އެންމެން އެކުގައި ގެއިން ނުކުމެ އަތިރިމައްޗާ ދިމާލަށް ދުވަން ފެށިއެވެ. މަގުމަތީގައި ހުރި ގަސްތަކުން ހީވަނީ އަތްތަކެއް ނުކުމެ އެމީހުން ހިފަހައްޓަން އުޅޭހެންނެވެ. އާދިލް ކުއްލިއަކަށް ވެއްޓުނެވެ. އޭނާގެ ފައިގައި ހިފާފައި އޮތީ ވެޔޮގަނޑެކެވެ. އެ ވެޔޮގަނޑު އޭނާ ދަމާފައި ގެންދަނީއެވެ.
“އާދިލް.” ނާޔާ ހަޅޭއްލަވައިގަތެވެ. ނާޔާ އޭނާ ސަލާމަތްކުރުމަށްޓަކައި ދުއްވައިގަތެވެ.
“ދޭ! އަހަރެން ދޫކޮށްލާފައި ދޭ! އަމިއްލަ ސަލާމަތް ހޯދާ!” އާދިލް ހަޅޭއްލަވަމުން ދިޔައެވެ. އޭރު ފަހަތުން އެ މަރުވެފައިވާ މީހުންތައް އާދެއެވެ. ޒަޔާންއާއި ފަޒީލް އައިސް ވަރަށް އުނދަގުލުން އާދިލްގެ ފައިގައި އޮޅާލާފައިވާ ވެޔޮގަނޑު ނައްޓާލިއެވެ. އޭރު އެ ރަށުގެ މީހުން އެމީހުންނާ ފުދޭވަރަކަށް ކައިރިވެއްޖެއެވެ. ވާޅަކަށްވެސް މަޑުކޮށްނުލައި އެމީހުން އާދިލް ގޮވައިގެން ދުއްވައިގަތެވެ.
އެމީހުންނަށް އެތައް އިރަކު ދުވެގެން އަތިރިމައްޗަށް ދެވުނުއިރު ދިޔަވަރު ބޮޑުވެފައި ރާޅުތައް ހީވަނީ ހަނގުރާމައެއް ފަށައިގެން އުޅޭހެންނެވެ. އެ ގަދަ ރާޅުތަކުގެ ތެރޭގައި ދޯންޏަށް ދިއުމަކީ ވުމަށްވުރެ ނުވުން ގާތް ކަމެކެވެ. ރަށު މީހުން ގޮނޑުދޮށަށް ޖަމާވަމުން ދިޔައެވެ. އެމީހުންގެ އަޑުތައް ހީވަނީ ވަޔާ އެކުވެފައިވާ ހަޅޭކެއް ހެންނެވެ.
“ޒަޔާން ބަލާބަލަ!” ނަޒްމީ ދެއްކީ ރަށުގެ މިސްކިތާ ދިމާލެވެ. އެތަނުން އަލިކަމެއް ފެންނަން ހުއްޓެވެ.
“މިސްކިތަށް ދުވޭ!” ޒަޔާން ބުނެލިއެވެ.
އެންމެން އެއްފަހަރާ މިސްކިތާ ދިމާލަށް ދުއްވައިގަތެވެ. ވަރުބަލިވެފައި ތިބުމާއެކު އެ ގޮނޑުދޮށުގެ މަޑު ފަސްގަނޑުގައި ދުވުންވެސް އެމީހުންނަށް ވެފައިވަނީ ބޮޑު ބުރައަކަށެވެ. ނަމަވެސް ފުރާނަ ސަލާމަތްކުރުން އެ ހުރިހާ ކަމަކަށްވުރެ ބޮޑުވެފައިވާތީ ކަށިން ނެތް ހިތްވަރު ނެރެމުން އެންމެން ދުވިއެވެ.
އެމީހުންނަށް މިސްކިތަށް ވަދެވުނީ ކިރިޔާއެވެ. ސާރާ، އިނާޔާ އަދި ނާޔާ އެތާ ބިންމައްޗަށް ވެއްޓުނެވެ. އެމީހުންގެ ދެފައި ކޮޅުގައި އިތުރަށް ކޮޅަށް ހުންނާނެހާ ބާރެއް ނެތެވެ. ވަރުބަލިވެފައި ވުމާއެކު ގަނެފައި ހުރި ބިރުން އެ ޒުވާން ތިން އަންހެން ކުދިންނަށް ރޯން ފެށުނެވެ.
