މާލޭގެ ހަލަބޮލިކަމާ ދުރުގައި އޮތް ރީތި ރަށެކެވެ. އިރުއޮއްސެމުން ދިޔަ ވަގުތު، އަތިރިމަތީގެ ހުދު ދޮންވެލިގަނޑުމަތީގައި ދުވަމުންދިޔަ ފަސް އަހަރުގެ އާދަމް ފެންނަނީ އެހެން ކުދިންނާ ވަރަށް ތަފާތު ގޮތަކަށެވެ. އޭނާގެ ކަންފަތުގައި އަބަދުވެސް އޮންނަނީ ބޮޑު ހެޑްފޯނެކެވެ. އެއިން އިވެމުންދަނީ ރާއްޖޭގެ މަޝްހޫރު ބޭންޑްތަކުގެ ލަވަތަކެވެ. އޭނާ ދުވަނީ ވަކި މިސްރާބެއް ނެތިއެވެ. އަތްތިލަ ހޫރުވަމުން، އަމިއްލަ ދުނިޔެއެއްގައި އުޅޭ ކަހަލައެވެ.
އާދަމްގެ މަންމަ އައިޝަތު، ގޭގެ ބޭރު ފެންޑާގައި ހުރެ އާދަމްއަށް ބަލަހައްޓައިގެން ހުއްޓެވެ. އޭނާގެ މޫނުމަތިން ފެންނަނީ ފަޚުރުވެރިކަމަށްވުރެ ބޮޑަށް ކަންބޮޑުވުމެވެ.
“އައިޝާ، އަދިވެސް އާދަމް އެ އުޅެނީ ހެޑްފޯން އަޅައިގެންތަ؟” ގޭގެ ދޮރު ހުޅުވާލާފައި ނުކުތް އާދަމްގެ ބައްޕަ އިބްރާހީމް އެހިއެވެ.
“އާނ، އޭނާ އެ ލަވަތަކާ ނުލާ އެންމެ ހިނދުކޮޅަކުވެސް މަޑުންނެއް ނުހުރޭ. އިބްރާހީމް، އަހަރެން ހާދަ ބިރެއްގަނެއޭ. އޭނާގެ ފަސްވަނަ އުފަންދުވަސް މިއީ. އެކަމަކު އަދިވެސް އެހެން ކުދިންނާ ވާހަކައެއް ނުދައްކާ،” އައިޝަތުގެ އަޑުގައި މަޑު ތުރުތުރުލުމެއް ހުއްޓެވެ.
އިބްރާހީމް އައިސް އައިޝަތުގެ ކޮނޑުގައި އަތް ބާއްވާލިއެވެ. “ދެން އައިޝާވެސް ތި ހާސްވަނީ މާ ބޮޑަށް. އޭނާއަކީ ތޫނުފިލި ކުއްޖެއް. ބަލާބަލަ، އެހެން ކުއްޖަކަށް ނޭނގޭހާ ގިނަ ލަވަ އޭނާއަށް ދަސްވެއްޖެ. އެއީ ހަމަ އޭނާގެ ގޮތް.”
އެރޭ އޮތީ އާދަމްގެ އުފަންދުވަހުގެ ސަޔެވެ. އާއިލާގެ އެންމެން އައިސް ތިއްބެވެ. އައިޝަތުގެ ބައްޕަ، އަބްދުﷲ އަކީ ރަށުގެ ގަދަރުވެރި މީހެކެވެ. އޭނާ އާދަމްއާ ދިމާލަށް ބަލަހައްޓައިގެން އިނީ ވަރަށް ފުން ވިސްނުމެއްގައެވެ.
“ކޮބާ ކޭކު ފަޅާކަށް ނުވޭތަ؟” އަބްދުﷲ އެހިއެވެ.
އައިޝަތު އާދަމްގެ ގާތަށް ގޮސް އޭނާގެ ހެޑްފޯން ނަގަން އުޅުނެވެ. “ދަރިފުޅާ އާދަމް، ހިނގާ ކޭކު ފަޅަން.”
އެއާއެކު އާދަމް ބާރަށް ހަޅޭއްލަވައިގަތެވެ. އޭނާ ދެކަންފަތުގައި އަތްއަޅައި، ބިންމަތީގައި އިށީނދެ ދެފަރާތަށް ހޫރެން ފެށިއެވެ. މުޅި ތަން ހިމޭންވިއެވެ. ތިބި މީހުން އެކަކު އަނެކަކަށް ބަލަން ފެށިއެވެ.
