ލޭ ހަދިޔާކުރުމަކީ އިންސާނަކަށް އިންސާނެއްގެ ފަރާތުން ކޮށްދެވޭނެ އެންމެ އަގުބޮޑު އެއް ހަދިޔާއެވެ. އެއީ މީހެއްގެ ފުރާނަ ސަލާމަތްކުރުމަށްޓަކައި ވެވޭ ވަރަށް މަތިވެރި ގުރުބާނީއެކެވެ. ނަމަވެސް، އަޅުގަނޑުމެންގެ ތެރޭގައި ލޭ ހަދިޔާކުރަން ޖެހިލުންވާ ނުވަތަ ބިރުގަންނަ މީހުން މަދެއް ނޫނެވެ. މި ބިރުވެރިކަން އުފެދެނީ ގިނަ ފަހަރަށް މިކަމާ ބެހޭ ސައްހަ މަޢުލޫމާތު ނޭނގުމުގެ ސަބަބުންނެވެ.
ލޭ ހަދިޔާކުރުމުގެ މުހިންމުކަމަށް ބަލާއިރު، މިއީ އެތައް ބައެއްގެ ދިރިއުޅުމާ ގުޅިފައިވާ ކަމެކެވެ. ޚާއްޞަކޮށް ރާއްޖެ ފަދަ ތަލަސީމިއާ ކުދިން ގިނަ ޤައުމެއްގައި، އެ ކުދިންގެ ދިރިހުރުމަށްޓަކައި ކޮންމެ މަހަކުވެސް ގަވާއިދުން ލޭ ބޭނުންވެއެވެ. މީގެ އިތުރުން ކުއްލި ހާދިސާތަކާއި، ބޮޑެތި އޮޕަރޭޝަންތަކާއި، ވިހެއުމުގެ ތެރޭގައި ދިމާވާ ނުރައްކާތަކުގައި ލޭ ހަދިޔާކުރާ މީހުންގެ އެހީތެރިކަން ނުހަނު ބޮޑެވެ.
އިސްލާމީ ނަޒަރަކުން ބަލާއިރު، ލޭ ހަދިޔާކުރުމަކީ ވަރަށް މަތިވެރި އަދި ދަރުމަހުރި ކަމެކެވެ. ކީރިތި ޤުރުއާނުގައި މާތްﷲ ވަނީ އެއްވެސް މީހެއްގެ ފުރާނަ ސަލާމަތްކޮށްފި މީހަކީ މުޅި އިންސާނިއްޔަތު ސަލާމަތްކުރި މީހެއް ފަދަ މީހެއް ކަމުގައި ބަޔާންކުރައްވާފައެވެ. އެހެންކަމުން، ބަލިމީހަކަށް އެހީތެރިވުމުގެ ނިޔަތުގައި ލޭ ހަދިޔާކުރުމަކީ ޞަދަޤާތެއްގެ ގޮތުގައި ބެލެވޭނެ އަމަލެކެވެ.
ތަލަސީމިއާ ބަލިކުއްޖަކަށް ލޭ އަޅަނީ – ފޮޓޯ: ޖެމިނައި
ލޭ ހަދިޔާކުރުމާ މެދު މުޖުތަމަޢުގައި ހުރި ބައެއް ކުށްހީތަކަށް ބަލާއިރު، ބައެއް މީހުން ގަބޫލުކުރަނީ ލޭ ދިނުމުން ހަށިގަނޑު ބަލިކަށިވާނެ ކަމަށެވެ. ނަމަވެސް ހަގީގަތަކީ ލޭ ދިނުމުން ހަށިގަނޑުގައި އާ ސެލްތައް އުފެދުމަށް ބާރުލިބި، ދުޅަހެޔޮކަން އިތުރުވާ ކަމެވެ. ލޭ ދެވޭނީ އުމުރުން 18 އަހަރާއި 65 އަހަރާ ދެމެދުގެ، ބަރުދަން 45 ކިލޯއަށްވުރެ މަތި، ދުޅަހެޔޮ ސިއްހަތެއްގައި ހުރި ކޮންމެ މީހަކަށެވެ. ބަލިވެއިނުމާއި، ގާތުން ކިރުދޭ މުއްދަތުގައި އަދި ބައެއް ކަހަލަ ގައިންގަޔަށް އަރާ ބަލިތައް ހުންނަ މީހުންނަށް ލޭ ނުދެވޭނެއެވެ.
ޓެޓޫ ޖަހާފައިވާ މީހުންނާ މެދު އޮންނަ ސުވާލަކީ ޓެޓޫ ޖެހުމަށްފަހު ލޭ ދެވޭނެތޯއެވެ؟ އާންމު އުސޫލުން ޓެޓޫ ޖަހާތާ 1 އަހަރު ފަހުން، ސިއްހީ ގޮތުން އެއްވެސް މައްސަލައެއް ނެތް ނަމަ ލޭ ހަދިޔާކުރެވިދާނެއެވެ. ބޮޑު ސާޖަރީއެއް ކުރާތާ 1 އަހަރު ފަހުން ލޭހަދިޔާކުރެވޭނެއެވެ. ޕްލޭޓްލެޓްސް ޑޮނޭޓްކުރެވޭނީ 2 ހަފުތާ ފަހުންނެވެ. ހަމައެހެންމެ، ދިގު މުއްދަތަށް ބޭސްކުރާ މީހުން (މިސާލަކަށް ހަކުރު ބަލި ނުވަތަ ލޭގެ ޕްރެޝަރަށް ބޭސްކުރާ މީހުން) ބަލި ކޮންޓްރޯލް ކުރެވިފައިވާނަމަ، ޑޮކްޓަރުގެ ލަފާގެ މަތިން ލޭ ދެވިދާނެއެވެ. އެއްފަހަރު ލޭ ދިނުމަށްފަހު ދެން ލޭ ދެވޭނީ 3 މަސް ދުވަހުގެ މުއްދަތެއް ފާއިތުވުމުންނެވެ.
ސޭފް ހައުސް މޯލްޑިވްސްއަކީ ރާއްޖޭގައި ލޭ ހަދިޔާކުރުމަށް ހިލޭ ސާބަހަށް އެންމެ ހަރަކާތްތެރިކޮށް މަސައްކަތްކުރާ ޓީމެއް
ނިންމާލަމުން ދަންނަވާނީ، ތިބާ ހަދިޔާކުރާ ކޮންމެ ލޭ ފޮދަކީ މީހެއްގެ މުޅި ދިރިއުޅުން ބަދަލުކޮށްލާނެ އުއްމީދެކެވެ. ލޭ ހަދިޔާކުރުމަށް ޖެހިލުންނުވާށެވެ. މިއީ ސިއްހީ ގޮތުންނާއި ރޫހާނީ ގޮތުން ތިބާއަށް ލިބޭނެ ބޮޑު އުފަލެކެވެ. އަދި ލޭ ބޭނުންވެގެން ކުރާ އިޢުލާންތަކާއި ޕޯސްޓްތައް ސޯޝަލް މީޑިއާގައި ގިނައިން ހިއްސާކޮށް، މި މަތިވެރި އަމަލުގައި އެންމެން ބައިވެރިވުމަށް ބާރުއަޅަމާ ހިނގާށެވެ. ތިބާގެ ލޭގެ ސަބަބުން މީހެއްގެ ހިތުގެ ވިންދު ދެމިއޮވެދާނެއެވެ.
