“ރާޔާ ނުބުނަމެއްނު ފްރެންޑެއް އަންނަ ވާހަކައެއް؟” ކުއްލިއަކަށް މަޢުރީން ފެނުމުން އަކްމަލްއަށް ހައިރާންކަމެއް ލިބުނެވެ. އެ ހައިރާންކަން ފޮރުވުމަށް އަވަސްއަވަހަށް އޭނާ ބަހަނާއެއް ހޯދިއެވެ.
“އަކޫވެސް ނުބުނަމެއްނު، އެހެންވީމާ ހަމަހަމަވީ،” ރާޔާ ޖަވާބު ދިނެވެ. ރާޔާ، މަޢުރީންއަށް އޭނާގެ ކޮޓަރި ދެއްކުމަށްފަހު އަލުން އަކްމަލް ގާތަށް އައެވެ.
“މާދަމާ އަހަރެމެންނެއް ނުދާނަން. ދާނީ ކުރިން ނިންމާފައިވާ ދުވަހު،” ފޭކު ހިނިތުންވުމަކާއެކު ރާޔާ ބުންޏެވެ.
ރާޔާ އެތަނުން ދިއުމުން، އަކްމަލްގެ ސިފައިގައި ހުރި ޝަމްހޫރިޝް ވަރަށް ބޮޑަށް ރުޅިއައެވެ.
“އޭނާ އަހަރެން ސިލާއާ ވަކިކުރީ ކީއްވެ؟ އޭނާގެ އެކުވެރިޔާ މިތަނަށް އައީ ކޮން ބޭނުމަކުބާ،” ފާރުގައި މުށްކަވާފައި ޖަހަމުން އޭނާ ބުންޏެވެ. އަދި އަތުން ލޭތިއްކެއް ފޭބިތަން ފެނުމުން ހިނިތުންވެލިއެވެ.
“އެންމެ ރަނގަޅު، ކޮންމެއަކަސް އަހަރެންގެ ދުޝްމަނަށް އަނިޔާދެވިއްޖެ،” މިހެން ބުނެ އޭނާ ހިނގައްޖެއެވެ.
ރާޔާ ކުޑަކޮށް އަރާމުކޮށްލުމަށްފަހު މަޢުރީންގެ ގާތަށް ދިޔައެވެ.
“ރާޔާ، އަހަރެން މިތަނަށް އައި ބޭނުން ހަނދާން އެބަހުރި. އަކްމަލް ބަލައި ޗެކްކުރުމަށްޓަކައި އޭނާ އޮންނަންވާނީ ގަދަ ނިދީގަ. ލޮލަށް ނުފެންނަ، ކަންފަތަށް އަޑުނީވޭ ފަދަ ގަދަ ނިންޖެއްގަ،” މަޢުރީން ބުންޏެވެ.
“އެކަމަކު އަހަރެން ކިހިނެއް…” ރާޔާ ބުނަން އުޅުނު ވާހަކަ މެދުކަނޑާލުމަށްފަހު މަޢުރީން ބުންޏެވެ،
“އަހަރެން އެކަން ކުރާކަށް ނުބުނަމެއްނު. އަހަރެން ބޭނުންވަނީ އޭނާ އެ ހާލަތުގައި ބާއްވާން. އެކަން ވާނީ ރޭގަނޑު. އެހެންވީމާ ރޭގަނޑުވަންދެން މަޑުކުރަން ޖެހޭނެ.” ރާޔާ ބުނަން އުޅުނު ވާހަކަ މެދުކަނޑާލުމަށްފަހު މަޢުރީން ބުންޏެވެ. ރާޔާ ބޯޖަހާލިއެވެ.
އެރޭ ފަހުން، ރާޔާއާއި މަޢުރީން ދެމީހުންވެސް އެމީހުންގެ ކޮޓަރީގައި ނިދާކަމަށް ހެދިގެން ތިއްބެވެ. އަކްމަލްގެ ސިފައިގައި ހުރި ޝަމްހޫރިޝް އޮތީ އަސްލަށްވެސް ނިދާފައެވެ. އޭނާ ވަނީ ސިލާއަށްވެސް ގޮވާފައެވެ. އެހެން މީހުންނަށް ސިލާ ނުފެނުނަސް އޭނާއަށް ފެނެއެވެ. ރާޔާ އެނދުން ތެދުވެގެން އަކްމަލްގެ ކޮޓަރިއަށް ގޮސް، ދޮރު ކުޑަކޮށް ހުޅުވާލާފައި އޭނާ ނިދާފައި އޮތްތޯ ބަލައިލިއެވެ. އަދި އެ ފުރުސަތުގެ ބޭނުން ހިފައި މަޢުރީންއަށް ގޮވައިގެން ދެމީހުން އެކުގައި ކޮޓަރިއަށް ވަނެވެ.
