ރަސްކަމެއް ބިނާކުރުން
މީގެ ކުރިން ދުވަހަކުވެސް ތަޖުރިބާކޮށްފައި ނުވާ ފަދަ މިނިވަންކަމެއް ފައިސާގެ ސަބަބުން އޭނާއަށް ލިބުނެވެ.
ނަމަވެސް ދުވަސްކޮޅަކުން ފައިސާ އެކަނި ނުފުދޭކަން އެނގުނެވެ. އެހެން ކަމެއްވެސް އެބައޮތެވެ. ބާރެވެ. ނުފޫޒެވެ. ތަނަކަށް ވަދެގެންދާއިރު މީހުންގެ ސަމާލުކަން ލިބުމުގެ އިޙުސާސެވެ. މީހުން ތިމާއާ އެކުވެރިވާން ބޭނުންވާކަން އެނގުމެވެ. ފޯނު ކޯލަކުން ކޮންމެ ފަދަ ކަމެއްވެސް ހަމަޖެހިގެންދާނެކަން އެނގުމެވެ. މީހުން އެމީހުންގެ ދިރިއުޅުމުގެ ސިއްރުތައް ތިމާއާ ހިއްސާކުރުމެވެ. މިރްޒާ އެ އިޙުސާސަށް ލޯބިކުރިއެވެ. ބައެއް ފަހަރު މާ ބޮޑަށްވެސްމެއެވެ. އޭނާ މި ވިޔަފާރިއާމެދު ދެކޭގޮތް ބަދަލުވިއެވެ. މިއީ މިހާރު ހަމައެކަނި ވަޒީފާއެއް ނޫނެވެ. މިއީ ގޮންޖެހުމެކެވެ.
މީހަކު ދެނެގަތުމުގައި އޭނާ މާ ހުޝިޔާރުވެދާނެ ހެއްޔެވެ؟ އެމީހުންގެ ބަލިފައި އޭނާއަށް ހޯދިދާނެ ހެއްޔެވެ؟ އާ މީހަކު މި ދާއިރާއަށް އޭނާއަށް ވައްދާލެވިދާނެ ހެއްޔެވެ؟ މީހަކު ފޮރުވާފައިވާ ސިއްރުތައް ހާމަކުރާ މިންވަރަށް އޭނާއަށް އެމީހަކާ ގާތްވެވިދާނެ ހެއްޔެވެ؟ އެމީހަކު އަލުން އެތަނަށް ގެނެވިދާނެ ހެއްޔެވެ؟
ކޮންމެ ކާމިޔާބީއަކީ އޭނާއަށް ލިބޭ ކުޑަކުޑަ މޮޅެކެވެ. އަދި މިރްޒާ ދިޔައީ އެ މޮޅުތައް ހޯދުމަށް މަސައްކަތް ކުރަމުންނެވެ. އޭނާ މީހުންނަކީ ވަކިވަކި ފަރުދުންގެ ގޮތުގައި ދެކުން ހުއްޓާލިއެވެ. އެމީހުން ބަދަލުވީ ފުރުސަތުތަކަކަށެވެ. އެކަކަކީ މީހަކީ ނުފޫޒުގަދަ މީހުން ދަންނާތީ ބޭނުންތެރި މީހެކެވެ. އަނެއް މީހަކީ މަޤުބޫލު މީހަކަށް ވާތީއެވެ. އަނެއް މީހަކީ ބަލާލަން ރީތި މީހަކަށް ވާތީއެވެ. އަނެއް މީހަކީ އާ މީހުން މި ދާއިރާއަށް ވެއްދޭނެ މީހަކަށް ވާތީއެވެ. އަނެއް މީހަކީ އެހެން މީހުން ފައިސާ ދީގެން ގަންނަން ބޭނުންވާ މަޢުލޫމާތު އެނގޭ މީހަކަށް ވާތީއެވެ. އަނެއް މީހަކީ އެހެން މީހުން ދައްކަން ނުކެރޭ ކަންތައްތަކުގައި ބައިވެރިވާން ތައްޔާރަށް ހުރި މީހަކަށް ވާތީއެވެ.
