އެމެރިކާގެ ކާޑިއޮލޮޖީ ދާއިރާގެ މާހިރުން ހިމެނޭ “އެމެރިކަން ކޮލެޖް އޮފް ކާޑިއޮލޮޖީ” އާއި “އެމެރިކަން ހާރޓް އެސޯސިއޭޝަން” ގުޅިގެން، ލޭގައި ހުންނަ ކޮލެސްޓްރޯލްގެ މިންވަރު ކޮންޓްރޯލްކުރުމާ ގުޅޭ އާ އިރުޝާދުތަކެއް އާންމުކޮށްފިއެވެ. މި އިރުޝާދުތަކަކީ ހިތުގެ ބަލިތަކުން ރައްކާތެރިވުމަށްޓަކައި އެކުލަވާލާފައިވާ މުހިންމު އުސޫލުތަކެކެވެ.
މި އާ އިރުޝާދުތަކުގެ އެންމެ މުހިންމު އެއް ބޭނުމަކީ، މީހާގެ އުމުރާއި، ސިއްހީ ހާލަތަށް ބަލައި ކޮލެސްޓްރޯލް ދަށްކުރުމަށް ދެވޭ ފަރުވާ އިތުރަށް ހަރުދަނާކުރުމެވެ. މީގެ ކުރީގެ އުސޫލުތަކާ ހިލާފަށް، އާ އިރުޝާދުގައި ބޮޑަށް ބާރުއަޅާފައިވަނީ ހަމައެކަނި ލޭގެ ޓެސްޓުތަކަށް ބެލުމުގެ ބަދަލުގައި، އެމީހަކަށް ހިތުގެ ބަލި ޖެހުމުގެ އޮތް ފުރުސަތު ނުވަތަ “ރިސްކް” ވަޒަންކުރުމަށެވެ.
އާ އިރުޝާދުގައި ހިމެނޭ މުހިންމު ބައިތައް:
1- ކެލްސިއަމް ސްކޭން: ހިތުގެ ބަލި ޖެހުމުގެ ފުރުސަތު އޮތް މިންވަރު ޔަގީންނުވާ ހާލަތްތަކުގައި، “ކޮރޯންރީ އާޓްރީ ކެލްސިއަމް ސްކޭން” އެއް ހެދުމަށް މިހާރު ލަފާދެއެވެ. މިއީ ހިތުގެ ނާރުތަކުގައި ކެލްސިއަމް ޖަމާވެފައި ހުރިތޯ ބަލައި، ބޭސް ބޭނުންކުރަންޖެހޭތޯ ނިންމުމަށް އެހީތެރިވެދޭނެ ކަމެކެވެ.
2- ދިރިއުޅުމުގެ އާދަތައް: ކޮލެސްޓްރޯލް ކޮންޓްރޯލްކުރުމަށްޓަކައި އެންމެ ފުރަތަމަ ފިޔަވަޅެއްގެ ގޮތުން ސިއްހަތަށް ފައިދާހުރި ކާނާ ކެއުމަށާއި ގަވާއިދުން ކަސްރަތުކުރުމަށް އިރުޝާދު ދީފައިވެއެވެ.
3- ސްޓެޓިން ބޭސް: ލޭގައި ހުންނަ ނުރައްކާތެރި ކޮލެސްޓްރޯލް ނުވަތަ އެލްޑީއެލް ގެ މިންވަރު އިންތިހާއަށް މަތި މީހުންނަށް، އުމުރަށް ބެލުމެއްނެތި ސްޓެޓިން ބޭނުންކުރަން ފެށުމަށް ވަނީ ލަފާދީފައެވެ.
4- ކުޑަކުދިންނާއި ޒުވާނުން: އާއިލީ ގޮތުން ކޮލެސްޓްރޯލް މަތިވުމުގެ މައްސަލަ ހުންނަ ކުދިން، ކުޑައިރުއްސުރެ ޓެސްޓުކޮށް ބެލެހެއްޓުމުގެ މުހިންމުކަން މި އިރުޝާދުގައި ފާހަގަކޮށްފައިވެއެވެ.
މި އިރުޝާދުތައް ނެރެފައިވަނީ ދުނިޔޭގައި ހިތުގެ ބަލިތައް އިތުރުވަމުންދާ ދަނޑިވަޅެއްގައެވެ. މާހިރުން ވިދާޅުވާ ގޮތުގައި، ކޮލެސްޓްރޯލް މަތިވުމަކީ ހިތުގެ މައްސަލަތަކާއި ސްޓްރޯކް ޖެހުމަށް މެދުވެރިވާ މައިގަނޑު ސަބަބަކަށް ވީ ހިނދު، ކުރިއާލައި ރައްކާތެރިކަމުގެ ފިޔަވަޅު އެޅުމަކީ ފުރާނަ ސަލާމަތްކުރުމަށް ކުރެވޭނެ އެންމެ މުހިންމު މަސައްކަތެވެ.
