ފުރަތަމަ ފަހަރަށް ސަނަމްއަށް ވިސްނުނީ، ކުރިމަގު އަދި ވަކި ގޮތަކަށް ނުނިންމައި ދޫކޮށްލެވިދާނެކަމެވެ. ވަގުތުން އެނބުރި ދިޔުމާއި، ދާއިމަށް ދޮރު ލައްޕާލުމާ ދެމެދު ވަގުތުން ވަކި ގޮތެއް ޚިޔާރުކުރާކަށް އޭނާއަކަށް މަޖުބޫރެއް ނޫނެވެ. އޭނާއަށް އަމިއްލަ ނަފްސަށް ވަގުތު ދެވިދާނެއެވެ. އޭނާގެ އަމިއްލަ އިމާއި ޙައްޤުތައް ޤުރުބާން ނުކޮށް، އާހިލް ދައްކާ ވާހަކަ އަޑުއެހިދާނެއެވެ. އަމިއްލަ ނަފްސު ހަނދާން ނައްތާނުލައި، އާހިލްދެކެ ލޯބިވެސް ވެވިދާނެއެވެ. އަދި، އެއްދުވަހަކު އޭނާގެ ކައިރީގައި އަބަދުވެސް ޖާގައެއް އޮންނާނެކަމަށް ވަޢުދުވި ފިރިހެނާ، އެ ޖާގަ އަލުން ބިނާކުރަން ހަޤީޤަތުގައިވެސް ތައްޔާރަށް ހުރިތޯ ބަލަން އޭނާއަށް މަޑުކުރެވިދާނެއެވެ.
*****
ދުވަސްތައް ހަފުތާތަކަށް ބަދަލުވަމުން ގޮސް، ދުވަސްތަކެއް ވޭތުވެގެން ދިޔައެވެ. ސަނަމް އަދިވެސް ދިރިއުޅެމުން ދިޔައީ އޭނާގެ މައިންބަފައިންގެ ގޭގައެވެ.
އޭނާ ވަޒީފާއަށް ނުކުންނަން ފެށިއެވެ. އާއިލާއާއެކު ވަގުތު ހޭދަކުރަމުން، ކުރިން އަމިއްލަ ނަފުސަށް ގެއްލިފައިވި ކުދިކުދި އުފާތައް މަޑުމަޑުން އަލުން ހޯދަން ފެށިއެވެ. ހަވީރު ފިންޏަށް ހިނގާލަން ދިއުމާއި، ފޮތް ކިޔުމާއި، ކޮންމެ ދެތިން މިނެޓަކުން ފޯނަށް ނުބަލައި މަންމައާއެކު ސައިތަށްޓެއް ބޯލަން އިނުމުގެ އުފާ އޭނާ އަލުން ދަސްކުރިއެވެ.
އެހެންނަމަވެސް، އޭނާގެ ހިތުން އާހިލްގެ ހަނދާންތަކެއް ނުފިލައެވެ. ބައެއް ދުވަސްދުވަހުގެ ހެނދުނު އޭނާއަށް ހޭލެވެނީ، ބެލްކަނީގައި ދެމީހުން އެކުގައި ހީނސަމާސާ ކުރަން ތިބި މަންޒަރު ހުވަފެނުން ފެނިފައެވެ. އަނެއްބައި ދުވަސްދުވަހު އިރުއޮއްސޭ ވަގުތުތަކުގައި، އިވޭ ފަރިތަ ލަވައަކުން ދެމީހުންގެ މާޒީގެ ހަނދާންތައް އާވެ، ކުރަން ހުރި މަސައްކަތް ހުއްޓާލަން މަޖުބޫރުވެއެވެ. ޒަޚަމްތައް ފަސޭހަވުމަކީ ހުރިހާ ކަމެއް ހަނދާން ނައްތާލުމެއް ނޫނެވެ. އެއީ އެ ހަނދާންތަކުގެ ބުރަ އުފުލަން ދަސްކުރުމެވެ. އެ ހަނދާންތަކަށް ތިމާގެ ކުރިމަގުގެ ފިޔަވަޅުތައް ނިންމުމުގެ ބާރު ނުދީ ދިރިއުޅެން ދަސްކުރުމެވެ.