“ދެން އަހަރެންގެ މަސައްކަތް އެއްވެސް ހުރަހެއް ނެތި ކުރިއަށް ގެންދާނަން،” މަޢުރީން ބުންޏެވެ. ރާޔާ ބޯޖަހާލިއެވެ. މަޢުރީން އަކްމަލްގެ ނިތްކުރިމަތީގައި ކުޑަ މަލެއް ބޭއްވުމަށްފަހު ހިތާހިތުން ކިޔެވެއްޔެއް ކިޔަވަން ފެށިއެވެ. ރާޔާ ނަތީޖާއަށް އިންތިޒާރު ކުރިއެވެ. ކުޑަވަގުތުކޮޅަކަށްފަހު، މަޢުރީން ލޯ ހުޅުވާލައި މަލަށް ބަލައިލުމަށްފަހު ސިހުނެވެ.
“ކިހިނެއްވީ؟” ރާޔާ އެހިއެވެ. މަޢުރީން އެ މާ ދައްކާލިއިރު، މާ އޮތީ ކަޅުވެފައެވެ.
“މިހެންވީ ކީއްވެ؟ މީގެ މާނައަކީ ކޮބައި؟” ރާޔާ ސިހިފައި އެހިއެވެ.
“މިހެންވީ އަކްމަލްގެ ހަށިގަނޑުގައިވާ ނުބައި ބާރުތަކަށް އަހަރެން ކިޔެވި ކިޔެވެލި ބަރުދާސްތު ނުކުރެވުމުން. މީގެ މާނައަކީ އަކްމަލްއަކީ މުޅިން ކުށެއް ނެތް މީހެކޭ،” މަޢުރީން ބުންޏެވެ.
“އޭނާ ކުށެއް ނެތް މީހަކަށް ވަނީ ކިހިނެއް؟ އަދި އަކްމަލްގެ ހަށިގަނޑުގައިވާ ނުބައި ބާރަކީ ކޮބާ؟” ރާޔާ އެހިއެވެ.
“އޭނާގެ ކުށެއް ނެތީ، ރާޔާ ތިޔަ ކިޔައިދިން ކަންތައްތައް ކުރީ އޭނާ ނޫން ކަމަށްވާތީ. އެއީ ބާރުގަދަ ޖިންނިއެއް. ރާޔާ ނިދާފަ އޮއްވާ ބެހެން އުޅުނީވެސް އެ ޖިންނި. އަދި ރާޔާއަށް މީހުންގެ ހިތުގައިވާ އެއްޗެހި ދެނެގަތުމުގެ ބާރު ލިބުނީވެސް އެ ޖިންނިއެއްގެ ސަބަބުން،” މަޢުރީން ކިޔައިދިނެވެ.
“އެހެންވީމާ، މިއީ ހަމައެކަނި އަކްމަލްގެ ހަށިގަނޑުތަ؟ އޭނާ އަހަރެމެންގެ ގެއަށް އައި ފަހުން އެއީ އަކްމަލްއެއް ނޫންތަ؟ އަހަންނަށް ގޯނާކުރަން އުޅުނީ އޭނާތަ؟ މި އާދަޔާ ހިލާފު ބާރު އަހަންނަށް ދިނީ އޭނާތަ؟” ހައިރާންވެފައި ހުރެ ރާޔާ ބުންޏެވެ.
“އާނ، އެއީ އަކްމަލްއެއް ނޫން. އޭނާގެ ފުރާނަ ހަށިގަނޑު އެއީ އަކްމަލްގެ، ނަމަވެސް އެ ފުރާނައިގެ މައްޗަށް ވެރިވެގަނެގެން އެއުޅެނީ ޖިންނިއެއް. އެ ޖިންނި އޭނާގެ ހަށިގަނޑަށް ވަނީ އަކްމަލް އަމިއްލައަށް އެ ޖިންނިއަށް ގޮންޖެހުމުން،” މަޢުރީން ބުންޏެވެ.
“ދެން އޭނާގެ ކިބައިން ސަލާމަތްވާނީ ކިހިނެއް؟” ރާޔާ އެހިއެވެ.
“ފުރަތަމަ، އޭނާ ބޭނުންކޮށްފައިވާ އަންނައުނެއް ހޯދަން ޖެހޭނެ. ކޮންމެ އެއްޗެއް ވިޔަސް އެންމެ ރަނގަޅު. ދެން ކުރަންޖެހޭ ކަންތައްތައް ކުރާނީ ދުވާލު ގަޑީގަ،” މަޢުރީން ބުންޏެވެ. އެއަށްފަހު އެމީހުން އޭނާ ބޭނުންކޮށްފައިވާ އެއްޗެއް ފެނޭތޯ ބަލަން ފެށިއެވެ.
“އަހަންނަށް ފެނިއްޖެ،” އިސްޓާކީނެއް ދައްކާލަމުން ރާޔާ ބުންޏެވެ.
