ބިހަކީ ދުނިޔޭގެ ހުރިހާ ހިސާބެއްގައިވެސް އިންސާނުންގެ ކެއުމުގައި ވަރަށް މުހިންމު ދައުރެއް އަދާކުރާ، އަދި އެންމެ ފައިދާހުރި ކާނާގެ ބާވަތްތަކުގެ ތެރޭގައި ހިމެނޭ އެއްޗެކެވެ. މިއީ ތަފާތު ގިނަގޮތްގޮތަށް ކާނާ ތައްޔާރުކޮށްގެން ކެއުމަށް ބޭނުންކުރާ، ހަށިގަނޑަށް ބޭނުންވާ ގިނަގުނަ މާއްދާތަކެއް އެކުލެވިގެންވާ މުއްސަނދި ކާނާއެކެވެ.

ކުކުޅުބިސް

ކުކުޅުބިހަކީ ދިވެހިންގެ ކެއުމުގައިވެސް އެންމެ އާންމުކޮށް ބޭނުންކުރާ ބިހުގެ ބާވަތެވެ. ހެނދުނުގެ ނާސްތާއިން ފެށިގެން، ތަފާތު ފޮނިކާތަކެއްޗާއި އެތަކެއް މީރު ކާތަކެތި ތައްޔާރުކުރުމުގައި ކުކުޅުބިސް ބޭނުންކުރެއެވެ. މިއީ އަގުހެޔޮކޮށް ފަސޭހައިން ލިބެން ހުންނަ، އަދި ހަށިގަނޑަށް ބޭނުންވާ ޕްރޮޓީން އެންމެ ފަސޭހައިން ހޯދޭނެ އެއް ގޮތެވެ. ކުކުޅުބިހަކީ އޭގެ ޒާތުގައި ފުރިހަމަ ކާނާއެކެވެ. ކުކުޅު ބިހަކީ ސިއްހީ މާހިރުން “ސުޕަރ ފުޑް” އެއްގެ ގޮތުގައި ސިފަކުރާ އެއްޗެކެވެ

ކުކުޅު ބިހުގެ ބައެއް މުހިންމު ފައިދާތަކަށް ބަލާއިރު.

ޕްރޮޓީން: ހަށިގަނޑުގެ މަސްތަކާއި ސެލްތައް އާލާކުރުމަށް ބޭނުންވާ މަތީ ފެންވަރުގެ ޕްރޮޓީން ބިހުން ލިބެއެވެ.
ވިޓަމިން އަދި މިނަރަލްސް: ވިޓަމިން އޭ، ބީ12، އަދި ޑީގެ އިތުރުން ސެލެނިއަމް ފަދަ ހަށިގަނޑަށް މުހިންމު މާއްދާތައް ބިހުގައި ގިނަ އަދަދަކަށް ހުރެއެވެ.
ލޮލުގެ ފެނުން: ބިހުގެ ރީނދޫ ބައިގައި ހިމެނޭ ލޫޓީން، އަދި ޒިއެކްސެންތިން (Zeaxanthin) ގެ ސަބަބުން އުމުރުން ދުވަސްވުމުން ލޮލަށް ދިމާވާ މައްސަލަތަކުން ރައްކާތެރިކޮށްދީ، ފެނުން ރަނގަޅުކޮށްދެއެވެ.
ސިކުނޑީގެ ދުވެލި: ބިހުގައި ހިމެނޭ “ކޯލިން” (Choline) އަކީ ސިކުނޑީގެ ހަނދާން ވަރުގަދަކުރުމަށާއި ސިކުނޑީގެ މަސައްކަތްތަކަށް ވަރަށް ބޭނުންތެރި މާއްދާއެކެވެ. އަދި ހަށިގަނޑަށް ފައިދާހުރި އޯމެގާ-3 ފެޓީ އެސިޑްސް ގިނަ އަދަދަކަށް ބިހުގައި ހުރެއެވެ.

އޯގަނިކް ކުކުޅުބިހާއި ޕްލާސްޓިކް އެކުލެވިގެންވާ ބިސް:

މިޒަމާނުގައި ކާނާގެ ރައްކާތެރިކަމަށް ބަލާއިރު، އޯގަނިކް ބިހަށް ދެވޭ ސަމާލުކަން ވަނީ އިތުރުވެފައެވެ. އޯގަނިކް ބިހަކީ އެއްވެސް ކެމިކަލެއް ނުވަތަ ހޯރމޯންއެއް ބޭނުންނުކޮށް، ގުދުރަތީ މާހައުލެއްގައި އުޅޭ ކުކުޅު އަޅާ ބިހެވެ. މީގެ ފައިދާ އާދައިގެ ބިހަށްވުރެ ގިނަކަމަށް ދިރާސާތަކުން ދައްކައެވެ.

ފަހަހަކަށް އައިސް “ޕްލާސްޓިކް ބިސް” ނުވަތަ އަމަލީ ގޮތުން އުފައްދާފައިވާ ބިސްތަކެއް ބާޒާރުގައި އުޅޭ ކަމުގެ ވާހަކަތަކެއް ވަނީ ފެންމަތިވެފައެވެ. މިފަދަ ބިސްތަކަކީ ސިއްހަތަށް ނުރައްކާތެރި ކެމިކަލްތަކެއް ބޭނުންކޮށްގެން އުފައްދާފައިވާ އެއްޗެހި ކަމަށް ބުނެވެއެވެ. އަސްލު ބިހާއި މިފަދަ ބިސް ވަކިކުރާނެ ގޮތްތަކުގެ ތެރޭގައި، ބިހުގެ ތޮށިގަނޑު މާ އޮމާންވުމާއި، ބިސް ތަޅާލުމުން ރީނދޫބައި ވަރަށް އަވަހަށް ހުދުބަޔާ އެކުވެގެން ދިއުން ހިމެނެއެވެ. އެހެންކަމުން، ކާބޯތަކެތި ގަންނައިރު އިތުބާރު ހުރި މަސްދަރުތަކުން ތަކެތި ގަތުމަކީ ސިއްހީ ރައްކާތެރިކަމަށްޓަކައި ކޮންމެހެން ކުރަންޖެހޭ ކަމެކެވެ.

ކުކުޅު ބިހަކީ ކޮންމެ ދުވަހެއްގެ ކެއުމުގައި ހިމަނާލަން ވަރަށް ރަނގަޅު، ފައިދާހުރި ކާނާއަކައް ވީހިނދު، ބިސް ބޭނުންކުރުމުގައި އޭގެ ތާޒާކަމާއި ފެންވަރަށް ސަމާލުކަން ދިނުމަކީ ބަލިތަކުން ރައްކާތެރިވުމަށްޓަކައި ކޮންމެހެން ބޭނުންތެރި ކަމެކެވެ. ހަށިގަނޑަށް ބޭނުންވާ މުހިންމު މާއްދާތައް ހޯދުމަށްޓަކައި، ހެލްތީ ޑައިޓެއްގައި ބިސް ހިމެނުމަކީ ބުއްދިވެރި ގޮތެކެވެ