މިއޯ މިއޯ
ވަޝިއްޔާއަށް ކަމެއް ގޯސްވެއްޖެކަމުގެ ޝައްކު ފުރަތަމަ ކުރެވުނީ މާ މުހިންމު ނޫންކަމަށް ފެނުނު ވާހަކައެއްގެ ތެރެއިންނެވެ. އެއީ މެންދުރުފަހުގެ ވަގުތެއްގައި އޭނާ އުޅޭ ގްރޫޕުގެ ދެ އަންހެނަކާއެކު ކެފޭއެއްގައި ތިއްބައެވެ. އެމީހުން ވާހަކަދައްކަމުން ދިޔައީ މިދިޔަ ހަފުތާ ބަންދުގައި ދިޔަ ޕާޓީއެއްގެ ވާހަކައެވެ. އެތަނުގެ މިއުޒިކާއި، ބާރުބޮޑު ނެށުމުގެ މައިދާނާއި، މުޅި ރޭ އޭނާއަކީ މުހިންމު މީހެއްކަން ދެއްކުމަށް މަސައްކަތްކުރި މީހެއްގެ ވާހަކަ ދައްކައި އެމީހުން ހެމުން ދިޔައެވެ.
އެތަނުން އެކަކު، އެރޭގެ ދަންވަރު ވަގުތެއްގައި އާދަޔާ ޚިލާފަށް ބިރުގަނެ ހާސްވި ޒުވާން ދަތުރުވެރިއެއްގެ ވާހަކަ ބުންޏެވެ. “ފުރަތަމަ އޭނާ އުޅުނީ ވަރަށް ހީނ މަޖާކޮށް.” ބޯން ހުރި އެއްޗަށް ސަމުސަލުން ގަށަމުން އޭނާ ބުންޏެވެ. “އެކަމަކު ފަހުން އޭނާ އާދަޔާ ޚިލާފު ވާހަކަތައް ދައްކަން ފެށީ. މީހުން އޭނާއާ ބެހޭގޮތުން ވާހަކަދައްކަނީ ކަމަށް ހީކޮށް، ބޭރަށް ދާން ބޭނުންވެގެން އުޅުނީ.”
“އޭނާ ހުރީ މަސްތުވެފައިތަ؟” ވަޝިއްޔާ އެހިއެވެ.
“ނޭނގޭ. ވެދާނެ. މީހަކު ބުނި އޭނާ އެއްޗެއް ބޭނުންކުރި ކަމަށް.”
“ކޮން ކަހަލަ އެއްޗެއް؟”
އެ އަންހެން މީހާ ކޮނޑު އަރުވާލިއެވެ. “ޕާޓީ ޕިލްސް ކަމަށް ވެދާނެ. މީހަކު ބުނި އަޑުއެހިން އެއީ މިއޯ އޭ ކިޔާ އެއްޗެއް ކަމަށް.”
ވަޝިއްޔާގެ މޫނުމަތީގެ ކުލަވަރު ކުޑަކޮށް ބަދަލުވިއެވެ. އެ ނަން އޭނާއަށް ކުރިންވެސް ވަނީ އިވިފައެވެ. ރާއްޖެއިން ބޭރުގެ ރޭގަނޑުގެ ދިރިއުޅުމުގެ ވާހަކަތަކާއި، އިންޓަނެޓްގެ ބަހުސްތަކާއި، ނޫސްތަކުގެ ސުރުޚީތަކަށް އަރާ މީހުންގެ ވާހަކަތަކުގެ ތެރެއިން އެ ނަން އޮންނަނީ އިވިފައެވެ. ނަމަވެސް އޭނާ ދަންނަ އާދައިގެ މީހުންގެ ދިރިއުޅުމުގެ ތެރެއަށް މިކަން މިހާ ފަސޭހައިން ވަދެދާނެ ކަމަކަށް އޭނާ ދުވަހަކުވެސް ހީނުކުރެއެވެ.
“އޭނާ ހޮސްޕިޓަލަށް ގެންދިޔަތަ؟” އޭނާ އެހިއެވެ.
“ނޫން، އެހެނެއް ހީނުވޭ. އޭނާ ހަމައަކަށް އެޅެންދެން ރައްޓެހިން އޭނާއާއެކު ތިބީ.”