ކޮންމެ ދިމާލަކުންވެސް އޭނާއަށް ފެންނަނީ މަންފާއެވެ. އަދި އެކަންކަމުގެ ސަބަބުން އޭނާ ބަދަލުވިއެވެ.
ފައިސާ ލިބެމުންދާ ވަރަކަށް، މި ދިރިއުޅުމަކީ ބިރުވެރި ކަމެއްގެ ގޮތުގައި އޭނާއަށް ނުފެނެއެވެ. ރަލަކީ އާދައިގެ އެއްޗަކަށް ވިއެވެ. ޕާޓީތަކަކީ އާދައިގެ ކަމަކަށް ވިއެވެ. މަސްތުވާތަކެއްޗަކީ އާދައިގެ އެއްޗަކަށް ވިއެވެ. ސިއްރުވެރިކަމަކީ އާދައިގެ ކަމަކަށް ވިއެވެ. އަންނަ މީހުންނާއި ދާ މީހުންނަކީވެސް އާދައިގެ ކަމަކަށް ވިއެވެ. ކުރިން ނުރައްކާތެރި ކަމެއްގެ ގޮތުގައި ފެނުނު ކަންތައްތައް މަޑުމަޑުން އާދައިގެ ކަންކަމަށް ބަދަލުވިއެވެ. ނުބައިކަން ފެތުރެނީ އެގޮތަށެވެ. އެއީ އަބަދު ތޫފާނެއް ފަދައިން އަންނަ އެއްޗެއް ނޫނެވެ. ބައެއް ފަހަރު އެއީ ކޮޓަރިއެއްގެ ތެރެ އަނދިރިވަމުންދާކަން އިޙުސާސް ނުވާހާ މަޑުމަޑުން އަންނަ ބަދަލެކެވެ. އަދި މިރްޒާއަށް އެކަމެއް ފާހަގައެއް ނުކުރެވުނެވެ. ނުވަތަ އޭނާއަށް އެކަން އެނގި ހުރެމެ، އެކަމާ އަޅާނުލީއެވެ.
އޭނާ ހުރީ އުފަލުންނެވެ. ފައިސާ އެބަހުއްޓެވެ. ނުފޫޒު އެބައޮތެވެ. ފުރުސަތުތައް އެބަހުއްޓެވެ. ވަށައިގެން މީހުން އެބަތިއްބެވެ. އިބްރާހީމްގެ އިތުބާރު ލިބިފައިވެއެވެ. އަދި އެންމެ މުހިންމު ކަމަކީ، އޭނާއަކީ މި ވިޔަފާރިއަށް ކިހާ ޤާބިލު މީހެއްކަން އޭނާއަށް އަމިއްލައަށް އެނގުމެވެ. އެ ހުރިހާ ކަމެއްގެ ސަބަބުން އޭނާ ކުރާ ކަންތައްތައް ދިފާއުކުރަން ފަސޭހަވިއެވެ.
މަޖުބޫރުން ކުރުވާ ކަމެއް ނޫނެވެ. އޭނާއަކީ އެހީތެރިކަމެއް ނެތް މީހެއް ނޫނެވެ. އޭނާއަށް ކުރެވޭ ކަމެއް އެނގެއެވެ. އޭނާ އިޚްތިޔާރު ކުރަނީއެވެ. އަދި އެ އިޚްތިޔާރުތަކާމެދު އޭނާ ހިތްހަމަޖެހެއެވެ. އެއީ މިރްޒާއަށް ކޮންމެވެސް ދުވަހަކުން ކުރިމަތިލާން ޖެހޭނެ ހިތްދަތި ހަޤީޤަތެވެ. އޭނާ އިބްރާހީމްގެ ދުނިޔެއަށް ވެއްޓުނީކީ ނޫނެވެ. އޭނާ އެ ދުނިޔޭގެ އުސޫލުތައް ދަސްކުރީއެވެ. އޭނާ އެ ބަހުރުވަ ދަސްކުރީއެވެ.
