ބޮލީވުޑްގެ މަޝްހޫރު ދެ ތަރިން ކަމަށްވާ އިމްރާން ހާޝްމީ އަދި ރަންދީޕް ހޫޑާ، ކާމިޔާބު ޕްރޮޑިއުސަރު ސާޖިދު ނަދިއާޑްވާލާ ޕްރޮޑިއުސްކުރާ އާ އެކްޝަން ތުރިލާ ފިލްމަކުން އެކުގައި ފެނިގެންދާ ގޮތަށް ހަމަޖެހިއްޖެއެވެ. މިއީ 2012 ވަނަ އަހަރު ނުކުތް މަޤުބޫލު ފިލްމު “ޖަންނަތު 2” އަށް ފަހު މި ދެ ތަރިން އެކުގައި ފެނިގެންދާނެ ފުރަތަމަ ފަހަރެވެ.
މިކަމާ ގުޅޭގޮތުން ބޮލީވުޑް ހަންގާމާއަށް މަޢުލޫމާތު ދެމުން އިތުބާރު ހުރި މަސްދަރަކުން ބުނެފައިވަނީ، ސާޖިދު ނަދިއާޑްވާލާއަކީ އިންޑިއާގެ ސިނަމާގައި ފާހަގަކޮށްލެވޭ އެންމެ ބޮޑު އެއް ޕްރޮޑިއުސަރު ކަމަށާއި، އޭނާ އަބަދުވެސް މަސައްކަތަށް ފުރިހަމައަށް އިޚްލާސްތެރި ހުނަރުވެރި ތަރިންނާއެކު މަސައްކަތްކުރަން ބޭނުންވާ ކަމަށެވެ. އަދި މި ޕްރޮޖެކްޓާ ގުޅުނު އެންމެ ފުރަތަމަ އެއް އެކްޓަރަކީ ރަންދީޕް ކަމަށާއި، ސާޖިދާއެކު މަސައްކަތްކުރުމުގެ ރަނގަޅު ތަޖުރިބާތަކެއް އޭނާގެ ހުރިކަން ވެސް އެ މަސްދަރުން ފާހަގަކުރިއެވެ.
އަދި ނަން ހާމަކޮށްފައިނުވާ މި އެކްޝަން ތުރިލާ ފިލްމުގެ ޝޫޓިން ފެށުމަށް ހަމަޖެހިފައިވަނީ 2027 ވަނަ އަހަރު ކުރީކޮޅުއެވެ. އަދި މި ފިލްމު ސިނަމާތަކަށް ގެނައުމަށް އަމާޒު ހިފާފައިވަނީ އެ އަހަރުގެ ފަހުކޮޅުގައެވެ.
މި ފިލްމުގެ އިތުރުންވެސް އިމްރާން ހާޝްމީގެ ގިނަ މަސައްކަތްތަކެއް ދަނީ ކުރިއަށެވެ. އެގޮތުން އަދިތުޔާ ދަތު ޑައިރެކްޓްކޮށްފައިވާ ފިލްމު “ގަންމާސްޓާ ޖީ9” ރިލީޒްވުމަށް މިހާރު ދަނީ ތައްޔާރުވަމުންނެވެ. ނޮވެމްބަރު 27 ގައި ރިލީޒްކުރުމަށް ހަމަޖެހިފައިވާ މި ފިލްމަކީ ބޮކްސް އޮފީހުގައި ބޮޑު ކާމިޔާބީއެއް ހޯދާނެ ކަމަށް ބެލެވޭ ފިލްމެކެވެ. އިމްރާން އެންމެ ފަހުން ފެނިގެން ގޮސްފައިވަނީ ދިޝާ ޕަޓާނީ، ޝަބާނާ އަޒްމީ އަދި ސުވިންދަރ ވިކީއާއެކު ނިތިން ކައްކަރް ޑައިރެކްޓްކުރި ފިލްމު “އަވާރާޕަން 2” އިންނެވެ.
