ރިޕޯޓު ފޮތް ޑިޖިޓަލް (ސުމޭކު) ކުރުމަށް ދަރިވަރުންގެ ރިޕޯޓު ފޮތަށް ގެނެވޭ އެންމެ ބޮޑު ބަދަލު ދެވަނަ ސެމެސްޓަރުން ފެށިގެން ގެނައުމަށް މިނިސްޓްރީ އޮފް އެޑިއުކޭޝަނުން ވަނީ ނިންމަވާފައެވެ. އެގޮތުން ރިޕޯޓް ފޮތްތައް ސުމޭކުކުރުމަށް ބޭނުންކުރަނީ “މީމިސް” އެވެ.
މޯލްޑިވްސް އެޑިއުކޭޝަން މޭނޭޖްމަންޓް އިންފޮމޭޝަން ސިސްޓަމް (މީމިސް)އަކީ ތައުލީމީ ދާއިރާގެ އެންމެހާ މައުލޫމާތު އިންޓަނެޓް މެދުވެރިކޮށް ބެލެހެއްޓުމަށް އެޑިއުކޭޝަން މިނިސްޓްރީން ގާއިމްކޮށްފައިވާ ހާއްސަ ނިޒާމެކެވެ. “މީމިސް” މެދުވެރިކޮށް މި އަހަރުގެ ދެ ވަނަ ޓާރމުން ފެށިގެން ސަރުކާރު ސްކޫލުތަކުގައި ދަރިވަރުންގެ ރިޕޯޓު ފޮތް ސުމޭކު (ޑިޖިޓަލް) ކުރަން ހަމަޖެހިފައިވާ ކަމަށް މިނިސްޓްރީ އޮފް އެޑިއުކޭޝަނުން ހާމަކުރައްވައެވެ.
މިނިސްޓްރީ އޮފް އެޑިއުކޭޝަންގެ ސީނިއަރ ޕޮލިސީ ޑިރެކްޓަރ މޫސާ އާދަމް ދަރިވަރު.އެމްވީއަށް ވިދާޅުވީ މިހާރު ބޭނުންކުރަމުންދާ ރިޕޯޓު ފޮތުގެ ޓެމްޕްލޭޓަށް ބަދަލު ގެނެވިފައިވާ ކަމަށާއި މި ބަދަލުތަކަކީ ކުރިން ބޭނުން ކުރަމުން އައި ރިޕޯޓު ފޮތަށް ގެނެވިފައިވާ ބޮޑު ބަދަލުތަކެއް ކަމުން، ސްކޫލުތަކުގެ މުވައްޒަފުންނާއި ބެލެނިވެރިންނަށް މިކަމާގުޅޭ މަޢުލުމާތު ފޯރުކޮށްދިނުމަށް ހުރިހާ ސްކޫލުތަކަކަށް ދަންނަވާފައިވާނެ ކަމަށެވެ.
މޫސާ އާދަމް ވިދާޅުވީ ސްކޫލުތަކުގެ އިސް ފަރާތްތަކަށް ފޯނު ކޮންފަރެންސް މެދުވެރިކޮށް މަޢުލޫމާތު ހިއްސާކުރެވި ސްކޫލުތަކުން ހުރި ކަންބޮޑުވުންތަކަށް ޖަވާބު ދީފައިވާ ކަމަށެވެ.
ސުމޭކުކޮށް ރިޕޯޓް ފޮތްތައް ދެނީ ޓެބްލެޓާ ގުޅުވާފައި ނޫންކަމަށާއި ނަމަވެސް ޓެބްލެޓްތައް ބެހިފައި ބޭނުންކުރެވޭ ހާލަތުގައި ހުރި ސްކޫލުތަކުގައި ޓެބްލެޓް ވެސް ބޭނުން ކުރެވޭނެ ކަމަށެވެ. އަދި އެކިއެކި ސަބަބުތަކާ ހުރެ މީމިސްއަށް ވަނުމުގައި ދަތިތައް ކުރިމަތިވާ ބެލެނިވެރިންނަށް މާއްދާތަކުން ދަރިވަރުން ޙާޞިލްކޮށްފައިވާ މިންވަރާއި ދަރިވަރުންނާ ގުޅޭ އެހެނިހެން މައުލޫމާތު ފޯރުކޮށްދިނުމުގެ އިންތިޒާމް ސްކޫލުތަކުން ހަމަޖައްސައި ދޭނެކަމަށް އޭނާ ވިދާޅުވިއެވެ.
