ލޮސް އެންޖެލެސްއަށް ނިސްބަތްވާ، އުމުރުން އެންމެ 10 އަހަރުގެ ފެޝަން ޑިޒައިނަރު މެކްސް އެލެގްޒެންޑާ، ޕެރިސް ފެޝަން ވީކްގައި އޭނާގެ އުފެއްދުންތައް ދައްކާލައި، އެ މުބާރާތުގެ ތާރީޚުގައި ބައިވެރިވި އެންމެ ހަގު ޑިޒައިނަރުގެ މަގާމު ހޯދައިފިއެވެ.
މިދިޔަ މާރިޗު މަހުގެ 3 ވަނަ ދުވަހު ޕެރިހުގެ މަޝްހޫރު ‘ޕަލޭ ގާނިއޭ’ ގައި މެކްސް ވަނީ 15 ހެދުމެއް ދައްކާލާފައެވެ. ތިމާވެއްޓާ ރައްޓެހި ގޮތަކަށް ފެޝަން ސިނާއަތް ކުރިއެރުވުމަށް ބާރުއެޅުމުގެ ގޮތުން، އޭނާ ދައްކާލި ހެދުންތަކުގެ 90 އިންސައްތައަކީ ބަޔޯޑިގްރޭޑަބަލް އަދި އަލުން ބޭނުންކުރެވޭ ފަދަ ތަކެތި ބޭނުންކޮށްގެން ތައްޔާރުކޮށްފައިވާ ހެދުންތަކެކެވެ. މީގެ އިތުރުން، އޭނާ އެންމެ ފަހުން ފަރުމާކުރި އަތްދަބަސް ބާޒާރަށް ނެރުނުތާ 24 ގަޑިއިރު ތެރޭގައި މުޅިން ހުސްވެފައިވާއިރު، އޭނާގެ އިންސްޓަގްރާމް ފޮލޯވަރުންގެ އަދަދު މިހާރު ވަނީ ހަ މިލިއަނާ ގާތްކޮށްފައެވެ.
މެކްސް ހެދުން ފެހުމުގެ މަސައްކަތް ފެށީ އުމުރުން އެންމެ ހަތަރު އަހަރުގައެވެ. އޭނާގެ ހުނަރުވެރިކަމުގެ ސަބަބުން، އުމުރުން ހަތް އަހަރުގައި ރަންވޭއެއްގައި އުފެއްދުންތައް ދައްކާލި އެންމެ ހަގު ޑިޒައިނަރުގެ ގޮތުގައި ގިނިސް ވޯލްޑް ރެކޯޑް ފޮތުންވެސް އޭނާ ވަނީ ޖާގަ ހޯދާފައެވެ.
އޭނާ ވަނީ މަޝްހޫރު ފިލްމީ ތަރި ޝެރޯން ސްޓޯން ފަދަ ފަރާތްތަކަށް ހެދުން ފަރުމާކޮށްދީ، ފެޝަން ސިނާއަތުން އުފެދޭ ކުނި މަދުކުރުމާ ގުޅޭގޮތުން އދ. ގައި ވާހަކަދައްކާފައެވެ. މީގެ ކުރިން ނިއުޔޯކް، ޑެންވަރ އަދި އެސްޕެން ފަދަ ސިޓީތަކުގައިވެސް އޭނާގެ އުފެއްދުންތައް ވަނީ ދައްކާލާފައެވެ.
ޕެރިސްގައި ބޭއްވި މި ހަރަކާތުގައި، ނިއުޔޯކް ފެޝަން ވީކްގެ ބާނީ ފާން މެލިސް ވަނީ މެކްސްގެ ހުނަރަށް ވަރަށް ބޮޑަށް ތައުރީފުކޮށްފައެވެ. އޭނާ ބުނި ގޮތުގައި މެކްސްއަކީ އޭނާގެ މަސައްކަތުގައި ވަރަށް ތަފާތު އަދި އާދަޔާޚިލާފު ހުނަރެއް ލިބިފައިވާ ކުއްޖެކެވެ.
މިހާ ބޮޑު މަގުބޫލުކަމެއް ލިބިފައިވީ ނަމަވެސް، މެކްސްއަކީ އަދިވެސް ގްރޭޑް ހަތަރޭއްގައި ކިޔަވަމުންދާ ދަރިވަރެކެވެ. އޭނާއަކީ ކިޔެވުމުގެ އިތުރުން ރޮބޮޓިކްސް އާއި ޕިއާނޯ ކުޅުމަށް ލޯބިކުރާ ކުއްޖެކެވެ. މެކްސްގެ އެންމެ ބޮޑު އުންމީދަކީ މުސްތަގުބަލުގައި ޕެރިހުގެ އެންމެ މަތީ ފަންތީގެ ފެޝަން ޑިޒައިނަރަކަށް ވުމެވެ.