“އޭނާއަށް ކިހިނެއްވީ؟” އިބްރާހީމްގެ ކޮއްކޮ، ނާޒިމް ސިއްރުސިއްރުން އޭނާގެ އަންހެނުން ގާތު އެހިއެވެ.
އައިޝަތު އަވަސްއަވަހަށް އާދަމްގެ ކަންފަތުގައި ހެޑްފޯން އެޅުވިއެވެ. ހަމަ އެވަގުތު އާދަމް ހިމޭންވިއެވެ. އޭނާގެ މޫނުމަތިން ފެނުނު ބިރުވެރިކަން ފިލައި، އަނެއްކާވެސް އެ އަމިއްލަ ދުނިޔެއަށް ގެނބިގެން ދިޔައެވެ.
“އައިޝާ، އަހަރެން ބޭނުން ކަލޭމެންނާ ވާހަކަދައްކަން،” ސައި ނިމުމުން އަބްދުﷲ ސީރިއަސް ރާގަކަށް ބުންޏެވެ. “އެ ސޮރުގެ އުޅުން އެހެން ކުދިންނާ ތަފާތު. ތިޔައީ ހަމައެކަނި ‘ބަސް މަދުވުމެއް’ ނޫން. އަހަރެމެން އެބަ ޖެހޭ އެކުއްޖާ ގޮވައިގެން މާލެ ގޮސް ޑޮކްޓަރަކަށް ދައްކަން.”
އިބްރާހީމްގެ މޫނުމަތިން ނުރުހުންތެރިކަން ފެނުނެވެ. “ބައްޕާ، އޭނާއަށް އެއްވެސް ކަމެއް ނުވޭ. އޭނާ މާލެ ގެންގޮސްގެން ލޭ ނަގައި، ޓެސްޓުތައް ހަދައިގެން އެ ސޮރު ބިރުގަންނަވާކަށް އަހަރެން ބޭނުމެއް ނޫން. މީހުން ކިޔާފާނެ އެއްޗަކަށް ބައްޕަ ތި ހާސްވަނީ.”
“މީހުން ކިޔާ އެއްޗަކަށް ނޫން އިބްރާހީމް! އެ ސޮރުގެ މުސްތަގުބަލަށްޓަކައި،” އަބްދުﷲ ބާރަށް ބުންޏެވެ.
މި ބަހުސް ހިނގަމުން ދިޔައިރު، އައިޝަތު އިނީ އިސްދަށަށް ޖަހައިގެންނެވެ. އޭނާގެ ހިތުގެ ކޮންމެވެސް ކަނެއްގައި ބައްޕަ އެ ބުނަނީ ތެދެއްކަން ގަބޫލުކުރެވެއެވެ. ނަމަވެސް އެ ހަގީގަތާ ކުރިމަތިލާން އޭނާ ބިރުގަނެއެވެ.
ޖެހިގެން އައި ދުވަހު، އާދަމް ގޮވައިގެން އައިޝަތު ރަށު ސިއްހީ މަރުކަޒަށް ދިޔައެވެ. އެތަނުގައި ހުރި ޒުވާން ޑޮކްޓަރު، ޑރ. ރަޝީދު އާދަމްއާއެކު ކުޅެން މަސައްކަތް ކުރިއެވެ. ނަމަވެސް އާދަމް ޑޮކްޓަރާ ހަތަރުކަޅި ހަމައެއް ނުކުރިއެވެ. އޭނާ އިނީ މޭޒުމަތީގައި އޮތް ކުޑަ ކާރުގެ ފުރޮޅު އަނބުރާށެވެ.
“އައިޝަތު، އާދަމް އަބަދުވެސް އުޅެނީ މިހެންތަ؟” ޑޮކްޓަރު ސުވާލުކުރިއެވެ.
“އާނ ޑޮކްޓަރު. އޭނާ ކުޅޭ އެއްޗެއްސަށްވުރެ ބޮޑަށް ޝައުގުވެރިވަނީ އެ އެއްޗެހީގެ ބައިތަކަށް. މިސާލަކަށް ކާރުގެ ފުރޮޅު، ނޫނީ ފަންކާ އެނބުރޭ މަންޒަރު ބަލަން ގަޑިއިރުތަކެއް ވަންދެން ހުރެދާނެ،” އައިޝަތު ކިޔައިދިނެވެ.
