ހެނދުނު ހޭލާއިރު އަނގަ ހިކިފައި ހުރުމާއި، ދޫ ބަރުވެފައި ހުރުން ނުވަތަ އަނގައިން ނުބައި ވަސް ދުވުމަކީ ހަމައެކަނި އުނދަގުލެއް ކަމަށް ބަލައި ދޫކޮށްލެވޭކަށް ނެތެވެ. އާދަވެގެން އަނގަ ހުޅުވައިގެން ނިދުމުގެ ސަބަބުން އަނގަޔަށް ބޭނުންވާ ތެތްކަން މަދުވެ، ބެކްޓީރިއާ އާއި ދަތް ފަނިކެއުމާއި ހިރުގަނޑުގެ ބަލިތަކުން ދިފާޢުވުމަށް ކުޅުގެ އެހީގައި ލިބިދޭ ޤުދުރަތީ ރައްކާތެރިކަން ބަލިކަށިވެގެންދެއެވެ.
އަނގަޔާއި ދަތްތަކުގެ ދުޅަހެޔޮކަމުގައި ކުޅަކީ ވަރަށް މުހިންމު ދައުރެއް އަދާކުރާ އެއްޗެކެވެ. އެއީ ކާނާގެ ކުނޑިތައް ފޮޅާލައި، ގެއްލުންދެނިވި އެސިޑްތައް ނިއުޓްރަލައިޒްކޮށް، ބެކްޓީރިއާ ކޮންޓްރޯލްކުރުމުގެ އިތުރުން ދަތުގެ ބޭރު ފަށަލަ (އެނަމަލް) ރައްކާތެރިކޮށްދޭ އެއްޗެކެވެ. ކުޅު އުފައްދާ މިންވަރު މާބޮޑަށް މަދުވުމުން ބެކްޓީރިއާ އިތުރުވުމަށް މަގުފަހިވެ، އަނގައިން ނުބައި ވަސް ދުވުމާއި، ދަތް ފަނިކެއުމާއި އަދި އަނގައިގެ އެކި އިންފެކްޝަންތަކަށް ހުށަހެޅުމުގެ ފުރުސަތު ބޮޑުވެއެވެ.
އެމެރިކަން ޑެންޓަލް އެސޯސިއޭޝަން (އޭ.ޑީ.އޭ) އިން ހާމަކުރާ ގޮތުގައި، ސިއްޙީ ބަހުރުވައިން “ޒެރޯސްޓޯމިއާ” ނުވަތަ އަނގަ ހިކުމުގެ ސަބަބުން ދަތް ފަނިކެއުމާއި އަނގައިގެ ބަލިތައް ޖެހުމުގެ ނުރައްކާ އިތުރުވެއެވެ. އެމެރިކާގެ މެރީލޭންޑްގައި ހުންނަ ނޭޝަނަލް އިންސްޓިޓިއުޓް އޮފް ޑެންޓަލް އެންޑް ކްރޭނިއޯފޭޝަލް ރިސާޗުން ވެސް ވަނީ ގެއްލުންދެނިވި ޖަރާސީމުތައް ކޮންޓްރޯލްކުރުމަށާއި އަނގަ ދުޅަހެޔޮކޮށް ބެހެއްޓުމުގައި ކުޅުގެ މުހިންމުކަން ފާހަގަކޮށްފައެވެ.
ނިދާއިރު އަނގަ ހުޅުވައިގެން ނޭވާލުމަކީ އަބަދުވެސް އާދައެއްގެ ގޮތުގައި ކުރާ ކަމެއް ނޫނެވެ. މިއީ ނޭފަތް ބެދުން، އެލާޖީ، ސައިނަސްގެ މައްސަލަތައް، ނޭފަތުގައި މަސްލުން ނުވަތަ ނޭފަތުގެ ހޮޅީގެ އޮނިގަނޑުގައި ހުންނަ ހުރަސްތަކެއްގެ ސަބަބުން ދިމާވާ ކަމަކަށް ވެދާނެއެވެ. މީގެ އިތުރުން ކަރުގައި ހުންނަ ޓޮންސިލް ދުޅަވުމާއި “ސްލީޕް އެޕްނިއާ” ފަދަ ނިދުމުގެ މައްސަލަތަކަކީ ވެސް މީގެ ސަބަބުތަކެވެ. ކްލީވްލޭންޑް ކްލިނިކުން ބަޔާންކުރާ ގޮތުގައި، އަނގަ ހުޅުވައިގެން ނޭވާލާ މީހުންގެ ކިބައިން ގުގުރި ދެމުން، ކުޅު އައުން އަދި ދުވާލު ގަޑީގައި ވަރުބަލިވުން ފަދަ އަލާމާތްތައް ފެނިދާނެއެވެ.
ދިގު މުއްދަތަކަށް ރޭގަނޑު އަނގަ ހިކުމަކީ ހަމައެކަނި އުނދަގުލެއް ނޫނެވެ. މީގެ ސަބަބުން ހިރުގަނޑު ދުޅަވުމާއި، ދަތް ހީލިކެރުވުމާއި، ތުންފަތް ފަޅައިގެން ދިއުމާއި، އެއްޗެހި ދިރުވަން އުނދަގޫވުމުގެ އިތުރުން ތަކުރާރުކޮށް އަނގައިގެ އިންފެކްޝަންތައް ޖެހުމަށް މަގުފަހިވެއެވެ. ހެނދުނު ހޭލާއިރު އަނގައިން ނުބައި ވަސް ދުވުމަކީ ވެސް މީގެ އާންމު އަލާމާތެކެވެ. ސަބަބަކީ އަނގަ ހިކުމުން ވަސް އުފައްދާ ބެކްޓީރިއާތައް އިތުރުވުމަށް ފުރުސަތު ލިބޭތީއެވެ.
ސިއްޙީ މާހިރުން އިރުޝާދު ދެއްވަނީ ހަށިގަނޑަށް ބޭނުންވާ ވަރަށް ފެން ބުއިމަށާއި، ދުވާލަކު ދެ ފަހަރު ފްލޮރައިޑް ހިމެނޭ ދަތް އުނގުޅާ ބޭހުން ދަތް އުނގުޅުމަށާއި، އަނގަ ސާފުކޮށް ބެހެއްޓުމަށެވެ. އަދި ހޭލާ ހުންނަ ވަގުތުތަކުގައި ކުޅު އުފެއްދުމަށް ބާރުއެޅުމުގެ ގޮތުން ހަކުރު ނުހިމެނޭ ޗުއިންގަމް ބޭނުންކުރެވިދާނެއެވެ. މީގެ އިތުރުން އަލްކޮހޯލް ނުހިމެނޭ މައުތުވޮޝް ބޭނުންކުރުމަކީ ވެސް އަނގަ ހިކުމަށް އޮތް ހައްލެކެވެ.
އެހެންނަމަވެސް، މިކަމުގެ އަސްލު ސަބަބު ދެނެގަނެ އެކަމަށް ފަރުވާ ހޯދުމަކީ ވަރަށް މުހިންމު ކަމެކެވެ. އާދަވެގެން ނޭފަތް ބެދޭނަމަ ނުވަތަ މާބޮޑަށް ގުގުރި ދެމޭނަމަ ޑޮކްޓަރެއްގެ އެހީތެރިކަން ހޯދަންވާނެއެވެ. ނޭފަތުން ނޭވާލާން އުނދަގޫވާ ހާލަތްތަކުގައި ނުވަތަ ނޭވާލުމުގެ މައްސަލަތައް ހުންނަ ނަމަ، އަމިއްލައަށް އަނގަ ބަންދުކޮށްގެން (މައުތު ޓޭޕިންގް) ނިދުމަކީ ރައްކާތެރި ކަމެއް ނޫނެވެ.
އަނގަ ހިކުމަކީ ބައެއް ފަހަރު ދިމާވާ އާންމު ކަމެއް ނަމަވެސް، ތަކުރާރުކޮށް މިކަން ދިމާވާނަމަ އެއީ އަޅާނުލާ ދޫކޮށްލަންވާނެ ކަމެއް ނޫނެވެ. ކުޅު އުފައްދާ މިންވަރު އެއްވަރެއްގައި ހިފެހެއްޓުމާއި ނޭފަތުން ފަސޭހައިން ނޭވާލުމަކީ ދަތްތަކާއި ހިރުގަނޑުގެ އިތުރުން މުޅި ހަށިގަނޑުގެ ދުޅަހެޔޮކަމަށްޓަކައި އެޅޭ މުހިންމު ފިޔަވަޅެކެވެ.
