ފަތިހުގެ ފުރަތަމަ އަލިކަން އުޑުމަތިން ފެންނަން ފެށިއިރު، ދާންނާގެ ތެރޭގައި އާ ހަނގުރާމައެއް ފެށެނީއެވެ. ނަފީސްއަކީ މިހާރު މި ގައުމުގެ ހަމައެކަނި އުންމީދެވެ.
—
ދާންނާގޭގެ މަތީ ބަޔަކީ އާދައިގެ މީހަކަށް ފަސޭހައިން ވަދެވޭނެ ތަނެއް ނޫނެވެ. ނަމަވެސް ނަފީސްއަކީ އެ ގަނޑުވަރުގެ ކޮންމެ ކަނެއް، ކޮންމެ ސިއްރު މަގެއް ދަންނަ މީހެކެވެ. އޭނާ ހުރީ ފުރާޅުމަތީގެ ހަނި ބައެއްގައި ފިލައިގެންނެވެ. އޭނާގެ ކޮނޑުމަތިން އޮހެމުންދިޔަ ލޭތައް ހުއްޓުވުމަށްޓަކައި، އޭނާގެ ގަމީހުން ބައެއް ވީދާލައި އައްސާލިއެވެ.
“ނަފީސް، ކަލޭ ކޮބާ؟” ކުއްލިއަކަށް އޭނާގެ ކަންފަތުގައި އޮތް ކުޑަ އިއަރޕީސްއިން އަޑެއް އިވުނެވެ. އެއީ ދާންނާގޭގެ އައިޓީ ސެކްޝަންގައި މަސައްކަތްކުރާ ހުނަރުވެރި ކުއްޖެއް ކަމަށްވާ ފައިސަލްގެ އަޑެވެ.
“ފައިސަލް؟ ކަލޭ ކޮބާ؟” ނަފީސް ސިއްރުން އަހާލިއެވެ.
“އަހަރެން މިއިނީ ސާވަރ ރޫމްގެ ފަހަތުގައި ހުރި ކުޑަ ގުދަނެއްގައި ފިލާ. މިމީހުން މުޅި ސިސްޓަމް ހެކްކޮށްފި. އެކަމަކު އަހަރެންގެ އަތުގައި ބެކަޕް ލައިނެއް އެބައޮތް. ނަފީސް، މިއީ ހަމައެކަނި ބޭރުގެ ބަޔަކު ކުރާ ކަމެއް ނޫން. އެތެރޭގެ އެހީތެރިކަން އެމީހުންނަށް އެބަލިބޭ،” ފައިސަލް ބިރުން ހުރެ ކިޔައިދިނެވެ.
ނަފީސްގެ ދަތްކުނޑި ވިކާލެވުނެވެ. “ޚާއިނުން! ކާކުކަން އެނގޭތަ؟”
“އަދި ނޭނގޭ. އެކަމަކު އެމީހުން ބޭނުންވަނީ ‘ސައިލެންސް’ ކޯޑް. އެއީ ރާއްޖޭގެ ހުރިހާ ދިފާއީ ބާރުތަކާއި ރޭޑާ ސިސްޓަމްތައް ނިއްވާލެވޭ ކޯޑް. އެ ކޯޑް އޮތީ ހަމައެކަނި ރައީސާއި، ޑިފެންސް މިނިސްޓަރާއި، އަދި ޗީފް އޮފް ސްޓާފްގެ އަތުގައި،” ފައިސަލް ތަފްސީލުކޮށްދިނެވެ.
ނަފީސަށް ކަންތައްތައް ރޭގަނޑުގެ ކަޅު އަނދިރިކަމަށްވުރެ ބޮޑަށް ސާފުވާން ފެށިއެވެ. ސުފިޔާނުގެ މަގްސަދަކީ ހަމައެކަނި ރައީސް ރަހީނުކުރުމެއް ނޫނެވެ. އޭނާ ބޭނުންވަނީ ރާއްޖޭގެ ދިފާއީ ނިޒާމު ފުނޑުފުނޑުކޮށްލައި، މި ސަރަހައްދުގެ ބާރުވެރިކަން އަތުލުމަށެވެ.
މިވަގުތު ތިރީގައި، ބަންކަރުގެ ބޭރުގައި ސުފިޔާނު ހުރީ ވަރަށް ހަމަޖެހިލައިގެންނެވެ. އޭނާގެ އަތުގައި އޮތީ ރައީސްގެ ދަރިފުޅު، އުމުރުން 12 އަހަރުގެ އާޔާންގެ ފޮޓޯއެކެވެ. އާޔާން މިވަގުތު ހުރީ ރާއްޖެއިން ބޭރުގައި ކިޔަވާށެވެ.
“ރައީސް ރާޝިދު! އަޅުގަނޑަށް އެނގޭ މަނިކުފާނު ތިޔަ އިންނެވީ އަޑުއިވޭ ހިސާބުގައިކަން،” ސުފިޔާނު ބަންކަރުގެ ދޮރުމަތީގައި ހުރި މައިކްރޯފޯނުން ވާހަކަދެއްކިއެވެ. “މަނިކުފާނުގެ އަތްޕުޅުގައި އޮތް ފުރަތަމަ ކޯޑް އަޅުގަނޑަށް ބޭނުންވޭ. އެހެން ނޫނީ، މަނިކުފާނުގެ ދަރިފުޅު މާދަމާގެ އިރު އަރާއިރު ދުނިޔޭގައި ނުހުންނާނެ.”
ބަންކަރުގެ ތެރޭގައި ރައީސް ރާޝިދު ހުންނެވީ އިސްޖަހާލައިގެންނެވެ. އެމަނިކުފާނުގެ ލޮލުން ކަރުނަ ހިލުނެވެ. ގައުމުގެ ސަލާމަތާއި އަމިއްލަ ދަރިފުޅުގެ ފުރާނައާ ދެމެދު އިޚްތިޔާރު ކުރަން ޖެހުމަކީ ކޮންފަދަ ބޮޑު އިމްތިހާނެއް ހެއްޔެވެ؟
“ސަރ، އެކަން ނުކުރައްވާ! އެއީ އެމީހުންގެ މަޅިއެއް،” ޝާހިދު ބުންޏެވެ. ނަމަވެސް ޝާހިދުގެ މޫނުމަތިން ފެންނަނީ އާދަޔާޚިލާފު ނުތަނަވަސްކަމެކެވެ.
ނަފީސް މަޑުމަޑުން ގަނޑުވަރުގެ ފިނިލައިޓްތަކުގެ ތެރެއިން ދަތުރުކުރަމުން ދިޔައެވެ. އޭނާ ބޭނުންވަނީ ކޮންޓްރޯލް ރޫމަށް ވަދެ، މުވާސަލާތީ ނިޒާމު އަލުން އިއާދަކުރުމަށެވެ. މަގުމަތީގައި އޭނާއަށް ދިމާވި ދެ ގާޑަކު، އެއްވެސް އަޑެއް އިވުނަނުދީ އޭނާ ނައްތާލިއެވެ. އޭނާގެ ހަރަކާތްތައް ހުރީ ބާޒެއް ފަދައިން ހަލުވިކޮށް އަދި ނުރައްކާތެރިކޮށެވެ.
“ފައިސަލް، އަހަރެން މިހުރީ ކޮންޓްރޯލް ރޫމްގެ ދޮރުމަތީގަ. ބޭރުގައި ހަތަރު މީހުން އެބަތިބި،” ނަފީސް ރިޕޯޓްކުރިއެވެ.
“ނަފީސް، މަޑުކުރޭ. އަހަރެން މިތަނުން އަލިފާން ނިވާ ސިސްޓަމް ޖައްސާލާނަން. އޭރުން އެމީހުންގެ ސަމާލުކަން ގެއްލޭނެ،” ފައިސަލް ބުންޏެވެ.
ކުއްލިއަކަށް މުޅި ކޮރިޑޯގައި ދުން ބޯވެ، ފެން އޮހެން ފެށިއެވެ. ގާޑުން ހާސްވެގެން ދެފަރާތަށް ބަލަން ފެށި ވަގުތު، ނަފީސް ނުކުމެ ހަލުވިކަމާއެކު އެމީހުންނަށް ހަމަލާދިނެވެ. ބަޑީގެ ބަދަލުގައި އޭނާ ބޭނުންކުރީ އޭނާގެ އަތުގައި އޮތް ވަޅިއެވެ. މަދު ސިކުންތުކޮޅެއްގެ ތެރޭގައި ހަތަރު މީހުން ބިންމައްޗަށް ތިރިވިއެވެ.
ނަފީސް ކޮންޓްރޯލް ރޫމަށް ވަދެ، ފައިސަލް ބުނި ގޮތަށް ކޭބަލްތައް ގުޅަން ފެށިއެވެ. “މިހާރު އޯކޭ؟”
“ލައްބަ! މިހާރު ސިގްނަލް އެބަ ލިބޭ. ނަފީސް، އަވަހަށް ބޭރުގެ ސިފައިންނާ ގުޅާ! އެމީހުން ތިބީ ދާންނާގެ ކައިރީގައި މަޑުކޮށްލައިގެން، އެތެރޭގައި ވާނުވާ ނޭނގިފަ،” ފައިސަލް ބުންޏެވެ.