“ދަރިވަރުންގެ ޕޯޓަލް އެކްސެސް ބެލެނިވެރިންނަށް ހުޅުވާލުމުން ބެލޭނެ. އަޅުގަނޑުމެން މިނިސްޓްރީން ބޮޑަށް ރިޕޯޓު ފޮތް ޑިޖިޓަލްކޮށް ދޭން މި ބަލަނީ ވެބް ބޭސްޑް ނުވަތަ ބެލެނިވެރިޔާ ގެންގުޅޭ ފޯނުން އޮންލައިންކޮށް ވެސް ބެލޭނެގޮތް ހަމަޖައްސައިދޭން. އެހެންނަމަވެސް ފުރަތަމަ މި ކަހަލަ ކަމެއް ފެށިގެން ދާއިރުގައި އަޅުގަނޑުމެން ޕްރިންޓް ވެސް ކޮށްލާފައި އެބަ ދެން. ޕްރިންޓްކޮށްލާފައި މި ދެނީ ރަމްޒީ ގޮތުން. ގާތްގަނޑަކަށް ކުރީގައި ރިޕޯޓު ފޮތް ޕްރިންޓްކޮށްލާފައި އެބަ ދެން ފަންސަވީހަކަށް ޞަފްހާ އޭގެ ބަދަލުގައި ޕްރިންޓް ކުރަންޖެހޭ އަދަދު 3 ނުވަތަ 5 ސަޕްހާއަށް ބަދަލުވާނެ. ދަރިވަރުގެ ހުރިހާ ވަނަވަރުތަކާއި އޭގެތެރޭގައި ހާޒިރީ ކިޔެވުމާއި ގުޅުން ހުރި ބައިތަކާއި އިތުރުހަރަކާތްތައް ހިމެނޭނޭ ” ރިޕޯޓު ފޮތްތައް ސުމޭކުކުރުމުގެ އިތުރު މަޢުލޫމާތު ދެއްވަމުން މޫސާ އާދަމް ވިދާޅުވިއެވެ.
އޭނާ އިތުރަށް ވިދާޅުވީ މިކަމުގެ ސަބަބުން ސްކޫލުތަކުގައި ރިޕޯޓު ފޮތް ހެދުމަށް ޓީޗަރުންނަށް ލުއިފަސޭހަތަކެއް ލިބުމުގެ އިތުރުން ޕްރިންޓް ކުރުމަށާއި ކަރުދާހަށް ކުރާ ހޭދައިގެ 90 އިންސައްތަ ސަލާމަތް ވާނެ ކަމަށެވެ. އަދި މިނިސްޓްރީން ޤަބޫލުކުރަނީ މި ގެނެވޭ ބަދަލުގެ ސަބަބުން ޓީޗަރުންނަށާއި ބެލެނިވެރިންނަށް ލުއިފަސޭހަތަކެއް ލިބޭނެކަމަށެވެ.
މީމިސް ޑޭޓާބޭސް އަކީ ތައުލީމީ ދާއިރާގެ އެންމެހާ މައުލޫމާތު އިންޓަނެޓްގެ ޒަރިއްޔާއިން އެއްކޮށް، ރާއްޖޭގެ ތަޢުލީމީ ދާއިރާއަށް އެންމެ އެކަށޭނަ ގޮތަށް ބަދަލުތައް ގެނެވި ބެލެހެއްޓުމަށް ޤާއިމްކުރެވިފައިވާ ނިޒާމެކެވެ. މި ނިޒާމުގެ އެހީގައި ސްކޫލްތަކާއި، ދަރިވަރުންނާއި އަދި އެންމެހާ މުއައްޒަފުންގެ މައުލޫމާތު އެއްކޮށް، ފަސޭހަކަމާއި، ރައްކާތެރިކަމާއެކު ބަލައިލުމުގެ ފުރުސަތު އެޑިޔުކޭޝަން މިނިސްޓްރީއަށް އަދި ސްކޫލްތަކުގެ މުދައްރިސުންނާއި، ބެލެނިވެރިން އަދި ދަރިވަރުންނަށް ލިބިގެންދެއެވެ.
ލިޔުމަށް މަޢުލޫމާތު ނެގީ: ދަރިވަރު އެމްވީ އިން
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 17 މެއި 2024ޚަބަރު“ލަސްވިޔަސް” މާލޭ މޭޔޭރަށް ބަރާބަރު!
- 7 މެއި 2024ޚަބަރުމޯލްޑިވްސް ފިލްމު އެސޯސިއޭޝަންގެ ޗެއަރއަށް މުއާ
- 3 މެއި 2024ޚަބަރު“ބަވަތި” ވީޑިއޯކްލަބުން މިހާރު ބަލައިލެވޭނެ
- 30 އޭޕްރިލް 2024ރިޕޯޓްވޯލްނަޓް ކާންވީ ކީއްވެ؟
