ސާފް ވިމެންސް ފުޓްސަލް ޗެމްޕިއަންޝިޕްގެ ތަށި ބަނގުލަދޭޝް އިން ހޯދައިފިއެވެ.
މިއަދު ދިވެހިރާއްޖެ ބަލިކޮށް ހޯދި 3 ޕޮއިންޓާއެކު ބަނގުލަދޭޝް ހޯދި ޕޮއިންޓްގެ އަދަދު ވަނީ 16 އަށް އަރާފައެވެ. ބަނގުލަދޭޝްއާ އެންމެ ގާތުން ވާދަކުރާ ބޫޓާނަށް ބާކީ އެއް މެޗު އޮތްނަމަވެސް 16 ޕޮއިންޓް ހަމަކުރުމުގެ ފުރުސަތެއް ނެތެވެ.

ދިވެހިރާއްޖެއާ ބަނގުލަދޭޝް ބައްދަލުކުރި މެޗު ބަނގުލަދޭޝް ކާމިޔާބުކުރީ ފަސޭހަކަމާއެކު 14-2 އިންނެވެ. މި މެޗަކީ މި މުބާރާތުގައި ދިވެހިރާއްޖެ ކޮޅަށް އެންމެ ގިނަ ގޯލު ވަތް މެޗެވެ. މި މެޗުގެ 4 ވަނަ މިނިޓްގައި ދިވެހިރާއްޖެެއިން ނެގި ލީޑު މާގިނައިރު ހިފަހައްޓައެއް ނުލެވުނެވެ. ފަހަތުން އަރައި އެއްވަރުކޮށް، ފުރަތަމަ ހާފު ނިމުމުގެ ކުރިން ބަނގުލަދޭޝްއިން ވަނީ 6 ގޯލު ޖަހާފައެވެ.
ދެވަނަ ހާފުގައި ވެސް ފެނުނީ ބަނގުލަދޭޝް ކުޅުންތެރިން ހުއްޓުވުމުގައި ދިވެހިރާއްޖެއަށް ނާކާމިޔާބުވަމުން ދިޔަތަނެވެ. ފަހު ހާފުގައި ބަނގުލަދޭޝް އިތުރު 8 ގޯލު ޖެހިއިރު، ދިވެހިރާއްޖެއިން ވެސް ގޯލެއް ޖެހިއެވެ.