މި ދުވަސްތަކުގައި އާހިލްވެސް ދިޔައީ ބަދަލުވަމުންނެވެ. އޭނާގެ މެނޭޖަރާ ވާހަކަދައްކައިގެން، އޮފީހުގެ މަސައްކަތު ގަޑިތަކަށް އިންތަކެއް ކަނޑައެޅިއެވެ. އޮފީހުގެ ހުރިހާ މައްސަލަތަކާއި ރުޅިގަނޑު ދެމީހުންގެ ވާހަކަތަކުގެ ތެރެއަށް ގެނައުން ހުއްޓާލިއެވެ. ސަނަމް އެނބުރި އަންނާނީ ކޮން އިރަކުތޯ އެކަނި އަހާކަށް އޭނާ މިހާރު ގުޅައެއް ނުހަދައެވެ. އޭގެ ބަދަލުގައި، ސަނަމްގެ ހާލު ބަލައިލަން ގުޅަން ފެށިއެވެ. އަދި ސަނަމް ޖަވާބުދޭ ވަގުތު، އަމިއްލަ ދިފާޢުގައި ވާހަކަދެއްކުމުގެ ބަދަލުގައި ކަނުލާ އަޑުއަހަން އޭނާ މަސައްކަތް ކުރިއެވެ.
އާހިލް ސަނަމްގެ ބައްޕައާ ބައްދަލުކޮށް ވާހަކަވެސް ދެއްކިއެވެ. އެއީ ސަނަމް އަނބުރާ ގެއަށް ފޮނުވައިދިނުމަށް އެދި އާދޭސްކުރާކަށް ނޫނެވެ. އެހެންނަމަވެސް، އޭނާ ވީ ވަޢުދާ އެއްގޮތަށް އަނބިމީހާއަށް އަޅާލުމުގައި އިހުމާލުވެވުނުކަމަށް އަމިއްލައަށް އިޢުތިރާފުވުމަށެވެ.
އެހެންނަމަވެސް، މި އެއްވެސް ކަމަކުން މާޒީ ފޮހެވިގެންނެއް ނުދިޔައެވެ. ސަނަމް އަދިވެސް ހުރީ ފިޔަވަޅު އަޅަން ފަސްޖެހި، ސަމާލުވެގެންނެވެ.
ހަވީރެއްގެ ވަގުތުގައި ދެމީހުން ސައިބޯން ބައްދަލުކުރަން ނިންމި ދުވަހު، އާހިލް ދިޔައީ މާ ކުރިންނެވެ. އޭނާ އިނީ ފަޅުތެރެ ފެންނަ ގޮތަށް އަތިރިމަތީގައި ހުރި ކުޑަ ކެފޭއެއްގައި އިންތިޒާރުގައެވެ. މަޑު ނޫކުލައިގެ ހެދުމެއްގައި ސަނަމް އެތެރެއަށް ވަދެގެން އައެވެ. އޭނާގެ މޫނުމަތިން ފެންނަނީ ހަމަހިމޭންކަމެވެ. އެކަމަކު އެ ދެލޮލުގައިވަނީ އަމިއްލަ ނަފްސު ރައްކާތެރިކުރުމުގެ ފާރަވެރިކަމެކެވެ.
އާހިލް ކޮޅަށް ތެދުވިއެވެ. “އައީތީ ވަރަށް ބޮޑަށް ޝުކުރިއްޔާ.”
ސަނަމް އޭނާގެ ކުރިމަތީގައި އިށީނެވެ. “ވާހަކައެއް ދައްކަން ބޭނުންވެގެންނޭ ބުނީމެއްނު.”
“އާނ.” އާހިލް ވަރަށް ފުންކޮށް ސަނަމްގެ މޫނަށް ބަލައިލިއެވެ. “ކިހިނެއްތަ ހާލު؟”
“ރަނގަޅު.”
“ހަމަ އަސްލުވެސްތަ؟”
ސަނަމް ބޯޖަހައިލިއެވެ. “މިހާރު ހަމަނިދި ލިބޭ.”
އާހިލް އިސްދަށަށް ޖަހައިލިއެވެ. “ވަރަށް އުފާވެއްޖެ.”
ސަނަމް އޭނާއަށް ބަލަހައްޓައިގެން އިނދެ ބުންޏެވެ. “އާހިލް، އަހަންނަށް އަޅާލާ މީހަކަށް އާހިލް މި ދުވަސްކޮޅު ވާން ތިޔަ އުޅެނީ، އަހަރެން އަބަދަށް ގެއްލިދާނެތީ ބިރުން ކަމަށްވާކަށް އަހަރެން ބޭނުމެއް ނޫން.”
