ހިންދީ ސިނަމާއަކީ ލޯބީގެ ވާހަކަތައް އެކި ނަޒަރިއްޔާތުން ގެނެސްދީފައިވާ ސިނަމާއެކެވެ. ޚާއްސަކޮށް ނުވަދިހައިގެ އަހަރުތަކަކީ ލޯބީގެ މިއުޒިކަލް ފިލްމުތަކާއި އާއިލީ ޑްރާމާ ފިލްމުތަކުން ސިނަމާތަކުގައި ރަސްކަންކުރި ދުވަސްވަރެކެވެ. ނަމަވެސް ހަމަ އެ ދުވަސްވަރު ބެލުންތެރިން ސިއްސުވާލާފަދަ ވަރުގަދަ ތުރިލާތަކާއި ލޯބީގައި ހައްދުފަހަނައަޅާފައިވާ މީހުންނަށް ބިނާކޮށް ގެނެސްދިން ފިލްމުތައްވެސް ފާހަގަކޮށްލެވެއެވެ. އޭރުގެ ބައެއް ފިލްމުތަކުގައި މީހުންގެ ފަހަތުން އަޅުވާލައި ފާރަލުމާއި އާދަޔާ ޚިލާފަށް މީހަކަށް ހިތްކިޔުން ފަދަ ކަންކަން ރީތި ލަވަތުގެ އެހީގައި ވަރަށް ވަރުގަދަ ލޯތްބެއްގެ ގޮތުގައި ދައްކުވައިދީފައިވެއެވެ.

މިފަހަރު މި ލިޔުމުގައި ބަލައިލާނީ އިޝްޤީ ލޯބީގެ އެންމެ ނުރައްކާ ވައްތަރު ކަމަށްވާ ހައްދުފަހަނައެޅި ލޯބީގެ އަނދިރި ފަރާތްތައް ދައްކުވައިދީފައިވާ 90ގެ އަހަރުތަކުގެ ހިންދީ 5 ފިލްމަށެވެ.

1 – ޑަރް (1993)

“އޮބްސެޝަން” ނުވަތަ ލޯބީގައި ހައްދުފަހަނައަޅާފައިވާ މީހެއްގެ ވާހަކަ ހިންދީ ފިލްމަކުން ސިފަކުރާނަމަ އެންމެ ފުރަތަމަވެސް ހިތަށް އަންނާނެ އެއް ފިލްމަކީ “ޑަރް” އެވެ. މިއީ ސުނިލް ނަމަކަށް ކިޔާ ފުލުހަކާއި ކައިވެނިކުރަން އުޅޭ ކިރަން ނަމަކަށް ކިޔާ އަންހެންކުއްޖަކަށް ރާހުލް މާބޮޑަށް ހިތް ކިޔުމުން އޭނައަށް ފާރަލައި، އޭނާ ހާސިލްކުރަން ކުރާ ކަންތައްތަކުން ކުރިމަތިވާ ނުރައްކާތެރި ހާދިސާތަކެއް ދައްކުވައިދިން ސައިކޮލޮޖިކަލް ތުރިލާއެކެވެ.

ޝާހްރުކް ޚާން، ޖޫހީ ޗާވްލާ އަދި ސަނީ ޑިއޯލް މައިގަނޑު ރޯލުތަކުން ފެނިގެންދިޔަ މި ފިލްމަކީ ޔާޝް ރާޖް ފިލްމްސްގެ ކުޑައިގެ ދަށުން ޔާޝް ޗޯޕްރާ ޑައިރެކްޓްކޮށް ގެނެސްދިން ފިލްމެކެވެ. ހިތްގައިމު ލަވަތަކަކާއެކު ގެނެސްދިން މި ފިލްމަކީ ބޮކްސް އޮފީހުގައި “ބްލޮކްބަސްޓާ” އެއްގެ ދަރަޖަ ލިބުނު ފިލްމެކެވެ.

އަދި މި ފިލްމުގައި ޝާހް ކުޅެފައިވާ ރާހުލްގެ ރޯލަކީ އަދިވެސް އޭނާގެ އެންމެ މޮޅު އެއް ރޯލުގެ ގޮތުގައި ގިނަ ބަޔަކު ފާހަގަކުރާ ރޯލެވެ. އަދި މި ފިލްމުގައި އޭނާ ދެއްކި މޮޅު އެކްޓިންގެ ސަބަބުން އޭނާ ފިލްމްފެއަރ އެވޯޑްގެ އެންމެ މޮޅު ވިލަންގެ އެވޯޑަށް ނޮމިނޭޓްވެސް ވެފައެވެ.

2 – އަންޖާމް (1994)

މިއީ ކުށްކުރުމުގެ މައްޗަށް ބިނާވެފައިވާ ސައިކޮލޮޖިކަލް ތުރިލާއެކެވެ. މި ފިލްމުގައި ދައްކުވައިދިނީ ޝިވާނީގެ ލޯބީގައި ހައްދުފަހަނައަޅާފައިވާ ވިޖޭއަށް ޝިވާނީގެ ލޯބި ހާސިލް ނުވުމުން އެކަން ބަދަލު ހިފުމުގެ ރޫޙަކަށް ބަދަލުވެގެން ދާގޮތެވެ. އެ ބަދަލު ހިފުމުގެ ތެރެއިން ވިޖޭ ޝިވާނީގެ ފިރިމީހާ މަރާލުމަށްފަހު ދެން ހިނގާ ތަފާތު ކަންތައްތައް މި ފިލްމުގައި ދައްކުވައިދީފައިވެއެވެ.

ރާހުލް ރަވައިލް ޑައިރެކްޓްކުރި މި ފިލްމުގެ މައިގަނޑު ތަރިންނަކީ ޝާހްރުކް ޚާން، މާދޫރީ ޑިކްޝިޓް އަދި ޑީޕަކް ތިޖޯރީއެވެ. ހިތްގައިމު ލަވަތަކެއް ހިމެނުނު މި ފިލްމު ޕްރޮޑިއުސްކުރީ މަހާރުކް ޖޯކީ އާއި ރީޓާ ރަވައިލްއެވެ.

މިއީވެސް ޝާހްރުކް ޚާންގެ މޮޅު އެކްޓިންއެއް ފެނިގެންދިޔަ ފިލްމެކެވެ. މި ފިލްމުގައި އޭނާ ދެއްކި ހުނަރަށް ފިލްމުފެއަރ ބެސްޓް ޕާފޯމަންސް އިން ނެގެޓިވް ރޯލްގެ އެވޯޑް ލިބިފައިވެއެވެ. މިއީ ބޮކްސް އޮފީހުގައި “އެވަރެޖް” ފިލްމެއްގެ ދަރަޖަ ލިބިފައިވާ ފިލްމެކެވެ.

3 – ދަރާރް (1996)

މިއީ ފިރިމީހާ ވިކްރަމްގެ ފަރާތުން ކުރިމަތިވާ ނަފްސާނީ އަދި ޖިސްމާނީ އަނިޔާތަކުގެ ސަބަބުން ކައިވެނީގެ މަޅީގައި ބަންދުވެފައިވާ ޕްރިޔާ ނަމަކަށް ކިޔާ އަންހެނެއްގެ ވާހަކަ ކިޔައިދޭ ރޮމޭންޓިކް ސައިކޮލޮޖިކަލް ތުރިލާއެކެވެ.

އަރްބާޒް ޚާން، ޖޫހީ ޗާވްލާ އަދި ރިޝީ ކަޕޫރް މައިގަނޑު ރޯލުތަކުން ފެނިގެންދިޔަ މި ފިލްމަކީ ސަސްޕެންސް ތުރިލާ ފިލްމުތައް އުފެއްދުމަށް މަޝްހޫރު އައްބާސް-މުސްތާންގެ ޑައިރެކްޝަނެކެވެ. ވީނަސް ރެކޯޑްސް އެންޑް ޓޭޕްސް (މިހާރުގެ އިޝްތާރް މިއުޒިކް)ގެ ކުޑައިގެ ދަށުން މި ފިލްމު ޕްރޮޑިއުސްކުރީ ގަނޭޝް ޖެއިން އާއި ރަތަން ޖެއިންއެވެ.

ބޮކްސް އޮފީހުގައި “ފްލޮޕް” ވި މި ފިލްމަކީ ޖޫހީ އާއި އަރްބާޒްގެ ކެރިއަރުގެ އެންމެ މޮޅު އެކްޓިންއެއް ފެނިގެންދިޔަ އެއް ފިލްމުކަމަށް ގިނަ ބަޔަކު އެއްބަސްވެއެވެ.

