އިމާދު މަޑުމަޑުން ބުންޏެވެ. “ސާރާ އެނބުރި އަތުވެއްޖެ.”
ވާދިލްގެ އަތުގައި އޮތް ތަށި ދޫނުވީ ކިރިޔާއެވެ. “ކީކޭ؟ އެކަމަކު އޭނާ ރަށުން ނާންނާނެ ކަމަށް އެއްބަސްވިއެއްނު؟ އަހަރެމެން އޭނާއަށް ފައިސާވެސް ދިނީމެއްނު؟”
“އޭނާ މިހާރު ފައިސާއެއް ބޭނުމެއް ނޫން. އޭނާ ބޭނުންވަނީ ބަދަލުހިފަން،” އިމާދު ބުންޏެވެ. “އަދި އޭނާގެ އަތުގައި ބައްޕަގެ އެ ހުރިހާ ފައިލްތަކެއް އެބަހުރި.”
ވާދިލްގެ މޫނު ހުދުވިއެވެ. އެ ފައިލްތަކުގައި ވާދިލްގެ އާއިލާގެ ބައެއް ސިއްރުތައްވެސް ހިމެނެއެވެ. “އިމާދު، އަހަރެމެން އޭނާ ހުއްޓުވަން ޖެހޭނެ. ކޮންމެ ގޮތަކުންވިޔަސް.”
—–
ހަމަ އެވަގުތު، ހުޅުމާލޭގެ ކުޑަ އެޕާޓްމަންޓެއްގައި ސާރާ އިނީ އޭނާގެ ލެޕްޓޮޕް ހުޅުވައިގެންނެވެ. އޭނާ ބަލަމުންދިޔައީ ‘ރިކާޒް ހޯލްޑިންގްސް’ ގެ އަހަރީ ރިޕޯޓުތަކެވެ. އޭނާގެ ކައިރީގައި އޮތް ފައިލެއްގައި ބައެއް ފޮޓޯތައް ހުއްޓެވެ. އެއީ މީގެ އަހަރުތަކެއް ކުރިން ހިނގާފައިވާ ބޮޑު ހާދިސާއެއްގެ ފޮޓޯތަކެކެވެ.
އެ ފޮޓޯތަކުން ފެންނަނީ އަލިފާން ރޯވެފައިވާ ގުދަނެކެވެ. އެ ގުދަނަކީ ސާރާގެ ބައްޕަ ބަލަހައްޓަމުންދިޔަ ތަނެކެވެ. އެ ރޭ އޭނާގެ ބައްޕަ ހައްޔަރުކުރެވުނީ ވައްކަން ކުރި ކަމުގެ ތުހުމަތުގައެވެ. ނަމަވެސް ހަގީގަތަކީ އެއީ އިންޝުއަރެންސް ފައިސާ ހޯދުމަށް އިމާދުގެ ބައްޕަ ރޭވި ކަމެކެވެ.
ސާރާގެ ފޯނަށް މެސެޖެއް އައެވެ. އެއީ ނޭނގޭ ނަންބަރަކުން އައި މެސެޖެކެވެ. “ކަލޭ މާލޭގައި އުޅެން ބޭނުންނަމަ، މާދަމާ ހެނދުނު 10 ޖަހާއިރު ސަލްސާ ރޯޔަލްއަށް އާދޭ. -ނާޝާ-”
ސާރާގެ ހިތް ބާރަށް ތެޅެން ފެށިއެވެ. އޭނާ ވަގުތުން ނިންމީ ހަނގުރާމަ ފަށާށެވެ. “އަހަރެން ތައްޔާރު،” އޭނާ އަމިއްލަ ނަފްސަށް ބުންޏެވެ.
—–
ޖެހިގެން އައި ދުވަހު ހެނދުނު، ސަލްސާ ރޯޔަލްގެ ވީއައިޕީ ރޫމެއްގައި ނާޝާ އިނީ ސައި ބޯށެވެ. އޭނާގެ ހެދުން އެޅުމާއި އިށީނދެގެން އިން ގޮތުން ޝާހީކަން ފެންނަން ހުއްޓެވެ.