އާހިލް ލަސްލަހުން ބޯޖަހައިލިއެވެ. “ވިސްނޭ.”
“އަހަންނަށް ޔަޤީންވާން ޖެހޭނެ، އަހަރެން އެނބުރި އަޔަސް އަނެއްކާވެސް ހަ މަސް ފަހުން މިފަދަ ވާހަކައެއް ދައްކަން ނުޖެހޭނެކަން.”
“އަހަންނަކަށް ނުބުނެވޭނެ ދުވަހަކުވެސް ކުށެއް ނުކުރާނަމެކޭ.” އާހިލް ބުންޏެވެ. “އެކަމަކު އަހަންނަށް ވަޢުދުވެވިދާނެ، ކަމެއް ގޯސްވެއްޖެއޭ ސަނަމް ބުނާ ދުވަހު އެއީ އެއްވެސް ކަމެއް ނޫންކަމަށް ހަދާފައި ފަހަނައަޅައި ނުދާނެކަމަށް. އަދި އަހަންނަށް އެނގޭ، އަހަރެންގެ އަމަލުން އެކަން ނުދައްކާހާ ހިނދަކު އެ ވަޢުދަކީ އެއްވެސް އަގެއް ހުރި އެއްޗެއް ނޫންކަން.”
ސަނަމް އިނީ ހިމޭނުންނެވެ. އާހިލް ވާހަކަ ކުރިއަށް ގެންދިޔައެވެ. “ކުރިން އަހަންނަށް ހީވީ ރަނގަޅު ފިރިއަކަށް ވުމަކީ ސަނަމް ބޭނުންވާ ހުރިހާ މާއްދީ އެއްޗެއް ހޯދައިދިނުމޭ. އަހަންނަކަށް ނުވިސްނުނު ސަނަމްގެ ލޯތްބަކީ ދުވަހަކުވެސް ފަނާނުވާނެ، އެއަށް އަޅާލަން ނުޖެހި އޮންނާނެ އެއްޗެއްގެ ގޮތުގައި އަހަންނަށް ދެކެވެން ފެށުނު ކަމެއް. ސަނަމް ދިޔައީ އަބަދުވެސް އަހަރެންގެ ސަމާލުކަމަށް އެދި އަތްދިއްކުރަމުން. އެކަމަކު އަހަންނަށް ހީކުރެވުނީ ސަނަމް އަބަދުވެސް ހަމަ އެތާ ހުންނާނޭ.”
އާހިލް ސީދާ ސަނަމްގެ ލޮލަށް ބަލައިލިއެވެ. ސަނަމްގެ ދެލޯ ކަރުނުން ފުރުނެވެ.
“އެނގޭތަ އެންމެ ބޮޑަށް ތަދުވީ ކީއްވެގެންކަން؟” ސަނަމް އަހައިލިއެވެ.
“ކީއްވެ؟”
“އަހަރެން ބޭނުމެއް ނުވި އާހިލް މާ މޮޅު، ފުރިހަމަ މީހަކަށް ވާކަށް. އަހަރެން އެދުނީ ހަމައެކަނި ކުރިން އަހަންނަށް ސަމާލުކަން ދިން، އަހަރެން ފެންނަ މީހާގެ ގޮތުގައި އާހިލް ދެމިހުރުމަށް.”
އާހިލް ހިތާމައާއެކު ބޯޖަހައިލިއެވެ. “މިހާރު އަހަންނަށް އެކަން ވިސްނިއްޖެ.”
ސަނަމް ކަނޑާ ދިމާއަށް ބަލައިލިއެވެ. ކެފޭގެ ބޭރުން، ހަވީރުގެ އަވީގައި ކަނޑުގެ ލޮނުގަނޑު ދިޔައީ ވިދަމުންނެވެ. ފަޅުތެރެއިން ދަތުރުކުރި ފެރީއެއްގެ ފަހަތުން ހުދު ފޮނުގަނޑެއް ދެމެމުން ދިޔައެވެ. ބާޒާރުކޮށްފައި އައިސް ކޮތަޅުތައް ހިފައިގެން އާދައިގެ ދިރިއުޅުމުގެ ވާހަކަތައް ދައްކަމުން މަގުމަތިން މީހުން ހިނގާފައި ދެއެވެ. ދިރިއުޅުން ދަނީ ކުރިއަށެވެ. ސަނަމްގެ މުޅި ދުނިޔެ ބިމާހަމަވިހެން ހީވި ވަގުތުވެސް ދުނިޔެ ހުއްޓުމެއްނެތި ހިނގަމުން ދިޔައެވެ.
އޭނާ އަނެއްކާވެސް އާހިލާ ދިމާއަށް އެނބުރުނެވެ. “އަހަރެން އަދިވެސް އާހިލްދެކެ ލޯބިވޭ.” އާހިލްގެ ދެލޯ ވިދައިގަތެވެ. “އެކަމަކު އާހިލަށް ވިސްނެންވާނެ، ކުރިން އޮތް ކައިވެންޏަކަށް އަހަންނަކަށް އެނބުރިއެއް ނުދެވޭނެ. އެތާނގައި އަހަރެން އުޅުނީ ވަރަށް އެކަނިވެރިކޮށް. އިންތިޒާރުގައި އިންނަކަން ހަނދާންވެސް ނެތިފައިވާ މީހަކަށްޓަކައި، ކާތަށި މަތީގައި އިންތިޒާރުކުރަން އިންނަ އަންހެނަކަށް ވާކަށް އަހަރެން ދެން ދުވަހަކުވެސް އެނބުރިއެއް ނުދާނަން.”
އާހިލް ކަރުނަތައް ހިންދައިލަމުން ބޯޖަހައިލިއެވެ. “އެހެންވީއިރު.. އެ ކައިވެންޏަކަށް އެނބުރި ނާދޭ.”
ސަނަމް ހައިރާންވެފައި ބަލައިލިއެވެ. “ތީގެ މާނައަކީ ކޮބާ؟”
“އަހަރެމެން ދުވަހަކުވެސް އަލުން ފަށާނަމަ، ފަށަންވާނީ މުޅިން ތަފާތު ގޮތަކަށް. އަހަރެން ސަނަމްގެ އިތުބާރު ހޯދަން އެބަޖެހޭ. އަހަންނަކީ އަޑުއަހާ، ސަނަމްއަށް ވަގުތުދޭ، އަދި އަނބިމީހާ ދިރިއުޅޭ ހަމައެކަނި ގެއެއް ހުރުމުގެ ބަދަލުގައި އަނތްބަކު ހުރުމުގެ އަގު ވަޒަންކުރަން ދަންނަ މީހެއްކަން ސާބިތުކޮށްދޭން އަހަރެން ބޭނުން.” އާހިލް މަޑުޖެހިލިއެވެ. “އަހަރެން މިއަދަކު ގޮތެއް ނިންމާކަށް ނޭދެން.”
ސަނަމްގެ ހިތަށް ބަޔާންކުރަން ނޭނގޭ ލުޔެއް ލިބުނެވެ. އެއީ މުޅިން ޔަޤީންކަމެއް ލިބިގެނެއް ނޫނެވެ. މަޢާފުކުރެވުނީކީވެސް ނޫނެވެ. އެއީ ހަމައެކަނި، އެއްވެސް ޒުވާބެއް ނުކޮށް، އާދޭހެއް ކުރަން ނުޖެހި އެންމެ ފަހުން އޭނާގެ އަޑު އަހާނެ މީހަކު ވީކަމުގެ އިޙުސާސުން ލިބުނު ހިތްހަމަޖެހުމެކެވެ.
އޭނާ ސައިތަށީގައި އަތްލިއެވެ. “އަހަންނަށް ވަގުތު ބޭނުން، އާހިލް.”
“އަހަރެން ސަނަމްއަށް ވަގުތު ދޭނަން.”
“އަދި އަހަރެން ނިންމާ ކޮންމެ ނިންމުމަކަށް އާހިލް އިޙުތިރާމް ކުރަންވާނެ.”
އާހިލް ބޯޖަހައިލިއެވެ. “އަހަރެން އިޙުތިރާމް ކުރާނަން.”
އެއަށްފަހު، ދެމީހުންވެސް ވާހަކަނުދައްކައި ކަނޑުގެ ރާޅުތަކަށް ބަލަހައްޓައިގެން އިރުކޮޅަކު ތިއްބެވެ. އެތަނުގައި ލޯބީގެ ބޮޑެތި އިޤުރާރުތަކެއް ނެތެވެ. އެ ހިނދުކޮޅުން ފެށިގެން ހުރިހާ ކަމެއް ފުރިހަމަވާނެކަމުގެ ވަޢުދެއްވެސް ނެތެވެ. އެކަނިވެރިކަމުގައި ވޭތުކުރި ރޭތަކުގެ ހަނދާން އެއްފަހަރުން ފޮހެލާނެ ފަދަ ކުއްލި ބައްދައިލުމެއްވެސް ނެތެވެ. އެތަނުގައި އޮތީ ހަމައެކަނި އެކަކު އަނެކަކުދެކެ ލޯބިވި، އެކަކު އަނެކަކަށް ހިތާމަދިން، އަދި ހަޤީޤަތް ފޮރުވައިގެން ދެން ކުރިއަށް ނުދެވޭނެ ހިސާބަށް އާދެވިފައިވާ ދެ އިންސާނުންގެ ދެމެދުގައި ދެކެވުނު ތެދުވެރި ވާހަކަތަކެކެވެ.
ދެމީހުން ވަކިވެގެން ދާން ތެދުވި ވަގުތު، އާހިލް ސަނަމް ގާތު ގެއަށް އައުމަކަށް ނޭދުނެވެ. އޭނާ ހަމައެކަނި ބުނެލިއެވެ. “ސަނަމް، އަމިއްލަ ނަފުސަށް ރައްކާތެރިވާތި.”
ސަނަމް އާހިލްގެ މޫނަށް ބަލައިލިއެވެ. “އާހިލްވެސް.”
ދެން އޭނާ ހިނގައިގަތެވެ. އޭނާ އެނބުރި އާހިލްގެ ގާތަށް ދާނެކަމެއް ނުވަތަ ނޫންކަމެއް ޚުދު އޭނާއަކަށްވެސް ނޭނގެއެވެ. ފަހަރެއްގައި، ދުވަސްތައް ފާއިތުވަމުންދާ ވަރަކަށް، އެކަކު އަނެކަކުދެކެ ލޯބިވާނެ އާ ގޮތެއް އެމީހުންނަށް ފެނިދާނެއެވެ. ކުރިން މާ ބޮޑު ކަމަކަށް ނަހަދައި ދޫކޮށްލެވުނު ކުދިކުދި އަޅާލުންތަކުން ކައިވެނި ރައްކާތެރިކުރަން އާހިލް ދަސްކޮށްފާނެއެވެ. ވަޢުދުތަކުގެ ބަދަލުގައި އަމަލުން އަޅާލުން ލިބެން ފެށުމުން، އަލުން އިތުބާރު އުފެދިދާނެކަން ސަނަމްއަށް އިޙުސާސްވެސް ވެދާނެއެވެ. ނުވަތަ ދެމީހުންގެ ދެމެދުގައި އޮތް ދުރުމިން މާ ބޮޑުވެ، އަލުން ގުޅެން މާ ލަސްވެފައިވެސް އޮވެދާނެއެވެ. މިވަގުތަށް، އެ ސުވާލުތަކުގެ ޖަވާބު ހޯދަން އަވަސްނުވެ ހުރުމުގެ ހިތްހަމަޖެހުން އޭނާ އަމިއްލަ ނަފްސަށް ދިނެވެ.
އަތިރިމަތީ މަގުން އޭނާ ހިނގަމުން ދިޔައިރު، ޖެހެމުންދިޔަ މަޑު ވައިރޯޅިން އޭނާގެ ދޯޕައްޓާގެ ކޮޅު ވިހުރެމުން ދިޔައެވެ. އިރުއޮއްސެމުން ދިޔަ ވަގުތުގެ ރަން ދޯދިތަކުން ކަނޑުގެ ލޮނުގަނޑު ވިދަމުންދިޔައިރު، މާލޭގެ އާންމު އަޑުތައް އޭނާގެ ވަށައިގެން ގުގުމަމުން ދިޔައެވެ. ދުއްވާފައިދާ ސައިކަލުތަކުގެ އަޑާއި، ދުރުން މީހުން ސަލާންގޮވާ އަޑާއި، ތޮށިގަނޑުގައި ޖެހި ބިންދައިގެންދާ ރާޅުތަކުގެ މަޑުމައިތިރި އަޑެވެ.
އާހިލް އޭނާގެ ގާތުން މަޤާމެއް ދޭނެކަމަށް އެންމެ ފުރަތަމަ ވަޢުދުވި ދުވަހު، އޭނާ ހުރި ގޮތް ސަނަމް ހަނދާންވިއެވެ. އެ ދުވަހު އެ ޒުވާން އަންހެންކުއްޖާ ޤަބޫލުކުރީ ލޯތްބަކީ ކެތްތެރިވުމާއި، ވިސްނައިދިނުމާއި، މަޢާފުކުރުމާއި، އަދި ހުރިހާ ތަކުލީފެއް އުފުލައިގެންވެސް ދެމިހުރުން ކަމަށެވެ.
އޭނާ އަދިވެސް ލޯބި ޤަބޫލުކުރެއެވެ. އެކަމަކު އޭނާ މިހާރު ވަނީ އެހެން ފިލާވަޅެއް ދަސްކޮށްފައެވެ. ލޯބީގައި ކެތްތެރިކަން ބޭނުންވެދާނެއެވެ. ނަމަވެސް އެއީ އިންސާނަކު އެއްވެސް އަގެއް ނެތް، ނުފެންނަ ހިޔަންޏަކަށް ވާން މަޖުބޫރުކުރާ އެއްޗަކަށް ވެގެން ނުވާނެއެވެ. އުނދަގޫ ދުވަސްތަކުގައިވެސް ލޯބި ދެމިއޮވެދާނެއެވެ. އެކަމަކު އަބަދުވެސް އިންތިޒާރުކުރަން ޖެހެނީ ހަމައެކަނި އެކަކަށް ކަމަށްވާނަމަ، އެ ލޯތްބަކަށް ދިރުމެއް ނުލިބޭނެއެވެ. އަދި ކައިވެންޏަކުން ބޯހިޔާވަހިކަމެއް ދިން ނަމަވެސް، އެއީ އަބަދުވެސް ހިތުގެ ހަމަޖެހުމާއި ގާތްކަން ލިބޭނެ ތަނެއް ނޫނެވެ.
ސަނަމް މޫދު ކައިރީގައި މަޑުކޮށްލައިގެން، ރާޅުތައް އުފުލި ތިރިވާ މަންޒަރަށް ބަލަން ހުއްޓެވެ. ވަރަށް ގިނަ ދުވަސްތަކެއް ވަންދެން، އޭނާ ދިޔައީ އާހިލް ދުވަހަކުވެސް ސަމާލުކަން ނުދިން ސުވާލެއް ކުރަމުންނެވެ.
“މީހޭ މަށަށް ދިން މަޤާމަކީ؟” އޭނާ އެ ސުވާލު ކުރީ އޭނާގެ ކަރުނަތަކުންނެވެ. އޭނާގެ ހިމޭންކަމުންނެވެ. އާހިލް އަންނާނެ އިރަކަށް ހޫނުކޮށް ބަހައްޓާފައި ހުރި ކާނާތަކުންނެވެ. އަދި އޭނާ އިސްވެ ފަށަން މަސައްކަތްކުރި ކޮންމެ ވާހަކައަކުންނެވެ. އޭނާ އެ ސުވާލު ކުރީ އާހިލްގެ ކައިރީގައި ހުރެމެ، އަމިއްލަ ނަފްސަށް އެކަނިވެރިކަން އިޙުސާސްވި ކޮންމެ ފަހަރަކުއެވެ. އެކަމަކު މިހާރު، އެ ސުވާލުގެ ޖަވާބު ބިނާވެފައި އޮތީ ހަމައެކަނި އާހިލްގެ މައްޗަށް ނޫންކަން އޭނާއަށް ވިސްނިއްޖެއެވެ.
މީހެއްގެ ދިރިއުޅުމުން ލިބޭ މަޤާމަކީ ވަޢުދުތަކަކުން ދެވިދާނެ އެއްޗެކެވެ. އެކަމަކު އެ މަޤާމު ދެމެހެއްޓޭނީ އަޅާލުމާއި އޯގާތެރިކަމުންނެވެ. އެ މަޤާމަކީ ދެމީހުންނަށްވެސް ޖާގަ އޮންނަންޖެހޭ ތަނެކެވެ. އެމީހުންގެ އުފާތަކަށާއި، ބިރުވެރިކަމަށާއި، އާދައިގެ ދުވަސްތަކަށާއި، އަދި އަނެކާގެ ވިސްނުން ދެނެގަންނަން ބޭނުންވާ ބޭނުންވުމަށެވެ.
