މަޝްހޫރު ބަތަލާ ނިއުމާ މުހައްމަދުގެ ފިލްމީ ކެރިއަރަށް 25 އަހަރު ފުރުން ފާހަގަކުރުމަށް، ރާއްޖޭގެ ރައީސުލް ޖުމްހޫރިއްޔާ ވެސް ބައިވެރިވެލައްވާ ވަރަށް ޚާއްޞަ ހަފުލާއެއް ބޭއްވުމަށް ތައްޔާރުވަމުން އަންނަކަމަށް ނިޢުމާ ބުނެފިއެވެ.

“ސެލެބްރޭޓިން 25” ގެ ނަމުގައި ބާއްވާ މި ޚާއްޞަ ހަފުލާ ބޭއްވުމަށް ހަމަޖެހިފައިވަނީ މިމަހުގެ 17ވަނަ ދުވަހުގެ ރޭ ހޮޓެލް ޖެން ގައެވެ. މި ހަފުލާއަށް ފިލްމީ ދާއިރާގެ ބޭފުޅުންނާއި ސަރުކާރުގެ ބައެއް ޢިއްޒަތްތެރީންނާއި ގިނަ އަދަދެއްގެ ނޫސްވެރިންނަށް ދައުވަތު ދިނުމަށް ހަމަޖެހިފައިވާކަމަށް މަޢުލޫމާތު ލިބެއެވެ.

މުނިއަވަސް އަށް ނިޢުމާ ބުނީ “ސެލެބްރޭޓިން 25” ގެ އިވެންޓްގައި ތިން ‘ސަޕްރައިޒް’ އެއް އޮންނާނެ ކަމަށެވެ. ސަޕްރައިޒަކަށް ވާތީ އިތުރު ތަފްޞީލެއް ހިއްސާއެއް ނުކުރެއެވެ. ނަމަވެސް ނިޢުމާ ޕްރޮޑިއުސްކުރާ އާ ފިލްމެއް އިޢުލާނުކުރުމަކީ ވަރަށް ބޮޑަށް އެކަށީގެނވާ ކަމެކެވެ.

މީގެ ކުރިން “ސެލެބްރޭޓިން 20” ގެ ނަމުގައި ބޭއްވި އިވެންޓުގައި ނިއުމާގެ ލަވަތައް ހިމެނޭ ޚާއްޞަ ވީސީޑީއެއް ރިލީޒްކުރިއެވެ. މީގެ އިތުރުން، ނިޢުމާގެ އެންމެ ފަހު ފިލްމު “ނިވައިރޯޅި” ގެ ލޯންޗިން އެއް ބޭއްވިއެވެ. ނިޢުމާގެ ބަޔޮގްރަފީ ފިލްމެއް ތައްޔާރުކުރުމަށް މަސައްކަތްކުރާ ކަމަުގެ މަޢުލުމާތު ހިއްސާކުރިއެވެ. އެ ހަފުލާގައި ނިއުމާ ބުނީ ”މައި ސްޓޯރީ“ގެ ނަމުގައި ހަދާ ބަޔޮގްރަފީގައި އޭނާގެ ފިލްމީ ކެރިއަރާއި އަމިއްލަ ޒާތީ ދިރިއުޅުމާ ބެހޭ ގޮތުން ނޭނގޭ ވަރަށް ގިނަ ވާހަކަތައް އާންމުންނާ ހަމައަށް ތިލަކުރާނެ ކަމަށެވެ.

ގިނަ ބައެއްގެ މަޤްބޫލުކަން ހޯދި ސިލްސިލާ ޑްރާމާއަކުން ކެރިއަރުފެށި ނިޢުމާ އަކީ “ފަތިސްހަނދުވަރު”، “ޔޫސުފް”، “ކަލާޔާ ނުލާ” އަދި “ނޯޓީ 40” ފަދަ ކާމިޔާބު އެތައް ފިލްމަކާއި ޑްރާމާތަކާއި އެތައް ވީޑިއޯ ލަވައެއް ކުޅެފައިވާ ތަރިއެކެވެ.

އެންމެ ފަހުން ބޮޑު ސްކްރީނުން ނިޢުމާ ފެނުނީ ނިޢުމާ ޕްރޮޑިއުސްކޮށް، މޫމިން ފުއާދު ޑައިރެކްޝަން ހެދި ސަސްޕެންސް ފިލްމު “ނިވައިރޯޅި” އިންނެވެ.

ނިއުމާ ފިލްމީ ދާއިރާ އަށް ނިކުތީ 1994 ގައި ޓެލެވިޛަން މޯލްޑިވްސް އިން ދެއްކި ސިލްސިލާ ފިލްމު “ހިތި ތަޖުރިބާ”އިން ނެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: