ޝާހްރުކް ޚާންގެ ފަހުގެ ބްލޮކްބަސްޓަރ ފިލްމު “ޕަތާން” އާއި “ޖަވާން” އަށް ފަހު، ހުރިހާ ލޮލެއް މިހާރު އަމާޒުވެފައި ވަނީ ގިނަ ބަޔަކު އެ ފިލްމަކަށް އިންތިޒާރުކުރަމުން އަންނަ ސަލްމާން ޚާންގެ “ޓައިގާ 3” އަށެވެ. ފިލްމު ރިލީޒްކުރާ ތާރީޚު ކައިރިވެފައިވީ ނަމަވެސް، ފިލްމު އުފެއްދި ފަރާތްތަކުން ފިލްމުގެ މާގިނަ ވާހަކަތަކެއް ހިއްސާނުކުރާތީ ފޭނުން ތިބީ ކެތްމަދުވެފައެވެ. މިހައިތަނަށް އައިއިރު މި މަޝްހޫރު ފްރެންޗައިޒްގެ ތިން ވަނަ އިންސްޓޯލްމަންޓުގެ ޓީޒާއެއް ނުވަތަ ޓްރެއިލާއެއް ދައްކާލާފައެއް ނުވެ އެވެ.

‘ޓައިގާ 3’ އަށް ފުޅާ ދާއިރާއެއްގައި ޕްރޮމޯޝަނަލް ކެމްޕޭނެއް ހިންގަން ނުޖެހޭނެ ކަމަށް ފިލްމު ވިޔަފާރީގެ މަޝްހޫރު ތަޖުރިބާކާރެއް ބުނެފައިވެ އެވެ. އޭނާ ބުނި ގޮތުގައި ފިލްމު ރިލީޒްކުރަން އެންމެ ދެ މަސް ދުވަސް ބާކީ އޮތް ނަމަވެސް ޕްރޮމޯޝަނަލް މެޓީރިއަލް ނެތުމުން ފިލްމުގެ ޕާފޯމަންސަށް ނޭދެވޭ އަސަރެއް ނުކުރާނެ އެވެ. އޭނާ އިތުރަށް ފާހަގަކުރި ގޮތުގައި ސިނަމާތަކުގައި ‘ޖަވާން’ ދެއްކިއިރު ‘ޓައިގާ 3’ ގެ ޓީޒާއެއް ދެއްކުމަކީވެސް ކޮންމެހެން ބޭނުންކަމެއް ނޫން ކަމަށެވެ.

މި ނުކުތާ ފާހަގަކުރަމުން ފިލްމު ވިޔަފާރީގެ ތަޖުރިބާކާރު ފާހަގަކުރި ގޮތުގައި ‘ޖަވާން’ އިން ވެސް މިފަދަ ސްޓްރެޓެޖީއެއް ބޭނުންކުރި ކަމަށާއި، ފިލްމު ރިލީޒްކުރާ ތާރީޚާ ގާތްކޮށްފައި ޓްރެއިލާ ރިލީޒްކުރި ނަމަވެސް ފާހަގަކޮށްލެވޭ ވަރުގެ ރަނގަޅު ނަތީޖާއެއް ނެރެފައިވާ ކަމަށެވެ. އޭނާ ފާހަގަކުރި ގޮތުގައި މި އުސޫލުގެ ސަބަބުން ފޭނުންގެ މެދުގައި ފިލްމަށް ކުރާ އިންތިޒާރު އިތުރުވެ، އެމީހުން ސިނަމާތަކަށް ދިއުމަށް ބާރުއަޅާނެ އެވެ.

މީގެ އިތުރުން ފިލްމު ވިޔަފާރީގެ ތަޖުރިބާކާރު ވަނީ ފަހުގެ ފިލްމީ ކާމިޔާބީތަކެއް ކަމަށްވާ ‘ޕަތާން’ އާއި ‘ރޮކީ އޯރް ރާނީ ކި ޕްރޭމް ކަހާނީ’ ގައި މިއުޒިކުގެ ދައުރު ފާހަގަކޮށްފަ އެވެ. ‘ޒަރާ ހަޓްކޭ ޒަރާ ބަޗްކޭ’ ފަދަ ކުރު ފިލްމުތަކުގައި ފެންވަރު ރަނގަޅު މިއުޒިކެއް ބޭނުންކޮށްފައި ވުމުން ފައިދާތަކެއް ލިބުނުކަންވެސް އޭނާ ފާހަގަކުރިއެވެ. މިގޮތުން އޭނާ ބުނީ ‘ޓައިގާ 3’ގައި ޝައުގުވެރިވާނެ މިއުޒިކެއް ހިމެނިފައިވާ ނަމަ ފިލްމަށް ބޮޑު ކާމިޔާބީއެއް ލިބުމަކީ އެކަށީގެންވާ ކަމެއް ކަމަށެވެ.

ފިލްމު ވިޔަފާރީގެ އެހެން ތަޖުރިބާކާރުން ވެސް މި ލަފާކުރުންތައް ތަކުރާރުކޮށް، ‘ޓައިގަރ 3’ އާއި ގުޅިގެން ފެންމަތިވެފައިވާ މުހިންމު ވާހަކަތައް ފާހަގަކުރި އެވެ. ފިލްމަށް ބޮޑު ޝައުގުވެރިކަމެއް އުފެދިފައިވާއިރު، ރިލީޒްކުރާ ތާރީޚު ކައިރިވަމުންދާ ވަރަކަށް މި އިންތިޒާރު އިތުރަށް ވަރުގަދަވާނެ ކަމަށް ބެލެވެ އެވެ.

ސަލްމާން ޚާން އެންމެ ފަހުން ފެނިގެންދިޔަ ފިލްމު “ކިސީ ކާ ބާއި ކިސީ ކާ ޖާން”އަށް ބޮކްސް އޮފީހުގައި ރަނގަޅު ކާމިޔާބީއެއް ލިބިފައި ނެތަސް، ސަލްމާންގެ ސަޕޯޓަރުން އިންތިޒާރުކުރަނީ “ޓައިގާ 3” އިން ސަލްމާންގެ އަސްލު ދައްކާލާނެ ކަމަށެވެ.

މަނީޝް ޝަރްމާ ޑައިރެކްޓްކޮށްފައިވާ މި ފިލްމުގެ ލީޑް ރޯލުން ކެޓްރީނާ ކައިފް އާއި އިމްރާން ހާޝްމީ ވެސް ފެނިގެންދާއިރު، ފިލްމު ރިލީޒްކުރާނީ 10 ނޮވެމްބަރު 2023ގައެވެ.

ލިޔުންތެރިޔާގެ ފުރަމަލަ

އަޙްމަދު ޝާހް ޢަލީ
އަޙްމަދު ޝާހް ޢަލީ
ދިވެހި ފިލްމީ ދާއިރާގެ އެފުށާއި މިފުށް ރަނގަޅަށް ދަންނަ ކުރީގެ އެކްޓަރ އަދި މިހާރު ފިލްމު ޕްރޮޑިއުސްކުރާ ޝާހް ޚާއްޞަވަނީ ބޭރުގެ ފިލްމީ ޚަބަރު ލިޔުމަށެވެ.

ގުޅުންހުރި ލިޔުން: