އޯރްހާން އަވަތުރަމަނީ ނުވަތަ އާންމު ނަމުން ނަމަ “އޯރީ” އަކީ މިހާރު އިންޑިއާގެ މުނިފޫހިފިލުވުމުގެ ދާއިރާގައި އެންމެ ގަދައަށް ދެކެވޭ އެއް ނަމެވެ. އޭނާއަކީ ފިލްމީ ތަރިއެއް ނޫނެވެ. ނުވަތަ ލަވަކިޔުންތެރިއެއް ވެސް ނޫނެވެ. ނަމަވެސް ބޮލީވުޑްގެ އެންމެ ނުފޫޒުގަދަ ތަރިންނާއި، އަމްބާނީ އާއިލާގެ މެންބަރުންނާ އެކު އޭނާ ފެންނަނީ ވަރަށް ގާތްކޮށެވެ. އޯރީއަކީ ކާކުކަމާއި އޭނާ ކުރާ މަސައްކަތަކީ ކޮބައިކަމާމެދު ގިނަ ބައެއްގެ ހިތުގައި ސުވާލު އުފެދިފައިވާއިރު، އޭނާގެ މަގުބޫލުކަން ދަނީ ދުވަހެއް ދުވަހަކަށް އިތުރުވަމުންނެވެ. އޯރީގެ މަގުބޫލުކަން އިތުރުވެފައިވަނީ އޭނާގެ ތަފާތު މިޒާޖާއި، ފޮޓޯ ނެގުމުގައި ގެންގުޅޭ ހާއްސަ ގޮތްތަކުގެ ސަބަބުންނެވެ.
އޯރީ މީހުންގެ ގައިގައި އަތްލައިގެން ނުވަތަ ވަކި ޚާއްޞަ ގޮތަކަށް “ޕޯޒް” ކޮށްގެން ފޮޓޯ ނެގުމަށް ފައިސާ ހޯދަނީ ކީއްވެގެންތޯ ގިނަ ބަޔަކު ސުވާލު އުފައްދައެވެ. އޭނާ އަމިއްލައަށް ސިފަކުރާ ގޮތުގައި އޭނާއަކީ “މާކެޓިންގ” އެކެވެ. އޭނާ މީހުންގެ ގައިގައި އަތްލައިގެން ފޮޓޯ ނެގުމަކީ އޭނާގެ ބްރޭންޑްގެ ވަރުގަދަކަން ދައްކުވައިދޭ ކަމެކެވެ. އޭނާ ބުނާ ގޮތުގައި އޭނާއަކީ “މަސައްކަތްކުރާ” މީހެކެވެ. އޭނާގެ ހާޒިރީއާއި، އޭނާއާއެކު ނަގާ ފޮޓޯތަކުގެ ސަބަބުން އެ ހަފުލާއެއްގެ ނުވަތަ އެ ބްރޭންޑެއްގެ މަގުބޫލުކަން ސޯޝަލް މީޑިއާގައި އިންތިހާއަށް އިތުރުވެގެން ދެއެވެ. އެހެންކަމުން، އޭނާ ފައިސާ ނަގަނީ އޭނާގެ ވަގުތަށާއި އޭނާގެ “ބްރޭންޑް ވެލިއު” އަށެވެ.
އޯރީއާއެކު ފޮޓޯއެއް ނެގުމަށް ނަގާ އަގާ ބެހޭގޮތުން ދެކެވޭ ވާހަކަތަކަކީ ގިނަ ބަޔަކު ހައިރާންކުރުވާ ފަދަ ވާހަކަތަކެކެވެ. ބައެއް މީޑިއާ ރިޕޯޓްތަކާއި އޭނާ އަމިއްލައަށް ބައެއް އިންޓަވިއުތަކުގައި ބުނެފައިވާ ގޮތުން، އެންމެ ފޮޓޯއެއް ނެގުމަށް ވެސް އޭނާ 20 ލައްކައާއި 30 ލައްކަ އިންޑިއަން ރޫޕީސްއާ ދެމެދުގެ އަދަދެއް ނަގައެވެ. މިއީ އާދައިގެ މީހަކަށް ބަލާއިރު ބޮޑު އަދަދެއް ކަމުގައި ވިޔަސް، ބޮޑެތި ކުންފުނިތަކުންނާއި ހަފުލާތައް ބާއްވާ ފަރާތްތަކުން އޭނާގެ މަގުބޫލުކަމުގެ ބޭނުން ހިފުމަށް މި ފައިސާ ހޭދަކުރެއެވެ.
އޯރީގެ ފޮޓޯތަކާއި އޭނާ މީހުންގެ ގައިގައި އަތްލާ ގޮތާ ބެހޭގޮތުން “ރޫހާނީ ބާރެއް” ލިބޭ ކަމުގެ ވާހަކަތަކަކީ ވެސް މަޝްހޫރު ވާހަކަތަކެކެވެ. އޯރީ ބުނާ ގޮތުގައި އޭނާގެ އަތް މީހެއްގެ ހަށިގަނޑުގައި ޖެހުމުން، އެމީހަކަށް ހަކަތަ ލިބި، ފޮޓޯގައި އެމީހެއްގެ މޫނުމަތީގެ އުޖާލާކަން އިތުރުވެގެން ދެއެވެ. އޭނާ މިކަން ސިފަކުރަނީ “ހީލިންގ” ނުވަތަ ރޫހާނީ ތަފާތު އިހުސާސެއްގެ ގޮތުގައެވެ. ނަމަވެސް، މިއީ ސައިންޓިފިކް ގޮތުން ނުވަތަ ދީނީ ގޮތުން އެއްވެސް އަސާސެއް އޮތް ކަމެއް ނޫނެވެ. ގިނަ ބަޔަކު ގަބޫލުކުރާ ގޮތުގައި މިއީ އޭނާގެ މަގުބޫލުކަން ދެމެހެއްޓުމަށާއި، މީހުންގެ ސަމާލުކަން ހޯދުމަށް ބޭނުންކުރާ ތަފާތު “މާކެޓިންގ ސްޓްރެޓެޖީ” އެކެވެ.
އޯރީއަކީ މިއަދުގެ ސޯޝަލް މީޑިއާގެ ދުނިޔޭގައި އާދަޔާ ޚިލާފު ގޮތަކަށް މަޝްހޫރުކަން ހޯދާފައިވާ މީހަކަށް ވީހިނދު އޭނާގެ ފޮޓޯތަކާއި، އެ ފޮޓޯތަކަށް ކުރާ ހޭދައަކީ ބައެއް މީހުންނަށް މަޖާ ކަމަކަށް ވިޔަސް، ބޮލީވުޑްގެ މުނިފޫހިފިލުވުމުގެ ދާއިރާގައި އޭނާއަކީ މިހާރު ފެޝަނާއި މަގުބޫލުކަމުގެ ރަމްޒެކެވެ. އޭނާގެ “މިސްޓްރީ” ދިރިއުޅުމާއި، މަޝްހޫރު ތަރިންނާ އޮންނަ ގާތް ގުޅުމުގެ ސަބަބުން އޭނާ ވަނީ އިންޑިއާގެ މުނިފޫހިފިލުވުމުގެ ދާއިރާގައި ފައިތިލަ ސާބިތުކޮށްފައެވެ. އަދި އޯރީ އަކީ މި ޒަމާނުގެ “އިންފްލުއެންސާ” މާކެޓިންގެ އާ ފަންތިއެއްގެ ގޮތުގައި ގިނަ ބަޔަކު ދެކެއެވެ.
