އާއިލާއަކީ ކޮންމެ އިންސާނަކަށްވެސް އަމާންކަމާއި، ލޯތްބާއި، އަޅާލުން ލިބެންޖެހޭ އެންމެ މުހިންމު ބިނާއެވެ. ނަމަވެސް، ހިތާމައަކީ މިއަދުގެ މުޖުތަމައުގައި އާއިލާގެ ނަމުގައި ހިންގޭ ބައެއް އަނިޔާވެރި އަމަލުތަކަކީ “އާދައިގެ” ކަންކަން ކަމުގައި ބަލައިގަންނަ މިންވަރު އިތުރުވަމުންދާ ކަމެވެ. މިފަދަ ކަންކަން ދިފާއުކުރުމަށްޓަކައި އެންމެ ގިނައިން ބޭނުންކުރެވޭ އެއް ބުނުމަކީ “އެއީ ހަމަ ތިބާގެ އާއިލާއޭ” މި ބުނުމެވެ. މިއީ އާއިލާގެ ތެރޭގައި ހިނގާ އަނިޔާވެރިކަން ދިގުދަންމައި، އެކަންކަން އާދައިގެ ކަމަކަށް ހެދުމަށް ބޭނުންކުރެވޭ ވަރަށް ނުރައްކާތެރި އުޒުރެކެވެ.
“އެއީ ހަމަ ތިބާގެ އާއިލާއޭ” ބުނެވޭ ބުނުމަކީ، އެހެން މީހެއްގެ ފަރާތުން ފެނިއްޖެނަމަ ދުވަހަކުވެސް ބަލައިނުގަންނާނެ ފަދަ ނޭދެވޭ އަމަލުތަކާއި އުޅުންތައް ދިފާއުކުރުމަށް ބޭނުންކުރާ އައްޑަނައެކެވެ. މި ބުނުމުގެ ސަބަބުން، އަނިޔާ ލިބޭ މީހާ އަމިއްލަ ނަފްސަށްޓަކައި ކަނޑައަޅާ ހުދޫދުތައް މުގުރާލެވެއެވެ. އަދި އޭނާއަށް ލިބޭ ތަދާއި ވޭނަކީ މާ ބޮޑު ކަމެއް ނޫން ކަމުގައި ދައްކައި، އަނިޔާވެރިޔާގެ ހިތްހަމަޖެހުމަށްޓަކައި ހަނުހުރުމަށް މަޖުބޫރުކުރުވައެވެ. މިއީ ލޭގެ ގުޅުމެއް އޮތުމަކީ، އަނެކާގެ އިހުތިރާމް ކުޑަކުރުމަށާއި، ނަފްސާނީ ގޮތުންނާއި ޖިސްމާނީ ގޮތުން ދެވޭ އަނިޔާތައް ބަލައިގަންނަން ޖެހޭނެ ސަބަބެއް ކަމަށް ދަސްކޮށްދޭ ދަސްކޮށްދިނުމެކެވެ.
ހަގީގަތުގައި އާއިލާއަކީ ބިރުވެރިކަމުގެ ތަނަކަށް ވެގެންނުވާނެއެވެ. ލޯތްބަކީ ނަފްސާނީ ނުވަތަ ޖިސްމާނީ އަނިޔާ ތަހައްމަލުކުރުމަށް އޮތް ޝަރުތެއް ނޫނެވެ. މީހަކާ ތިމާގެކަމުގެ ގުޅުމެއް އޮތުމަކީ، މުޅި އުމުރަށް އެމީހަކަށް ތިބާގެ މައްޗަށް ބާރުފޯރުވައި، ތިބާގެ ހުދޫދުތައް މުގުރާލުމަށް ލިބޭ ހުއްދައެއް ނޫނެވެ. ގިނަ ފަހަރަށް “މާފުކޮށް ހަނދާން ނައްތާލުމަށާއި” ނުވަތަ “އާއިލާގެ މަސްލަހަތު ހިފެހެއްޓުމަށް” ބާރުއަޅަނީ، އަނިޔާލިބޭ މީހާއަށް ހެޔޮއެދިގެންނެއް ނޫނެވެ. އޭގެ ބަދަލުގައި، އެހެން މީހުންނަށް ކުރިމަތިވެދާނެ ނުތަނަވަސްކަމަކުން ސަލާމަތްވުމަށެވެ.