ނާޒުކު ހާލަތުގައި ތިބި މީހުން ޕާޓީތަކާއި، މަސްތުވާތަކެއްޗާއި، ފައިސާއާއި، ސަމާލުކަމާއި އަދި އާދައިގެ ދިރިއުޅުމުން ބޭރުގައިވާ ދުނިޔެއެއްގެ އުންމީދު ދީގެން، މީހުން ދަމައިގަނެވޭނެ ގޮތް އޭނާ ހޯދިއެވެ. އަދި އެކަމަށް ކާމިޔާބު މީހަކަށް ވުމަށް އޭނާ އަމިއްލައަށް އިޚްތިޔާރު ކުރިއެވެ. ވަރަށް ކާމިޔާބު މީހަކަށެވެ.
އަހަރުތަކެއް ފަހުން، މިރްޒާ މިހާ ފުންކޮށް މިކަމުގެ ތެރެއަށް ވަނީ ކިހިނެއްތޯ މީހުން ސުވާލުކުރިއިރު، އޭގެ ޖަވާބަކީ މާ އުނދަގޫ ޖަވާބެއް ނޫނެވެ. އޭނާ މި ވިޔަފާރި ދަސްކުރީ އެކަކަށް ފަހު އަނެކަކަށް ބަލައިގެންނެވެ. އެއް ޕާޓީއަށް ފަހު އަނެއް ޕާޓީންނެވެ. އެއް ސިއްރަށް ފަހު އަނެއް ސިއްރުންނެވެ. އެއް ފުރުސަތަށް ފަހު އަނެއް ފުރުސަތުންނެވެ.
އިބްރާހީމްގެ ދުނިޔޭގެ އަރިމަތީގައި ކޮޅަށް ހުރި މީހާ، މިއަދު ހުރީ އެ ދުނިޔޭގެ އަރިމައްޗަކު ނޫނެވެ. އޭނާ ހުރީ އޭގެ މެދުގައެވެ. އަދި އޭނާ ދިޔައީ އެ ދިރިއުޅުމުގެ ކޮންމެ ސިކުންތަކުން އުފާ ހޯދަމުންނެވެ. މިރްޒާއަކީ ނުރައްކާތެރި މީހަކަށްވީ އެ ސަބަބަށްޓަކައެވެ. އެއީ މި ވިޔަފާރިން ކުރާ އަސަރު އޭނާއަށް ނޭނގޭތީއެއް ނޫނެވެ. ނަމަވެސް އެކަން ވަރަށް ފުރިހަމައަށް އެނގި ހުރެވެސް އޭނާ އެގޮތުގައި ކުރިއަށް ދިއުމަށް އިޚްތިޔާރު ކުރީތީއެވެ.
*****
ކާމިޔާބީ ހޯދައި އަމިއްލަ ނަމެއް ބިނާކުރުމަށްޓަކައި، އިބްރާހީމްގެ ދާއިރާއިން ބޭރުން ފުރުސަތުތައް ހޯދަން މިރުޒާ ފެށިއެވެ.
އޭރު އޭނާ ވަނީ އޭނާގެ އާއިލާ އަވަށްޓެރި ސްރީލަންކާއަށް ބަދަލުކޮށްފައެވެ. އެއީ ދިވެހިން އާންމުކޮށް ޗުއްޓީ ހޭދަކުރުމަށާއި، މުނިފޫހިފިލުވުމަށާއި، ވިޔަފާރި އަދި ބޭސްފަރުވާއަށް ގޮސްއުޅޭ މަންޒިލެކެވެ. ދެ ޤައުމުގެ ދެމެދުގައި އޮންނަ މި ގުޅުމުގެ ފައިދާ މިރުޒާއަށް ވަރަށް ރަނގަޅަށް ވިސްނުނެވެ.
