ދޮންވެ ފައްކާނުވާ ފެހި ދޮންކެޔޮ ކެއުމުން ހަޖަމުކުރުމުގެ ނިޒާމަށް ލިބޭ ފައިދާތަކާއި، ލޭގައި ހަކުރު ހުންނަ މިންވަރު ކޮންޓްރޯލް ކުރުމަށް އެހީތެރިވެދޭ ގޮތާ ގުޅޭގޮތުން ދިރާސާތަކެއް ކުރެވިއްޖެއެވެ.

ފެހި ދޮންކެޔޮ ބޭނުންކުރުމަކީ ހަމައެކަނި ފޮނިކަން ކުޑަ މޭވާއެއްގެ އިޚްތިޔާރުގެ އިތުރުން، އޭގައި އެކުލެވޭ “ރެސިސްޓަންޓް ސްޓާޗް” ގެ ސަބަބުން ސިއްޙީ ގޮތުން ގިނަ ފައިދާތަކެއް ލިބިދާނެ ކަމެކެވެ. ރެސިސްޓަންޓް ސްޓާޗަކީ ފައިބަރާ އެއްފަދަ ގޮތަކަށް މަސައްކަތްކުރާ ކާބޯހައިޑްރޭޓްގެ ބާވަތެކެވެ.

މިދިޔަ މެއި މަހުގެ 6 ވަނަ ދުވަހު “ފުޑް ސައިންސް އެންޑް ނިއުޓްރިޝަން” މަޖައްލާގައި ހާރޫން މުނީރު އަދި އޭނާގެ ޓީމުން ޝާއިޢުކޮށްފައިވާ ދިރާސާއެއްގައި، ފެހި ދޮންކެޔޮގައި ހުންނަ ރެސިސްޓަންޓް ސްޓާޗް ސިއްޙީ ގޮތުން ބޭނުންކުރެވިދާނެ ގޮތްތަކުގެ މައްޗަށް އަލިއަޅުވާލާފައިވެއެވެ. މި ދިރާސާއިން ދައްކާ ގޮތުގައި މި މާއްދާއަކީ ގޮހޮރުގެ ދުޅަހެޔޮކަން އިތުރުކުރުމަށް އެހީތެރިވެދޭ އަދި ބައެއް ބާވަތްތަކުގެ ސިއްޙީ ކާނާ އުފެއްދުމުގައި ބޭނުންކުރެވިދާނެ މާއްދާއެކެވެ.

ދޮންވެފައިވާ ކެޔޮވަކާ ޚިލާފަށް، ފެހި ދޮންކެޔޮގައި ރެސިސްޓަންޓް ސްޓާޗް ގިނަ އަދަދަކަށް އެކުލެވިގެންވެއެވެ. މިއީ ކުޑަގޮހޮރުގެ ތެރޭގައި އެއްކޮށް ހަޖަމުނުވެ ބޮޑުގޮހޮރަށް ދާ އެއްޗެކެވެ. އެތަނުން ގޮހޮރުގެ ބެކްޓީރިއާގެ އެހީގައި މިއީ “ޝޯޓް-ޗެއިން ފެޓީ އެސިޑްސް” އަށް ބަދަލުވެ، ގޮހޮރުގެ ދުޅަހެޔޮކަން ދެމެހެއްޓުމަށް ބާރުއަޅައެވެ.

މާޗް 29، 2024 ގައި “މޮލިކިއުލްސް” މަޖައްލާގައި ޔަސްމީން އެމް. ބަޝްމިލް އަދި އޭނާގެ ޓީމުން ޝާއިޢުކުރި އެހެން ދިރާސާއެއްގައި އޮސްޓްރޭލިއާގެ ތިން ބާވަތެއްގެ ފެހި ދޮންކެޔޮ ތަހުލީލުކޮށްފައިވެއެވެ. ލެބޯޓްރީ ތަހުލީލުތަކުން މި ބާވަތްތަކުގައި ރެސިސްޓަންޓް ސްޓާޗާއި ފައިބަރު ހުރިކަން ކަށަވަރުވި ނަމަވެސް، ލެބޯޓްރީގެ މި ނަތީޖާތަކަކީ އިންސާނުންގެ ހަށިގަނޑުގައި ސީދާ އެގޮތަށް ހިނގާނެ ކަންކަން ކަމުގައި ނިންމޭނީ އިތުރު ދިރާސާތަކުންނެވެ.