އެމީހުންގެ ފަހަތުން އައި ރަށު މީހުން މިސްކިތު ގޯތިތެރެއަށް ވަދެފައި މަޑުޖެހުނެވެ. އެމީހުންނަށް މިސްކިތުގެ އެތެރެއަކަށް ނުވަދެވުނެވެ. ހީވަނީ ނުފެންނަ އައްޑަނައަކުން އެމީހުން އެތެރެއަށް ވަނަނުދީ ހިފެހެއްޓިހެންނެވެ.
“މިތާނގަ އަހަރެމެންނަށް ކިހާ ދުވަހަކު ތިބެވޭނީ؟” ނާޔާ ރޮމުން އެހިއެވެ.
އެވަގުތު މިސްކިތުގެ ކަނެއްގައި އިށީނދެލައިގެން އިން މީހަކު އެމީހުންނަށް ފެނުނެވެ. އެއީ ހަޤީޤީ އިންސާނެއްގެ ސިފަ ހުރި މީހެކެވެ. އޭނާގެ މުޅި ގައިގައިވެސް ވަނީ ވިދުމެކެވެ. މޫނުމަތިން ނޫރެއް ފާޅުވެއެވެ. އޭނާގެ އަތުގައި ތަސްބީޙައެއް އޮތެވެ.
“ތިޔަ ކުދިންނަށް މިރަށަށް އާދެވުނީ ކިހިނެއް؟” އެ މާތް ސިފަ ޖަހާ މީހާ އެހިއެވެ.
“އަހަރެމެންނަށް ބެހިގެން މިރަށަށް އާދެވުނީ؟ މީ ކޮން ތަނެއް؟” ޒަޔާން އެހިއެވެ.
“މިއީ ނުފެންނަފުށި. މިރަށުގެ މީހުންނަކީ މަރުވެފައިވާ ބައެއް. އެކަމަކު އެމީހުންގެ ފާފަތަކުގެ ސަބަބުން އެމީހުންގެ ރޫޙު ވަނީ މިރަށުގައި ގައިދުވެފައި. އެ ރޫޙުތަކަށް މިނިވަން ވެވޭނީ އިތުރު ބައެއްގެ ރޫޙު މިރަށުގައި ހައްޔަރުވީމަ. އެހެންވެ އެމީހުން ބޭނުންވަނީ ތިޔަ ކުދިންގެ ފުރާނަ.” އެ މުސްކުޅި މީހާ ކިޔައިދިނެވެ.
“އަހަރެމެންނަށް ސަލާމަތް ވެވޭނީ ކިހިނެއް؟” ސާރާ އާދޭހާއެކު އެހިއެވެ.
“ފަތިސް ނަމާދުގެ ބަންޤީގެ އަޑާއެކު މި ރަށް ގެއްލޭނެ. އެ ވަގުތަކީ ތިޔަ ކުދިންނަށް ސަލާމަތްވާން ލިބޭނެ ހަމައެކަނި ފުރުސަތު. އެކަމަކު ހަނދާންކުރާތި! ބަންޤި ނިމުމުގެ ކުރިން ދޯންޏަށް އަރަން ޖެހޭނެ! ރަށުން ފައިބަން ދާ ވަގުތު އެއްވެސް ކުއްޖަކު ފަސްއެނބުރި ނުބަލާތި! ނޫނީ ތިޔަ ކުދިންވެސް މިރަށުގެ ބަޔަކަށް ވާނެ.” އެ މުސްކުޅި މަދަދުވެރިޔާ ކިޔައިދިނެވެ.
ރޭގަނޑުގެ ބިރުވެރި ވަގުތުތައް ފާއިތުވަމުން ދިޔައެވެ. މިސްކިތުގެ ބޭރުގައި ރަށު މީހުން ތިބީ އެމީހުން ނުކުންނާނެ ވަގުތަކަށް ބަލަބަލައެވެ. ބައެއް ފަހަރު ފާރުތަކުގައި ނިޔަފަތި އަޅާ އަޑާއި ބިރުވެރި އަޑުތަކުން ގޮވާ އަޑު އިވެމުން ދިޔައެވެ. ހަތް ރަޙުމަތްތެރިން އެކަތިގަނޑަކަށް ވެގެން ތިބީ ފަތިސް ވާނެ އިރެއްގެ އިންތިޒާރުގައެވެ.