އޭނާ ސިއްރިއްޔާތުގައި އެކަހެރި އެޕާޓްމަންޓްތަކާއި ގެތައް ކުއްޔަށް ހިފަން ފެށިއެވެ. މި ތަންތަން ހުންނަނީ ފަތުރުވެރިން ގިނަ ސަރަހައްދުތަކާ ދުރުގައި ކަމުން، ކަސްޓަމަރުން ބޭނުންވާ ފަދަ މިނިވަންކަމާއި ސިއްރުވެރިކަން އެ ތަންތަނުން ލިބެއެވެ.
ދިވެހިންގެ ގްރޫޕްތައް ހޯދަމުން ދިޔައީވެސް ހަމަ އެފަދަ މާހައުލެކެވެ. ދަންނަ މީހުންނާ ބައްދަލުނުވާނެ ތަނެކެވެ. ހިތްހަމަޖައްސާލައި، އުފާ ފާޅުކޮށް، ޤައުމުގައި އޮންނަ އިޖުތިމާއީ ހަމަތަކާއި މަސްއޫލިއްޔަތުތަކުން ދުރުވެލެވޭނެ ފަދަ މާހައުލެކެވެ. މިރުޒާ އެ ފުރުސަތު ފަހިކޮށްދިނެވެ. އަދި މި ހުރިހާ ކަމެއް އިބްރާހީމަށް އެނގޭކަށް ނުޖެހެއެވެ. މިއީ އޭނާގެ އަމިއްލަ ވަކި ވިޔަފާރިއެކެވެ. އަމިއްލަ ނެޓްވޯކެކެވެ. އަމިއްލަ ފައިސާއެވެ. އަދި އޭނާގެ އަމިއްލަ މަޤުބޫލުކަމެވެ.
ފުރަތަމަ މިކަން ފެށުނީ ވަރަށް ކުޑަކޮށެވެ. މަދު އެޕާޓްމަންޓްތަކަކާއި، އިތުބާރު ހިފޭ މަދު ބަޔަކާއެކު ބޭއްވި މަދު ބައްދަލުވުންތަކަކުންނެވެ. ނަމަވެސް، އެކަކު ހިތްހަމަޖެހުމުން އިތުރު ތިން މީހުންނަށް އެ ޚަބަރު ފެތުރޭކަން މިރުޒާއަށް އޮތީ ދަސްވެފައެވެ. އެއް ހަފުލާ ކާމިޔާބުވުމުން އަނެއް ގްރޫޕް އާދެއެވެ. އިތުބާރު ކުރެވޭ އެކަކު މެދުވެރިކޮށް މުޅިން އާ ދާއިރާއެއް އޭނާއަށް ހުޅުވިގެންދެއެވެ.
މާ ގިނަ ދުވަސްތަކެއް ނުވެ، އޭނާގެ ފޯނަށް އަންނަ ކޯލްތައް މެދުނުކެނޑި ގިނަވާން ފެށިއެވެ. ތަންތަނުގެ ވެރިން އޭނާ ދަންނަން ފެށިއެވެ. ޑްރައިވަރުންނަށް އޭނާގެ ކަސްޓަމަރުން އެނގެން ފެށިއެވެ. ޕާޓީތައް އިންތިޒާމުކުރާ މީހުން ސީދާ އޭނާއާ ގުޅަން ފެށިއެވެ. ކުރިން ފަސްޖެހުނު މީހުންވެސް، އެހެން މީހުންނަށް ލިބުމުގެ ކުރިން އާ ސާމާނުތައް އޭނާއަށް ހުށަހަޅަން ފެށިއެވެ.
މަސްތުވާތަކެއްޗާއި، ބާރުގަދަ ބޭސްތަކާއި، އުފާ ފާޅުކުރުމަށް ބޭނުންވާ ހުރިހާ ވަސީލަތްތަކެކެވެ. ކަސްޓަމަރުން ބޭނުންވާ ކޮންމެ ކަމެއް ކޮށްދޭނެ މީހަކު މިރުޒާގެ އަތުގައި އަބަދުވެސް ހުރެއެވެ. މި ހުރިހާ ކަމެއް ގުޅުވައިދޭ މަރުކަޒަކީ މިރުޒާއެވެ. ތަންތަނާއި، ދަތުރުފަތުރާއި، އިންތިޒާމުތަކާއި، ބޭނުންވާ ސާމާނެވެ. އަދި އެކިއެކި މެދުވެރިން މެދުވެރިކޮށް، އަމިއްލަ ހަފުލާތަކަށް ބޭނުންވާނެ އަންހެނުންގެ ޚިދުމަތްވެސްމެއެވެ.