އިސްލާމްދީނަކީ އިންސާނާގެ ކަރާމާތާއި ރައްކާތެރިކަން އެންމެ ފުރިހަމައަށް ކަށަވަރުކޮށްދޭ ދީނެވެ. އާއިލީ ގުޅުންތައް ދެމެހެއްޓުމަކީ ދީނުގައި ބާރުއަޅާފައިވާ ކަމެއް ނަމަވެސް، އާއިލާގެ ނަމުގައި އަނިޔާވެރިވުމަކީ އިސްލާމީ ޝަރީއަތުގައި ހުއްދަކަމެއް ނޫނެވެ. ކޮންމެ ބާވަތެއްގެ އަނިޔާއަކީވެސް “ޒުލްމު” ކަމުގައި ބެލެވޭއިރު، އަނިޔާވެރިކަމަށް ހިތްވަރުދީ އެކަންކަން ފޮރުވުމަކީ ދީނީ ގޮތުންނާއި އަޚްލާގީ ގޮތުން ބަލައިގަނެވޭނެ ކަމެއް ނޫނެވެ.
އިސްލާމްދީން އަމުރުކުރަނީ އާއިލާގެ ތެރޭގައި އިޙްސާންތެރިކަމާއި، އޯގާތެރިކަން އިސްކުރުމަށެވެ. އަނިޔާ ލިބޭ މީހާ އެ އަނިޔާގައި ދެމިހުރުމަށް މަޖުބޫރުކުރުމުގެ ބަދަލުގައި، އިންސާފު ހޯދައިދިނުމާއި ނިކަމެތިންނަށް ހިމާޔަތް ދިނުމަކީ އިސްލާމީ މުޖުތަމައެއްގެ ޒިންމާއެކެވެ. އެހެންކަމުން، “އާއިލާ” މި ނަން ބޭނުންކޮށްގެން މީހެއްގެ ނަފްސާއި ޖިސްމަށް ގެއްލުންދިނުމަކީ އިސްލާމީ އުސޫލުތަކާ މުޅިން ޚިލާފު، ހުއްޓުވަންޖެހޭ ނުރައްކާތެރި އަމަލެކެވެ. ދުޅަހެޔޮ އާއިލާއެއް ބިނާކުރެވޭނީ ބިރުވެރިކަމެއް ނެތް، އިހުތިރާމާއި ލޯބި އޮތް މާހައުލެއްގައެވެ.
މިފަދަ ހާލަތްތަކުގައި ޒިންމާ އުފުލަންޖެހޭ މީހާގެ ކިބައިން ޒިންމާ ނަގައި، އަނިޔާ ލިބޭ މީހާގެ ބޮލުގައި އިތުރު ބުރައެއް އެޅުވުމަކީ ބޮޑުވެގެންވާ ބޭއިންސާފެކެވެ. އަމިއްލަ ނަފްސުގެ ސަލާމަތަށްޓަކައި އާއިލާގެ މީހަކާ ދުރުމިނެއް ބެހެއްޓުމަކީ ނުވަތަ ގުޅުން ކަނޑާލުމަކީ، ތިމާގެ ހިތްނުބައިކަމެއް ނޫނެވެ. އެއީ އަމިއްލަ ނަފްސަށް އޮތް ލޯތްބާއި، ދިރިއުޅުން އިސްލާހުކުރުމަށް އެޅޭ މުހިންމު ފިޔަވަޅެކެވެ.
ކޮންމެ މީހަކަށްމެ، އާއިލީ އާދަކާދަތަކުގެ ކުރިއަށް އަމިއްލަ ނަފްސުގެ ހަމަޖެހުމާއި ސަލާމަތް އިސްކުރުމުގެ ހައްގު ލިބިގެންވެއެވެ. ކުށުގެ އިހުސާސް ކުރަންޖެހޭނީ އަނިޔާ ލިބޭ މީހާއެއް ނޫނެވެ. އާއިލާގެ ތެރޭގައި ޖީލުތަކަކަށް ދެމިގެން އަންނަ މިފަދަ ނޭދެވޭ އަނިޔާވެރި ސިލްސިލާތައް ބިންދާލުމުގެ ހިތްވަރު އަޅުގަނޑުމެންގެ ކިބައިގައި ހުންނަންޖެހެއެވެ. ލޭގެ ގުޅުމަކީ އަނިޔާވެރިވުމަށް ލިބޭ ހުއްދައެއް ނޫންކަން ގަބޫލުކޮށް، އަނިޔާއާ ދެކޮޅަށް ތެދުވުމަކީ ދުޅަހެޔޮ މުޖުތަމައެއް ބިނާކުރުމަށް ކުރެވޭނެ އެންމެ މުހިންމު މަސައްކަތެވެ.