4 – ޖީތު (1996)

މިއީ ކާޖަލް ނަމަކަށް ކިޔާ އަންހެންކުއްޖެއްގެ ލޯބީގައި ދީވާނާވާ ކަރަން ނަމަކަށް ކިޔާ ކުށްވެރިއެއްގެ ވާހަކަ ކިޔައިދޭ ފިލްމެކެވެ. ދިމާވާ މަޖުބޫރީ ހާލަތަކުން ރާޖްނާތު ނަމަކަށް ކިޔާ ޒުވާނަކާ ކާޖަލް ކައިވެނި ކުރެއެވެ. އެއަށްފަހު ކަރަންގެ ލޯބި ބަދަލު ހިފުމަކަށް ބަދަލުވެގެންދާ ގޮތާއި ހަޤީޤަތް އެނގުމުން ކަންތައްތައް ބަދަލުވެގެންދާގޮތް މި ފިލްމުގައި ވަރަށް ހިތްގައިމުކޮށް ދައްކުވައިދީފައިވެއެވެ.

ސަނީ ޑިއޯލް، ކަރިޝްމާ ކަޕޫރް އަދި ސަލްމާން ޚާން މައިގަނޑު ރޯލުތަކުން ފެނިގެންދިޔަ މި ފިލްމަކީ ރާޖް ކަންވަރު ޑައިރެކްޓްކޮށްފައިވާ ރޮމޭންޓިކް އެކްޝަން ފިލްމެކެވެ. ފިލްމު ޕްރޮޑިއުސްކުރީ ސާޖިދު ނާދިއާޑްވާލާއެވެ.

ނަދީމް-ޝްރަވަންގެ ހިތްގައިމު މިއުޒިކުން ގެނެސްދިން ލަވަތަކާއެކު މި ފިލްމު ވަނީ ބޮކްސް އޮފީހުގައި “ސުޕަހިޓް” ފިލްމެއްގެ ދަރަޖަ ހޯދާފައެވެ. އަދި ސަނީ ޑިއޯލްގެ އެކްޓިންއަށް އޭނާ ވަނީ ސްޓާ ސްކްރީން އެވޯޑްގައި ބެސްޓް އެކްޓަރުގެ އެވޯޑަށް ނޮމިނޭޓްވެސް ވެފައެވެ.

5 – ގުޕްތު: ދަ ހިޑެން ޓްރުތު (1997)

މި ފިލްމުގައި ކިޔައިދެނީ ސާހިލްގެ ދޮންބައްޕަ އޭނާގެ ކައިވެނި ޝީތަލް ނަމަކަށް ކިޔާ އަންހެންކުއްޖަކާ ހަމަޖެއްސުމުން ސާހިލްގެ ލޯބީގައި ދީވާނާ ވެފައިވާ ސާހިލްގެ ލޯބިވެރިޔާ އީޝާގެ ހިތުގައި ބަދަލު ހިފުމުގެ ރޫޙު އަށަގަނެ އޭނާ ސީރިއަލް ކިލާއަކަށް ބަދަލުވެގެންދާ ގޮތެވެ.

ކާޖޮލް، ބޮބީ ޑިއޯލް އަދި މަނީޝާ ކޮއިރާލާ މައިގަނޑު ރޯލުތަކުން ފެނިގެންދިޔަ މި މިސްޓްރީ ތުރިލާ ފިލްމަކީ ގުލްޝަން ރާއީ ޕްރޮޑިއުސްކޮށް ރަޖީވް ރާއީ ޑައިރެކްޓްކޮށްފައިވާ ފިލްމެކެވެ. ވިޖޫ ޝާހްގެ ހިތްގައިމު ލަވަތަކާއެކު ގެނެސްދިން މި ފިލްމު ވަނީ ބޮކްސް އޮފީހުގައި “ހިޓް” ފިލްމެއްގެ ދަރަޖަ ހޯދާފައެވެ.

މި ފިލްމުގައި ކާޖޮލް ދެއްކި މޮޅު ހުނަރުން އޭނާއަށް ވަނީ ފިލްމުފެއަރ ބެސްޓް ޕާފޯމަންސް އިން އަ ނެގެޓިވް ރޯލްގެ އެވޯޑް ލިބިފައެވެ. މިއީ ފިލްމުފެއަރ އެވޯޑްގެ ތާރީޚުގައިވެސް އަންހެން ފަންނާނަކަށް މި އެވޯޑް ލިބުނު ފުރަތަމަ ފަހަރުކަންވެސް ފާހަގަކޮށްލެވެއެވެ.

“އޮބްސެސްޑް ލަވާރސް” ނުވަތަ ހައްދުފަހަނައަޅާފައިވާ ލޯބިވެރިންގެ ވާހަކަ ކިޔައިދިން މި ފިލްމުތަކުން ތިބާއަށް އެންމެ ކަމުދިޔައީ ކޮން ފިލްމެއް؟ ކޮމެންޓް ބައިގައި ލިޔެލައްޗޭ