ސާރާ އެތެރެއަށް ވަނެވެ. އޭނާ ލައިގެން ހުރީ އާދައިގެ ކުރުތާ އެކެވެ. ނަމަވެސް އޭނާގެ މޫނުމަތިން ފެންނަނީ ކެރޭ ފަދަ ސިފައެކެވެ.
“އިށީނދޭ،” ނާޝާ އަމުރުވެރި ރާގަކަށް ބުންޏެވެ. “އަހަރެން ވަގުތު ބޭކާރު ކުރާކަށް ބޭނުމެއް ނޫން. ކަލެއާއި އިމާދާ އޮތީ ކޮން ގުޅުމެއް؟”
ސާރާ ހަމަޖެހިލައިގެން އިށީނދެ ނާޝާގެ ލޮލަށް ބަލައިލިއެވެ. “އަހަރެމެންނަކީ ކުރީގެ އެކުވެރިން. އެއަށްވުރެ ބޮޑަށް، އަހަރެންގެ ބައްޕައަކީ އޭނާގެ ބައްޕަގެ މުވައްޒަފެއް.”
“ކުރީގެ އެކުވެރިންނެއް ސިއްރުން ބީޗްގައި ބައްދަލެއް ނުކުރާނެ،” ނާޝާ ހަރުކަށިވިއެވެ. “އަދި އެ ކުއްޖާ… އެއީ އިމާދުގެ ދަރިއެއް ދޯ؟”
ސާރާ ކުޑަކޮށް ހީނލިއެވެ. “ނާޝާ، ކަލޭ ބިރުގަންނަނީ ކޮން ކަމަކާ؟ އިމާދު ކަލޭ ދޫކޮށްލަފާނެތީތަ؟ ނޫނީ ކަލޭގެ ތި މުއްސަނދި ދިރިއުޅުން ގެއްލިދާނެތީތަ؟”
ނާޝާ މޭޒުމަތީގައި އަތުން ޖެހިއެވެ. “މަށާ ކުޅެން ނޫޅޭތި! އަހަރެން ބޭނުންވެއްޖެނަމަ ކަލޭ މި ރަށުން ބޭރުކޮށްލާކަށް ފަސް މިނެޓުވެސް ނުނަގާނެ.”
“އެހެންތަ؟” ސާރާ ފޯނުން ފޮޓޯއެއް ދައްކާލިއެވެ. އެއީ އިމާދުގެ ބައްޕަ ސޮއިކޮށްފައިވާ ސިއްރު އެއްބަސްވުމެކެވެ.
“މިއީ ކޮން އެއްޗެއްކަން އެނގޭތަ ؟ މިއީ ކަލޭގެ ފިރިމީހާގެ އާއިލާއަކީ ގާތިލުންކަން ސާބިތުކޮށްދޭނެ ހެއްކެއް. މި ލިޔުން މީޑިއާއަށް ދީފިނަމަ، ކަލޭގެ ތި މުއްސަނދިކަން ލޮލުކޮޅުންވެސް ހޯދޭ ފެންނާނެހެން ކަލެއަށް ހީވޭތަ؟”
ނާޝާގެ މޫނުމަތިން ކުލަވަރު ފަނޑުވެގެން ދިޔައެވެ. އޭނާ ދުވަހަކުވެސް ހީނުކުރާ ފަދަ ބާރުގަދަ އަންހެނަކާ އަދި ކިރިޔާ މި ބައްދަލުވީއެވެ.
“ކަލޭ ބޭނުމީ ކޯޗެއް؟” ނާޝާ މަޑުމައިތިރި ރާގަކަށް އަހައިލިއެވެ.
“އަހަރެން ބޭނުމީ ‘ރިކާޒް ހޯލްޑިންގްސް’ ގެ %20 ހިއްސާ. އަދި އަހަރެންގެ ދަރިފުޅަށް އާއިލީ ނަން ދިނުން،” ސާރާ ބުންޏެވެ.