“ރަނގަޅު، ހިނގާ ދާން. އެކަމަކު ރާޔާ، އަހަންނަށް ހީވަނީ ނުފެންނަ މީހަކުވެސް މިތަނުގައި އުޅޭހެން،” މަޢުރީން ބުންޏެވެ.
“ވެދާނެ، އެކަމަކު ހިނގާ ދާން، ފަހުން އެކަން ބަލާނީ،” ރާޔާ ބުންޏެވެ. އަދި އެމީހުން މަޢުރީންގެ ކޮޓަރިއަށް ދިޔައެވެ. ރާޔާއަށް ބިމުން އާދަޔާ ހިލާފު އަނގޮޓިއެއް ފެނުނެވެ. އޭނާ ގުދުވެ އެ ނެގިއެވެ.
“މަޢުރީން،” އަނގޮޓި ދައްކާލަމުން ރާޔާ ގޮވާލިއެވެ. މަޢުރީން އެ އަނގޮޓި ބަލައިލާފައި ބުމަ ގޮށްޖަހާލިއެވެ.
“ހަރުފައެއް؟ މީގެ މާނައަކީ ކޮބައި؟ މިއީ ކާކުގެ އެއްޗެއް؟” މަޢުރީން ހިތާހިތުން ސުވާލުކުރިއެވެ.
“މިއީ އަހަރެންގެ އެއްޗެއް ނޫން، ރާޔާގެ އެއްޗެއްވެސް ނޫން. ނާޔާއްތަ މި ކޮޓަރިއަކަށް ނާދޭ، އެހެންވީމާ މިއީ ސިލާގެ އެއްޗަކަށް ނޫނީ ނުވާނެ. މަޢުރީން އައުމުގެ ކުރިން މިތަނުގައި އުޅުނީ އޭނާ،” ރާޔާ ބުންޏެވެ.
“ސިލާއަކީ ކާކު؟” މަޢުރީން އެހިއެވެ.
“އަކްމަލް ބުނީ އެއީ އޭނާގެ ކޮލެޖް ދުވަސްވަރުގެ އެކުވެރިއެއް ކަމަށް. އެކަމަކު ހައިރާންވާންޖެހޭ ކަމަކީ އަކްމަލް ދުވަހަކުވެސް އޭނާގެ ވާހަކަ ނުދައްކާތީ،” ރާޔާ ކިޔައިދިނެވެ.
“އެއީ އަކްމަލްގެ އެކުވެރިއެއް ނޫން، އެއީ އެ ޖިންނީގެ އެކުވެރިއެއް،” މަޢުރީން ބުންޏެވެ.
“އޭނާގެ ކިބައިން ސަލާމަތްވާން ކުރަންވީ ކީއް؟” ރާޔާ އެހިއެވެ.
“ދުވާލުވުމުން އަހަރެމެން މި އިސްޓާކީނު އަންދާލާނީ. އެހާތަނަށް އޭނާ ހޭލައިފިނަމަ، އަކްމަލްއަށް އަޑުއިވޭތޯ މަސައްކަތްކުރޭ،” މަޢުރީން ބުންޏެވެ. ރާޔާ ބޯޖަހާލުމަށްފަހު އޭނާގެ ކޮޓަރިއަށް ގޮސް މަޑުމޮޅި ހިތަކާއެކު އެނދުގައި އިށީނދެލިއެވެ.
އެމީހުން ފުރަތަމަ ބައްދަލުވި ގޮތް އޭނާ ހަނދާންވިއެވެ. އެއްފަހަރަކު ދެމީހުން މަސްތުވެގެން އަތިރިމަތީ ހުރި ބޮޑު ނިކަގަސް ދޮށަށް ދިޔަ ގޮތް ހަނދާންވިއެވެ. ދެމީހުންގެ މޫނު ހިމަނައިގެން އޭނާ ކުރެހި މަޖާ ކުރެހުން ހަނދާންވިއެވެ. އޭނާ ދުވަހަކުވެސް ވަކިނުވާނެކަމަށް ބުނެ ވައުދުގެ އަނގޮޓި ދިން ގޮތް ހަނދާންވިއެވެ.
ކޮންމެ ވަގުތެއް އޭނާގެ ލޯމަތިން ސިފަވަމުން ދިޔައެވެ. ރާޔާއަށް ނިދުނުގޮތެއްވެސް ނޭނގުނެވެ.
އަނެއްދުވަހު ހެނދުނު ނާސްތާއަށްފަހު، ރާޔާ މަޢުރީންގެ ގާތަށް ދާން އުޅެނިކޮށް އަކްމަލް އޭނާ ހުއްޓުވިއެވެ.
“ކުރިމަގުގެ ފިރިމީހާއަށް ފުރަގަސްދެނީތަ؟ އަހަންނަށް ކޮންމެވެސް ގޯސް ވަހެއް ދުވާ،” އަކްމަލް ބުންޏެވެ.
“ސޮރީ!….. ތިޔަ ވާހަކަ ދައްކަނީ ކާކުތޯ ބަލައިލަބަލަ. އަހަންނަށްވެސް އަކޫއާއި ސިލާގެ ދެމެދުގައިވާ ކަންތައްތަކުގެ ވަސް ދުވާ. މާ މޮޅުވާން ނޫޅޭ، އަހަންނަށް އެނގޭ ތިޔަކީ ކާކުކަން. ތީ ޖިންނިއެއް. އަކްމަލްގެ ގޮންޖެހުމާއެކު ކަލޭ ތިޔަހުރީ އޭނާގެ ހަށިގަނޑަށް ވެރިވެގެން. އެކަމަކު ހާސްނުވޭ، ކަލޭ ވަރަށް އަވަހަށް ދާންޖެހޭނެ،” ރާޔާ ރުޅިއައިސްފައި ބުންޏެވެ.
“އެންމެ ރަނގަޅު، އެކަމަކު އޭގެ ކުރިން އަހަރެމެން މާދަމާ ޗުއްޓީއަށް ދާނަން. ދެން ކައިވެނި. އުފް، ކިހާ ކުޑަ ވަގުތުކޮޅެއް. ރާޔާއަށް މި ހުރިހާ ކަމެއް ނިންމާލެވޭނީ ކިހިނެއް؟ ދެރައީ ރާޔާއާ މެދު، އެހެންވެ ރާޔާގެ ނަސީބު ރަނގަޅުވާނެ ކަމަށް އުންމީދު ކުރަން،” އޭނާ މަލާމާތް ކުރަމުން ބުންޏެވެ. އަދި ދާން އުޅުމުން ރާޔާ އޭނާގެ ކުރިމައްޗަށް ހުއްޓުނެވެ.
“އަހަރެމެން އެއްވެސް ތަނަކަށް ނުދާނަން، އެކަމަކު ކަލޭ ޔަގީނުންވެސް ދާނެ،” ރާޔާ ބުންޏެވެ. އަކްމަލްގެ ސިފައިގައި ހުރި ޝަމްހޫރިޝްވެސް ކޮޓަރިއަށް ގޮސް ދޮރު ލެއްޕިއެވެ. އޭނާ ރުޅިއައިސްގެން ލޯ މަރާލުމަށްފަހު، އަކްމަލްގެ ހަށިގަނޑުން ބޭރުނުވެ އޭނާގެ އަސްލު ސިފައަށް ބަދަލުވިއެވެ.
“އަހަރެންގެ ސިލާ! ސިލާ އަހަރެންގެ ގާތަށް އާދޭ! އަވަހަށް އާދޭ!” ލޯ މަރައިގެން ހުރެ އޭނާ ބުންޏެވެ. އެވަގުތު މީހަކު ފަހަތުން އޭނާގެ ގައިގައި ބައްދާލިހެން ހީވިއެވެ. އެއީ ކާކުކަން އެނގުމުން އޭނާ ހިނިތުންވެލައި ލޯ ހުޅުވާލިއެވެ.
“އޯހް ސިލާ،” އޭނާ ލޯތްބާއެކު ބުންޏެވެ. ސިލާ އޭނާގެ ކޮނޑުގައި އަތް ބާއްވާލައި ކޮލަށް ބޮސްދިނުމުން އޭނާ ކުޑަކޮށް ހަމަޖެހުނެވެ.
“ބުނެބަލަ، ކިހިނެއްވީ؟” ސިލާ އެހިއެވެ.
“ރާޔާއަށް އެނގިއްޖެ އަހަންނަކީ އަކްމަލް ނޫންކަން. އަދި މިހާރު އަހަރެންގެ ބާރުތައްވެސް ހުރީ އޭނާގެ އަތުގަ. ދެން ހަދާނީ ކިހިނެއް؟” އޭނާ އެހިއެވެ. ސިލާ ހީނލިއެވެ.
“އަހަރެމެން ފެށުނީއްސުރެ ބޭނުންވީވެސް ތިޔަހެން ވާން. އަހަރެމެން ބޭނުންވީ ބަދަލު ހިފަން. އެމީހުންނަށް އެނގުނަސް ފަރުވާލެއް ނެތް. ކޮންމެވެސް ދުވަހަކުން އެމީހުންނަށް އެނގެން ޖެހޭނެ،” ސިލާ ބުންޏެވެ.
“އާނ، އެކަމަކު މިހާރު އޭނާ މަސައްކަތް ކުރާނީ އަހަރެމެންގެ ކިބައިން ސަލާމަތްވާން،” ޝަމްހޫރިޝް ބުންޏެވެ.
“އެހެންވިޔަސް އޭނާއަށް ކާމިޔާބެއް ނުވާނެ. އަހަރެމެންނަކީ މަރުވެފައިވާ ޖިންނީން. އަދި މަރުވުމަށްފަހު އަހަރެމެންގެ ބާރު ކުރިއަށްވުރެ ގަދަވާނެ،” ސިލާ ހަނދާންކޮށްދިނެވެ.
“އެކަމަކު އަހަރެމެންގެ ހަށިގަނޑުތައް؟ އެތަކެތި ހުރީ ރައްކާތެރި ތަނެއްގަތަ؟” ޝަމްހޫރިޝް އެހިއެވެ.
“ޔަގީންތާ، އެތަކެތި ހުރީ އަހަރެމެންގެ ގޭގެ ބިމުގެ އަޑީގައި ވަޅުލާފަ. އެތަކެތި އަދިވެސް ހުރީ ތާޒާކޮށް،” ސިލާ ކިޔައިދިނެވެ.
“ރަނގަޅު، ދެން ކުރަންވީ ކީއް؟” ޝަމްހޫރިޝް އެހިއެވެ.
“ކޮންމެ ގޮތަކުންވެސް ޝަމްހޫރިޝްގެ ބާރުތައް އަނބުރާ ހޯދޭތޯ ބަލަންވީ. އެއީ ކަލޭ ދިރިހުރިއިރުވެސް ކަލޭގެ ބާރުތަކެއް. އެއީ ރާޔާގެ އެއްޗެއް ނޫން،” ހިނިތުންވެ ހުރެ ސިލާ ބުންޏެވެ.
ކުއްލިއަކަށް ރާޔާ ކޮޓަރިއަށް ވަދެގަތެވެ. އެވަގުތު ސިލާ ގެއްލިއްޖެއެވެ. އަދި ޝަމްހޫރިޝް އަލުން އަކްމަލްގެ ސިފައަށް ބަދަލުވިއެވެ.
“ތިޔައީ ކޮންމެ މީހެއްކަމަށް ވިޔަސް، އަހަރެންގެ އަކްމަލް ދޫކޮށްލާފައި ދޭ،” ރާޔާ އަމުރުވެރި ރާގަކަށް ބުންޏެވެ.
“ކީކޭ ތިޔަ ކިޔަނީ؟ އަހަންނަކީ ހަމަ ރާޔާގެ އަކްމަލް،” ރާޔާގެ ގާތަށް އައިސް އޭނާގެ ނިތްކުރީގައި ނިތްކުރި ޖައްސައި، އޭނާގެ ބާރުތައް އަނބުރާ އަތުލަން ފެށިއެވެ. ރާޔާ ސަލާމަތްވާން މަސައްކަތް ކުރި ނަމަވެސް އޭނާގެ ވަރުގަދަ ހިފެހެއްޓުމުން ސަލާމަތެއް ނުވެވުނެވެ. ކުއްލިއަކަށް އޭނާ ރާޔާ ދޫކޮށްލާފައި ދުރަށް ޖެހިލިއެވެ. ސިލާ އެތަނަށް ފާޅުވެ، ޝަމްހޫރިޝްއާ އެކު ރާޔާއާ ދިމާލަށް އަތް ދިއްކޮށްލައި، އޭނާ ވައިގެ ތެރެއަށް އުފުލާލުމަށްފަހު ލައްޕާފައި ހުރި ކުޑަދޮރާ ދިމާލަށް އެއްލާލިއެވެ. ބިއްލޫރިތައް ތަޅައިގެން ގޮސް އޭނާ ބޭރަށް ވެއްޓުނުއިރު، އެ ދެމީހުން ތިބީ މަކަރުވެރި ހިނިތުންވުމަކާއެކު ބަލާށެވެ.
ކުޑަދޮރުގެ ބިއްލޫރިތައް ތަޅައިގެން ގޮސް ރާޔާ ބޭރަށް ވެއްޓެމުން ދިޔަވަގުތު ހަޅޭއްލަވައިގަތެވެ. އެވަގުތު މީހެއްގެ ލޮލުގައި އޭނާ އަޅައިގަތެވެ. އެއީ ފިރިހެނެކެވެ. އޭނާ އަތް ކުރިއަށް ދިއްކޮށްލަމުން “ސިންސާ!” އޭ ބުނެ ހަޅޭއްލަވައިގަތެވެ. ވަގުތުން ރާޔާ ވެއްޓެމުން ދިޔަ ދިމާ ބިމުން ގޮދަޑިއެއް ފާޅުވިއެވެ. ރާޔާ އޭގެ މައްޗަށް ވެއްޓި ފުރާނަ ސަލާމަތްވިއެވެ. ވެއްޓުނު ވަގުތު ބިރުން އޭނާ އޮތީ ލޯ މަރައިގެންނެވެ. ސަލާމަތްވިކަން އެނގުމުން ލޯ ހުޅުވާލިއިރު އޭނާ އޮތީ ގޮދަޑި މަތީގައެވެ.
“އޭއް، އާޔޫ އޯކޭ؟” އެމީހާ އެހިއެވެ.
“އާނ، ރަނގަޅު. ވަރަށް ބޮޑަށް ޝުކުރިއްޔާ. ތިޔައީ ކޮންމެ މީހެއް ކަމުގައި ވިޔަސް އަހަރެންގެ ފުރާނަ ސަލާމަތްކޮށްދީފި،” ރާޔާ ރޮމުން ބުންޏެވެ.
“ނޫނޭ، އެއީ އަހަރެންގެ ޒިންމާއެއް. އަހަންނަކީ ކަބީރު،” އޭނާ އަމިއްލައަށް ތައާރަފުވިއެވެ.
“އަދި އަހަންނަކީ އަދާ، އޭނާގެ އަންހެނުން،” އެތަނުގައި ހުރި އަންހެން ކުއްޖާ ބުންޏެވެ. ރާޔާ ކޮޅަށް ތެދުވިއެވެ.
“އަހަންނަކީ ރާޔާ. އެކަމަކު ތިޔައީ އިންސާނުންތަ؟ …. އުހުނ…. އަހަރެން ބުނަން މިއުޅެނީ، ތިޔަ ހެދީ ސިހުރެއްތަ؟” ރާޔާ އެހިއެވެ.
“އަހަންނަކީ ޖިންނިއެއް، އަދި މިއީ އަހަރެންގެ ވައިފް ޖިންނި،” ކަބީރު ބުންޏެވެ. ރާޔާ ސިހުނެވެ.
“ޖިންނިއޭ؟ އޯ މައި ގޯޑް! ނޫން، އަހަރެން މިދަނީ،” ބިރުން ހުރެ ރާޔާ ދުވަން ފެށިއެވެ.
“ސިންސާ!” ކަބީރު ހަޅޭއްލަވައިގަތުމަށްފަހު އޭނާގެ ސިހުރުވެރި ދަނޑިބުރި ރާޔާއާ ދިމާލަށް ދިއްކޮށްލުމުން، ރާޔާ އަނބުރާ އޭނާގެ ގާތަށް އައެވެ.
“ދައްތާ!” ރާޔާ ހަޅޭއްލަވައިގަންނަމުން ގޭގެ ދޮރާ ދިމާލަށް ދުއްވައިގަތެވެ.
“ސިންސާ!” ކަބީރު އަނެއްކާވެސް ހަޅޭއްލަވައިގަނެ، ދޮރާ ދިމާލަށް އަމާޒުކުރުމުން ދޮރު ހުރި ތަން ބަދަލުވެ ކުޑަދޮރު ހުރި ދިމާލަށް ދިޔައެވެ. ރާޔާ ހައިރާންވިއެވެ. އޭނާ ކުޑަދޮރާ ދިމާލަށް ދުވަން އުޅުމުން ކަބީރު އަނެއްކާވެސް އޭގެ މަގާމު ބަދަލުކުރިއެވެ. ރާޔާ އެކި ކޮޅުކޮޅަށް ދުވަމުން ދިޔައެވެ. އަކްމަލް ލޯ މަރާލުމަށްފަހު އޭނާގެ އަތް އުފުލާލައި ލޯ ހުޅުވާލިއިރު، އޭނާގެ ލޯ ވަނީ ނޫކުލައަށް ބަދަލުވެފައެވެ. އޭނާގެ އަތަށް ކުޑަ ރަތްލޮއިގެ އެއްޗެއް އައެވެ. އޭނާ އެ ކުރިއަށް އެއްލުމުން އެ ބޮޑުވެ ދޮރަކަށް ބަދަލުވިއެވެ. އަދާ ރާޔާގެ ގާތަށް އައެވެ. “އާދޭ،” އޭނާ ރާޔާގެ އަތުގައި ހިފައިގެން އެ ދޮރުން ވަދެ، ސިއްރުސިއްރުން ގޭތެރެއަށް ވަނެވެ.
“އަކްމަލް…” ރާޔާ ބުނަން އުޅުނު ވާހަކަ މެދުކަނޑާލީ އަދާ އޭނާގެ އަނގަމަތީގައި އަތް އެޅުމުންނެވެ.
“އަހަރެމެން މިތަނުގައި ތިބިކަން އެހެން މީހުންނަށް އެނގުނަ ނުދިނުން ރަނގަޅުވާނެ. ހިމޭނުން ހުރޭ،” އަދާ ބުންޏެވެ.
“ދެން ބުނެބަލަ، ރާޔާ މަރާލަން އުޅުނީ ކާކު؟” ކަބީރު އެހިއެވެ. ރާޔާ ހުރިހާ ވާހަކައެއް ކިޔައިދިނެވެ.
“އެހެންވިއްޔާ އަކްމަލްގެ ހައްގުގައި އަހަރެމެންނަށް ޖެހޭނީ ސިލާއަށް އަނިޔާކުރަން. އެހެން ނޫނީ ޝަމްހޫރިޝް ދުވަހަކުވެސް އަކްމަލްގެ ހަށިގަނޑު ދޫކޮށްލާފައި ނުދާނެ. ހިނގާ ދާން،” އަދާ ބުންޏެވެ. ތިން މީހުން އެކުގައި މައްޗަށް އަރައި އަކްމަލްގެ ކޮޓަރިއަށް ވަދެގަތެވެ. އަކްމަލްގެ ސިފައިގައި ހުރި ޝަމްހޫރިޝްއާއި ސިލާ ތިބީ ވަރަށް އުފަލުންނެވެ.
