ބޮލީވުޑްގެ މަޝްހޫރު އެކްޓަރު އަކްޝޭ ކުމާރުގެ އުފަންދުވަހާ ދިމާކޮށް، އޭނާގެ އާ ފިލްމު ‘ބޫތު ބަންގްލާ’ އިޢުލާން ކުރުމާއެކު ފޭނުންގެ މެދުގައި ބޮޑު ފޯރިއެއް އުފެދިއްޖެއެވެ.
މި ފިލްމަކީ ގިނަ ދުވަސްތަކަކަށްފަހު އަކްޝޭ ކުމާރު އަދި ކާމިޔާބު ޑައިރެކްޓަރު ޕްރިޔަދަރްޝަން ގުޅިގެން އުފައްދާ ހޮރޯ-ކޮމެޑީ (ބިރުވެރި މަޖާ) ފިލްމެކެވެ. މި ދެ ފަންނާނުން ވަނީ މީގެ ކުރިން ‘ހޭރާ ފޭރީ’ އަދި ‘ބޫލް ބުލައްޔާ’ ފަދަ ކާމިޔާބު ފިލްމުތައް ބެލުންތެރިންނަށް ގެނެސްދީފައެވެ.
ފިލްމުގެ ފުރަތަމަ މޯޝަން ޕޯސްޓަރު ސޯޝަލް މީޑިއާގައި އާންމުކުރުމާއެކު، ގިނަ އަދަދެއްގެ ފޭނުން ދަނީ އެކަމަށް މަރުހަބާ ކިޔަމުންނެވެ. ފޭނުން ބުނާ ގޮތުގައި އަކްޝޭ އަދި ޕްރިޔަދަރްޝަންގެ ކޮމްބިނޭޝަނަކީ އަބަދުވެސް ތަފާތު މުނިފޫހިފިލުވުމެއް ލިބޭނެ ކަމުގެ ޔަގީންކަން އޮތް ކަމެކެވެ. އަދި މި ފިލްމުގެ ސަބަބުން އަކްޝޭގެ ކުރީގެ ރަން ދުވަސްތައް އަލުން އިއާދަވާނެ ކަމަށް ގިނަ ބަޔަކު އުންމީދު ކުރެއެވެ.
‘ބޫތު ބަންގްލާ’ އާންމުކޮށްފައިވަނީ އަކްޝޭގެ 57 ވަނަ އުފަންދުވަހުގެ ހަދިޔާއެއްގެ ގޮތުގައެވެ. މި ފިލްމު ރިލީޒް ކުރުމަށް ހަމަޖެހިފައިވަނީ 17 އޭޕްރީލް 2026 ގައެވެ.
މި ފިލްމުގެ ސަބަބުން ބޮލީވުޑްގެ ހޮރޯ-ކޮމެޑީ ޖޯންރާއަށް އިތުރު ފުރިހަމަކަމެއް އަންނާނެ ކަމަށް ފިލްމީ މާހިރުން ލަފާކުރެއެވެ. ފޭނުންގެ އެންމެ ބޮޑު އުފަލަކީ 14 އަހަރުގެ މެދުކެނޑުމަކަށްފަހު އަކްޝޭ އާއި ޕްރިޔަދަރްޝަން އެކުގައި މަސައްކަތް ކުރާތީއެވެ.
