މައިންބަފައިންނަކީ އިންސާނަކަށް މި ދުނިޔޭގައި ލިބޭނެ އެންމެ އަގުބޮޑު ނިޢުމަތެވެ. އެއީ އޯގާތެރިކަމާއި، ކުލުނާއި، ލޯބީގެ މަތިވެރި ނަމޫނާއެވެ. އިސްލާމްދީނުގައި މައިންބަފައިންނަށް ދީފައިވަނީ ނުހަނު މަތިވެރި ދަރަޖައެކެވެ. ޤިޔާމަތްދުވަހުން މައިންބަފައިންގެ ބޮލުގައި “ރަންތާޖު” އެޅުވުމަކީ ކޮންމެ ހެޔޮލަފާ ދަރިއެއްގެވެސް އެންމެ ބޮޑު އުންމީދެވެ. ނަމަވެސް، މިއަދުގެ މުޖުތަމަޢަށް ބަލާއިރު، މި މަތިވެރި މަޤާމުގެ އަގުވަޒަންކުރުމުގައި އަޅުގަނޑުމެންގެ ތެރެއިން ބައެއް ދަރިންނަށް ވަނީ ގޯސް މަގަކުން ދެވިފައެވެ.
މިއަދު އަޅުގަނޑުމެންގެ ތެރެއިން ފެންނަ ހިތާމަވެރި މަންޒަރަކީ، ބައެއް ދަރިން މައިންބަފައިންނާ މުޚާތަބުކުރާއިރު ބޭނުންކުރާ ހަރުކަށި ބަސްމަގެވެ. މައިންބަފައިން ކަމަކަށް ބުނުމުން، ނުރުހުމުގެ މޫނު ދައްކައި “އުއްފު” ބުނުމަކީ ބައެއް ކުދިންގެ އާދައަކަށް ވަނީ ވެފައެވެ. ދުނިޔަވީ ތަޢުލީމާއި މުއްސަނދިކަން ލިބުމުން، އުފަންކޮށް ބޮޑުކުރި މައިންބަފައިންނަކީ އެއްޗެއް ނޭނގޭ ބައެއްގެ ގޮތުގައި ސިފަކޮށް، އެމީހުންނަށް އިހާނެތިކޮށް ހިތާ ދަރިން މަދެއް ނޫނެވެ. މައިންބަފައިން މުސްކުޅިވެ ގައިބާރު ދެރަވާ ދުވަހު، އެމީހުން ބެލުމުގެ ބަދަލުގައި މުސްކުޅިން ބަލާ މަރުކަޒުތަކަށް ފޮނުވާލުމަކީ އިންސާފެއް ނޫނެވެ. މިއީ އެ ރަންތާޖަށް އެދޭ ދަރިއެއްގެ ކިބައިން ފެނިގެންވާނެ ސިފަތަކެއް ނޫނެވެ.
މައިންބަފައިންނަށް ރަންތާޖު ޙައްޤުކޮށްދިނުމަށްޓަކައި ދަރިންގެ ޢަމަލުތައް ބަހައްޓަންވީ އެންމެ ރަނގަޅު ގޮތަކީ، އެމީހުންނަށް އޯގާތެރިވުމެވެ. މާތް ﷲ ވަނީ މައިންބަފައިންނަށް “އުއްފު” ވެސް ނުބުނުމަށް އަމުރުކުރައްވާފައެވެ. އެހެންކަމުން، އެމީހުންނާ ވާހަކަދައްކާއިރު މަޑުމައިތިރިކަމާއި އިޙްތިރާމާއެކު ވާހަކަދެއްކުމަކީ ވާޖިބެކެވެ. ދުނިޔަވީ ކަންކަމުގައި އެމީހުންނަށް އެހީތެރިވެ، ބަލިވުމުން އެމީހުންގެ ޚިދުމަތުގައި ދެމިތިބުމަކީ ސުވަރުގެއަށް ދިއުމަށް އޮތް އެންމެ ފަހި މަގެވެ. ޚާއްޞަކޮށް، ދަރިންނަކީ ޤުރުއާން އުނގެނި، އެއަށް ޢަމަލުކުރާ ބަޔަކަށް ވެއްޖެނަމަ، ޤިޔާމަތްދުވަހުން އެކުދިންގެ މައިންބަފައިންގެ ބޮލުގައި ނޫރުގެ ތާޖެއް އެޅުވޭނެކަމުގެ އުފާވެރި ޚަބަރު މާތް ނަބިއްޔާ ވަނީ ދެއްވާފައެވެ.
މައިންބަފައިންނަށް ހެޔޮކޮށް ހިތުމަކީ ހަމައެކަނި އެމީހުން ދުނިޔޭގައި ތިބޭއިރު ކުރަންޖެހޭ ކަމެއް ނޫނެވެ. އެމީހުން ދުނިޔެ ދޫކުރުމަށްފަހުވެސް، އެމީހުންނަށްޓަކައި ހެޔޮދުޢާކުރުމާއި، އެމީހުންގެ ނަމުގައި ޞަދަޤާތްކުރުމަކީ ދަރިންގެ މައްޗަށް އޮތް ޒިންމާއެކެވެ. “ރަންތާޖު” ޙައްޤުވަނީ އެ ތާޖު ހޯދައިދިނުމަށް މަސައްކަތްކުރާ ހެޔޮލަފާ ދަރިންގެ މައިންބަފައިންނަށެވެ.
މައިންބަފައިންނަކީ އަޅުގަނޑުމެންގެ ސުވަރުގެއެވެ. އެމީހުންގެ ހިތުގައި ޖެއްސުމަކީ ދެދުނިޔޭގެ ބާއްޖަވެރިކަން ގެއްލިގެންދާނެ ކަމެކެވެ. އެހެންކަމުން، މައިންބަފައިންނަށް އިޙްތިރާމްކޮށް، އެމީހުންގެ ބަސްއަހައި، އެމީހުންނަށް ޚިދުމަތްކުރުމުގައި ދެމިތިބެމާ ހިނގާށެވެ. އޭރުން އެމީހުންގެ ދުޢާއާއެކު، ޤިޔާމަތްދުވަހު އެމީހުންގެ ބޮލުގައި އެ މަތިވެރި ރަންތާޖު އެޅުވުމުގެ ނަސީބު އަޅުގަނޑުމެންނަށް ލިބިގެންދާނެއެވެ.
