މެޓާގެ ޚިދުމަތްތައް އިތުރަށް ހަރުދަނާކޮށް، ބޭނުންކުރާ ފަރާތްތަކަށް ލުއިފަސޭހަ ކޮށްދިނުމުގެ ގޮތުން، މެސެންޖަރގެ ޚާއްޞަ ވެބްސައިޓް (messenger.com) މިއަހަރުގެ އޭޕްރީލް މަހުން ފެށިގެން ބަންދުކުރުމަށް އެ ކުންފުނިން ވަނީ ނިންމާފައެވެ.
މިއީ ޓެކްނޮލޮޖީގެ ދާއިރާއިން މެޓާ އިން މިފަދަ ބޮޑު ބަދަލެއް ގެންނަ ފުރަތަމަ ފަހަރެއް ނޫނެވެ. މިދިޔަ އަހަރުގެ ތެރޭގައި ވެސް ވިންޑޯޒް އަދި މެކް ކޮމްޕިއުޓަރުތަކަށް ޚާއްޞަކޮށްފައިވާ މެސެންޖަރ ޑެސްކްޓޮޕް އެޕްލިކޭޝަންތައް ބޭނުންކުރުން އެ ކުންފުނިން ވަނީ ހުއްޓާލާފައެވެ.
ގެންނަނީ ކޮން ބަދަލެއް؟
މެޓާ އިން ހާމަކޮށްފައިވާ އިރުޝާދުތަކުގައިވާ ގޮތުން، messenger.com މެދުވެރިކޮށް މެސެންޖަރ ބޭނުންކުރާ ފަރާތްތައް ދެން އޮޓޮމެޓިކުން ބަދަލުވާނީ facebook.com/messages އަށެވެ.
އެ ކުންފުނިން ބުނެފައިވަނީ، “މިއަހަރުގެ އޭޕްރީލް މަހުން ފެށިގެން messenger.com މެދުވެރިކޮށް މެސެޖު ކުރުމުގެ ޚިދުމަތް މެދުކަނޑާލެވޭނެ. އަދި މެސެންޖަރ ޑެސްކްޓޮޕް އެޕްލިކޭޝަން ވެސް މިހާރު ބޭނުން ނުކުރެވޭނެ. ވެބް ބްރައުޒާ މެދުވެރިކޮށް މެސެޖު ކުރުމަށް ދެން ބޭނުންކުރަން ޖެހޭނީ facebook.com/messages” ކަމަށެވެ. ނަމަވެސް، މި ބަދަލުގެ ސަބަބުން އައި.އޯ.އެސް އަދި އެންޑްރޮއިޑް ފޯނުތަކުގައި ބޭނުންކުރާ މެސެންޖަރ އެޕްލިކޭޝަނަށް އެއްވެސް ބަދަލެއް ނާންނާނެ ކަމަށް މެޓާ އިން ކަށަވަރުކޮށްދެއެވެ. މޮބައިލް ފޯނު ބޭނުންކުރާ ފަރާތްތަކަށް ކުރިއެކޭވެސް އެއްފަދައިން އެޕްލިކޭޝަން މެދުވެރިކޮށް ޚިދުމަތް ލިބޭނެއެވެ.
މި ބަދަލުގެ އަސަރު އެންމެ ބޮޑަށް ކުރާނީ ކޮން ބަޔަކަށް؟
މި ނިންމުމުގެ ސަބަބުން އެންމެ ބޮޑު ގޮންޖެހުމަކާ ކުރިމަތިވާނީ ފޭސްބުކް އެކައުންޓެއް ނެތި، ހަމައެކަނި މެސެންޖަރ ވެބްސައިޓް ބޭނުންކުރާ ފަރާތްތަކަށެވެ. ވެބްސައިޓް ބަންދުކުރުމާއެކު، މެސެޖުތައް ބަލައި މުޢާމަލާތް ކުރުމަށްޓަކައި ފޭސްބުކް މެދުވެރިކޮށް ލޮގިންވުން މިހާރު ވަނީ މަޖުބޫރުވެފައެވެ. އެހެންކަމުން، ފޭސްބުކް ޕްރޮފައިލެއް ނެތި messenger.com ބޭނުންކުރާ ފަރާތްތަކަށް ވެބް މެދުވެރިކޮށް މެސެޖުތަކަށް އެކްސެސްވުމުގެ ފުރުޞަތު ގެއްލިގެންދާނެއެވެ.