ނާޝާ ހައިރާންވިއެވެ. “އާއިލީ ނަން؟ އެއީ އިމާދުގެ ދަރިއެއްކަމަށް ކަލޭ އެއްބަސްވަނީތަ؟”
“އެއީ އިމާދަށް އެނގޭނެ ކަމެއް،” ސާރާ ތެދުވަމުން ބުންޏެވެ. “އަހަރެން ކަލެއަށް 24 ގަޑިއިރު ދެން. ވިސްނާލާފައި ޖަވާބެއް ދީ.”
—–
ސާރާ ނުކުމެގެން ދިޔުމުން ނާޝާ އެކަނި އިނދެ ރޮއިގަތެވެ. އޭނާގެ ހުރިހާ އުއްމީދެއް ފުނޑުފުނޑުވީއެވެ. އޭނާ ދިރިއުޅެމުން އައި “ފޮނި ދިރިއުޅުން” މިއަދު މިވަނީ ހިތި އެއްޗަކަށް ވެފައެވެ.
އޭނާ ވަގުތުން ވާދިލްގެ އަންހެނުން ލަޔާއަށް ގުޅިއެވެ. “ލަޔާ، އަހަރެމެން ބައްދަލުކުރަން އެބަ ޖެހޭ. ހަމަ މިހާރުން މިހާރަށް!”
ލަޔާ އޭރު އިނީ ބިއުޓީ ސެލޫނެއްގައެވެ. “ނާޝާ، ކިހިނެއްވީ؟ ޔޫގެ އަޑު ހާދަ ތަފާތޭ.”
“އަހަރެމެންގެ ދިރިއުޅުމަށް ބޮޑު ތޫފާނެއް އެބައާދޭ،” ނާޝާ ބުންޏެވެ.
މި ހުރިހާ ކަމެއް ހިނގަމުންދިޔައިރު، އިމާދު އިނީ އޭނާގެ އޮފީހުގެ ކުޑަދޮރުން ބޭރު ބަލަހައްޓައިގެންނެވެ. އޭނާއަށް އެނގެއެވެ. މިއީ ނިމުމުގެ ފެށުމެއް ކަމެވެ. ނުވަތަ އާ ފެށުމެއްގެ ނިމުމެއް ކަމެވެ.
އޭނާގެ މޭޒުމަތީގައި އޮތީ ސާރާގެ ފޮޓޯއެކެވެ. އެއީ މީގެ ހަ އަހަރު ކުރިން ނަގާފައިވާ ފޮޓޯއެކެވެ. އޭރު އެއީ އެމީހުންގެ ޒުވާން ދުވަސްވަރެވެ.
—–
އިމާދުގެ އަތުގައި އޮތް ފޮޓޯއަށް ބަލަހައްޓައިގެން އިނދެ، އޭނާގެ ހިތް މީގެ ހަ އަހަރު ކުރިއަށް ދަތުރުކުރިއެވެ. އޭރު އޭނާއަކީ ބައްޕަގެ ވިޔަފާރިއާ އަލަށް ހަވާލުވި، ޖޯޝުން ފުރިގެންވި ޒުވާނެކެވެ. ސާރާއަކީ އޭނާގެ ބައްޕަގެ އެންމެ އިތުބާރުކުރާ އެސިސްޓެންޓް، އަޙްމަދުފުޅުގެ ދަރިފުޅެވެ. ސާރާގެ އެ ސާދާކަމާއި، ހިތްހެޔޮކަން އިމާދުގެ ހިތް އަތުލީ މަދު ދުވަސްކޮޅެއްގެ ތެރޭގައެވެ.
“އިމާދު، އަހަރެމެންގެ މި ގުޅުމަށް ބައްޕަ ގަބޫލެއް ނުވާނެ،” ސާރާ އެއްދުވަހަކު ބުންޏެވެ. “އަހަރެމެންނަކީ ތަފާތު ދެ ދުނިޔެއެއްގެ ބައެއް.”