ނަފީސް ސިފައިންގެ މައި މަރުކަޒާ ގުޅިއެވެ. “މިއީ އޮފިސަރު ނަފީސް. ދާންނާގެ އޮތީ ހައިޖެކްކޮށްފަ. ރައީސް ބަންކަރުގައި ރައްކާތެރިކޮށް އެބައިންނެވި. އެކަމަކު އެމީހުން އެބަ މަސައްކަތްކުރޭ ‘ސައިލެންސް’ ކޯޑް ހޯދަން. އަހަރެން ބޭނުންވަނީ އެއަރ ސަޕޯޓް އަދި ސްޕެޝަލް ފޯސް.”
ސިފައިންގެ ކޮމާންޑަރުގެ އަޑު އިވުނެވެ. “ނަފީސް، ކަލޭ ތިޔަ ކުރަނީ ވަރަށް ބޮޑު މަސައްކަތެއް. އެކަމަކު އެމީހުންގެ އަތުގައި އެންޓި-އެއަރކްރާފްޓް މިސައިލް އެބަހުރި. އަހަރެމެންނަށް މަތިންނެއް ނާދެވޭނެ. ކަލޭ ޖެހޭނީ އެތެރެއިން އެ ސިސްޓަމް ނިއްވާލަން.”
ނަފީސް ފުން ނޭވާއެއްލިއެވެ. މި މަސައްކަތް ދަނީ އެއް ފިޔަވަޅަށްވުރެ އަނެއް ފިޔަވަޅު އުނދަގޫވަމުންނެވެ. އޭނާ ކޮންޓްރޯލް ރޫމުން ނުކުންނަން އުޅެނިކޮށް، ބޮޑު ސްކްރީނުން ފެނުނު މަންޒަރަކުން އޭނާ ހުއްޓުން އެރިއެވެ.
ބަންކަރުގެ ތެރޭގައި، ޝާހިދު ހުރީ ރައީސްގެ ބޮލުގައި ބަޑި ޖައްސައިގެންނެވެ!
“ޝާހިދު؟” ނަފީސްއަށް ބޭ އިޚްތިޔާރުގައި ބުނެވުނެވެ. “އެއީ ޚާއިނަކީ!”
ޝާހިދު ހަޅޭއްލަވަމުން ދިޔައެވެ. “ރާޝިދު! ކޯޑް ދީ! އަހަރެން މިކަމަށްޓަކައި އަހަރުތަކެއް ވަންދެން އިންތިޒާރު ކުރިން. މި ގައުމުގެ ވެރިކަން ބަދަލުވާން ޖެހޭ.”
ރައީސް ރާޝިދު ހައިރާންކަމާއެކު ބަލަން ހުންނެވިއެވެ. “ޝާހިދު، އަހަރެން ކަލެއަށް އިތުބާރު ކުރިން. ކަލެއަކީ މަގޭ އެންމެ ގާތް އެކުވެރިޔާ.”
“އެކުވެރިކަމުން ބަނޑެއް ނުފުރޭނެ،” ޝާހިދު ނުލަފާ ގޮތަކަށް ހީނލިއެވެ. “ސުފިޔާނު ބޭނުންވަނީ މި ގައުމު. އަހަރެން ބޭނުންވަނީ ފައިސާ. މިހާރު ކޯޑް ޖަހާ!”
ދެން އެއްވެސް ވަގުތެއް ނެތްކަން ނަފީސްއަށް އެނގުނެވެ. އޭނާ ދުވެފައި ގޮސް ބަންކަރާ ދިމާލަށް މިސްރާބު ޖެހިއެވެ. ނަމަވެސް މަގުމަތީގައި އޭނާއަށް ހުރަސް އެޅީ ސުފިޔާނުގެ އެންމެ ވަރުގަދަ ފައިޓަރު، “ޖޯކަރު” އެވެ. ޖޯކަރަކީ އިސްކޮޅުން ދިގު، ބިޔަ، އަދި މާޝަލް އާޓްސްގެ މާހިރެކެވެ.
“ނަފީސް، ކަލޭގެ ނަން އަހަރެން އަޑުއެހިން،” ޖޯކަރު އޭނާގެ ދަގަނޑު ދަނޑިގަނޑާ ކުޅެލަމުން ބުންޏެވެ. “އެކަމަކު މިރޭ ކަލޭގެ ދުވަސް ދިޔައީ.”
