ފައިސާއަކީ އިންސާނާގެ ދިރިއުޅުމުގެ ބޭނުންތައް ފުއްދުމަށްޓަކައި ކޮންމެހެން ބޭނުންތެރި އެއްޗެކެވެ. ނަމަވެސް، ތާރީޚަށާއި މިއަދުގެ މުޖުތަމަޢަށް ބަލާއިރު، ފައިސާއަކީ ހަމައެކަނި ބޭނުންތައް ފުއްދައިދޭ ވަސީލަތެއް ނޫނެވެ. ގިނަ ފަހަރަށް ފައިސާއަކީ އިންސާނާގެ ތަބީޢަތް ބަދަލުކޮށް، އޭނާގެ ހިތުގައި ބޮޑާކަމާއި ކިބުރުވެރިކަން އުފައްދާ މައިގަނޑު ސަބަބަށްވެސް ވެއެވެ.
ފައިސާ އަތަށް ގިނަވުމުން އިންސާނާ ބޮޑާކޮށްދޭކަމީ ފެންނަން އޮތް ހަޤީޤަތެކެވެ. އަތުގައި މުދަލާއި ފައިސާ ގިނަވުމުން، އަނެކުންނަށްވުރެ ތިމާ މާ މަތިވެރި މީހެއް ކަމުގައި ދެކެން ފެށެއެވެ. ކުރިން އަންނަން ގެންގުޅުނު މުންޑުގަނޑު މަތިން ހަނދާންނެތެއެވެ. މި ބޮޑާކަމުގެ ސަބަބުން ދަށު ފަންތީގެ މީހުންނާ މުޢާމަލާތް ކުރުމުގައި އިޙްތިރާމް ކުޑަކޮށް، ތިމާގެ ބާރާއި ނުފޫޒު ދެއްކުމަކީ ގިނަ މުއްސަނދިންގެ ކިބައިން ފެންނަ ނޭދެވޭ ސިފައެކެވެ. އަމިއްލަ ރައްޓެހިންނަކީ ތިމާއަށްވުރެ މަދުން ފައިސާ ލިބޭ މީހަކަށް ވެއްޖެނަމަ އޭނާއާއި އޮންނަ ގުޅުންވެސް އެއްވެސް ސަބަބަކާއި ނުލައި ކަނޑާލާ ހިސާބަށް ދެއެވެ. ފައިސާގެ މަސްތުގައި ޖެހުމުން، ދުނިޔޭގެ ހުރިހާ އުފަލަކާއި ބާރެއް އޮތީ ތިމާގެ އަތްމަތީގައި ކަމަށް ހީކުރެވި، އިންސާނީ ރިވެތި އަޚްލާޤާ ދުރަށް ދެވެއެވެ.
ހަމައެއާއެކު، ފައިސާއަކީ އިންސާނާ ކިބުރުވެރިކޮށްދޭ އެއްޗެކެވެ. ކިބުރުވެރިކަމަކީ ހަޤީޤަތް ގަބޫލުކުރަން ދެކޮޅު ހަދައި، މީހުންނަށް ދަށްކޮށް ހިތުމެވެ. ގިނަ ފަހަރަށް މުއްސަނދިކަން އިތުރުވުމުން، ތިމާގެ ނަފްސަށް އޮންނަ އިތުބާރު ނުބައި ގޮތަކަށް ބަދަލުވެގެން ދެއެވެ. އަނެކުންގެ ނަޞޭޙަތް ޤަބޫލުނުކުރުމާއި، ކޮންމެ ކަމެއްގައިވެސް ތިމާ ބޭނުންވާ ގޮތް ނޫން ގޮތެއް ނޯންނާނެ ކަމަށް ޤަބޫލުކުރުމަކީ ފައިސާއިން އުފަންކުރުވާ ކިބުރުވެރިކަމުގެ ނަތީޖާއެވެ.
މިއަދުގެ މުޖުތަމަޢަށް ބަލާއިރު، ގިނަ މުއްސަނދިންނަކީ ކިބުރުވެރި އަދި ބޮޑާ ބައެއްގެ ގޮތުގައި ފާހަގަކުރެވެއެވެ. އެފަދަ މީހުންގެ ދިރިއުޅުމުގެ ވައްޓަފާޅިއާއި، މީހުންނާ މުޢާމަލާތު ކުރާގޮތުން އެކަން ވަރަށް ރީއްޗަށް ހާމަވެއެވެ. ފައިސާގެ ސަބަބުން ތިމާގެ ޢާއިލީ ގުޅުންތަކާއި، އެކުވެރިންނާ އޮންނަ ގާތްކަން ކަނޑާލައި، ހަމައެކަނި މާއްދީ ތަކެއްޗަށް އަޅުކަންކުރާ މީހުންނަށް އެމީހުން ބަދަލުވެއެވެ. މުއްސަނދިކަމުގެ ސަބަބުން އެހެން މީހުންނަކީ އެއްވެސް އަގެއް ނެތް ބައެއް ކަމުގައި ދެކުމަކީ މި ދެންނެވި ކިބުރުވެރިކަމުގެ އެންމެ ނުރައްކާތެރި މަރުޙަލާއެވެ.
ފައިސާއަކީ އިލާހީ އިމްތިޙާނެކެވެ. އެއީ ހެޔޮ ގޮތުގައި ބޭނުންކޮށްފިނަމަ ދުނިޔެއާއި އާޚިރަތުގެ ބާއްޖަވެރިކަން ލިބޭނެ އެއްޗެކެވެ. ނަމަވެސް، ފައިސާގެ ސަބަބުން ބޮޑާވެ ކިބުރުވެރިވުމަކީ އިންސާނާ ދުނިޔެއާއި އާޚިރަތުގައި ވެސް ގެއްލެނިވެދާނެ ކަމެކެވެ. އެހެންކަމުން، މުއްސަނދިކަން ލިބުމުން ހިތްތިރިކަމާއި އިންސާނިއްޔަތުކަން އިސްކުރުމަކީ ކޮންމެހެން ބޭނުންތެރި ކަމެކެވެ.