ޑޮކްޓަރު ފުން ނޭވައެއްލިއެވެ. “އަޅުގަނޑު ލަފާދެނީ އޭނާ މާލެ ގެންގޮސް ޕީޑިއަޓްރިޝަންއަކަށާއި ސްޕީޗް ތެރަޕިސްޓަކަށް ދައްކަން. މިއީ ‘އޯޓިޒަމް’ ކަމަށް ވެދާނެ.”
އެ ބަސް އިވުމާއެކު އައިޝަތުގެ ދުނިޔެ އެނބުރިގަތް ކަހަލައެވެ. އޯޓިޒަމް؟ އެއީ ކޮން އެއްޗެއް ހެއްޔެވެ؟ އޭނާގެ ދަރިފުޅަކީ ‘ބަލި’ ކުއްޖެއް ހެއްޔެވެ؟
ގެއަށް އައި މަގުމަތީގައި އައިޝަތު ފިހާރައަކަށް ވަނެވެ. އެތަނުން އޭނާއާ ދިމާވީ ރަށުގެ ‘ޚަބަރު ފަތުރާ’ ޒުބޭދާއާއެވެ. “އައިޝާ، އާދަމް ކޮބާ؟ މިއަދު ސިއްހީ މަރުކަޒުން ފެނުނޭ މީހަކު ބުނި. ކިހިނެއްވީ؟” ޒުބޭދާ ލޯ އަޅަމުން އެހިއެވެ.
“ކަމެއް ނުވޭ، ހަމަ އާދައިގެ ޗެކަޕަކަށް ދިޔައީ،” އައިޝަތު އަވަސްއަވަހަށް ބުންޏެވެ.
އޭނާ ގެއަށް ވަދެ ކޮޓަރިއަށް ވަދެ އިންތިހާއަށް ރުއެވެ. ރަށު މީހުން އޭނާގެ ދަރިފުޅާ ބެހޭގޮތުން ވާހަކަދައްކާނެ ގޮތް ހިތަށް އެރުމުން ހިތް ފަޅައިގެންދާ ވަރުވެއެވެ. ދިވެހި މުޖުތަމައުގައި މިފަދަ ކަންކަމަކީ އަދިވެސް ގިނަ ބަޔަކު ‘ސިހުރު’ ނޫނީ ‘ޖިންނި މޮޔަވުން’ ކަމަށް ގަބޫލުކުރާ ކަންކަމެވެ.
އެރޭ އިބްރާހީމް ގެއަށް އައުމުން ޑޮކްޓަރު ބުނި ވާހަކަ އައިޝަތު ކިޔައިދިނެވެ. އިބްރާހީމް ވަރަށް ބޮޑަށް ރުޅިގަދަވިއެވެ. “އެ ޑޮކްޓަރަށް ކޯޗެއް އެނގެނީ؟ އޭނާއަށް އެނގޭނީ ހުމާއި ރޯގާއަށް ބޭސްދޭން. އަހަރެމެންގެ ދަރިފުޅަކީ މޮޔައެއް ނޫން!”
“އިބްރާހީމް، އޯޓިޒަމްއަކީ މޮޔަވުމެއް ނޫނޭ،” އައިޝަތު މަޑުމަޑުން ބުންޏެވެ. “އެއީ ސިކުނޑި މަސައްކަތްކުރާ ގޮތުގެ ތަފާތެއް.”
“އަހަރެން ތިވާހަކަ އަޑުއަހާކަށް ބޭނުމެއް ނޫން. މާދަމާ އަހަރެން ބައްޕަ ގާތު ބުނާނަން މާލެ ދާން ދެއްކި ވާހަކަ ހުއްޓާލަން،” އިބްރާހީމް ކޮޓަރިން ނުކުމެގެން ދިޔައެވެ.
ނަމަވެސް ކަންތައްވީ އެހެންނެއް ނޫނެވެ. އައިޝަތުގެ ބޭބެ ނާޒިމާއި އޭނާގެ އަންހެނުން މަރިޔަމް، މާލޭގައި ދިރިއުޅޭތީ، އެމީހުން އައިސް އައިޝަތުމެންނަށް މަޖުބޫރުކުރީ މާލެ ގޮސް ޓެސްޓުތައް ހަދާށެވެ.
ދެ ހަފުތާ ފަހުން، އާއިލާ އެކުގައި މާލެ ދިޔައެވެ. އާދަމްއަށް މާލޭގެ ކާރުބާރު ބޮޑު މަގުތަކާއި، ބާރު އަޑުތަކަކީ ތަހައްމަލު ކުރަން ބޮޑުކަމަކަށް ވި ކަމެކެވެ. އޭނާ އަބަދުވެސް ހުންނަނީ ހެޑްފޯން އަޅައިގެން މަންމަގެ އަތުގައި ބާރަށް ހިފަހައްޓައިގެންނެވެ.