ފެހި ދޮންކެޔޮ ލޭގައި ހަކުރު ހުންނަ މިންވަރު ކޮންޓްރޯލް ކުރަން އެހީވޭތަ؟

ކެއުމަށްފަހު ލޭގައި ހަކުރު މައްޗަށްދާ މިންވަރު ކުޑަކުރުމަށް ރެސިސްޓަންޓް ސްޓާޗް އެހީތެރިވެދެއެވެ. ސަބަބަކީ މިއީ އާދައިގެ ކާބޯހައިޑްރޭޓްތަކާ ތަފާތު ގޮތަކަށް ހަޖަމުވާ އެއްޗަކަށް ވާތީއެވެ. ނަމަވެސް، މީގެ ނަތީޖާ ބިނާވެފައިވަނީ ކެޔޮވަކުގެ ފެހިކުލަ އާއި، ތައްޔާރުކުރާ ގޮތާއި، ކާ މިންވަރު އަދި އެއާއެކު ކާ އެހެން ބާވަތްތަކުގެ މައްޗަށެވެ. އެހެންކަމުން، ފެހި ދޮންކެޔޮ ބޭނުންކުރުމަކީ ހަކުރު ބަލީގެ ފަރުވާއެއް ކަމުގައި ބަލައިގެން ނުވާނެއެވެ.

2019 ވަނަ އަހަރު “ނިއުޓްރިއެންޓްސް” މަޖައްލާގައި އާނާ ލުއިސާ ފަލްކޮމަރާއި އޭނާގެ ޓީމުން ކުރި ދިރާސާއަކުންވެސް ފެހި ދޮންކެޔޮގެ ސަބަބުން ހަޖަމުކުރުމާއި، މެޓަބޮލިޒަމް އަދި ބަރުދަން ލުއިކުރުމަށް ކުރާ އަސަރުތައް ބަލާފައިވެއެވެ. އަދި މިކަމުގައި އިތުރު ފުޅާ ދިރާސާތައް ބޭނުންވާކަން އެ ދިރާސާގައި ފާހަގަކޮށްފައިވެއެވެ.

ފެހި ދޮންކެޔޮ ކެއްކުމަށްފަހު ނުވަތަ އާވިން މަޑުކޮށްގެން ކެއުމުގައި ބޭނުންކުރެވިދާނެއެވެ. މީގެ އިތުރުން ފެހި ދޮންކެޔޮ ފުށަކީވެސް ބޭނުންކުރެވިދާނެ އެއްޗެކެވެ. ރެސިސްޓަންޓް ސްޓާޗް އެކުލެވޭ ކާނާ ބޭނުންކުރަން ފަށާއިރު، މަޑުމަޑުން އެ މިންވަރު އިތުރުކުރުމުން ބަނޑު ފުއްޕުމާއި ގޭސްވުން ފަދަ ކަންކަމުން ދުރުހެލިވެވޭނެއެވެ.

ފެހި ދޮންކޭލަކީ އެކަނި ބޭނުންކޮށްގެން ހުރިހާ ބައްޔަކަށް ޝިފާ ލިބޭނެ އެއްޗެއް ނޫނެވެ. ނަމަވެސް، މިއީ ފައިބަރުން މުއްސަނދި، ސިއްޙަތަށް ފައިދާހުރި ކާނާގެ ތެރޭގައި ހިމަނާލެވިދާނެ މޭވާއެކެވެ. ގޮހޮރުގެ ދުޅަހެޔޮކަމާ ގުޅޭ ދިރާސާތައް ކުރިއަށްދާއިރު، މޭވާއެއްގެ ފެހިކުލައިގެ ސަބަބުން އޭގެ ރަހަޔާއި އޮނިގަނޑުގެ އިތުރުން، އޭގައި އެކުލެވޭ ފައިދާތަކަށްވެސް ބަދަލު އަންނަކަން މިކަމުން ހާމަވެއެވެ.