އެފްއޭއެމް ވެޓެރަންސް ކަޕް 2026 ފުޓްބޯޅަ މުބާރާތުގައި ކުޅުނު ތިން މެޗުން ވެސް މޮޅުވެ، ގުރޫޕްގެ އެއްވަނައިގައި ވިލިމާލެ ޔުނައިޓެޑް ހަމަޖެހިލައިފިއެވެ.
މިއަދު ހަވީރު މުއިވެޔޮ ފުރެންޑްސް އާއި ވިލިމާލެ ޔުނައިޓެޑް ބައްދަލުކުރި މެޗުން ވިލިމާލެ ޔުނައިޓެޑް މޮޅުވީ 3-1 އިންނެވެ.
މެޗުގެ ފުރަތަމަ ލަނޑު ޖެހީ ވިލިމާލެ ޔުނައިޓެޑުންނެވެ. މެޗުގެ ވިހި ވަނަ މިނެޓުގައި ވިލިމާލެ ޔުނައިޓެޑަށް މި ލަނޑު ޖަހައިދިނީ އާދިލް އެވެ. މުއިވެޔޮ ފުރެންޑްސްގެ އޭރިޔާ ބޭރުން އާދިލްއަށް ލިބުނު ބޯޅަ ގޯލުގެ ތެރެއަށް އޭނާ ފޮނުވާލީ ތިރިތިރިންނެވެ.
ލަނޑު ޖަހާނެ ފުރުސަތު މުއިވެޔޮ ފުރެންޑްސްއިން އުފެއްދި މި މެޗުގައި ދެން ވެސް ފެނުނީ ވިލިމާލެ ޔުނައިޓެޑްގެ ލަނޑެކެވެ. ފުރަތަމަ ހާފުގެ ފަހު މިނެޓުގައި މި ލަނޑު ވިލިމާލެ ޔުނައިޓެޑްއަށް ކާމިޔާބު ކޮށްދިނީ އާދަމް މައުރޫފެވެ.
ދެވަނަ ހާފު ވެސް ވިލިމާލެ ޔުނައިޓެޑްގެ ކުޅުން ފެނުނީ މުއިވެޔޮ ފުރެންޑްސް އަށްވުރެ ވަރުގަދަކޮށެވެ. ދެވަނަ ހާފު ފެށުމާއިއެކު އިތުރު ފުރުސަތުތައް ފަހިކުރި، ވިލިމާލެ ޔުނައިޓެޑުން އެ ޓީމުގެ ތިންވަނަ ލަނޑު ޖެހީ 33 ވަނަ މިނެޓުގައެވެ. މި ލަނޑު އެ ޓީމަށް ޖަހައިދިނީ އިސްމާއީލް އެވެ.
ލަނޑު ޖަހާނެ ފުރުސަތުތައް ދެޓީމަށް ވެސް ލިބުނު މި މެޗުގައި މުއިވެޔޮ ފުރެންޑްސްއިން ޖެހި ހަމައެކަނި ލަނޑު، އެ ޓީމުން ޖެހީ 38 ވަނަ މިނެޓުގައެވެ. އެ ޓީމަށް މި ލަނޑު ޖަހައިދިނީ އާދަމް ލަރީފް އެވެ.
މި މެޗުން ހޯދި ތިން ޕޮއިންޓާއެކު 9 ޕޮއިންޓް ހަމަކޮށް ވިލިމާލެ ޔުނައިޓެޑުން ވަނީ ގުރޫޕްގެ އެއްވަނައިގައި ހަމަޖެހިލައިފައެވެ.
މި މުބާރާތުގެ މާދަމާގެ މެޗުގައި ބައްދަލުކުރާނީ ނިއުރޭޑިއަންޓާއި ދިވެހި ސިފައިންގެ ކުލަބެވެ. މުބާރާތުގެ ސެމީ ފައިނަލުން ޖާގަ ހޯދުމަށްޓަކައި މޮޅުވާން މަޖުބޫރު މި މެޗާއި ކުރިމަތިލާއިރު މިއިން ކޮންމެ ޓީމެއް ވަނީ އެއް މެޗުން މޮޅުވެ އެއް މެޗުން ބަލިވެފައެވެ.