ކުރިން ސަނަމް ޤަބޫލުކުރީ އާހިލް އޭނާއަށް ދިން މަޤާމަކީ އަބަދުވެސް އޭނާގެ ޙައްޤެއްގެ ގޮތުގައި އޮންނާނެ އެއްޗެއް ކަމަށެވެ. އެއީ އޭނާދެކެ ލޯބިވެގެން އެ މަޤާމު ދިނީތީއެވެ. އެކަމަކު މިހާރު އޭނާއަށް އެނގެއެވެ. އޭނާއަށްވެސް އިޚްތިޔާރު އެބައޮތެވެ. އަމިއްލަ ހިތް މަޑުމަޑުން މަރުވަމުންދާ ތަނެއްގައި ދެމިހުރުމަށް އިންކާރުކުރުމުގެ އިޚްތިޔާރު އޭނާއަށް އެބައޮތެވެ. އެތަނަށް އޭނާ ގެނެސްދިން ލޯބި ދޮގުނުކޮށް، އެތަނުން ދުރަށް ފިޔަވަޅު އެޅުމުގެ އިޚްތިޔާރުވެސް އޭނާއަށް އެބައޮތެވެ. އަދި އެއްއިރެއްގައި ލޯބިވި ފިރިމީހާގެ ދުޝްމަނަކަށް ނުވެ، އަމިއްލަ ނަފްސު އިސްކުރުމުގެ ބާރުވެސް އޭނާއަށް ލިބިގެންވެއެވެ.
އިރު އޮއްސި، އަނދިރިކަން ކަނޑުގެ ސަތަހައަށް ވެރިވާން ފެށިއެވެ. ސަނަމް ފުން ނޭވާއެއް ލުމަށްފަހު އަނެއްކާވެސް ހިނގައިގަތެވެ. އޭނާގެ ފަހަތުގައިވަނީ، މުޅި އުމުރު އެކުގައި ހޭދަކުރަން އެއްއިރެއްގައި އޭނާ ހުވަފެން ދުށް އެޕާޓްމަންޓެވެ. ކުރިމަތީގައިވަނީ އަދި އޭނާއަށް ސާފުކޮށް ފެންނަން ނެތް މުސްތަޤުބަލެކެވެ. އެކަމަކު ފުރަތަމަ ފަހަރަށް، އެ ނޭނގޭ ކުރިމަގާމެދު އޭނާގެ ހިތުގައި ބިރެއް ނެތެވެ.
އާހިލްއަކީ އޭނާ ބޭނުންވާފަދަ ފިރިއަކަށް ވެދާނެތޯ ނުވަތަ ނޫންތޯ އޭނާއަކަށް ނޭނގެއެވެ. އެމީހުންގެ ކައިވެނި ސަލާމަތްވާނެ ކަމެއްވެސް ނޭނގެއެވެ. އެކަމަކު އޭނާއަށް ޔަޤީންވާ އެއް ކަމެއް އެބައޮތެވެ. އޭނާއަށް ޙައްޤުވާ މަޤާމު ހޯދުމަށް ދެން ދުވަހަކުވެސް އޭނާ އާދޭހެއް ނުކުރާނެއެވެ. ސަބަބަކީ، އެންމެ ވޭންދެނިވި ސުވާލަކީ އާހިލްގެ ދިރިއުޅުމުން އޭނާއަށް މަޤާމެއް ދިންތޯ ނުވަތަ ނޫންތޯ ކުރެވޭ ސުވާލެއް ނޫނެވެ. އެއީ، އަމިއްލަ ނަފްސު ގެއްލުވައިނުލައި، އެ މަޤާމުގައި އޭނާއަށް ދެމިހުރެވިދާނެތޯ ކުރެވޭ ސުވާލެވެ. އަދި މިފަހަރު، ސަނަމް ނިންމީ ގެއްލިގެން ނުދިއުމަށެވެ.
(ނިމުނީ)