ކޮންމެ ކަމެއްވެސް ހަމަޖެއްސިދާނެއެވެ. ކޮންމެ ކަމެއްވެސް ސިއްރުކުރެވިދާނެއެވެ. މި ސިއްރުވެރިކަމަކީ މިރުޒާގެ ވިޔަފާރީގެ އެންމެ ބޮޑު ކާމިޔާބީއެވެ. އޭނާގެ ކަސްޓަމަރުން ފައިސާ ދެނީ ހަމައެކަނި ތަނަކަށް ނޫންކަން އޭނާއަށް އެނގެއެވެ. އެމީހުން ފައިސާ ދެނީ މިނިވަންކަމާއި ސިއްރުވެރިކަމަށެވެ. އެއްވެސް މީހަކު ސުވާލެއް ނުކުރާނެކަމުގެ އިތުބާރަށެވެ. އަދި އެމީހުންގެ އަސްލު ސޫރަ ފޮރުވައިލެވޭނެ ފަދަ ރޭގަނޑަކަށެވެ. މި ވަގުތީ އުފާވެރިކަން ވިއްކުމުގައި މިރުޒާއަކީ ވަރަށް ހުޝިޔާރު މީހެކެވެ. އޭނާގެ ދާއިރާ ފުޅާވިއެވެ. ލިބޭ ނަފާ އިތުރުވިއެވެ. މީހުން ސިއްރިއްޔާތުގައި އޭނާގެ ނަން ކިޔަން ފެށިއެވެ.
“މިރުޒާއާ ވާހަކަދައްކާށެވެ.”
“މިރުޒާއަށް އެކަން ހަމަޖެއްސޭނެއެވެ.”
“ސިއްރު ތަނެއް ބޭނުންނަމަ މިރުޒާއަށް ގުޅާށެވެ.”
ކޮންމެ ރަސްމީ މަގާމަކަށްވުރެ މި ބަސްތައް އޭނާއަށް މާ އަގުބޮޑުވިއެވެ. އޭނާ ދިޔައީ އަމިއްލަ ބާރެއް ބިނާކުރަމުންނެވެ. އިބްރާހީމަށް އެއްވެސް މިންވަރަކަށް ނޭނގޭ ކަންތައްތަކެކެވެ.
މިރުޒާގެ ހިތުގައި ފުރަތަމަ ފަހަރަށް ސުވާލެއް އުފެދުނެވެ. އޭނާއަކީ އަމިއްލަ ފައިމައްޗަށް ތެދުވެވޭހާ ބާރުގަދަ މީހަކަށް ވެވިދާނެ ބާވައެވެ؟ އޭނާ ފެށީ މީހެއްގެ ނޯކަރެއްގެ ގޮތުގައެވެ. ނަމަވެސް މިހާރު އޭނާއަކީ ސިއްރިއްޔާތުގައި އަމިއްލަ ނަމެއް އުފައްދާފައިވާ މީހެކެވެ. އަމިއްލަ ވިޔަފާރި ކާމިޔާބުވަމުން ދިޔަ ވަރަކަށް، މިރުޒާގެ އުންމީދުތައް އުފުލެމުން ދިޔައެވެ. އެހެން މީހެއްގެ ދަށުގައި ހުރެގެން ފައިސާ ހޯދުމަށްވުރެ، އެ މީހާގެ ހިޔަނީގައި ހުރެ އަމިއްލަ “ރަސްކަމެއް” ބިނާކުރުމުން ލިބޭ ފައިދާ މާ ބޮޑުކަން އޭނާއަށް ވިސްނުނެވެ.
(ނުނިމޭ)