“ލޯތްބަކީ ދުނިޔެތައް ގުޅުވައިދޭ ފާލަމެއް،” އިމާދު އޭރު ޖަވާބުދިނީ ވަރަށް ޔަގީންކަމާއެކުގައެވެ.
ނަމަވެސް، އެ ފާލަން ފުނޑުފުނޑުވީ އެންމެ ރެއަކުންނެވެ. ‘ރިކާޒް ހޯލްޑިންގްސް’ ގެ ބޮޑު ގުދަނުގައި އަލިފާން ރޯވުމާއި، އެކަމުގެ ތުހުމަތު ސާރާގެ ބައްޕަގެ ބޮލުގައި އެޅުވުމަކީ އިމާދުގެ ބައްޕަ ރޭވި ރޭވުމެއްކަން އިމާދަށް އެނގުނީ މާ ފަހުންނެވެ. އޭރު ސާރާ ވަނީ ރަށަށް ފޮނުވާލާފައެވެ. އިމާދަށް މަޖުބޫރުވީ އާއިލާގެ ނަމާއި އަބުރު ސަލާމަތްކުރުމަށްޓަކައި ނާޝާއާ ކައިވެނިކުރާށެވެ.
އިމާދު ފުން ނޭވާއެއްލަމުން ފޮޓޯގަނޑު ވަތްގަނޑަށް ލިއެވެ. “މާޒީއަކީ މިއަދު އަހަރެން ހިފަހައްޓަން އުޅޭ އައްސޭރިފަށެއް،” އޭނާ އަމިއްލަ ނަފްސަށް ބުންޏެވެ.
—–
ނާޝާއާއި ލަޔާ ބައްދަލުވީ މާލޭގެ މަޝްހޫރު ކެފޭއެއްގެ އެންމެ އެކަހެރި މޭޒެއްގެ ދޮށުގައެވެ. ނާޝާގެ މޫނުމަތިން ފެންނަނީ ނުތަނަވަސްކަމެވެ.
“ލަޔާ، އެ ސާރާ ބޭނުންވަނީ އަހަރެމެންގެ ހުރިހާ އެއްޗެއް އަތުލަން،” ނާޝާ ހިތްހަމަނުޖެހިފައި ބުންޏެވެ. “އޭނާގެ އަތުގައި ބައެއް ލިޔެކިޔުންތައް އެބަހުރި. އެ ލިޔުންތައް ފެނިއްޖެނަމަ އިމާދުގެ ބައްޕަ ކުރި ކަންތައްތައް ފަޅާ އަރާނެ. އޭރުން ބޭންކުތަކުން ލޯނުތައް ކެންސަލް ކުރާނެ، އަދި އަހަރެމެން މަގުމަތިވާނެ.”
ލަޔާ އޭނާގެ ނިޔަފަތިތަކަށް ބަލައިލިއެވެ. “އަހަރެމެން ޖެހޭނީ އޭނާގެ އަތުން އެ ލިޔުންތައް އަތުލަން. ނޫނީ އޭނާގެ އަގު ވައްޓާލަން. މާލޭގައި މީހެއްގެ އަގު ވައްޓާލުމަކީ އެހާ އުނދަގޫ ކަމެއް ނޫން.”
“ކިހިނެއް؟” ނާޝާ އަހައިލިއެވެ.
“އޭނާއަކީ އާޓިސްޓެއްނު؟” ލަޔާ ރޭވުންތެރި ހިނިތުންވުމެއް ދިނެވެ. “އޭނާގެ ފުރަތަމަ އެގްޒިބިޝަން ބާއްވާއިރު، އެތަނަށް ބަޔަކު ފޮނުވައިގެން ހަމަނުޖެހުން އުފެއްދިދާނެ. އަދި އޭނާގެ ކުރެހުންތަކަކީ ކޮޕީކޮށްފައިވާ އެއްޗެހިކަމަށް ދައްކައި، ސޯޝަލް މީޑިއާގައި އޭނާ ބަދުނާމު ކުރެވިދާނެ. މީހުން އޭނާ ބަލައިނުގަންނަނަމަ، އޭނާ ދައްކާ ވާހަކައެއްވެސް އެކަކުވެސް ގަބޫލެއް ނުކުރާނެ.”
ނާޝާ ވިސްނާލިއެވެ. “އެކަމަކު އެވަރުން ފުދޭނެތަ؟”
“ނޫން، އެއީ ފެށުން. އަހަރެމެން ޖެހޭނެ އިމާދަށް ޝައްކުވާ ގޮތަށް ކަންތައްތައް ކުރަން. ސާރާ މާލެ މިއައީ އެހެން މީހެއްގެ އެހީގައި ކަމަށް ދައްކަން ޖެހޭނެ. އިމާދުގެ ހިތުގައި ހަސަދަވެރިކަން އުފައްދަން ޖެހޭނެ،” ލަޔާ އިތުރުކޮށްލިއެވެ.
—–
ހުޅުމާލޭގެ ގޮނޑުދޮށުގައި ސާރާއާއި އޭނާގެ ދަރިފުޅު ހިނގާލަން ނުކުމެ އުޅުނެވެ. އައިލާ ކުދި ބޮލިތައް ހޮވަމުން ދިޔައިރު، ސާރާ އިނީ ފުން ވިސްނުމެއްގައެވެ. އޭނާއަށް އެނގެއެވެ، ނާޝާ ހިމޭނުން ނުހުންނާނެކަމެވެ.
އެވަގުތު އޭނާގެ ފޯނަށް ކޯލެއް އައެވެ. އެއީ ވާދިލެވެ.
“ސާރާ، އަހަރެން ބޭނުން ބައްދަލުކޮށްލަން. އިމާދަށް ނޭނގި،” ވާދިލް ބުންޏެވެ.
“ކީއްކުރަން؟” ސާރާ ސުވާލުކުރިއެވެ.
“އަހަރެންގެ އަތުގައި ކަލެއަށް މުހިންމު މައުލޫމާތެއް އެބައޮތް. ކަލޭގެ ބައްޕައާ ބެހޭގޮތުން،” ވާދިލްގެ އަޑުގައި ހުރީ ސިއްރުވެރިކަމެކެވެ.
ސާރާ އެއްބަސްވިއެވެ. އޭނާ ވަގުތުން ނިންމީ ހުރިހާ ދިމާލަކުން މައުލޫމާތު އެއްކުރާށެވެ. ނަމަވެސް އޭނާއަށް ނޭނގޭ ކަމަކީ، ވާދިލަކީ ނާޝާގެ ރޭވުމުގެ ބައެއް ކަމެވެ.
—–
ޖެހިގެން އައި ދުވަހު ސާރާ ދިޔައީ ވާދިލް ބުނި ތަނަށެވެ. އެއީ ހުޅުމާލޭގެ ފޭސް 2 ގައި އޮތް ހިމޭން ސަރަހައްދެކެވެ. ވާދިލް ހުރީ އޭނާގެ ކާރު ކައިރީގައެވެ.
“ސާރާ، މިއީ އެ ފައިލް،” ވާދިލް ބޮޑު ސިޓީއުރައެއް ދިއްކޮށްލިއެވެ. “މީގައި ހުންނާނެ އެ ރޭ ގުދަނަށް ވަން މީހުންގެ އަސްލު ފޮޓޯތައް.”
ސާރާ އުރަ ހުޅުވާލަން އުޅުނު ވަގުތު، ކުއްލިއަކަށް ފަހަތުން ބަޔަކު އައިސް އޭނާގެ އަނގަ މަތީގައި އަތްއެޅިއެވެ. އޭނާގެ އަތުގައި އޮތް ފޯނާއި ސިޓީއުރަ ޖަހައިގަތެވެ.
(ނުނިމޭ)