ބާރު އަޑަކާއެކު ދޮރު ހުޅުވުމުން އެމީހުން ސިހުނެވެ.
“ކަލޭމެންގެ އިތުރުން މި ދުނިޔޭގައި ރަނގަޅު ޖިންނީންވެސް އުޅޭ،” ކަބީރު ބުންޏެވެ. ސިލާއާއި ޝަމްހޫރިޝް އެކަކު އަނެކަކަށް ބަލައިލުމަށްފަހު ކޮޅަށް ތެދުވިއެވެ.
“ޚަބަރުދާރު، އަހަރެމެންނަށް ހުރަސް ނާޅައި އަހަރުމެންގެ މަގުން ދުރަށް ދިޔުން މާ ރަނގަޅުވާނެ،” ސިލާ އިންޒާރު ދިނެވެ.
“ނޫނީ ކިހިނެއް ހަދާނީ؟ ސިލާ، ތީ މަރުވެފައިވާ ޖިންނިއެއް،” އަދާ ބުންޏެވެ.
“މަރުވެފައިވީމާ ކިހިނެއްވީ؟ އަހަރެމެން ތިޔަ ތިން މީހުންވެސް މަރާލާނަން،” ޝަމްހޫރިޝް މިހެން ބުނެ ހަމަލާދޭން އުޅުނެވެ. އަދާ ސިލާއަށް ހަމަލާދިނުމުން އޭނާ އެއިން ރެކިގަތެވެ.
“ސިންސާ!” ކަބީރު އޭނާގެ ޖާދޫގެ ވަރުގަދަ ބަސް އަނެއްކާވެސް ބޭރުކޮށްލިއެވެ. އަދި އޭނާގެ ދަނޑިބުރި ސިލާއަށް އަމާޒުކުރުމުން، މަދު ސިކުންތުކޮޅެއްގެ ތެރޭގައި ސިހުރުވެރި ވަލުން އޭނާ ބަންދުވިއެވެ. ސިލާ ސަލާމަތްވާން މަސައްކަތް ކުރިއެވެ. ޝަމްހޫރިޝްއަށް އެ މަންޒަރު ބަލާކަށް ކެތެއް ނުވިއެވެ. އޭނާ އަކްމަލްގެ ސިފައިގައި ހުރެ ކަބީރަށް ހަމަލާދިނެވެ. އޭނާގެ އަތުން ބޮކިތަކެއް ނުކުމެ، އަދާއާއި ކަބީރު އޭގެ ތެރޭގައި ބަންދުވިއެވެ.
“ކަބީރު، އަދާ…” ބިރުން ހުރެ ރާޔާ ގޮވާލިއެވެ.
“ކަލޭ އަހަރެމެން ހިފެހެއްޓިޔަސް، ސިލާއެއް މިނިވަނެއް ނުވާނެ،” އަދާ ބުންޏެވެ. އަކްމަލްގެ ސިފައިގައި ހުރި ޝަމްހޫރިޝް އެ ވާހަކައަށް އަޅާނުލައި ރާޔާގެ ގާތަށް އައެވެ.
“މިހާރު ކަލޭ ސަލާމަތްކުރާނީ ކާކު؟” ރާޔާގެ އަތުގައި ބާރަށް ހިފަމުން އޭނާ އެހިއެވެ.
ރާޔާ އޭނާގެ އަތް ފޮޅުވާލިއެވެ. “ސިލާއާ މެދު ވިސްނާ، އޭނާ އެހުރީ ބަންދުވެފައި،” ރާޔާ ބުންޏެވެ. ޝަމްހޫރިޝް ސިލާގެ ގާތަށް ގޮސް އޭނާ މިނިވަންކުރަން މަސައްކަތް ކުރިއެވެ.
“އެއީ ބޭކާރު ކަމެއް. އަހަރެން ނޫނީ އަދާގެ ސިހުރާ ނުލައި އެ ވަލެއް ނުކެނޑޭނެ،” ކަބީރު ބުންޏެވެ. ޝަމްހޫރިޝް އެ ވާހަކައަށް ސަމާލުކަން ނުދީ ވާ ކަނޑަން މަސައްކަތް ކުރަމުން ދިޔައެވެ. ރާޔާ އެ ފުރުސަތުގެ ބޭނުން ހިފައި، ކަބީރާއި އަދާ ބަންދުވެފައި ތިބި ބޮކިތައް ފަޅާލަން އުޅުނެވެ. ނަމަވެސް އެއިން އެންމެ ބޮއްކެތް ވެސް ފަޅައިގެނެއް ނުދިޔައެވެ.