“އޭނާ ބޭނުންކުރީ ކޯއްޗެއްކަން އެމީހުންނަށް އެނގޭތަ؟”
އަނެއްކާވެސް އޭނާ ކޮނޑު އަރުވާލިއެވެ. “މަށަށް ހީވަނީ އެމީހުންނަށް އެނގޭ ކަމަށް އެމީހުން ހީކުރަނީހެން.”
އެ ވާހަކަ ނިމުނު ފަހުންވެސް ވަޝިއްޔާގެ ހިތުން އެކަން ފިލައިގެން ނުދެއެވެ. އޭނާ ފާއިތުވި ހަފުތާތަކުގައި ދިޔައީ އޭނާގެ ވަށައިގެންވާ މާޙައުލު ބަލައި، އާ ތަންތަނާއި މީހުންގެ ތަފްސީލުތައް އޭނާގެ ނޯޓުފޮތުގައި ލިޔަމުންނެވެ. އޯގާތެރިކަމާއި، އެކަނިވެރިކަމާއި، އަމިއްލަ ރަށުގެ މީހަކާ ބައްދަލުވުމުން ލިބޭ އުފަލާއި، އަމިއްލަ މާޙައުލާ ދުރުގައި އުޅޭއިރު މީހުން ބަދަލުވާ ގޮތުގެ ވާހަކަތައް އޭނާ ލިޔުނެވެ.
ނަމަވެސް މިހާރު އޭނާގެ ހިތުގައި އުފެދުނީ މީހުން ކިޔައިނުދޭ ވާހަކަތަކާމެދު ސުވާލެވެ. އޭނާ ކިޔާފައިވާ ނޫސްތަކުގެ ސުރުޚީތަކާއި، ދިވެހިންގެ ތެރޭގައި ތުންތުންމަތިން ދެކެވޭ ވާހަކަތަކާއި، މަސްތުވާތަކެއްޗާއި ނުރައްކާތެރި ޕާޓީތަކަކީ ހަމައެކަނި މުއްސަނދިންގެ ތެރޭގައި އޮންނަ ކަމެއް ކަމަށް ހީކުރެވޭ ހީކުރުމާމެދު އޭނާ ވިސްނާލިއެވެ.
ފަހަރުގައި އެއީ ކުށްހީއަކަށް ވެދާނެއެވެ. މީހުން އެއްވާ ކޮންމެ ތަނެއްގައިވެސް، އަދި އެހެން މީހުންގެ ބޭނުންތަކުން ނާޖާއިޒު ފައިދާ ނަގަން ބަޔަކު ތިބި ކޮންމެ ތަނެއްގައިވެސް މި ނުރައްކާ އޮތީއެވެ.
އެރޭ ވަޝިއްޔާ އޭނާގެ ނޯޓުފޮތް ހުޅުވާލިއެވެ. އާ ސަފުހާއެއްގެ މަތީގައި ތާރީޚު ޖެހުމަށްފަހު، ކުޑަ ވަގުތުކޮޅަކު މަޑުކޮށްލައިގެން އިނީ ތިރީގައިވާ މަގުމަތިން އިވޭ އަޑުތަކަށް ސަމާލުކަން ދީގެންނެވެ. އެއަށްފަހު އޭނާ ލިޔަން ފެށިއެވެ.