“އާދިލް. އަހަރެން ވަރަށް ބިރުގަނޭ.” ނާޔާ އާދިލްގެ އަތުގައި ބައްދައިގަނެގެން އިނދެ ބުނެލިއެވެ.
“ކަންބޮޑުނުވޭ ނާޔާ. އިރާދަކުރެއްވިއްޔާ އަހަރެމެން އެކުގައި މިތަނުން ނުކުންނާނަން. އަދި މާތް ﷲގެ އިރާދަފުޅާއެކު އަހަރެމެން ސަލާމަތުން އެނބުރި ދާނަން.” ބިރުގަނެފައި ވިޔަސް ގުރޫޕްގެ އެންމެ އިސްމީހާގެ ހައިސިއްޔަތުން ޒަޔާން އޭނާގެ ހަ ރަޙުމަތްތެރިންނަށް ހިތްވަރު ދިނެވެ.
ފަތިސްވާން ކައިރިވުމުން މުޅި މާހައުލަށް ފާޑެއްގެ ނޫކުލައެއް ވެރިވިއެވެ. ކުއްލިއަކަށް މިސްކިތުގެ މުންނާރުން ބަންޤީގެ އަޑު އިވެން ފެށިއެވެ. އެއީ ހިތްތަކަށް މަޑުމޮޅިކަމާއި ހަށިގަނޑަށް އާދަޔާ ޚިލާފު ހަކަތައެއް ގެނުވި އަޑެކެވެ. ބަންޤީގެ ކޮންމެ ކަލިމައަކާއެކު މިސްކިތުގެ ބޭރުގައި ތިބި ބިރުވެރި ސޫރަތަކަށް ބޮޑެތި ބަދަލުތަކެއް އަންނަން ފެށިއެވެ. އެމީހުންގެ ކުނިވެފައިވާ ހަށިގަނޑުތައް ދުމަށްވެ ވައިގެ ތެރެއަށް ބުރައިގެން ދާން ފެށިއެވެ.
“މިހާރު! ދުވޭ!” ޒަޔާން ބާރަށް ގޮވައިލިއެވެ.
ހަތް ރަޙުމަތްތެރިން އެކުގައި މިސްކިތުން ނުކުމެ އަތިރިމައްޗާ ދިމާލަށް ދުވަން ފެށިއެވެ. އެމީހުން ދުވަމުން ދިޔައިރު ރަށުގެ މަންޒަރު ބަދަލުވަމުން ދިޔައީ ބިރުވެރި ގޮތަކަށެވެ. ކުރިން ފެނުނު އުވަޖެހި ގެތައް ފުނޑުފުނޑުވެ ބިމުގެ އަޑިއަށް ދަނީއެވެ. މަގުމަތީގައި ހުރި ބޮޑެތި ނިކަގަސްތައް ހީވަނީ ދިރިގެން އައިސް އެމީހުން ހިފަހައްޓަން އުޅޭހެންނެވެ.
“ބަންޤި ނިމެނީ! އަވަސްކުރޭ!” އާދިލް ހަޅޭއްލަވައިގަތެވެ.
އެމީހުންނަށް އަތިރިމައްޗަށް ދެވުނުއިރު ރާޅުތައް ދިޔައީ ރަށުގެ ބޮޑު ބައެއް ގިރުވަމުންނެވެ. ދޯނި އޮތީ ފަޅުތެރޭގައި ތަޅާލަ ތަޅާލައެވެ. ރުކުގައި އައްސާފައިވާ ވާ ކެނޑުނީ ކުއްލިއަކަށެވެ. އެންމެން އެކަކު އަނެކަކަށް އެހީތެރިވަމުން ލޮނުގަނޑުގެ ތެރޭގައި ތެޅެމުން ގޮސް ދޯންޏަށް އެރިއެވެ. ޒަޔާން އަވަސްއަވަހަށް އިންޖީނު ކައިރިއަށް ގޮސް އިންޖީނު ސްޓާޓް ކުރަން އުޅުނެވެ.
“ޒަޔާން އަވަސްކުރޭ! ބަންޤި ނިމެނީ!” ނަޒްމީ ގޮވާލިއެވެ.
އުޅެއުޅެ އިންޖީނު ސްޓާޓެއް ނުވިއެވެ.