ކުދި ވިޔަފާރިތަކާއި، އެކި ގްރޫޕްތަކުގެ އިތުރުން އަމިއްލަ މުޢާމަލާތްތަކަށް މެސެންޖަރ ބޭނުންކުރާ ފަރާތްތަކުން ވެސް، ދެން ޖެހޭނީ ފޭސްބުކްގެ މައި އިންޓަފޭސްގެ ތެރެއިން މެސެޖުތައް ބޭނުންކުރުމަށް އާދަވާށެވެ.
ތާރީޚީ ނަޒަރެއް
2011 ވަނަ އަހަރު މެސެންޖަރ އަކީ ވަކި އެޕްލިކޭޝަނެއްގެ ގޮތުގައި މެޓާ އިން ތަޢާރަފްކުރީ ފޭސްބުކް ޗެޓް ތަޢާރަފްކުރިތާ އަހަރުތަކެއް ފަހުންނެވެ.
ޒަމާނާއެކު މެސެންޖަރ ވެފައިވަނީ ދުނިޔޭގައި އެންމެ ގިނަ ބަޔަކު މުޢާމަލާތް ކުރުމަށް ބޭނުންކުރާ އެއް ޕްލެޓްފޯމަށެވެ. މެޓާގެ ދަށުގައި އޮންނަ ވަޓްސްއެޕާ އެއް ފެންވަރެއްގައި މެސެންޖަރ ވާދަކުރާއިރު، މިހާރު މެޓާގެ މިޞްރާބު ހުރީ އެ ކުންފުނީގެ ހުރިހާ ޚިދުމަތްތަކެއް ފޭސްބުކްގެ މައި ޕްލެޓްފޯމާ ގުޅުވާލުމަށެވެ. މިދިޔަ އަހަރުގެ ޑިސެމްބަރު މަހު ޑެސްކްޓޮޕް އެޕްތައް ހުއްޓާލުމަކީ ވެސް މި އިންޓަގްރޭޝަންގެ މުހިންމު ފިޔަވަޅެކެވެ.
ބޭނުންކުރާ ފަރާތްތަކުގެ ސަމާލުކަމަށް
ކޮމްޕިއުޓަރު ނުވަތަ ވެބް ބްރައުޒާ މެދުވެރިކޮށް މެސެންޖަރ ބޭނުންކުރާ ފަރާތްތަކުން، ފޭސްބުކްއަށް ލޮގިންވެވޭކަން މިހާރުން ފެށިގެން ކަށަވަރުކުރުން މުހިންމެވެ. ސަބަބަކީ މި ބަދަލާއެކު މެސެޖުތައް ފެންނާނީ ހަމައެކަނި ފޭސްބުކް މެދުވެރިކޮށް ކަމަށްވާތީއެވެ. މީގެ އިތުރުން، ފޯނުގައި ބޭނުންކުރާ މެސެންޖަރ އެޕް ކުރިއެކޭ ވެސް އެއްފަދައިން ބޭނުންކުރެވޭނެއެވެ. އަދި ރައްކާތެރިކަމުގެ ފިޔަވަޅެއްގެ ގޮތުން، މުހިންމު މެސެޖުތަކެއް ހުރިނަމަ އެ މެސެޖުތައް ބެކަޕް ކުރުމަކީ ބުއްދިވެރި ކަމެކެވެ.