އައިޖީއެމްއެޗްގެ ޚާއްސަ ކުލިނިކުގައި ގިނަ ވަގުތުތަކެއް ހޭދަކުރުމަށްފަހު، އެންމެ ފަހުން ނަތީޖާ ލިބުނެވެ.
“އާދަމްއަކީ އޯޓިޒަމް ސްޕެކްޓްރަމް ޑިސްއޯޑަރ ހުރި ކުއްޖެއް،” ޑޮކްޓަރު ވަރަށް އޯގާތެރިކަމާއެކު ބުންޏެވެ.
އައިޝަތުގެ ލޮލުން ކަރުނަ ފޭދުނެވެ. އިބްރާހީމް އިނީ ގަބޫލުކުރަން ދަތިވެފައި އިސްދަށަށް ޖަހައިގެންނެވެ.
“މިހާރު ކިހިނެއް ހަދަންވީ؟” އައިޝަތު އެހިއެވެ.
“އެންމެ ފުރަތަމަ ކަމަކީ މިކަން ގަބޫލުކުރުން،” ޑޮކްޓަރު ކިޔައިދިނެވެ. “އާދަމްއަށް ބޭނުންވަނީ ލޯތްބާއި، ކެތްތެރިކަމާއި، އަދި ޚާއްސަ ތެރަޕީތަކެއް. އޭނާގެ ދުނިޔެއަށް ތިޔަބޭފުޅުން ވަންނަން ޖެހޭނީ.”
ރަށަށް އެނބުރި އައި މަގުމަތީގައި، ލޯންޗުގެ ތެރޭގައި އެކަކުވެސް ވާހަކައެއް ނުދައްކައެވެ. ކަނޑުގެ ރާޅުތަކުގެ އަޑާއި، އާދަމްގެ ހެޑްފޯނުން ބޭރަށް އިވޭ މަޑު މިއުޒިކްގެ އަޑު ފިޔަވައި އެހެން އަޑެއް ނެތެވެ.
އައިޝަތު މެންނަށް ރަށަށް ދެވުނު އިރު އެމީހުންގެ އިންތިޒާރުގައި އަބްދުﷲ ހުއްޓެވެ.
“ކިހިނެއްވީ؟” އޭނާ އެހިއެވެ.
އައިޝަތު ބައްޕަގެ ގައިގައި ބައްދާލާފައި ބާރަށް ރޮއިގަތެވެ. އިބްރާހީމް އެއްވެސް އެއްޗަކަށް ނުލާ ފޮށިތައް ހިފައިގެން ގެއާ ދިމާލަށް ހިނގައިގަތެވެ. އޭނާގެ ހިތުގައި ވަނީ ބޮޑު ބިރުވެރިކަމެކެވެ. އޭނާގެ ހުރި ހަމައެކަނި ފިރިހެން ދަރިފުޅަކީ “ނުކުޅެދޭ” ކުއްޖެއް ކަމަށް މުޖުތަމައުން ނިންމާފާނެތީއެވެ.
އެރޭ އާދަމް ނިދާފައި އޮއްވާ އައިޝަތު ބަލަން އިނެވެ. އާދަމް ނިދީގައި ވަރަށް މައުސޫމެވެ. އޭނާގެ ހެޑްފޯން އޮތީ ބާލީސް ކައިރީގައެވެ.
“ދަރިފުޅާ، މަންމަ ދަރިފުޅު ދޫކޮށްލާފައި ނުދާނަން،” އައިޝަތު އާދަމްގެ ނިތްކުރީގައި ބޮސްދެމުން ބުންޏެވެ. “ކޮންމެ ފަދަ އުނދަގުލަކާ ކުރިމަތިލާން ޖެހުނަސް، މަންމަ ދަރިފުޅުގެ އަޑަށް ވާނަން.”
މިއީ އާދަމްގެ އާއިލާގެ އާ ދަތުރެއްގެ ފެށުމެވެ. އެމީހުންނަށް ކުރިމަތިލާން ޖެހޭނީ ހަމައެކަނި އާދަމްގެ ތަފާތު އުޅުމަކާ ނޫނެވެ. ރަށުގެ މީހުންގެ ބަސްތަކާއި، އާއިލާގެ މީހުންގެ ޕްރެޝަރާވެސް ކުރިމަތިލާން ޖެހޭނެއެވެ.
ނުނިނޭ