“ޒަޔާން! އަވަސްކުރޭ! އެމީހުން އެ އަންނަނީ!” ނާޔާ ރޮމުން ހަޅޭއްލަވައިގަތެވެ.
ގޮނޑުދޮށުގައި ދުމުގެ ތެރެއިން އަނެއްކާވެސް އެ ބިރުވެރި ސޫރަތައް ފާޅުވާން ފެށިއެވެ. ބަންޤީގެ ފަހު ކަލިމަ އިވުނު ވަގުތު ޒަޔާން މުޅި ބާރާއެކު އިންޖީނު އަޅުވާލިއެވެ. ހަމަ އެ ސިކުންތުގައި އިންޖީނު ސްޓާޓް ވިއެވެ.
ސިކުންތެއްވެސް ނަގައިނުލާ ބާރު ދުވެލީގައި ދޯނި ދުއްވާލިއެވެ. ފަޅުން ނުކުމެ ފުން ކަނޑަށް މިސްރާބު ޖެހިއެވެ. އެމީހުން ފަސްއެނބުރި ބަލައިލިއިރު އެ ރަށް އޮތް ތަނުން ގަދަ އަލިގަނޑެއް ފާޅުވެ މުޅި ރަށް ކަނޑުގެ އަޑިއަށް ގަނބައިގަތެވެ. ކުޑަ ހިނދުކޮޅެއްގެ ތެރޭގައި އެތަނުގައި ރަށެއް އޮތްކަމުގެ އެއްވެސް ނިޝާނެއް ނެތެވެ. އޮތީ ހަމައެކަނި ހަމަހިމޭން ކަނޑެވެ.
“އަހަރެން ދެން ދުވަހަކުވެސް ދަތުރަކު ނުދާނަން.” ސާރާ ބިރުން ބުނެލިއެވެ. އޭރުވެސް އޭނާގެ ހަށިގަނޑުގައި މަޑު ތުރުތުރެއް ހުއްޓެވެ.
“އަހަންނަށް މިހާރު ޤަބޫލު ކުރެވިއްޖެ ރޫޙާނީ ކަންކަމަކީވެސް ވާ ކަންކަންކަން.” އާދިލް ބުންޏެވެ.
ލިބިފައިވާ ވަރުބަލިކަމުގައި އެންމެން ދޯނިމަތީ ޖައްސާލިއެވެ. ދެން ވީގޮތެއް ނޭނގުނެވެ.
ހޭއެރިއިރު އެމީހުން ތިބީ ހޮސްޕިޓަލުގައެވެ. އެތަނުގައި ފުލުހުން ހަރަކާތްތެރިވަމުން ދިޔައެވެ. ފުލުހުން އައިސް ސުވާލުކުރަން ފެށިއެވެ.
“އަހަރެމެން މިއައީ އެރަށުން. ނުފެންނަފުށިން. އެތަނުގައި ހިނގީ ބިރުވެރި ކަންތައްތަކެއް.” ވަރުބަލިވެފައިވާ ޒަޔާން ކިޔައިދިނެވެ.
“ކޮން ރަށެއްގެ ވާހަކައެއް ތި ދައްކަނީ؟ މި ސަރަހައްދުގައި ތިޔަ ބުނާ ކަހަލަ ރަށެއް ނޯންނާނެ. އަދި މި ރާއްޖޭގައިވެސް ނުފެންނަފުށި ކިޔާ ރަށެއްވެސް ނޯންނާނެ.” ފުލުސް އޮފިސަރު ހައިރާންވެފައި ބުންޏެވެ.
“ކަލޭމެންގެ ދޯނި ފެނުނީ މާކަނޑުގެ މެދުން.” ފުލުސް އޮފިސަރު އިތުރުކޮށްލިއެވެ.
“ނޫނެކޭ. ބަލާބަލަ! މިއޮތީ ހެކިވެސް.” ނަޒްމީ އޭނާގެ ކެމެރާ ނަގައި އޭގައި ހުރި ފޮޓޯތައް ދައްކަން އުޅުނެވެ.
ނަމަވެސް ކެމެރާގެ މެމޮރީ ކާޑު ހުޅުވާލިއިރު އޭގައި އެއްވެސް ފޮޓޯއެއް ނެތެވެ. ހުރީ ހަމައެކަނި އަޅިކުލައިގެ ފުސް މަންޒަރެކެވެ. ހީވަނީ ކެމެރާގެ ލެންސް ކުރިމަތީގައި ބޯ ދުމެއް ހުރިހެންނެވެ.
