީގެ ބައިވެރިންނާއި އާ ބައިވެރިން އެކުގައި ވާދަކުރި ފޯރިގަދަ ސީޒަނެކެވެ. ހަފުތާތަކެއް ވަންދެން ކުރިއަށްދިޔަ ނުރައްކާތެރި އަދި ގޮންޖެހުން ބޮޑު ސްޓަންޓްތަކަށްފަހު، އަވިނާޝް މި ކާމިޔާބީ ހޯދީ ފައިނަލްގެ ގަދަ 3 ގައި ހިމެނުނު ރިތުވިކް ދަންޖާނީ އާއި އޯރީ ބަލިކުރުމަށްފަހުގައެވެ.
މި މުބާރާތް ކާމިޔާބު ކުރުމުން އަވިނާޝްއަށް ވަނީ ޝޯވގެ ޓްރޮފީގެ އިތުރުން 20 ލައްކަ ރުޕީސްގެ ފައިސާގެ އިނާމާއި، ކާރެއްގެ އިތުރުން ޔޫރަޕް ދަތުރެއް ލިބިފައެވެ. މީގެ އިތުރުން ފައިނަލިސްޓުންގެ ގަދަ ތިނެއްގައި ހިމެނުނު ބައިވެރިންނަށް ވަނީ ސައިކަލެއްވެސް ލިބިފައެވެ.
ޝޯވގެ ފެށުމުން ފެށިގެންވެސް އަވިނާޝް ފާހަގަކުރެވިފައިވަނީ އެންމެ ވަރުގަދަ އެއް ބައިވެރިޔާގެ ގޮތުގައެވެ. މުޅި ސީޒަނުގައިވެސް އެއްވެސް ޓާސްކެއް ދޫކޮށްނުލައި ފުރިހަމަކުރި އަވިނާޝް ވަނީ “ސްވިފްޓް އިމިއުނިޓީ ޖެކެޓް” ވެސް ކާމިޔާބުކޮށްފައެވެ. އޭނާއަށް މި މުބާރާތުގައި އާ ބައިވެރިން ކަމަށްވާ ފަރްހާނާ ބަޓް އަދި އޯރީގެ އިތުރުން، ކުރީގެ ބައިވެރިން ކަމަށްވާ ކަރަން ވާހީ އާއި ރިތުވިކް ދަންޖާނީގެ ފަރާތުން ބޮޑެތި ގޮންޖެހުންތަކާ ކުރިމަތިލާން ޖެހުނެވެ.
ކާމިޔާބީއާ ގުޅޭގޮތުން ވާހަކަދައްކަމުން އަވިނާޝް ބުނީ، މިއީ ހަމައެކަނި ޓީވީ ސްކްރީނުން ފެންނަ ރީތި މޫނެއްގެ އިތުރުން އޭނާގެ ހަޤީޤީ ޤާބިލުކަން އަމިއްލަ ނަފްސަށާއި ބެލުންތެރިންނަށް ސާބިތުކޮށްދިނުމަށް ލިބުނު ވަރަށް މުހިންމު ފުރުސަތެއް ކަމަށެވެ. އަދި މިއީ ޖިސްމާނީ ބާރަށްވުރެ ބޮޑަށް، ބިރުވެރި ވަގުތުތަކުގައި ނަފްސު ކޮންޓްރޯލްކޮށް، ވިސްނުން އެއްދިމާއަކަށް ބެހެއްޓުމުގެ އިމްތިހާނެއް ކަމަށް އޭނާ ފާހަގަކުރިއެވެ.
އަވިނާޝް އިތުރަށް ބުނީ މި ޝޯވއިން އޭނާއަށް ލިބުނު އެންމެ ބޮޑު ކާމިޔާބީއަކީ ކުރިން އަމިއްލަ ނަފްސަށް ނެތް ވަރުގެ ވަރުގަދަ އިތުބާރެއް ހޯދުން ކަމަށެވެ.