“ޕާޓީ ޑްރަގްސް” އާ ބެހޭގޮތުން އެންމެންވެސް އަޑުއަހާފައިވާނެއެވެ. ޚަބަރުތަކުގެ ސުރުޚީތަކުންނާއި، މަޝްހޫރު މީހަކަށް ކުށެއް ކުރެވުނީތޯ ނުވަތަ އެއީ ގަސްތުގައި ބަޔަކު ރޭވި ކަމެއްތޯ ބަހުސްކުރާ މަންޒަރު ސޯޝަލް މީޑިއާއިން އަހަރެމެންނަށް ފެނެއެވެ. ގިނަ ފަހަރަށް މިފަދަ ވާހަކަތަކަކީ އަހަރެމެންގެ ދިރިއުޅުމާ މާ ދުރުގައި އުޅޭ، މުއްސަނދިންނާއި، ޚާއްސަ ޕާޓީތަކާއި، ނައިޓް ކްލަބްތަކުގައި އުޅޭ މީހުންގެ މެދުގައި ހިނގާ، އަހަރެމެންނާ ބެހޭ ކަންކަން ނޫންކަމުގައި ހީވެދެއެވެ. ނަމަވެސް، އާދައިގެ ޗުއްޓީ ހޭދަކުރާ މީހުންގެ ތެރޭގައި މިފަދަ ތަކެތި ފެންނަން ފެށުމުން ވާނީ ކިހިނެއް ހެއްޔެވެ؟ ބޭސްފަރުވާއަށާއި، ވިޔަފާރިއަށާއި، ނުވަތަ ދިރިއުޅުމުގެ ޒިންމާތަކުން ބަރީއަވެލައި، ހިތްހަމަޖައްސާލަން ދަތުރުކުރާ މީހުންގެ ތެރޭގައި މިފަދަ ކަންކަން ހިނގަން ފެށުމުން ވާނީ ކިހިނެއް ހެއްޔެވެ؟ އެއީ އެ މީހުންގެ މުޅި އުމުރަށް ހިޔަނި އެޅިދާނެ ފަދަ ކަމަކާ ކުރިމަތިލާން ޖެހިދާނެ ކަމަށް ދުވަހަކުވެސް އުންމީދު ކުރި ބައެއް ނޫނެވެ.
އޭނާ ލިޔުން މެދުކަނޑާލައި، އެ ލިޔުނު ބައި ކިޔާލުމަށްފަހު އަނެއްކާވެސް ކުރިއަށް ގެންދިޔައެވެ.
“ޕާޓީ” މި ބަހުގެ ސަބަބުން ކޮންމެ ކަމަކީވެސް ނުރައްކަލެއް ނެތް ކަމެއްގެ ގޮތުގައި ސިފަވެއެވެ. ޕާޓީއަކީ މިއުޒިކާއި، ރައްޓެހިންނާއި، ހިނިތުންވުމާއި، ފޮނި ހަނދާންތަކާ ގުޅިފައިވާ ކަމެކެވެ. ނަމަވެސް، އެއްވެފައިވާ ބައެއްގެ މެދުގައި ކޮން އެއްޗެއްކަން ނޭނގޭ މާއްދާތަކަކީ މަޖާކޮށްލަން ބޭނުންކުރާ އާދައިގެ އެއްޗެއް ކަމަށް ދެކެން ފެށުމުން، އެ މަޖާ މާހައުލު ބަދަލުވެގެންދެއެވެ. އަހަރެން އެންމެ ކަންބޮޑުވަނީ، ބައެއް މީހުން އެ ބޭނުންކުރާ އެއްޗަކާ ބެހޭގޮތުން އެއްވެސް މަޢުލޫމާތެއް ނެތި އެ ބޭނުންކުރާތީއެވެ. ވަކި ނަމަކުން އެ އެއްޗަކަށް ކިޔުމަކީ އޭގެ ނުރައްކާ ނެތްކަމުގެ ޔަގީންކަމެއް ނޫނެވެ. ކިތަންމެ އިތުބާރާއެކު މީހަކު ބުނި ކަމުގައިވިޔަސް، އެއީ ރައްކާތެރި އެއްޗެއްކަމުގެ ކަށަވަރުކަމެއް ނުލިބެއެވެ. އަދި އެހެން މީހަކު އެއިން ހިތްހަމަޖެހުން ހޯދަމުން ދިޔަޔަސް، އަނެކާއަށް އެއީ ރައްކާތެރި އެއްޗަކަށް ނުވެދާނެއެވެ.
ވަޝިއްޔާ ލިޔުން ހުއްޓާލިއެވެ. އޭނާގެ ރައްޓެހިން ބިރުގަންނަވާލި އެ ޒުވާން ދަތުރުވެރިޔާއާމެދު އޭނާ ވިސްނާލިއެވެ. އެ ރޭގެ ކަންތައްތައް އޭނާގެ ހަނދާނުގައި ހުންނާނެބާވައެވެ؟ އޭގެ ނުރައްކަލާ ބެހޭގޮތުން މީގެ ކުރިން އެއްވެސް މީހަކު އޭނާއަށް ކިޔައިދީފައިވޭބާވައެވެ؟ ނުވަތަ އެއީ ސުވާލު އުފައްދަން ނުޖެހޭ ފަދަ އާދައިގެ ކަމެއްގެ ގޮތުގައި އޭނާއަށް ދެއްކީ ބާވައެވެ؟
ދެން އޭނާ އެންމެ ފަހު ޖުމްލަ ލިޔުނެވެ.
“ފަހަރުގައި ރޭގަނޑެއްގެ އެންމެ ނުރައްކާތެރި ކަމަކީ މީހަކު ބޭނުންކުރާ އެއްޗެއް ނޫނެވެ. އެހެންނަމަވެސް، އެތަނެއްގައި ތިބި އެންމެންގެ ނުފޫޒުން، އެއްވެސް ސުވާލެއް ކުރުމަކީ ބޭނުންތެރި ކަމެއް ނޫންކަމަށް އޭނާއަށް ޤަބޫލުކުރެވޭ ކުރުވުމެވެ.”
އޭނާ ނޯޓުފޮތް ލައްޕާލިއެވެ.
އޭރު އެއީ އަދި މަޒުމޫނެއް ނޫނެވެ. އެއީ އޭނާއަށް ފާހަގަކުރެވުނު ކަންތައްތަކަކާއި، ޖަވާބު ނުލިބޭ ސުވާލުތަކަކާއި، އަދި އޭނާއަށް އިވުނު ވާހަކަތަކަކީ ހަމައެކަނި ތުންތުންމަތިން ދެކެވޭ ވާހަކަތަކަށްވުރެ ބޮޑު ކަމެއްގެ ފެށުން ކަމަށް ބުނެދޭ އުނދަގޫ އިޙުސާސެކެވެ. އެ ދުނިޔޭގައި މިރުޒާގެ ބައިވެރިވުން އޮތް މިންވަރެއް އޭނާއަކަށް ނޭނގެއެވެ. އެފަދަ އެއްވުންތަކުގައި ފެންނަ މިނިވަންކަމަކީ، އެތަނުގައި ހިނގާ ކަންކަމުގެ ހަޤީޤަތް މީހުންނަށް ނޭނގޭތީ ލިބިފައިވާ އެއްޗެއްކަންވެސް އޭނާއަކަށް ނޭނގެއެވެ. އަދި ލަންކާގައި އޭނާ ހުރި ހުރުން ފަސޭހަކޮށްދިން މީހާއަކީ، އޭނާ ދިރާސާކުރަން ފެށި މާހައުލަށް ކުރިންވެސް ފަރިތަ މީހެއްކަމެއް އޭނާއަކަށް ނޭނގެއެވެ.
*****
ވަޝިއްޔާގެ މޫނުމަތިން ފެންނަން ހުރި އަސަރުތަކަށްވުރެ ކުރިން މިރުޒާއަށް ފާހަގަވީ އޭނާގެ ނޯޓުފޮތެވެ. އެރޭ މިރުޒާ އެ އެޕާޓްމަންޓަށް އައީ އާދައިގެ މަތިން ސައިބޯލައި، ކުރިއަށް އޮތް ހަފުތާގެ ރޭވުންތަކާ ބެހޭގޮތުން ވާހަކަދައްކާލުމުގެ ބޭނުމުގައެވެ. ނަމަވެސް، އޭނާއަށް ފެނުނީ ވަޝިއްޔާ ކާ މޭޒު ދޮށުގައި އިށީނދެގެން އިނދެ، އަތުން ލިޔެފައިވާ ގިނަ ނޯޓުތަކެއް ފަތުރާލައިގެން އިން މަންޒަރެވެ. މިރުޒާ އެތެރެއަށް ވަނުމުން ވަޝިއްޔާ އިސްއުފުލާ ބަލާލިއެވެ.
“މިއަދު މާ މަޑުމައިތިރިކޮށް ތިޔަ އިނީ.” މިރުޒާ ބުންޏެވެ.
“އަހަރެން މި ވިސްނަނީ.”
“ތިޔައީ ނުރައްކާތެރި ކަމެއްހެން ހީވޭ.”
“އެއީ ސުވާލު ކުރެވުމަށް ބޭނުންނުވާ މީހުންނަށް އޮތް ނުރައްކަލެއް.”