“އޭނާ އަހަރެމެން މިނިވަން ނުކުރަނީހެއް ނުވެވޭނެ،” އަދާ ބުންޏެވެ. އެވަގުތު މަޢުރީން އައިސް ކިޔެވެއްޔެއް ކިޔަވާލުމާއެކު ބޮކިތައް ފަޅައިގެން ދިޔައެވެ.
“ޝަމްހޫރިޝް، މަގުން ދުރަށް ޖެހިލާ،” އަދާ ބުންޏެވެ. އަދާ އަތް ކުރިއަށް ދިއްކޮށްލުމާއެކު ސިލާ ބަންދުކޮށްފައި ހުރި ވާތައް ކެނޑި އޭނާ މިނިވަންވިއެވެ.
“އަކްމަލް! އަކްމަލް އަމިއްލަ ހޭވެރިކަމަށް އާދޭ. ޝަމްހޫރިޝްއަކީ ޝައިތާނެއް، އޭނާއަށް ކާމިޔާބުވިޔަ ނުދީ،” ރާޔާ ބުންޏެވެ.
“އަހަރެން ކުރިންވެސް ބުނިން، އަދި މިހާރުވެސް މިބުނަނީ، އޭނާއަކީ އަހަންނަށް ގޮންޖެހި މީހާ،” އަކްމަލްގެ ސިފައިގައި ހުރި ޝަމްހޫރިޝް ބުންޏެވެ.
“ކަލޭމެންނަށް އަޑުއިވިފައި އޮވެދާނެ، ނުވަތަ ނޫންކަމަށްވެސް ވެދާނެ. ޖަނަވާރުންނަށް އަނިޔާކުރުމަކީ ގޯސް ކަމެއް. އަދި އަހަރެމެން ޖިންނީންނަށް ކޮންމެ ސިފައެއްގައިވެސް އާދެވިދާނެ. ޖަނަވާރެއްގެ ސިފައިގައި ނުވަތަ އިންސާނެއްގެ ސިފައިގައިވެސްމެ. އަކްމަލް މިތަނަށް ތި ރާޔާއާ ބައްދަލުކުރަން އައުމުގެ ކުރިން އޭނާގެ އެކުވެރިންނާއެކު ލަންކާގެ ޖަންގައްޔަށް ދިޔަ ދަތުރެއްގައި، ގަހެއްގެ މަތީގައި ދެ ހަރުފަ އުޅެނިކޮށް ފެނުނު. އޭނާ ބިރުގަތް ކަމަށް އެހެން މީހުންނަށް ހީވިޔަސް، އަސްލު އެ ދެ ހަރުފައަކީ އަހަރެމެން،” ޝަމްހޫރިޝް ކިޔައިދިނެވެ.
“އޭނާގެ ފްރެންޑެއް ބުނި އޭނާ އަހަރެމެން މަރާލީ ކީއްވެގެންހޭ. އޭނާ ބުނީ އެ ހަރުފަތައް އެމީހުންނަށް ގެއްލުން ދީފާނެތީ ކަމަށް. އެކަމަކު އަނެއް އެކުވެރިޔާ ބުނީ އެހެން ހަދައިގެން ނުވާނެ ކަމަށާއި ޖަނަވާރުންނަށް އަނިޔާކުރުމަކީ ކުށެއް ކަމަށް. އަދި އެއީ ޖިންނީންނަށްވެސް ވެދާނެ ކަމަށް ބުނުމުން އަކްމަލް އެކަމަށް މަލާމާތްކޮށް ހީނގަތް. އޭނާ ބުނީ އެއީ ބާރުގަދަ ޖިންނިއެއް ނަމަ އޭނާގެ ގާތަށް އައިސް މާފަށް އެދެން ބުނަންވާނެ ކަމަށް. ޝަމްހޫރިޝް ކުރީ އެކަން. އޭނާ މާފަށް އެދުނު، އެކަމަކު އަކްމަލް މާފެއް ނުކުރި. އޭގެ ބަދަލުގައި އޭނާ އަޅައިގެން އުޅޭ ތަވީދު ދައްކާފައި ފަހުރުވެރިވި. އެކަމަކު އޭނާގެ އެކުވެރިން އޭނާ ކަކޫ މައްޗަށް ތިރިކުރި ވަގުތު އެ ތަވީދު ވެއްޓުނީ. އަކްމަލް ބުނީ ކޮންމެ ކަމެއް ކުރިޔަސް މާފަށް ނޭދޭނެ ކަމަށް. ތަވީދު ވެއްޓުނު ދަނޑިވަޅު ބަލާފަ އެހިސާބުން ޝަމްހޫރިޝް އޭނާގެ ހަށިގަނޑަށް ވަނީ،” ސިލާ ކިޔައިދިނެވެ. އެންމެން ތިބީ އެ ވާހަކަ އަޑުއަހާފައި ބިރުން ސިހިސިހިއެވެ.
(ނުނިމޭ)