“އެކަމަކު.. އަހަރެން ހުރިހާ މަންޒަރެއް ނެގިން.” ޤަބޫލުކުރަން ދަތިވެފައި ނަޒްމީ ބުންޏެވެ.
އެންމެންނަށް ހީވީ އެއީ ބިރުވެރި ހުވަފެނެއް ހެންނެވެ. ފުލުސް އޮފިސަރުވެސް ބުރަވީ އެގޮތަށެވެ. ނަމަވެސް ނާޔާއަށް އޭނާގެ އަތުން ތަފާތެއް ފެނުނެވެ. އޭނާގެ އަތުގައި ކުރިން ނެތް ލަކުނެއް އެބަހުއްޓެވެ. އެއީ އެ ބިރުވެރި ކޮޓަރީގައި ހުރި ލޯގަނޑުން ނުކުތް އަތް އޭނާގެ އަތުގައި ހިފި ވަގުތު އުފެދުނު ލަކުނެކެވެ. އެ ލަކުނުން ފެންނަނީ ކަށި އަތެއްގެ އިނގިލިތަކުގެ ނިޝާނެވެ.
“އާދިލް.” ނާޔާ މަޑުމަޑުން ގޮވާލިއެވެ. އަދި އޭނާގެ އަތް ދައްކާލިއެވެ.
އާދިލްއާއި އެކުވެރިން ނާޔާގެ އަތަށް ބަލައިލިއެވެ. އެމީހުންނަށް އެނގިއްޖެއެވެ. އެއީ ހުވަފެނެއް ނޫނެވެ. އެއީ ހަޤީޤަތެކެވެ. އެމީހުން އެނބުރި އެ އައީ މަރުގެ ތުންފަތްމަތިންނެވެ.
އޭގެ މަސްތަކެއް ފަހެވެ. މާލޭގައި ތިބި ނަމަވެސް އެ ހަތް ރަޙުމަތްތެރިންގެ ތެރެއިން އެކަކަށްވެސް އެރޭގެ ހަނދާންތަކާ ދުރަކަށް ނުދެވުނެވެ. ކޮންމެ ރެޔަކު ނިދީގައި އެމީހުންނަށް އިވެނީ އެ މުސްކުޅިޔާގެ އަޑެވެ.
“މިރަށަށް އަންނަ މީހުން ދުވަހަކުވެސް އެނބުރިއެއް ނުދޭ!”
އެއްދުވަހު ޒަޔާން އޭނާގެ އޮފީހުގައި މަސައްކަތްކުރަން އިނދެފައި ކޮމްޕިއުޓަރުން ފެންނަން ހުރި ދިވެހިރާއްޖޭގެ ޗާޓަށް ބަލައިލިއެވެ. އޭނާގެ ލޮލުގައި އަޅައިގަތީ އުތުރުގެ ކަނޑުގެ ސަރަހައްދުގައި ރަތްކުލައިން ފާހަގަކޮށްފައިވާ ކުޑަ ތިއްކެކެވެ. އެއީ ކުރިން އެ ޗާޓުގައި އިން ތިއްކެއް ނޫނެވެ. އޭނާ ބޯ ހިއްލާލައި ލޯގަނޑަށް ބަލައިލި ވަގުތު އޭނާގެ ފަހަތުން ކަޅު ހިޔަންޏެއް ފެނިލާފައި ގެއްލުނެވެ.
ޒަޔާންގެ ހިތް ހުއްޓުނު ކަހަލައެވެ. އެމީހުން އެ ރަށުން ސަލާމަތްވި ނަމަވެސް އެ ރަށުގެ ހިޔަނި އަދިވެސް އެމީހުންގެ ފަހަތުން އަންނަނީއެވެ. ހަޤީޤީ ސުވާލަކީ އެމީހުން ހަޤީޤަތުގައިވެސް އެރަށުން ސަލާމަތްވީ ހެއްޔެވެ؟ ނުވަތަ އެމީހުންގެ ރޫޙު އަދިވެސް ވަނީ އެ “ނުފެންނަފުށީގައި” ހައްޔަރުވެފައި ހެއްޔެވެ؟
(ނިމުނީ)