މިރުޒާ ހިނިތުންވެލި ނަމަވެސް، އަނެއްކާވެސް އެ ގަނޑުތަކަށް ބަލާލިއެވެ.
“ކޮން އެއްޗެއް ތިޔަ ލިޔަނީ؟”
“އަޑުއިވުނު ކަމަކާ ބެހޭގޮތުން.”
“ޝައުޤުވެރި ކަމެއްތަ؟”
“ކަންބޮޑުވާންޖެހޭ ކަމެއް.” އޭނާ ގޮނޑިއެއް ދަމާލި ނަމަވެސް، ވަގުތުން ނީށީނދެއެވެ.
“އެއީ އަބަދު އެއް ކަމަކަށް ނުވެދާނެ.”
“ނޫން.” އޭނާ ބުންޏެވެ. “އެކަމަކު ބައެއް ފަހަރު އެއީ އެއް ކަމެއް.”
މިރުޒާ އޭނާގެ މޫނަށް ފުންކޮށް ބަލާލިއެވެ. އޭނާގެ މޫނުމަތިން އެއްވެސް ތުހުމަތެއް ނުވަތަ ޝައްކެއް ފެންނާކަށް ނެތެވެ. އޭނާ ހުރީ ފިކުރުބޮޑުވެފައި ކަންނޭނގެއެވެ. މިރުޒާގެ ހިތަށް އެރިއެވެ. އެ ގްރޫޕުގެ ތެރެއިން އޭނާއަށް އިވުނު ވާހަކައަކުން، މިރުޒާ ދަންނަ މީހުންނާ ބެހޭގޮތުން ސުވާލު އުފެދޭ ހިސާބަށް ކަންކަން ގޮސްފިބާވައެވެ؟ މިރުޒާއަކީ އަބަދުވެސް އަމިއްލަ ނަފްސުގެ ކަންކަން ހާމަކުރުމުގެ ކުރިން އެހެން މީހުން ދިރާސާކުރާ މީހެކެވެ. ނަމަވެސް ވަޝިއްޔާއާމެދު އެގޮތަށް ކަންތައް ކުރުން އޭނާއަށް އުނދަގޫވިއެވެ.
“ކިހިނެއްވީ؟” އޭނާ އެހިއެވެ.
ވަޝިއްޔާ އޭނާއަށް ކެފޭއިން އިވުނު ވާހަކަ ކިޔައިދިނެވެ. ކޮން އެއްޗެއްކަން ނޭނގޭ މާއްދާއެއް ބޭނުންކޮށްގެން ހާލު ދެރަވި ޒުވާން ދަތުރުވެރިޔާގެ ވާހަކައާއި، އެކަމާ ބެހޭގޮތުން މީހުން ވަރަށް އާދައިގެ ގޮތަކަށް ވާހަކަދެއްކި ގޮތުގެ ވާހަކައެވެ. މިރުޒާ އެއްވެސް ބަހެއް ނުބުނެ އަޑުއަހަން އިނެވެ. އޭނާ ވާހަކަ ނިންމާލުމުން، މިރުޒާ ގޮނޑީގައި ލެނގިލިއެވެ.
“ބޭރަށް ގޮސް އުޅޭއިރު މީހުންނަށް މޮޔަ ކަންތައްތައް ކުރެވޭނެ.” އޭނާ ބުންޏެވެ.
“އޭގެ މާނައަކީ އެއީ ސީރިއަސް ކަމެއް ނޫންކަމަށް އަހަރެމެން ދެކިގެން ނުވާނެއޭ.”
“އަހަރެން އެހެނެއް ނުބުނަން.”
“ކަލޭ ތިޔަ ބުނި ގޮތުން ހީވަނީ އެއީ ވަރަށް އާދައިގެ ކަމެއްހެން.”
“އެއީ އެކަހަލަ ކަންކަން ހިނގާތީ.”
“އަހަރެން އެންމެ ކަންބޮޑުވަނީވެސް ތިޔަހެންވެ.” މިރުޒާ ކުރިއަށްވުރެ ބޮޑަށް އޭނާއަށް ސަމާލުކަން ދިނެވެ.
(ނުނިމޭ)