ނަފީސް ބަޑި ޖަހަން އުޅުނު ނަމަވެސް، ޖޯކަރު ހަލުވިކަމާއެކު ނަފީސްގެ އަތުން ބަޑި ފޮޅުވާލިއެވެ. ދެން ފެށުނީ ވަރުގަދަ ކުރިމަތިލުމެކެވެ. ނަފީސްގެ ޒަޚަމްތަކުގެ ސަބަބުން އޭނާއަށް އުނދަގޫވަމުން ދިޔަ ނަމަވެސް، އޭނާގެ ހިތުގައި އޮތް ގައުމީ ލޯބި އޭނާއަށް ހިތްވަރު ދިނެވެ.
ޖޯކަރުގެ ބާރުގަދަ އެތިފަހަރުތަކުން ނަފީސް ބިންމަތީގައި ކަހާލައިގެން ދިޔައެވެ. ނަމަވެސް ނަފީސް ހިތްވަރު ދޫނުކޮށް، އޭނާގެ ބޫޓުގައި ފޮރުވާފައި އޮތް ކުޑަ ވަޅި ނަގައި ޖޯކަރުގެ ފަޔަށް ހަރާލިއެވެ. ޖޯކަރުގެ ފަޔަށް އެޅި ގަދަ ވޭނުގެ ސަބަބުން ހަޅޭއްލަވައިގަތް ވަގުތު، ނަފީސް އޭނާގެ ބޯ ތަޅުންގަނޑުގައި ޖަހައި ހޭނައްތާލިއެވެ.
ނަފީސް އަވަހަށް ބަންކަރުގެ ދޮރުމަތީގައި ހުރި ކޮންޓްރޯލް ޕެނަލަށް ދިޔައެވެ. “ފައިސަލް، ބަންކަރުގެ ދޮރު ހުޅުވޭނެ ގޮތެއް ހަދާ!”
“ނަފީސް، އެއީ ވަރަށް ނުރައްކާތެރި ކަމެއް. އަހަރެން ސިސްޓަމް އޯވަރލޯޑް ކޮށްފިއްޔާ މުޅި ގަނޑުވަރުގެ ސެކިއުރިޓީ ކެނޑޭނެ،” ފައިސަލް އިންޒާރު ދިނެވެ.
“ކުރޭ! އެހެން ނޫނީ ރައީސް މަރާލާނެ!” ނަފީސް އަމުރުކުރިއެވެ.
ސިކުންތުކޮޅެއްގެ ތެރޭގައި މުޅި ގަނޑުވަރުގެ ބައްތިތައް ނިވި، ބަންކަރުގެ ބޮޑު ދަގަނޑު ދޮރު ހުޅުވެން ފެށިއެވެ. ނަފީސް ބަޑި ތައްޔާރުކޮށްގެން އެތެރެއަށް ވަދެގަތެވެ.
“ޝާހިދު، ބަޑި ބާއްވާ!” ނަފީސް ހަޅޭއްލަވައިގަތެވެ.
ޝާހިދު ސިހިފައި ރައީސްގެ ކަރުގައި ހިފާ ބާރުކޮށްލިއެވެ. “ނަފީސް، ކައިރިނުވާާތި! އެހެން ނޫނީ ރައީސްގެ ބޮލަށް ބަޑިޖަހާނަން!”
މިވަގުތު ސުފިޔާނުވެސް އެތަނަށް އައެވެ. އޭނާގެ އަތުގައި ރިމޯޓް ކޮންޓްރޯލެއް އޮތެވެ. “ހުއްޓާލާ! ނަފީސް، ކަލޭ ހީކުރީ ކަލެއަށް މިއީ ކާމިޔާބު ކުރެވޭނެ ކަމެއް ކަމަށްތަ؟ އަހަރެންގެ އަތުގައި މާލޭގެ ފަސް ތަނެއްގައި ހަރުކޮށްފައިވާ ބޮންތަކުގެ ރިމޯޓް އެބައޮތް. ކަލޭ އެންމެ ފިޔަވަޅެއް އެޅިޔަސް، ހާހުން މީހުން މަރުވާނެ.”
ނަފީސް މަޑުޖެހުނެވެ. އޭނާގެ ކުރިމަތީގައި އޮތީ މަރުގެ މަޅިއެކެވެ. އެއްފަރާތުގައި ރައީސް، އަނެއްފަރާތުގައި މުޅި މާލޭގެ ރައްޔިތުންނެވެ.
“ސުފިޔާނު، ކަލޭ ބޭނުންވަނީ ކޯންޗެއް؟” ނަފީސް މަޑުމައިތިރިކަމާއެކު އަހާލިއެވެ. އޭނާގެ ސިކުންތުތައް ގުނަމުންނެވެ.
(ނުނިމޭ)
